૯. દિટ્ઠસુતાદિદસ્સનવારો

૧૦૩૬. પઞ્ચન્નં ખન્ધાનં કતિ દિટ્ઠા, કતિ સુતા, કતિ મુતા, કતિ વિઞ્ઞાતા, કતિ ન દિટ્ઠા ન સુતા ન મુતા ન વિઞ્ઞાતા…પે… સત્તન્નં ચિત્તાનં કતિ દિટ્ઠા, કતિ સુતા, કતિ મુતા, કતિ વિઞ્ઞાતા, કતિ ન દિટ્ઠા ન સુતા ન મુતા ન વિઞ્ઞાતા?

૧૦૩૭. રૂપક્ખન્ધો સિયા દિટ્ઠો, સિયા સુતો, સિયા મુતો, સિયા વિઞ્ઞાતો, સિયા ન દિટ્ઠો ન સુતો ન મુતો, વિઞ્ઞાતો. ચત્તારો ખન્ધા ન દિટ્ઠા ન સુતા ન મુતા, વિઞ્ઞાતા.

રૂપાયતનં દિટ્ઠં, ન સુતં ન મુતં, વિઞ્ઞાતં. સદ્દાયતનં ન દિટ્ઠં, સુતં, ન મુતં, વિઞ્ઞાતં. ગન્ધાયતનં… રસાયતનં… ફોટ્ઠબ્બાયતનં ન દિટ્ઠં ન સુતં, મુતં, વિઞ્ઞાતં. સત્તાયતના ન દિટ્ઠા ન સુતા ન મુતા, વિઞ્ઞાતા.

રૂપધાતુ દિટ્ઠા, ન સુતા ન મુતા, વિઞ્ઞાતા. સદ્દધાતુ ન દિટ્ઠા, સુતા, ન મુતા, વિઞ્ઞાતા. ગન્ધધાતુ… રસધાતુ… ફોટ્ઠબ્બધાતુ ન દિટ્ઠા ન સુતા, મુતા, વિઞ્ઞાતા. તેરસ ધાતુયો ન દિટ્ઠા ન સુતા ન મુતા, વિઞ્ઞાતા.

તીણિ સચ્ચાનિ ન દિટ્ઠા ન સુતા ન મુતા, વિઞ્ઞાતા. દુક્ખસચ્ચં સિયા દિટ્ઠં, સિયા સુતં, સિયા મુતં, સિયા વિઞ્ઞાતં, સિયા ન દિટ્ઠં ન સુતં ન મુતં, વિઞ્ઞાતં.

બાવીસતિન્દ્રિયા ન દિટ્ઠા ન સુતા ન મુતા, વિઞ્ઞાતા. નવ હેતૂ ન દિટ્ઠા ન સુતા ન મુતા, વિઞ્ઞાતા. ચત્તારો આહારા ન દિટ્ઠા ન સુતા ન મુતા, વિઞ્ઞાતા. સત્ત ફસ્સા ન દિટ્ઠા ન સુતા ન મુતા, વિઞ્ઞાતા. સત્ત વેદના… સત્ત સઞ્ઞા… સત્ત ચેતના… સત્ત ચિત્તા ન દિટ્ઠા ન સુતા ન મુતા, વિઞ્ઞાતા.