૧. કુસિનારસુત્તવણ્ણના

૧૨૪. તતિયસ્સ પઠમે કુસિનારાયન્તિ એવંનામકે નગરે. બલિહરણે વનસણ્ડેતિ એવંનામકે વનસણ્ડે. તત્થ કિર ભૂતબલિકરણત્થં બલિં હરન્તિ, તસ્મા બલિહરણન્તિ વુચ્ચતિ. આકઙ્ખમાનોતિ ઇચ્છમાનો. સહત્થાતિ સહત્થેન. સમ્પવારેતીતિ અલં અલન્તિ વાચાય ચેવ હત્થવિકારેન ચ પટિક્ખિપાપેતિ. સાધુ વત માયન્તિ સાધુ વત મં અયં. ગથિતોતિ તણ્હાગેધેન ગથિતો. મુચ્છિતોતિ તણ્હામુચ્છનાયયેવ મુચ્છિતો. અજ્ઝોપન્નોતિ તણ્હાય ગિલિત્વા પરિનિટ્ઠપેત્વા પવત્તો. અનિસ્સરણપઞ્ઞોતિ છન્દરાગં પહાય સંકડ્ઢિત્વા પરિભુઞ્જન્તો નિસ્સરણપઞ્ઞો નામ હોતિ, અયં ન તાદિસો, સચ્છન્દરાગો પરિભુઞ્જતીતિ અનિસ્સરણપઞ્ઞો. સુક્કપક્ખો વુત્તવિપરિયાયેન વેદિતબ્બો. નેક્ખમ્મવિતક્કાદયો પનેત્થ મિસ્સકા કથિતાતિ વેદિતબ્બા.