૨. વિભત્તિસુત્તવણ્ણના

૧૭૨. દુતિયે અત્થપટિસમ્ભિદાતિ પઞ્ચસુ અત્થેસુ પભેદગતં ઞાણં. ઓધિસોતિ કારણસો. બ્યઞ્જનસોતિ અક્ખરસો. અનેકપરિયાયેનાતિ અનેકેહિ કારણેહિ. આચિક્ખામીતિ કથેમિ. દેસેમીતિ પાકટં કત્વા કથેમિ. પઞ્ઞાપેમીતિ જાનાપેમિ. પટ્ઠપેમીતિ પટ્ઠપેત્વા પવત્તેત્વા કથેમિ. વિવરામીતિ વિવટં કત્વા કથેમિ. વિભજામીતિ વિભજિત્વા કથેમિ. ઉત્તાનીકરોમીતિ ગમ્ભીરં ઉત્તાનકં કત્વા કથેમિ. સો મં પઞ્હેનાતિ સો મં પઞ્હેન ઉપગચ્છતુ. અહં વેય્યાકરણેનાતિ અહમસ્સ પઞ્હકથનેન ચિત્તં આરાધેસ્સામિ. યો નો ધમ્માનં સુકુસલોતિ યો અમ્હાકં અધિગતધમ્માનં સુકુસલો સત્થા, સો એસ સમ્મુખીભૂતો. યદિ મયા અત્થપટિસમ્ભિદા ન સચ્છિકતા, ‘‘સચ્છિકરોહિ તાવ સારિપુત્તા’’તિ વત્વા મં પટિબાહિસ્સતીતિ સત્થુ પુરતો નિસિન્નકોવ સીહનાદં નદતિ. ઇમિના ઉપાયેન સબ્બત્થ અત્થો વેદિતબ્બો. ઇમાસુ ચ પન પટિસમ્ભિદાસુ તિસ્સો પટિસમ્ભિદા લોકિયા, અત્થપટિસમ્ભિદા લોકિયલોકુત્તરાતિ.