૨. તેચીવરિકઙ્ગકથા

૨૫. તદનન્તરં પન તેચીવરિકઙ્ગં ‘‘ચતુત્થકચીવરં પટિક્ખિપામિ, તેચીવરિકઙ્ગં સમાદિયામી’’તિ ઇમેસં અઞ્ઞતરવચનેન સમાદિન્નં હોતિ.

તેન પન તેચીવરિકેન ચીવરદુસ્સં લભિત્વા યાવ અફાસુકભાવેન કાતું વા ન સક્કોતિ, વિચારકં વા ન લભતિ, સૂચિઆદીસુ વાસ્સ કિઞ્ચિ ન સમ્પજ્જતિ, તાવ નિક્ખિપિતબ્બં. નિક્ખિત્તપચ્ચયા દોસો નત્થિ. રજિતકાલતો પન પટ્ઠાય નિક્ખિપિતું ન વટ્ટતિ, ધુતઙ્ગચોરો નામ હોતિ. ઇદમસ્સ વિધાનં.

પભેદતો પન અયમ્પિ તિવિધો હોતિ. તત્થ ઉક્કટ્ઠેન રજનકાલે પઠમં અન્તરવાસકં વા ઉત્તરાસઙ્ગં વા રજિત્વા તં નિવાસેત્વા ઇતરં રજિતબ્બં. તં પારુપિત્વા સઙ્ઘાટિ રજિતબ્બા. સઙ્ઘાટિં પન નિવાસેતું ન વટ્ટતિ. ઇદમસ્સ ગામન્તસેનાસને વત્તં. આરઞ્ઞકે પન દ્વે એકતો ધોવિત્વા રજિતું વટ્ટતિ. યથા પન કઞ્ચિ દિસ્વા સક્કોતિ કાસાવં આકડ્ઢિત્વા ઉપરિકાતું, એવં આસન્ને ઠાને નિસીદિતબ્બં. મજ્ઝિમસ્સ રજનસાલાયં રજનકાસાવં નામ હોતિ, તં નિવાસેત્વા વા પારુપિત્વા વા રજનકમ્મં કાતું વટ્ટતિ. મુદુકસ્સ સભાગભિક્ખૂનં ચીવરાનિ નિવાસેત્વા વા પારુપિત્વા વા રજનકમ્મં કાતું વટ્ટતિ. તત્રટ્ઠકપચ્ચત્થરણમ્પિ તસ્સ વટ્ટતિ. પરિહરિતું પન ન વટ્ટતિ. સભાગભિક્ખૂનં ચીવરમ્પિ અન્તરન્તરા પરિભુઞ્જિતું વટ્ટતિ. ધુતઙ્ગતેચીવરિકસ્સ પન ચતુત્થં વત્તમાનં અંસકાસાવમેવ વટ્ટતિ. તઞ્ચ ખો વિત્થારતો વિદત્થિ, દીઘતો તિહત્થમેવ વટ્ટતિ.

ઇમેસં પન તિણ્ણમ્પિ ચતુત્થકચીવરં સાદિતક્ખણેયેવ ધુતઙ્ગં ભિજ્જતિ. અયમેત્થ ભેદો.

અયં પનાનિસંસો, તેચીવરિકો ભિક્ખુ સન્તુટ્ઠો હોતિ કાયપરિહારિકેન ચીવરેન. તેનસ્સ પક્ખિનો વિય સમાદાયેવ ગમનં, અપ્પસમારમ્ભતા, વત્થસન્નિધિપરિવજ્જનં, સલ્લહુકવુત્તિતા, અતિરેકચીવરલોલુપ્પપ્પહાનં, કપ્પિયે મત્તકારિતાય સલ્લેખવુત્તિતા, અપ્પિચ્છતાદીનં ફલનિપ્ફત્તીતિ એવમાદયો ગુણા સમ્પજ્જન્તીતિ.

અતિરેકવત્થતણ્હં, પહાય સન્નિધિવિવજ્જિતો ધીરો;

સન્તોસસુખરસઞ્ઞૂ, તિચીવરધરો ભવતિ યોગી.

તસ્મા સપત્તચરણો, પક્ખીવ સચીવરોવ યોગિવરો;

સુખમનુવિચરિતુકામો, ચીવરનિયમે રતિં કયિરાતિ.

અયં તેચીવરિકઙ્ગે સમાદાનવિધાનપ્પભેદભેદાનિસંસવણ્ણના.