૭. અભિઞ્ઞેય્યાદિવારો

૧૦૩૦. પઞ્ચન્નં ખન્ધાનં કતિ અભિઞ્ઞેય્યા, કતિ પરિઞ્ઞેય્યા, કતિ પહાતબ્બા, કતિ ભાવેતબ્બા, કતિ સચ્છિકાતબ્બા, કતિ ન પહાતબ્બા, ન ભાવેતબ્બા, ન સચ્છિકાતબ્બા…પે… સત્તન્નં ચિત્તાનં કતિ અભિઞ્ઞેય્યા, કતિ પરિઞ્ઞેય્યા, કતિ પહાતબ્બા, કતિ ભાવેતબ્બા, કતિ સચ્છિકાતબ્બા, કતિ ન પહાતબ્બા ન ભાવેતબ્બા ન સચ્છિકાતબ્બા?

૧૦૩૧. રૂપક્ખન્ધો અભિઞ્ઞેય્યો પરિઞ્ઞેય્યો ન પહાતબ્બો ન ભાવેતબ્બો ન સચ્છિકાતબ્બો. ચત્તારો ખન્ધા અભિઞ્ઞેય્યા પરિઞ્ઞેય્યા, સિયા પહાતબ્બા, સિયા ભાવેતબ્બા, સિયા સચ્છિકાતબ્બા, સિયા ન પહાતબ્બા ન ભાવેતબ્બા ન સચ્છિકાતબ્બા.

દસાયતના અભિઞ્ઞેય્યા પરિઞ્ઞેય્યા ન પહાતબ્બા ન ભાવેતબ્બા ન સચ્છિકાતબ્બા. દ્વે આયતના અભિઞ્ઞેય્યા પરિઞ્ઞેય્યા, સિયા પહાતબ્બા, સિયા ભાવેતબ્બા, સિયા સચ્છિકાતબ્બા, સિયા ન પહાતબ્બા ન ભાવેતબ્બા ન સચ્છિકાતબ્બા.

સોળસ ધાતુયો અભિઞ્ઞેય્યા પરિઞ્ઞેય્યા ન પહાતબ્બા ન ભાવેતબ્બા ન સચ્છિકાતબ્બા. દ્વે ધાતુયો અભિઞ્ઞેય્યા પરિઞ્ઞેય્યા, સિયા પહાતબ્બા, સિયા ભાવેતબ્બા, સિયા સચ્છિકાતબ્બા, સિયા ન પહાતબ્બા ન ભાવેતબ્બા ન સચ્છિકાતબ્બા.

સમુદયસચ્ચં અભિઞ્ઞેય્યં પરિઞ્ઞેય્યં પહાતબ્બં ન ભાવેતબ્બં ન સચ્છિકાતબ્બં. મગ્ગસચ્ચં અભિઞ્ઞેય્યં પરિઞ્ઞેય્યં ન પહાતબ્બં ભાવેતબ્બં ન સચ્છિકાતબ્બં. નિરોધસચ્ચં અભિઞ્ઞેય્યં પરિઞ્ઞેય્યં ન પહાતબ્બં ન ભાવેતબ્બં સચ્છિકાતબ્બં. દુક્ખસચ્ચં અભિઞ્ઞેય્યં પરિઞ્ઞેય્યં, સિયા પહાતબ્બં, ન ભાવેતબ્બં, ન સચ્છિકાતબ્બં, સિયા ન પહાતબ્બં.

નવિન્દ્રિયા અભિઞ્ઞેય્યા પરિઞ્ઞેય્યા ન પહાતબ્બા ન ભાવેતબ્બા ન સચ્છિકાતબ્બા. દોમનસ્સિન્દ્રિયં અભિઞ્ઞેય્યં પરિઞ્ઞેય્યં પહાતબ્બં ન ભાવેતબ્બં ન સચ્છિકાતબ્બં. અનઞ્ઞાતઞ્ઞસ્સામીતિન્દ્રિયં અભિઞ્ઞેય્યં પરિઞ્ઞેય્યં ન પહાતબ્બં ભાવેતબ્બં ન સચ્છિકાતબ્બં. અઞ્ઞિન્દ્રિયં અભિઞ્ઞેય્યં પરિઞ્ઞેય્યં ન પહાતબ્બં, સિયા ભાવેતબ્બં, સિયા સચ્છિકાતબ્બં. અઞ્ઞાતાવિન્દ્રિયં અભિઞ્ઞેય્યં પરિઞ્ઞેય્યં ન પહાતબ્બં ન ભાવેતબ્બં સચ્છિકાતબ્બં. તીણિન્દ્રિયા અભિઞ્ઞેય્યા પરિઞ્ઞેય્યા ન પહાતબ્બા, સિયા ભાવેતબ્બા, સિયા સચ્છિકાતબ્બા, સિયા ન ભાવેતબ્બા, સચ્છિકાતબ્બા. છ ઇન્દ્રિયા અભિઞ્ઞેય્યા પરિઞ્ઞેય્યા, સિયા પહાતબ્બા, સિયા ભાવેતબ્બા, સિયા સચ્છિકાતબ્બા, સિયા ન પહાતબ્બા ન ભાવેતબ્બા ન સચ્છિકાતબ્બા.

તયો અકુસલહેતૂ અભિઞ્ઞેય્યા પરિઞ્ઞેય્યા પહાતબ્બા ન ભાવેતબ્બા ન સચ્છિકાતબ્બા. તયો કુસલહેતૂ અભિઞ્ઞેય્યા પરિઞ્ઞેય્યા ન પહાતબ્બા, સિયા ભાવેતબ્બા, ન સચ્છિકાતબ્બા, સિયા ન ભાવેતબ્બા. તયો અબ્યાકતહેતૂ અભિઞ્ઞેય્યા પરિઞ્ઞેય્યા ન પહાતબ્બા ન ભાવેતબ્બા, સિયા સચ્છિકાતબ્બા, સિયા ન સચ્છિકાતબ્બા.

કબળીકારો આહારો અભિઞ્ઞેય્યો પરિઞ્ઞેય્યો ન પહાતબ્બો ન ભાવેતબ્બો ન સચ્છિકાતબ્બો. તયો આહારા અભિઞ્ઞેય્યા પરિઞ્ઞેય્યા, સિયા પહાતબ્બા, સિયા ભાવેતબ્બા, સિયા સચ્છિકાતબ્બા, સિયા ન પહાતબ્બા ન ભાવેતબ્બા ન સચ્છિકાતબ્બા.

છ ફસ્સા અભિઞ્ઞેય્યા પરિઞ્ઞેય્યા ન પહાતબ્બા ન ભાવેતબ્બા ન સચ્છિકાતબ્બા. મનોવિઞ્ઞાણધાતુસમ્ફસ્સો અભિઞ્ઞેય્યો પરિઞ્ઞેય્યો, સિયા પહાતબ્બો, સિયા ભાવેતબ્બો, સિયા સચ્છિકાતબ્બો, સિયા ન પહાતબ્બો ન ભાવેતબ્બો ન સચ્છિકાતબ્બો.

છ વેદના…પે… છ સઞ્ઞા… છ ચેતના… છ ચિત્તા અભિઞ્ઞેય્યા પરિઞ્ઞેય્યા ન પહાતબ્બા ન ભાવેતબ્બા ન સચ્છિકાતબ્બા. મનોવિઞ્ઞાણધાતુ અભિઞ્ઞેય્યા પરિઞ્ઞેય્યા, સિયા પહાતબ્બા, સિયા ભાવેતબ્બા, સિયા સચ્છિકાતબ્બા, સિયા ન પહાતબ્બા ન ભાવેતબ્બા ન સચ્છિકાતબ્બા.