(૧૨) ૨. આપાયિકવગ્ગો

૧. આપાયિકસુત્તવણ્ણના

૧૧૪. દુતિયસ્સ પઠમે અપાયં ગચ્છિસ્સન્તીતિ આપાયિકા. નિરયં ગચ્છિસ્સન્તીતિ નેરયિકા. ઇદમપ્પહાયાતિ ઇદં બ્રહ્મચારિપટિઞ્ઞતાદિં પાપધમ્મત્તયં અવિજહિત્વા. બ્રહ્મચારિપટિઞ્ઞોતિ બ્રહ્મચારિપટિરૂપકો, તેસં વા આકપ્પં અવિજહનેન ‘‘અહમ્પિ બ્રહ્મચારી’’તિ એવંપટિઞ્ઞો. અનુદ્ધંસેતીતિ અક્કોસતિ પરિભાસતિ ચોદેતિ. નત્થિ કામેસુ દોસોતિ કિલેસકામેન વત્થુકામે સેવન્તસ્સ નત્થિ દોસો. પાતબ્યતન્તિ પિવિતબ્બતં પરિભુઞ્જિતબ્બતં નિરાસઙ્કેન ચિત્તેન પિપાસિતસ્સ પાનીયપિવનસદિસં પરિભુઞ્જિતબ્બતં. ઇમસ્મિં સુત્તે વટ્ટમેવ કથિતં.

૨. દુલ્લભસુત્તવણ્ણના

૧૧૫. દુતિયે કતઞ્ઞૂ કતવેદીતિ ‘‘ઇમિના મય્હં કત’’ન્તિ તેન કતકમ્મં ઞત્વા વિદિતં પાકટં કત્વા પટિકરણકપુગ્ગલો.

૩. અપ્પમેય્યસુત્તવણ્ણના

૧૧૬. તતિયે સુખેન મેતબ્બોતિ સુપ્પમેય્યો. દુક્ખેન મેતબ્બોતિ દુપ્પમેય્યો. પમેતું ન સક્કોતીતિ અપ્પમેય્યો. ઉન્નળોતિ ઉગ્ગતનળો, તુચ્છમાનં ઉક્ખિપિત્વા ઠિતોતિ અત્થો. ચપલોતિ પત્તમણ્ડનાદિના ચાપલ્લેન સમન્નાગતો. મુખરોતિ મુખખરો. વિકિણ્ણવાચોતિ અસઞ્ઞતવચનો. અસમાહિતોતિ ચિત્તેકગ્ગતારહિતો. વિબ્ભન્તચિત્તોતિ ભન્તચિત્તો ભન્તગાવિભન્તમિગસપ્પટિભાગો. પાકતિન્દ્રિયોતિ વિવટિન્દ્રિયો. સેસમેત્થ ઉત્તાનમેવાતિ.

૪. આનેઞ્જસુત્તવણ્ણના

૧૧૭. ચતુત્થે તદસ્સાદેતીતિ તં ઝાનં અસ્સાદેતિ. તં નિકામેતીતિ તદેવ પત્થેતિ. તેન ચ વિત્તિં આપજ્જતીતિ તેન ઝાનેન તુટ્ઠિં આપજ્જતિ. તત્ર ઠિતોતિ તસ્મિં ઝાને ઠિતો. તદધિમુત્તોતિ તત્થેવ અધિમુત્તો. તબ્બહુલવિહારીતિ તેન બહુલં વિહરન્તો. સહબ્યતં ઉપપજ્જતીતિ સહભાવં ઉપપજ્જતિ, તસ્મિં દેવલોકે નિબ્બત્તતીતિ અત્થો. નિરયમ્પિ ગચ્છતીતિઆદિ નિરયાદીહિ અવિપ્પમુત્તત્તા અપરપરિયાયવસેન તત્થ ગમનં સન્ધાય વુત્તં. ન હિ તસ્સ ઉપચારજ્ઝાનતો બલવતરં અકુસલં અત્થિ, યેન અનન્તરં અપાયે નિબ્બત્તેય્ય. ભગવતો પન સાવકોતિ સોતાપન્નસકદાગામિઅનાગામીનં અઞ્ઞતરો. તસ્મિંયેવ ભવેતિ તત્થેવ અરૂપભવે. પરિનિબ્બાયતીતિ અપ્પચ્ચયપરિનિબ્બાનેન પરિનિબ્બાયતિ. અધિપ્પયાસોતિ અધિકપ્પયોગો. સેસમેત્થ વુત્તનયેનેવ વેદિતબ્બં. ઇમસ્મિં પન સુત્તે પુથુજ્જનસ્સ ઉપપત્તિજ્ઝાનં કથિતં, અરિયસાવકસ્સ તદેવ ઉપપત્તિજ્ઝાનઞ્ચ વિપસ્સનાપાદકજ્ઝાનઞ્ચ કથિતં.

૫. વિપત્તિસમ્પદાસુત્તવણ્ણના

૧૧૮. પઞ્ચમે સીલવિપત્તીતિ સીલસ્સ વિપન્નાકારો. સેસદ્વયેપિ એસેવ નયો. નત્થિ દિન્નન્તિ દિન્નસ્સ ફલાભાવં સન્ધાય વદતિ. યિટ્ઠં વુચ્ચતિ મહાયોગો. હુતન્તિ પહેણકસક્કારો અધિપ્પેતો. તમ્પિ ઉભયં ફલાભાવમેવ સન્ધાય પટિક્ખિપતિ. સુકતદુક્કટાનન્તિ સુકતદુક્કતાનં, કુસલાકુસલાનન્તિ અત્થો. ફલં વિપાકોતિ યં ફલન્તિ વા વિપાકોતિ વા વુચ્ચતિ, તં નત્થીતિ વદતિ. નત્થિ અયં લોકોતિ પરલોકે ઠિતસ્સ અયં લોકો નત્થિ, નત્થિ પરો લોકોતિ ઇધ લોકે ઠિતસ્સાપિ પરલોકો નત્થિ, સબ્બે તત્થ તત્થેવ ઉચ્છિજ્જન્તીતિ દસ્સેતિ. નત્થિ માતા નત્થિ પિતાતિ તેસુ સમ્માપટિપત્તિમિચ્છાપટિપત્તીનં ફલાભાવવસેન વદતિ. નત્થિ સત્તા ઓપપાતિકાતિ ચવિત્વા ઉપ્પજ્જનકસત્તા નામ નત્થીતિ વદતિ. સમ્પદાતિ પારિપૂરિયો. સીલસમ્પદાતિ સીલસ્સ પરિપુણ્ણઅવેકલ્લભાવો. સેસદ્વયેપિ એસેવ નયો. અત્થિ દિન્નન્તિઆદિ વુત્તપટિપક્ખનયેન ગહેતબ્બં.

૬. અપણ્ણકસુત્તવણ્ણના

૧૧૯. છટ્ઠે અપણ્ણકો મણીતિ છહિ તલેહિ સમન્નાગતો પાસકો. સુગતિં સગ્ગન્તિ ચાતુમહારાજિકાદીસુ અઞ્ઞતરં સગ્ગં લોકં. ઇમસ્મિં સુત્તે સીલઞ્ચ સમ્માદિટ્ઠિ ચાતિ ઉભયમ્પિ મિસ્સકં કથિતં. સત્તમં ઉત્તાનમેવ.

૮. પઠમસોચેય્યસુત્તવણ્ણના

૧૨૧. અટ્ઠમે સોચેય્યાનીતિ સુચિભાવા. કાયસોચેય્યન્તિ કાયદ્વારે સુચિભાવો. સેસદ્વયેપિ એસેવ નયો. ઇમેસુ પન પટિપાટિયા ચતૂસુ સુત્તેસુ અગારિકપટિપદા કથિતા. સોતાપન્નસકદાગામીનમ્પિ વટ્ટતિ.

૯. દુતિયસોચેય્યસુત્તવણ્ણના

૧૨૨. નવમે અજ્ઝત્તન્તિ નિયકજ્ઝત્તં. કામચ્છન્દન્તિ કામચ્છન્દનીવરણં. બ્યાપાદાદીસુપિ એસેવ નયો. સેસમેત્થ હેટ્ઠા વુત્તનયમેવ. ગાથાય પન કાયસુચિન્તિ કાયદ્વારે સુચિં, કાયેન વા સુચિં. સેસદ્વયેપિ એસેવ નયો. નિન્હાતપાપકન્તિ સબ્બે પાપે નિન્હાપેત્વા ધોવિત્વા ઠિતં. ઇમિના સુત્તેનપિ ગાથાયપિ ખીણાસવોવ કથિતોતિ.

૧૦. મોનેય્યસુત્તવણ્ણના

૧૨૩. દસમે મોનેય્યાનીતિ મુનિભાવા. કાયમોનેય્યન્તિ કાયદ્વારે મુનિભાવો સાધુભાવો પણ્ડિતભાવો. સેસદ્વયેપિ એસેવ નયો. ઇદં વુચ્ચતિ, ભિક્ખવે, કાયમોનેય્યન્તિ ઇદં તિવિધકાયદુચ્ચરિતપ્પહાનં કાયમોનેય્યં નામ. અપિચ તિવિધં કાયસુચરિતમ્પિ કાયમોનેય્યં, તથા કાયારમ્મણં ઞાણં કાયમોનેય્યં, કાયપરિઞ્ઞા કાયમોનેય્યં, પરિઞ્ઞાસહગતો મગ્ગો કાયમોનેય્યં, કાયે છન્દરાગસ્સ પહાનં કાયમોનેય્યં, કાયસઙ્ખારનિરોધો ચતુત્થજ્ઝાનસમાપત્તિ કાયમોનેય્યં. વચીમોનેય્યેપિ એસેવ નયો.

અયં પનેત્થ વિસેસો – યથા ઇધ ચતુત્થજ્ઝાનસમાપત્તિ, એવં તત્થ વચીસઙ્ખારનિરોધો દુતિયજ્ઝાનસમાપત્તિ વચીમોનેય્યન્તિ વેદિતબ્બા. મનોમોનેય્યમ્પિ ઇમિનાવ નયેન અત્થં ઞત્વા ચિત્તસઙ્ખારનિરોધો સઞ્ઞાવેદયિતનિરોધસમાપત્તિ મનોમોનેય્યન્તિ વેદિતબ્બા. કાયમુનિન્તિ કાયદ્વારે મુનિં ઉત્તમં પરિસુદ્ધં, કાયેન વા મુનિં. સેસદ્વયેપિ એસેવ નયો. સબ્બપ્પહાયિનન્તિ ખીણાસવં. ખીણાસવો હિ સબ્બપ્પહાયી નામાતિ.

આપાયિકવગ્ગો દુતિયો.