૫. એકાસનિકઙ્ગકથા

૨૮. એકાસનિકઙ્ગમ્પિ ‘‘નાનાસનભોજનં પટિક્ખિપામિ, એકાસનિકઙ્ગં સમાદિયામી’’તિ ઇમેસં અઞ્ઞતરવચનેન સમાદિન્નં હોતિ.

તેન પન એકાસનિકેન આસનસાલાયં નિસીદન્તેન થેરાસને અનિસીદિત્વા ‘‘ઇદં મય્હં પાપુણિસ્સતી’’તિ પતિરૂપં આસનં સલ્લક્ખેત્વા નિસીદિતબ્બં. સચસ્સ વિપ્પકતે ભોજને આચરિયો વા ઉપજ્ઝાયો વા આગચ્છતિ, ઉટ્ઠાય વત્તં કાતું વટ્ટતિ. તિપિટકચૂળાભયત્થેરો પનાહ ‘‘આસનં વા રક્ખેય્ય ભોજનં વા, અયઞ્ચ વિપ્પકતભોજનો, તસ્મા વત્તં કરોતુ, ભોજનં પન મા ભુઞ્જતૂ’’તિ. ઇદમસ્સ વિધાનં.

પભેદતો પન અયમ્પિ તિવિધો હોતિ. તત્થ ઉક્કટ્ઠો અપ્પં વા હોતુ બહુ વા, યમ્હિ ભોજને હત્થં ઓતારેતિ, તતો અઞ્ઞં ગણ્હિતું ન લભતિ. સચેપિ મનુસ્સા ‘‘થેરેન ન કિઞ્ચિ ભુત્ત’’ન્તિ સપ્પિઆદીનિ આહરન્તિ, ભેસજ્જત્થમેવ વટ્ટન્તિ, ન આહારત્થં. મજ્ઝિમો યાવ પત્તે ભત્તં ન ખીયતિ, તાવ અઞ્ઞં ગણ્હિતું લભતિ. અયઞ્હિ ભોજનપરિયન્તિકો નામ હોતિ. મુદુકો યાવ આસના ન વુટ્ઠાતિ તાવ ભુઞ્જિતું લભતિ. સો હિ ઉદકપરિયન્તિકો વા હોતિ યાવ પત્તધોવનં ન ગણ્હાતિ તાવ ભુઞ્જનતો, આસનપરિયન્તિકો વા યાવ ન વુટ્ઠાતિ તાવ ભુઞ્જનતો.

ઇમેસં પન તિણ્ણમ્પિ નાનાસનભોજનં ભુત્તક્ખણે ધુતઙ્ગં ભિજ્જતિ. અયમેત્થ ભેદો.

અયં પનાનિસંસો, અપ્પાબાધતા, અપ્પાતઙ્કતા, લહુટ્ઠાનં, બલં, ફાસુવિહારો, અનતિરિત્તપચ્ચયા અનાપત્તિ, રસતણ્હાવિનોદનં અપ્પિચ્છતાદીનં અનુલોમવુત્તિતાતિ.

એકાસનભોજને રતં,

ન યતિં ભોજનપચ્ચયા રુજા;

વિસહન્તિ રસે અલોલુપો,

પરિહાપેતિ ન કમ્મમત્તનો.

ઇતિ ફાસુવિહારકારણે,

સુચિસલ્લેખરતૂપસેવિતે;

જનયેથ વિસુદ્ધમાનસો,

રતિમેકાસનભોજને યતીતિ.

અયં એકાસનિકઙ્ગે સમાદાનવિધાનપ્પભેદભેદાનિસંસવણ્ણના.