૨. પવિવેકસુત્તવણ્ણના

૯૪. દુતિયે ચીવરપવિવેકન્તિ ચીવરં નિસ્સાય ઉપ્પજ્જનકકિલેસેહિ વિવિત્તભાવં. સેસદ્વયેપિ એસેવ નયો. સાણાનીતિ સાણવાકચેલાનિ. મસાણાનીતિ મિસ્સકચેલાનિ. છવદુસ્સાનીતિ મતસરીરતો છડ્ડિતવત્થાનિ, એરકતિણાદીનિ વા ગન્થેત્વા કતનિવાસનાનિ. પંસુકૂલાનીતિ પથવિયં છડ્ડિતનન્તકાનિ. તિરીટાનીતિ રુક્ખતચવત્થાનિ. અજિનાનીતિ અજિનમિગચમ્માનિ. અજિનક્ખિપન્તિ તદેવ મજ્ઝે ફાલિતં, સહખુરકન્તિપિ વદન્તિ. કુસચીરન્તિ કુસતિણાનિ ગન્થેત્વા કતચીરં. વાકચીરફલકચીરેસુપિ એસેવ નયો. કેસકમ્બલન્તિ મનુસ્સકેસેહિ કતકમ્બલં. વાલકમ્બલન્તિ અસ્સવાલાદીહિ કતકમ્બલં. ઉલૂકપક્ખિકન્તિ ઉલૂકપત્તાનિ ગન્થેત્વા કતનિવાસનં.

સાકભક્ખાતિ અલ્લસાકભક્ખા. સામાકભક્ખાતિ સામાકતણ્ડુલભક્ખા. નીવારાદીસુ નીવારા નામ અરઞ્ઞે સયં જાતવીહિજાતિ. દદ્દુલન્તિ ચમ્મકારેહિ ચમ્મં લિખિત્વા છડ્ડિતકસટં. હટં વુચ્ચતિ સિલેસોપિ સેવાલોપિ કણિકારાદિરુક્ખનિય્યાસોપિ. કણન્તિ કુણ્ડકં. આચામોતિ ભત્તઉક્ખલિકાય લગ્ગો ઝામઓદનો. તં છડ્ડિતટ્ઠાને ગહેત્વા ખાદન્તિ, ઓદનકઞ્જિયન્તિપિ વદન્તિ. પિઞ્ઞાકાદયો પાકટાવ. પવત્તફલભોજીતિ પતિતફલભોજી. ભુસાગારન્તિ ખલસાલં.

સીલવાતિ ચતુપારિસુદ્ધિસીલેન સમન્નાગતો. દુસ્સીલ્યઞ્ચસ્સ પહીનં હોતીતિ પઞ્ચ દુસ્સીલ્યાનિ પહીનાનિ હોન્તિ. સમ્માદિટ્ઠિકોતિ યાથાવદિટ્ઠિકો. મિચ્છાદિટ્ઠીતિ અયાથાવદિટ્ઠિ. આસવાતિ ચત્તારો આસવા. અગ્ગપ્પત્તોતિ સીલગ્ગપ્પત્તો. સારપ્પત્તોતિ સીલસારં પત્તો. સુદ્ધોતિ પરિસુદ્ધો. સારે પતિટ્ઠિતોતિ સીલસમાધિપઞ્ઞાસારે પતિટ્ઠિતો.

સેય્યથાપીતિ યથા નામ. સમ્પન્નન્તિ પરિપુણ્ણં પરિપક્કસાલિભરિતં. સઙ્ઘરાપેય્યાતિ સઙ્કડ્ઢાપેય્ય. ઉબ્બહાપેય્યાતિ ખલટ્ઠાનં આહરાપેય્ય. ભુસિકન્તિ ભુસં. કોટ્ટાપેય્યાતિ ઉદુક્ખલે પક્ખિપાપેત્વા મુસલેહિ પહરાપેય્ય. અગ્ગપ્પત્તાનીતિ તણ્ડુલગ્ગં પત્તાનિ. સારપ્પત્તાદીસુપિ એસેવ નયો. સેસં ઉત્તાનમેવ. યં પનેત્થ ‘‘દુસ્સીલ્યઞ્ચસ્સ પહીનં મિચ્છાદિટ્ઠિ ચસ્સ પહીના’’તિ વુત્તં, તં સોતાપત્તિમગ્ગેન પહીનભાવં સન્ધાય વુત્તન્તિ વેદિતબ્બં.