૮. સારમ્મણાનારમ્મણવારો

૧૦૩૨. પઞ્ચન્નં ખન્ધાનં કતિ સારમ્મણા, કતિ અનારમ્મણા…પે… સત્તન્નં ચિત્તાનં કતિ સારમ્મણા, કતિ અનારમ્મણા?

૧૦૩૩. રૂપક્ખન્ધો અનારમ્મણો. ચત્તારો ખન્ધા સારમ્મણા.

દસાયતના અનારમ્મણા. મનાયતનં સારમ્મણં. ધમ્માયતનં સિયા સારમ્મણં, સિયા અનારમ્મણં.

દસ ધાતુયો અનારમ્મણા. સત્ત ધાતુયો સારમ્મણા. ધમ્મધાતુ સિયા સારમ્મણા, સિયા અનારમ્મણા.

દ્વે સચ્ચા સારમ્મણા. નિરોધસચ્ચં અનારમ્મણં. દુક્ખસચ્ચં સિયા સારમ્મણં, સિયા અનારમ્મણં.

સત્તિન્દ્રિયા અનારમ્મણા. ચુદ્દસિન્દ્રિયા સારમ્મણા. જીવિતિન્દ્રિયં સિયા સારમ્મણં, સિયા અનારમ્મણં. નવ હેતૂ સારમ્મણા. કબળીકારો આહારો અનારમ્મણો. તયો આહારા સારમ્મણા. સત્ત ફસ્સા… સત્ત વેદના… સત્ત સઞ્ઞા… સત્ત ચેતના… સત્ત ચિત્તા સારમ્મણા.

૧૦૩૪. પઞ્ચન્નં ખન્ધાનં કતિ સારમ્મણારમ્મણા, કતિ અનારમ્મણારમ્મણા…પે… સત્તન્નં ચિત્તાનં કતિ સારમ્મણારમ્મણા, કતિ અનારમ્મણારમ્મણા?

૧૦૩૫. રૂપક્ખન્ધો અનારમ્મણો. ચત્તારો ખન્ધા સિયા સારમ્મણારમ્મણા, સિયા અનારમ્મણારમ્મણા.

દસાયતના અનારમ્મણા. મનાયતનં સિયા સારમ્મણારમ્મણં, સિયા અનારમ્મણારમ્મણં. ધમ્માયતનં સિયા સારમ્મણારમ્મણં, સિયા અનારમ્મણારમ્મણં, સિયા અનારમ્મણં.

દસ ધાતુયો અનારમ્મણા. છ ધાતુયો અનારમ્મણારમ્મણા. મનોવિઞ્ઞાણધાતુ સિયા સારમ્મણારમ્મણા, સિયા અનારમ્મણારમ્મણા. ધમ્મધાતુ સિયા સારમ્મણારમ્મણા, સિયા અનારમ્મણારમ્મણા, સિયા અનારમ્મણા.

નિરોધસચ્ચં અનારમ્મણં. મગ્ગસચ્ચં અનારમ્મણારમ્મણં. સમુદયસચ્ચં સિયા સારમ્મણારમ્મણં, સિયા અનારમ્મણારમ્મણં. દુક્ખસચ્ચં સિયા સારમ્મણારમ્મણં, સિયા અનારમ્મણારમ્મણં, સિયા અનારમ્મણં.

સત્તિન્દ્રિયા અનારમ્મણા. પઞ્ચિન્દ્રિયા અનારમ્મણારમ્મણા. નવિન્દ્રિયા સિયા સારમ્મણારમ્મણા, સિયા અનારમ્મણારમ્મણા. જીવિતિન્દ્રિયં સિયા સારમ્મણારમ્મણં, સિયા અનારમ્મણારમ્મણં, સિયા અનારમ્મણં.

નવ હેતૂ સિયા સારમ્મણારમ્મણા, સિયા અનારમ્મણારમ્મણા. કબળીકારો આહારો અનારમ્મણો. તયો આહારા સિયા સારમ્મણારમ્મણા, સિયા અનારમ્મણારમ્મણા. છ ફસ્સા અનારમ્મણારમ્મણા. મનોવિઞ્ઞાણધાતુસમ્ફસ્સો સિયા સારમ્મણારમ્મણો સિયા અનારમ્મણારમ્મણો. છ વેદના… છ સઞ્ઞા… છ ચેતના… છ ચિત્તા અનારમ્મણારમ્મણા. મનોવિઞ્ઞાણધાતુ સિયા સારમ્મણારમ્મણા, સિયા અનારમ્મણારમ્મણા.