૯. સસઙ્ખારસુત્તવણ્ણના

૧૬૯. નવમે પઠમદુતિયપુગ્ગલા સુક્ખવિપસ્સકા સસઙ્ખારેન સપ્પયોગેન સઙ્ખારનિમિત્તં ઉપટ્ઠપેન્તિ. તેસુ એકો વિપસ્સનિન્દ્રિયાનં બલવત્તા ઇધેવ કિલેસપરિનિબ્બાનેન પરિનિબ્બાયતિ, એકો ઇન્દ્રિયાનં દુબ્બલતાય ઇધ અસક્કોન્તો અનન્તરે અત્તભાવે તદેવ મૂલકમ્મટ્ઠાનં પટિલભિત્વા સસઙ્ખારેન સપ્પયોગેન સઙ્ખારનિમિત્તં ઉપટ્ઠપેત્વા કિલેસપરિનિબ્બાનેન પરિનિબ્બાયતિ, તતિયચતુત્થા સમથયાનિકા. તેસં એકો અસઙ્ખારેન અપ્પયોગેન ઇન્દ્રિયાનં બલવત્તા ઇધેવ કિલેસે ખેપેતિ, એકો ઇન્દ્રિયાનં દુબ્બલત્તા ઇધ અસક્કોન્તો અનન્તરે અત્તભાવે તદેવ મૂલકમ્મટ્ઠાનં પટિલભિત્વા અસઙ્ખારેન અપ્પયોગેન કિલેસે ખેપેતીતિ વેદિતબ્બો.