૧૦. દસકનિદ્દેસો

(૧) દસ કિલેસવત્થૂનિ

૯૬૬. તત્થ કતમાનિ દસ કિલેસવત્થૂનિ? લોભો, દોસો, મોહો, માનો, દિટ્ઠિ, વિચિકિચ્છા, થિનં, ઉદ્ધચ્ચં, અહિરિકં, અનોત્તપ્પં – ઇમાનિ દસ કિલેસવત્થૂનિ.

(૨) દસ આઘાતવત્થૂનિ

૯૬૭. તત્થ કતમાનિ દસ આઘાતવત્થૂનિ? ‘‘અનત્થં મે અચરી’’તિ આઘાતો જાયતિ, ‘‘અનત્થં મે ચરતી’’તિ આઘાતો જાયતિ, ‘‘અનત્થં મે ચરિસ્સતી’’તિ આઘાતો જાયતિ, ‘‘પિયસ્સ મે મનાપસ્સ અનત્થં અચરિ’’…પે… અનત્થં ચરતિ…પે… અનત્થં ચરિસ્સતીતિ આઘાતો જાયતિ, અપ્પિયસ્સ મે અમનાપસ્સ અત્થં અચરિ…પે… અત્થં ચરતિ…પે… અત્થં ચરિસ્સતીતિ આઘાતો જાયતિ, અટ્ઠાને વા પન આઘાતો જાયતિ – ઇમાનિ દસ આઘાતવત્થૂનિ.

(૩) દસ અકુસલકમ્મપથા

૯૬૮. તત્થ કતમે દસ અકુસલકમ્મપથા? પાણાતિપાતો, અદિન્નાદાનં, કામેસુમિચ્છાચારો, મુસાવાદો, પિસુણા વાચા, ફરુસા વાચા, સમ્ફપ્પલાપો, અભિજ્ઝા, બ્યાપાદો, મિચ્છાદિટ્ઠિ – ઇમે દસ અકુસલકમ્મપથા.

(૪) દસ સંયોજનાનિ

૯૬૯. તત્થ કતમાનિ દસ સંયોજનાનિ? કામરાગસંયોજનં, પટિઘસંયોજનં, માનસંયોજનં, દિટ્ઠિસંયોજનં, વિચિકિચ્છાસંયોજનં, સીલબ્બતપરામાસસંયોજનં, ભવરાગસંયોજનં, ઇસ્સાસંયોજનં, મચ્છરિયસંયોજનં, અવિજ્જાસંયોજનં – ઇમાનિ દસ સંયોજનાનિ.

(૫) દસ મિચ્છત્તા

૯૭૦. તત્થ કતમે દસ મિચ્છત્તા? મિચ્છાદિટ્ઠિ, મિચ્છાસઙ્કપ્પો, મિચ્છાવાચા, મિચ્છાકમ્મન્તો, મિચ્છાઆજીવો, મિચ્છાવાયામો, મિચ્છાસતિ, મિચ્છાસમાધિ, મિચ્છાઞાણં, મિચ્છાવિમુત્તિ – ઇમે દસ મિચ્છત્તા.

(૬) દસવત્થુકા મિચ્છાદિટ્ઠિ

૯૭૧. તત્થ કતમા દસવત્થુકા મિચ્છાદિટ્ઠિ? નત્થિ દિન્નં, નત્થિ યિટ્ઠં, નત્થિ હુતં, નત્થિ સુકતદુક્કટાનં કમ્માનં ફલં વિપાકો, નત્થિ અયં લોકો, નત્થિ પરો લોકો, નત્થિ માતા, નત્થિ પિતા, નત્થિ સત્તા ઓપપાતિકા, નત્થિ લોકે સમણબ્રાહ્મણા સમ્મગ્ગતા [સમગ્ગતા (ક.)] સમ્મા પટિપન્ના યે ઇમઞ્ચ લોકં પરઞ્ચ લોકં સયં અભિઞ્ઞા સચ્છિકત્વા પવેદેન્તીતિ – અયં દસવત્થુકા મિચ્છાદિટ્ઠિ.

(૭) દસવત્થુકા અન્તગ્ગાહિકા દિટ્ઠિ

૯૭૨. તત્થ કતમા દસવત્થુકા અન્તગ્ગાહિકા દિટ્ઠિ? સસ્સતો લોકોતિ વા, અસસ્સતો લોકોતિ વા, અન્તવા લોકોતિ વા, અનન્તવા લોકોતિ વા, તં જીવં તં સરીરન્તિ વા, અઞ્ઞં જીવં અઞ્ઞં સરીરન્તિ વા, હોતિ તથાગતો પરં મરણાતિ વા, ન હોતિ તથાગતો પરં મરણાતિ વા, હોતિ ચ ન ચ હોતિ તથાગતો પરં મરણાતિ વા, નેવ હોતિ ન ન હોતિ તથાગતો પરં મરણાતિ વા – અયં દસવત્થુકા અન્તગ્ગાહિકા દિટ્ઠિ.

દસકં.