૬. પત્તપિણ્ડિકઙ્ગકથા

૨૯. પત્તપિણ્ડિકઙ્ગમ્પિ ‘‘દુતિયકભાજનં પટિક્ખિપામિ, પત્તપિણ્ડિકઙ્ગં સમાદિયામી’’તિ ઇમેસં અઞ્ઞતરવચનેન સમાદિન્નં હોતિ.

તેન પન પત્તપિણ્ડિકેન યાગુપાનકાલે ભાજને ઠપેત્વા બ્યઞ્જને લદ્ધે બ્યઞ્જનં વા પઠમં ખાદિતબ્બં, યાગુ વા પાતબ્બા. સચે પન યાગુયં પક્ખિપતિ, પૂતિમચ્છકાદિમ્હિ બ્યઞ્જને પક્ખિત્તે યાગુ પટિકૂલા હોતિ, અપ્પટિકૂલમેવ ચ કત્વા ભુઞ્જિતું વટ્ટતિ. તસ્મા તથારૂપં બ્યઞ્જનં સન્ધાય ઇદં વુત્તં. યં પન મધુસક્કરાદિકં અપ્પટિકૂલં હોતિ, તં પક્ખિપિતબ્બં. ગણ્હન્તેન ચ પમાણયુત્તમેવ ગણ્હિતબ્બં. આમકસાકં હત્થેન ગહેત્વા ખાદિતું વટ્ટતિ. તથા પન અકત્વા પત્તેયેવ પક્ખિપિતબ્બં. દુતિયકભાજનસ્સ પન પટિક્ખિત્તત્તા અઞ્ઞં રુક્ખપણ્ણમ્પિ ન વટ્ટતીતિ ઇદમસ્સ વિધાનં.

પભેદતો પન અયમ્પિ તિવિધો હોતિ. તત્થ ઉક્કટ્ઠસ્સ અઞ્ઞત્ર ઉચ્છુખાદનકાલા કચવરમ્પિ છડ્ડેતું ન વટ્ટતિ. ઓદનપિણ્ડમચ્છમંસપૂવેપિ ભિન્દિત્વા ખાદિતું ન વટ્ટતિ. મજ્ઝિમસ્સ એકેન હત્થેન ભિન્દિત્વા ખાદિતું વટ્ટતિ, હત્થયોગી નામેસ. મુદુકો પન પત્તયોગી નામ હોતિ, તસ્સ યં સક્કા હોતિ પત્તે પક્ખિપિતું, તં સબ્બં હત્થેન વા દન્તેહિ વા ભિન્દિત્વા ખાદિતું વટ્ટતિ.

ઇમેસં પન તિણ્ણમ્પિ દુતિયકભાજનં સાદિતક્ખણે ધુતઙ્ગં ભિજ્જતિ. અયમેત્થ ભેદો.

અયં પનાનિસંસો, નાનારસતણ્હાવિનોદનં. અત્રિચ્છતાય પહાનં, આહારે પયોજનમત્તદસ્સિતા, થાલકાદિપરિહરણખેદાભાવો, અવિક્ખિત્તભોજિતા, અપ્પિચ્છતાદીનં અનુલોમવુત્તિતાતિ.

નાનાભાજનવિક્ખેપં, હિત્વા ઓક્ખિત્તલોચનો;

ખણન્તો વિય મૂલાનિ, રસતણ્હાય સુબ્બતો.

સરૂપં વિય સન્તુટ્ઠિં, ધારયન્તો સુમાનસો;

પરિભુઞ્જેય્ય આહારં, કો અઞ્ઞો પત્તપિણ્ડિકોતિ.

અયં પત્તપિણ્ડિકઙ્ગે સમાદાનવિધાનપ્પભેદભેદાનિસંસવણ્ણના.