૧૦. અબ્ભોકાસિકઙ્ગકથા

૩૩. અબ્ભોકાસિકઙ્ગમ્પિ ‘‘છન્નઞ્ચ રુક્ખમૂલઞ્ચ પટિક્ખિપામિ, અબ્ભોકાસિકઙ્ગં સમાદિયામી’’તિ ઇમેસં અઞ્ઞતરવચનેન સમાદિન્નં હોતિ.

તસ્સ પન અબ્ભોકાસિકસ્સ ધમ્મસ્સવનાય વા ઉપોસથત્થાય વા ઉપોસથાગારં પવિસિતું વટ્ટતિ. સચે પવિટ્ઠસ્સ દેવો વસ્સતિ, દેવે વસ્સમાને અનિક્ખમિત્વા વસ્સૂપરમે નિક્ખમિતબ્બં. ભોજનસાલં વા અગ્ગિસાલં વા પવિસિત્વા વત્તં કાતું, ભોજનસાલાય થેરે ભિક્ખૂ ભત્તેન આપુચ્છિતું, ઉદ્દિસન્તેન વા ઉદ્દિસાપેન્તેન વા છન્નં પવિસિતું, બહિ દુન્નિક્ખિત્તાનિ મઞ્ચપીઠાદીનિ અન્તો પવેસેતુઞ્ચ વટ્ટતિ. સચે મગ્ગં ગચ્છન્તેન વુડ્ઢતરાનં પરિક્ખારો ગહિતો હોતિ, દેવે વસ્સન્તે મગ્ગમજ્ઝે ઠિતં સાલં પવિસિતું વટ્ટતિ. સચે ન કિઞ્ચિ ગહિતં હોતિ, સાલાય ઠસ્સામીતિ વેગેન ગન્તું ન વટ્ટતિ. પકતિગતિયા ગન્ત્વા પવિટ્ઠેન પન યાવ વસ્સૂપરમા ઠત્વા ગન્તબ્બન્તિ ઇદમસ્સ વિધાનં. રુક્ખમૂલિકસ્સાપિ એસેવ નયો.

પભેદતો પન અયમ્પિ તિવિધો હોતિ. તત્થ ઉક્કટ્ઠસ્સ રુક્ખં વા પબ્બતં વા ગેહં વા ઉપનિસ્સાય વસિતું ન વટ્ટતિ. અબ્ભોકાસેયેવ ચીવરકુટિં કત્વા વસિતબ્બં. મજ્ઝિમસ્સ રુક્ખપબ્બતગેહાનિ ઉપનિસ્સાય અન્તો અપ્પવિસિત્વા વસિતું વટ્ટતિ. મુદુકસ્સ અચ્છન્નમરિયાદં પબ્ભારમ્પિ સાખામણ્ડપોપિ પીઠપટોપિ ખેત્તરક્ખકાદીહિ છડ્ડિતા તત્રટ્ઠકકુટિકાપિ વટ્ટતીતિ.

ઇમેસં પન તિણ્ણમ્પિ વાસત્થાય છન્નં વા રુક્ખમૂલં વા પવિટ્ઠક્ખણે ધુતઙ્ગં ભિજ્જતિ. જાનિત્વા તત્થ અરુણં ઉટ્ઠાપિતમત્તેતિ અઙ્ગુત્તરભાણકા. અયમેત્થ ભેદો.

અયં પનાનિસંસો, આવાસપલિબોધુપચ્છેદો, થિનમિદ્ધપનૂદનં, ‘‘મિગા વિય અસઙ્ગચારિનો, અનિકેતા વિહરન્તિ ભિક્ખવો’’તિ (સં. નિ. ૧.૨૨૪) પસંસાય અનુરૂપતા, નિસ્સઙ્ગતા, ચાતુદ્દિસતા, અપ્પિચ્છતાદીનં અનુલોમવુત્તિતાતિ.

અનગારિયભાવસ્સ, અનુરૂપે અદુલ્લભે;

તારામણિવિતાનમ્હિ, ચન્દદીપપ્પભાસિતે.

અબ્ભોકાસે વસં ભિક્ખુ, મિગભૂતેન ચેતસા;

થિનમિદ્ધં વિનોદેત્વા, ભાવનારામતં સિતો.

પવિવેકરસસ્સાદં, નચિરસ્સેવ વિન્દતિ;

યસ્મા તસ્મા હિ સપ્પઞ્ઞો, અબ્ભોકાસરતો સિયાતિ.

અયં અબ્ભોકાસિકઙ્ગે સમાદાનવિધાનપ્પભેદભેદાનિસંસવણ્ણના.