(૨) લોકિયદુકં

૧૦૪૪. પઞ્ચન્નં ખન્ધાનં કતિ લોકિયા, કતિ લોકુત્તરા? દ્વાદસન્નં આયતનાનં કતિ લોકિયા, કતિ લોકુત્તરા? અટ્ઠારસન્નં ધાતૂનં કતિ લોકિયા, કતિ લોકુત્તરા? ચતુન્નં સચ્ચાનં કતિ લોકિયા, કતિ લોકુત્તરા…પે… સત્તન્નં ચિત્તાનં કતિ લોકિયા, કતિ લોકુત્તરા?

રૂપક્ખન્ધો લોકિયો. ચત્તારો ખન્ધા સિયા લોકિયા, સિયા લોકુત્તરા. દસાયતના લોકિયા. દ્વે આયતના સિયા લોકિયા, સિયા લોકુત્તરા. સોળસ ધાતુયો લોકિયા. દ્વે ધાતુયો સિયા લોકિયા, સિયા લોકુત્તરા. દ્વે સચ્ચા લોકિયા. દ્વે સચ્ચા લોકુત્તરા.

દસિન્દ્રિયા લોકિયા. તીણિન્દ્રિયા લોકુત્તરા. નવિન્દ્રિયા સિયા લોકિયા, સિયા લોકુત્તરા. તયો અકુસલહેતૂ લોકિયા. છ હેતૂ સિયા લોકિયા, સિયા લોકુત્તરા. કબળીકારો આહારો લોકિયો. તયો આહારા સિયા લોકિયા, સિયા લોકુત્તરા. છ ફસ્સા લોકિયા. મનોવિઞ્ઞાણધાતુસમ્ફસ્સો સિયા લોકિયો, સિયા લોકુત્તરો. છ વેદના લોકિયા. મનોવિઞ્ઞાણધાતુસમ્ફસ્સજા વેદના સિયા લોકિયા, સિયા લોકુત્તરા. છ સઞ્ઞા લોકિયા. મનોવિઞ્ઞાણધાતુસમ્ફસ્સજા સઞ્ઞા સિયા લોકિયા, સિયા લોકુત્તરા. છ ચેતના લોકિયા. મનોવિઞ્ઞાણધાતુસમ્ફસ્સજા ચેતના સિયા લોકિયા, સિયા લોકુત્તરા. છ ચિત્તા લોકિયા. મનોવિઞ્ઞાણધાતુ સિયા લોકિયા, સિયા લોકુત્તરાતિ.

અભિઞ્ઞા દ્વે સારમ્મણા, દિટ્ઠા કુસલવેદના;

વિપાકા ચ ઉપાદિન્ના, વિતક્કં રૂપલોકિયાતિ.

ધમ્મહદયવિભઙ્ગો નિટ્ઠિતો.

વિભઙ્ગપકરણં નિટ્ઠિતં.