૭. ખલુપચ્છાભત્તિકઙ્ગકથાવણ્ણના

૩૦. ભુઞ્જન્તસ્સ યં ઉપનીતં, તસ્સ પટિક્ખેપેન તં અતિરિત્તં ભોજનન્તિ અતિરિત્તભોજનં. પુન ભોજનં કપ્પિયં કારેત્વા ન ભુઞ્જિતબ્બં, તબ્બિસયત્તા ઇમસ્સ ધુતઙ્ગસ્સ. તેનાહ ‘‘ઇદમસ્સ વિધાન’’ન્તિ. યસ્મિં ભોજનેતિ યસ્મિં ભુઞ્જિયમાને ભોજને. તદેવ ભુઞ્જતિ, ન અઞ્ઞં. અનતિરિત્તભોજનપચ્ચયા આપત્તિ અનતિરિત્તભોજનાપત્તિ, તતો દૂરીભાવો અનાપજ્જનં. ઓદરિકત્તં ઘસ્મરભાવો કુચ્છિપૂરકતા, તસ્સ અભાવો એકપિણ્ડેનાપિ યાપનતો. નિરામિસસન્નિધિતા નિહિતસ્સ અભુઞ્જનતો. પુન પરિયેસનવસેન પરિયેસનાય ખેદં ન યાતિ. અભિસલ્લેખકાનં સન્તોસગુણાદીનં વુદ્ધિયા સઞ્જનનં સન્તોસગુણાદિવુડ્ઢિસઞ્જનનં. ઇદન્તિ ખલુપચ્છાભત્તિકઙ્ગં.

ઇતિ ખલુપચ્છાભત્તિકઙ્ગકથાવણ્ણના.