(૪) તિસ્સો અકુસલધાતુયો

૯૧૨. તત્થ કતમા તિસ્સો અકુસલધાતુયો? કામધાતુ, બ્યાપાદધાતુ, વિહિંસાધાતુ.

તત્થ કતમા કામધાતુ? કામવિતક્કો કામધાતુ. બ્યાપાદવિતક્કો બ્યાપાદધાતુ. વિહિંસાવિતક્કો વિહિંસાધાતુ.

(ક) તત્થ કતમો કામવિતક્કો? કામપટિસંયુત્તો તક્કો વિતક્કો મિચ્છાસઙ્કપ્પો – અયં વુચ્ચતિ ‘‘કામવિતક્કો’’.

(ખ) તત્થ કતમો બ્યાપાદવિતક્કો? બ્યાપાદપટિસંયુત્તો તક્કો વિતક્કો મિચ્છાસઙ્કપ્પો – અયં વુચ્ચતિ ‘‘બ્યાપાદવિતક્કો’’.

(ગ) તત્થ કતમો વિહિંસાવિતક્કો? વિહિંસાપટિસંયુત્તો તક્કો વિતક્કો મિચ્છાસઙ્કપ્પો – અયં વુચ્ચતિ ‘‘વિહિંસાવિતક્કો’’. ઇમા તિસ્સો અકુસલધાતુયો.