૬. પત્તપિણ્ડિકઙ્ગકથાવણ્ણના

૨૯. અપ્પટિકૂલં કત્વા ભુઞ્જિતું વટ્ટતિ પટિકૂલસ્સ ભુત્તસ્સ અગણ્હનમ્પિ સિયાતિ અધિપ્પાયો. પમાણયુત્તમેવ ગણ્હિતબ્બન્તિ ‘‘એકભાજનમેવ ગણ્હામી’’તિ બહું ગહેત્વા ન છડ્ડેતબ્બં. નાનારસતણ્હાવિનોદનન્તિ નાનારસભોજને તણ્હાય વિનોદનં. અત્ર અત્ર નાનાભાજને ઠિતે નાનારસે ઇચ્છા એતસ્સાતિ અત્રિચ્છો, તસ્સ ભાવો અત્રિચ્છતા, તસ્સા અત્રિચ્છતાય પહાનં. આહારે પયોજનમત્તદસ્સિતાતિ અસમ્ભિન્નનાનારસે ગેધં અકત્વા આહારે સત્થારા અનુઞ્ઞાતપયોજનમત્તદસ્સિતા. વિસું વિસું ભાજનેસુ ઠિતાનિ બ્યઞ્જનાનિ ગણ્હતો તત્થ તત્થ સાભોગતાય સિયા વિક્ખિત્તભોજિતા, ન તથા ઇમસ્સ એકપત્તગતસઞ્ઞિનોતિ વુત્તં ‘‘અવિક્ખિત્તભોજિતા’’તિ. ઓક્ખિત્તલોચનોતિ પત્તસઞ્ઞિતાય હેટ્ઠાખિત્તચક્ખુ. પરિભુઞ્જેય્યાતિ પરિભુઞ્જિતું સક્કુણેય્ય.

ઇતિ પત્તપિણ્ડિકઙ્ગકથાવણ્ણના.