૯. નવકનિદ્દેસો

(૧) નવ આઘાતવત્થૂનિ

૯૬૦. તત્થ કતમાનિ નવ આઘાતવત્થૂનિ? ‘‘અનત્થં મે અચરી’’તિ આઘાતો જાયતિ; ‘‘અનત્થં મે ચરતી’’તિ આઘાતો જાયતિ; ‘‘અનત્થં મે ચરિસ્સતી’’તિ આઘાતો જાયતિ; ‘‘પિયસ્સ મે મનાપસ્સ અનત્થં અચરિ’’…પે… અનત્થં ચરતિ…પે… અનત્થં ચરિસ્સતીતિ આઘાતો જાયતિ; અપ્પિયસ્સ મે અમનાપસ્સ અત્થં અચરિ…પે… અત્થં ચરતિ…પે… અત્થં ચરિસ્સતીતિ આઘાતો જાયતિ. ઇમાનિ નવ આઘાતવત્થૂનિ.

(૨) નવ પુરિસમલાનિ

૯૬૧. તત્થ કતમાનિ નવ પુરિસમલાનિ? કોધો, મક્ખો, ઇસ્સા, મચ્છરિયં, માયા, સાઠેય્યં, મુસાવાદો, પાપિચ્છતા, મિચ્છાદિટ્ઠિ – ઇમાનિ નવ પુરિસમલાનિ.

(૩) નવવિધા માના

૯૬૨. તત્થ કતમે નવવિધા માના? ‘‘સેય્યસ્સ સેય્યોહમસ્મી’’તિ માનો, ‘‘સેય્યસ્સ સદિસોહમસ્મી’’તિ માનો, ‘‘સેય્યસ્સ હીનોહમસ્મી’’તિ માનો, ‘‘સદિસસ્સ સેય્યોહમસ્મી’’તિ માનો, ‘‘સદિસસ્સ સદિસોહમસ્મી’’તિ માનો, ‘‘સદિસસ્સ હીનોહમસ્મી’’તિ માનો, ‘‘હીનસ્સ સેય્યોહમસ્મી’’તિ માનો, ‘‘હીનસ્સ સદિસોહમસ્મી’’તિ માનો, ‘‘હીનસ્સ હીનોહમસ્મી’’તિ માનો – ઇમે નવવિધા માના.

(૪) નવ તણ્હામૂલકા ધમ્મા

૯૬૩. તત્થ કતમે નવ તણ્હામૂલકા ધમ્મા? તણ્હં પટિચ્ચ પરિયેસના, પરિયેસનં પટિચ્ચ લાભો, લાભં પટિચ્ચ વિનિચ્છયો, વિનિચ્છયં પટિચ્ચ છન્દરાગો, છન્દરાગં પટિચ્ચ અજ્ઝોસાનં, અજ્ઝોસાનં પટિચ્ચ પરિગ્ગહો, પરિગ્ગહં પટિચ્ચ મચ્છરિયં, મચ્છરિયં પટિચ્ચ આરક્ખો, આરક્ખાધિકરણં દણ્ડાદાન-સત્થાદાન-કલહ-વિગ્ગહવિવાદ-તુવંતુવં-પેસુઞ્ઞ-મુસાવાદા અનેકે પાપકા અકુસલા ધમ્મા સમ્ભવન્તિ – ઇમે નવ તણ્હામૂલકા ધમ્મા.

(૫) નવ ઇઞ્જિતાનિ

૯૬૪. તત્થ કતમાનિ નવ ઇઞ્જિતાનિ? ‘‘અસ્મી’’તિ ઇઞ્જિતમેતં, ‘‘અહમસ્મી’’તિ ઇઞ્જિતમેતં, ‘‘અયમહમસ્મી’’તિ ઇઞ્જિતમેતં ‘‘ભવિસ્સ’’ન્તિ ઇઞ્જિતમેતં, ‘‘રૂપી ભવિસ્સ’’ન્તિ ઇઞ્જિતમેતં, ‘‘અરૂપી ભવિસ્સ’’ન્તિ ઇઞ્જિતમેતં, ‘‘સઞ્ઞી ભવિસ્સ’’ન્તિ ઇઞ્જિતમેતં, ‘‘અસઞ્ઞી ભવિસ્સ’’ન્તિ ઇઞ્જિતમેતં, ‘‘નેવસઞ્ઞીનાસઞ્ઞી ભવિસ્સ’’ન્તિ ઇઞ્જિતમેતં – ઇમાનિ નવ ઇઞ્જિતાનિ.

(૬-૯) નવ મઞ્ઞિતાદીનિ

૯૬૫. તત્થ કતમાનિ નવ મઞ્ઞિતાનિ… નવ ફન્દિતાનિ… નવ પપઞ્ચિતાનિ… નવ સઙ્ખતાનિ? ‘‘અસ્મી’’તિ સઙ્ખતમેતં, ‘‘અહમસ્મી’’તિ સઙ્ખતમેતં, ‘‘અયમહમસ્મી’’તિ સઙ્ખતમેતં, ‘‘ભવિસ્સ’’ન્તિ સઙ્ખતમેતં, ‘‘રૂપી ભવિસ્સ’’ન્તિ સઙ્ખતમેતં, ‘‘અરૂપી ભવિસ્સ’’ન્તિ સઙ્ખતમેતં, ‘‘સઞ્ઞી ભવિસ્સ’’ન્તિ સઙ્ખતમેતં, ‘‘અસઞ્ઞી ભવિસ્સ’’ન્તિ સઙ્ખતમેતં, ‘‘નેવસઞ્ઞીનાસઞ્ઞી ભવિસ્સ’’ન્તિ સઙ્ખતમેતં – ઇમાનિ નવ સઙ્ખતાનિ.

નવકં.