૨. વેદનાતિકં

૧૦૩૯. પઞ્ચન્નં ખન્ધાનં કતિ સુખાય વેદનાય સમ્પયુત્તા, કતિ દુક્ખાય વેદનાય સમ્પયુત્તા, કતિ અદુક્ખમસુખાય વેદનાય સમ્પયુત્તા…પે… સત્તન્નં ચિત્તાનં કતિ સુખાય વેદનાય સમ્પયુત્તા, કતિ દુક્ખાય વેદનાય સમ્પયુત્તા, કતિ અદુક્ખમસુખાય વેદનાય સમ્પયુત્તા?

દ્વે ખન્ધા ન વત્તબ્બા સુખાય વેદનાય સમ્પયુત્તાતિપિ, દુક્ખાય વેદનાય સમ્પયુત્તાતિપિ, અદુક્ખમસુખાય વેદનાય સમ્પયુત્તાતિપિ. તયો ખન્ધા સિયા સુખાય વેદનાય સમ્પયુત્તા, સિયા દુક્ખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા.

દસાયતના ન વત્તબ્બા સુખાય વેદનાય સમ્પયુત્તાતિપિ, દુક્ખાય વેદનાય સમ્પયુત્તાતિપિ, અદુક્ખમસુખાય વેદનાય સમ્પયુત્તાતિપિ. મનાયતનં સિયા સુખાય વેદનાય સમ્પયુત્તં, સિયા દુક્ખાય વેદનાય સમ્પયુત્તં, સિયા અદુક્ખમસુખાય વેદનાય સમ્પયુત્તં. ધમ્માયતનં સિયા સુખાય વેદનાય સમ્પયુત્તં, સિયા દુક્ખાય વેદનાય સમ્પયુત્તં, સિયા અદુક્ખમસુખાય વેદનાય સમ્પયુત્તં, સિયા ન વત્તબ્બં સુખાય વેદનાય સમ્પયુત્તન્તિપિ, દુક્ખાય વેદનાય સમ્પયુત્તન્તિપિ, અદુક્ખમસુખાય વેદનાય સમ્પયુત્તન્તિપિ.

દસ ધાતુયો ન વત્તબ્બા સુખાય વેદનાય સમ્પયુત્તાતિપિ, દુક્ખાય વેદનાય સમ્પયુત્તાતિપિ, અદુક્ખમસુખાય વેદનાય સમ્પયુત્તાતિપિ. પઞ્ચ ધાતુયો અદુક્ખમસુખાય વેદનાય સમ્પયુત્તા, કાયવિઞ્ઞાણધાતુ સિયા સુખાય વેદનાય સમ્પયુત્તા, સિયા દુક્ખાય વેદનાય સમ્પયુત્તા. મનોવિઞ્ઞાણધાતુ સિયા સુખાય વેદનાય સમ્પયુત્તા, સિયા દુક્ખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા. ધમ્મધાતુ સિયા સુખાય વેદનાય સમ્પયુત્તા, સિયા દુક્ખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા, સિયા ન વત્તબ્બા સુખાય વેદનાય સમ્પયુત્તાતિપિ, દુક્ખાય વેદનાય સમ્પયુત્તાતિપિ, અદુક્ખમસુખાય વેદનાય સમ્પયુત્તાતિપિ.

દ્વે સચ્ચા સિયા સુખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા. નિરોધસચ્ચં ન વત્તબ્બં સુખાય વેદનાય સમ્પયુત્તન્તિપિ, દુક્ખાય વેદનાય સમ્પયુત્તન્તિપિ, અદુક્ખમસુખાય વેદનાય સમ્પયુત્તન્તિપિ. દુક્ખસચ્ચં સિયા સુખાય વેદનાય સમ્પયુત્તં, સિયા દુક્ખાય વેદનાય સમ્પયુત્તં, સિયા અદુક્ખમસુખાય વેદનાય સમ્પયુત્તં, સિયા ન વત્તબ્બં સુખાય વેદનાય સમ્પયુત્તન્તિપિ, દુક્ખાય વેદનાય સમ્પયુત્તન્તિપિ, અદુક્ખમસુખાય વેદનાય સમ્પયુત્તન્તિપિ.

દ્વાદસિન્દ્રિયા ન વત્તબ્બા સુખાય વેદનાય સમ્પયુત્તાતિપિ, દુક્ખાય વેદનાય સમ્પયુત્તાતિપિ, અદુક્ખમસુખાય વેદનાય સમ્પયુત્તાતિપિ. છ ઇન્દ્રિયા સિયા સુખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા. તીણિન્દ્રિયા સિયા સુખાય વેદનાય સમ્પયુત્તા, સિયા દુક્ખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા. જીવિતિન્દ્રિયં સિયા સુખાય વેદનાય સમ્પયુત્તં, સિયા દુક્ખાય વેદનાય સમ્પયુત્તં, સિયા અદુક્ખમસુખાય વેદનાય સમ્પયુત્તં, સિયા ન વત્તબ્બં સુખાય વેદનાય સમ્પયુત્તન્તિપિ, દુક્ખાય વેદનાય સમ્પયુત્તન્તિપિ, અદુક્ખમસુખાય વેદનાય સમ્પયુત્તન્તિપિ.

દોસો અકુસલહેતુ દુક્ખાય વેદનાય સમ્પયુત્તો. સત્ત હેતૂ સિયા સુખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા. મોહો અકુસલહેતુ સિયા સુખાય વેદનાય સમ્પયુત્તો, સિયા દુક્ખાય વેદનાય સમ્પયુત્તો, સિયા દુક્ખમસુખાય વેદનાય સમ્પયુત્તો.

કબળીકારો આહારો ન વત્તબ્બો સુખાય વેદનાય સમ્પયુત્તોતિ પિ, દુક્ખાય વેદનાય સમ્પયુત્તોતિપિ, અદુક્ખમસુખાય વેદનાય સમ્પયુત્તોતિપિ. તયો આહારા સિયા સુખાય વેદનાય સમ્પયુત્તા, સિયા દુક્ખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા.

પઞ્ચ ફસ્સા અદુક્ખમસુખાય વેદનાય સમ્પયુત્તા. કાયવિઞ્ઞાણધાતુસમ્ફસ્સો સિયા સુખાય વેદનાય સમ્પયુત્તો, સિયા દુક્ખાય વેદનાય સમ્પયુત્તો. મનોવિઞ્ઞાણધાતુસમ્ફસ્સો સિયા સુખાય વેદનાય સમ્પયુત્તો, સિયા દુક્ખાય વેદનાય સમ્પયુત્તો, સિયા અદુક્ખમસુખાય વેદનાય સમ્પયુત્તો.

સત્ત વેદના ન વત્તબ્બા સુખાય વેદનાય સમ્પયુત્તાતિપિ, દુક્ખાય વેદનાય સમ્પયુત્તાતિપિ, અદુક્ખમસુખાય વેદનાય સમ્પયુત્તાતિપિ. પઞ્ચ સઞ્ઞા… પઞ્ચ ચેતના… પઞ્ચ ચિત્તા અદુક્ખમસુખાય વેદનાય સમ્પયુત્તા, કાયવિઞ્ઞાણધાતુ સિયા સુખાય વેદનાય સમ્પયુત્તા, સિયા દુક્ખાય વેદનાય સમ્પયુત્તા. મનોવિઞ્ઞાણધાતુ સિયા સુખાય વેદનાય સમ્પયુત્તા, સિયા દુક્ખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા.