૧૦. પંસુધોવકસુત્તવણ્ણના

૧૦૨. દસમે ધોવતીતિ વિક્ખાલેતિ. સન્ધોવતીતિ સુટ્ઠુ ધોવતિ, પુનપ્પુનં ધોવતિ. નિદ્ધોવતીતિ નિગ્ગણ્હિત્વા ધોવતિ. અનિદ્ધન્તકસાવન્તિ અનીહતદોસં અનપનીતકસાવં. પભઙ્ગૂતિ પભિજ્જનસભાવં, અધિકરણીયં ઠપેત્વા મુટ્ઠિકાય પહટમત્તં ભિજ્જતિ. પટ્ટિકાયાતિ સુવણ્ણપટ્ટકાય. ગીવેય્યકેતિ ગીવાલઙ્કારે.

અધિચિત્તન્તિ સમથવિપસ્સનાચિત્તં. અનુયુત્તસ્સાતિ ભાવેન્તસ્સ. સચેતસોતિ ચિત્તસમ્પન્નો. દબ્બજાતિકોતિ પણ્ડિતજાતિકો. કામવિતક્કાદીસુ કામે આરબ્ભ ઉપ્પન્નો વિતક્કો કામવિતક્કો. બ્યાપાદવિહિંસસમ્પયુત્તા વિતક્કા બ્યાપાદવિહિંસવિતક્કા નામ. ઞાતિવિતક્કાદીસુ ‘‘અમ્હાકં ઞાતકા બહૂ પુઞ્ઞવન્તા’’તિઆદિના નયેન ઞાતકે આરબ્ભ ઉપ્પન્નો વિતક્કો ઞાતિવિતક્કો. ‘‘અસુકો જનપદો ખેમો સુભિક્ખો’’તિઆદિના નયેન જનપદમારબ્ભ ઉપ્પન્નો વિતક્કો જનપદવિતક્કો. ‘‘અહો વત મં પરે ન અવજાનેય્યુ’’ન્તિ એવં ઉપ્પન્નો વિતક્કો અનવઞ્ઞત્તિપટિસંયુત્તો વિતક્કો નામ. ધમ્મવિતક્કાવસિસ્સન્તીતિ ધમ્મવિતક્કા નામ દસવિપસ્સનુપક્કિલેસવિતક્કા. સો હોતિ સમાધિ ન ચેવ સન્તોતિ સો અવસિટ્ઠધમ્મવિતક્કો વિપસ્સનાસમાધિ અવૂપસન્તકિલેસત્તા સન્તો ન હોતિ. ન પણીતોતિ ન અતપ્પકો. નપ્પટિપ્પસ્સદ્ધિલદ્ધોતિ ન કિલેસપટિપ્પસ્સદ્ધિયા લદ્ધો. ન એકોદિભાવાધિગતોતિ ન એકગ્ગભાવપ્પત્તો. સસઙ્ખારનિગ્ગય્હવારિતગતોતિ સસઙ્ખારેન સપ્પયોગેન કિલેસે નિગ્ગણ્હિત્વા વારેત્વા વારિતો, ન કિલેસાનં છિન્નન્તે ઉપ્પન્નો, કિલેસે પન વારેત્વા ઉપ્પન્નો.

હોતિ સો, ભિક્ખવે, સમયોતિ એત્થ સમયો નામ ઉતુસપ્પાયં આહારસપ્પાયં સેનાસનસપ્પાયં પુગ્ગલસપ્પાયં ધમ્મસ્સવનસપ્પાયન્તિ ઇમેસં પઞ્ચન્નં સપ્પાયાનં પટિલાભકાલો. યં તં ચિત્તન્તિ યસ્મિં સમયે તં વિપસ્સનાચિત્તં. અજ્ઝત્તંયેવ સન્તિટ્ઠતીતિ અત્તનિયેવ તિટ્ઠતિ. નિયકજ્ઝત્તઞ્હિ ઇધ અજ્ઝત્તં નામ. ગોચરજ્ઝત્તમ્પિ વટ્ટતિ. પુથુત્તારમ્મણં પહાય એકસ્મિં નિબ્બાનગોચરેયેવ તિટ્ઠતીતિ વુત્તં હોતિ. સન્નિસીદતીતિ સુટ્ઠુ નિસીદતિ. એકોદિ હોતીતિ એકગ્ગં હોતિ. સમાધિયતીતિ સમ્મા આધિયતિ. સન્તોતિઆદીસુ પચ્ચનીકકિલેસવૂપસમેન સન્તો. અતપ્પકટ્ઠેન પણીતો. કિલેસપટિપ્પસ્સદ્ધિયા લદ્ધત્તા પટિપ્પસ્સદ્ધલદ્ધો. એકગ્ગભાવં ગતત્તા એકોદિભાવાધિગતો. કિલેસાનં છિન્નન્તે ઉપ્પન્નત્તા ન સપ્પયોગેન કિલેસે નિગ્ગણ્હિત્વા વારેત્વા વારિતોતિ ન સસઙ્ખારનિગ્ગય્હવારિતગતો. એત્તાવતા અયં ભિક્ખુ વિવટ્ટેત્વા અરહત્તં પત્તો નામ હોતિ.

ઇદાનિ ખીણાસવસ્સ સતો અભિઞ્ઞાપટિપદં દસ્સેન્તો યસ્સ યસ્સ ચાતિઆદિમાહ. તત્થ અભિઞ્ઞા સચ્છિકરણીયસ્સાતિ અભિજાનિત્વા પચ્ચક્ખં કાતબ્બસ્સ. સતિ સતિઆયતનેતિ પુબ્બહેતુસઙ્ખાતે ચેવ ઇદાનિ ચ પટિલદ્ધબ્બે અભિઞ્ઞાપાદકજ્ઝાનાદિભેદે ચ સતિ સતિકારણે. વિત્થારતો પન અયં અભિઞ્ઞાકથા વિસુદ્ધિમગ્ગે (વિસુદ્ધિ. ૨.૩૬૫ આદયો) વુત્તનયેનેવ વેદિતબ્બા. આસવાનં ખયાતિઆદિ ચેત્થ ફલસમાપત્તિવસેન વુત્તન્તિ વેદિતબ્બં.