૭. સઙ્ઘતેદકક્ખન્ધક

પુચ્છા – કથં આવુસો છન્નં સક્યકુમારાનં સહ ઉપાલિકપ્પકેન પબ્બજ્જા અહોસિ, કથઞ્ચ નેસં વિસેસો ઉદપાદિ.

વિસ્સજ્જના – ભગવા ભન્તે ઉપાલિં કપ્પકં પઠમં પબ્બાજેસિ, પચ્છા તે સક્યકુમારે, અથ ભન્તે આયસ્મા ભદ્દિયો તેનેવ અન્તરવસ્સેન તિસ્સો વિજ્જા સચ્છાકાસિ, આયસ્મા અનુરુદ્ધો દિબ્બચક્ખું ઉપ્પાદેસિ, આયસ્મા આનન્દો સોતાપત્તિફલં સચ્છાકાસિ, દેવદત્તો પોથુજ્જનિકં ઇદ્ધિં અભિનિપ્ફાદેસિ. એવં ખો ભન્તે છન્નં સક્યકુમારાનં ઉપાલિકપ્પકેન સહ પબ્બજ્જા અહોસિ, એવઞ્ચ પન ભન્તે તેસં વિસેસાધિગમો અહોસિ.

પકાસનીય

પુચ્છા – પકાસનીયકમ્મં આવુસો કાતું ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે દેવદત્તં આરબ્ભ પઞ્ઞત્તં, દેવદત્તો ભન્તે ‘‘સરાજિકાય મં ભગવા પરિસાય ખેળાસકવાદેન અપસાદેતિ, સારિપુત્તમોગ્ગલ્લાનેવ ઉક્કંસતી’’તિ કુપિતો અનત્તમનો ભગવતિ આઘાતં બન્ધિ, તસ્મિં ભન્તે વત્થુસ્મિં પઞ્ઞત્તં.

પકાસનીય

પુચ્છા – દેવદત્તસ્સ આવુસો પકાસનીયકમ્મં કારાપેત્વા કથં ભગવા પકાસેતું આણાપેસિ.

વિસ્સજ્જના – ભગવા ભન્તે દેવદત્તસ્સ પકાસનીયકમ્મં કાતું પઞ્ઞપેત્વા આયસ્મન્તં સારિપુત્તં આમન્તેસિ ‘‘તેન હિ ત્વં સારિપુત્ત દેવદત્તં રાજગહે પકાસેહી’’તિ, એવં ખો ભન્તે દેવદત્તસ્સ પકાસનીયકમ્મં કત્વા દેવદત્તં રાજગહે પકાસેતું ભગવા આણાપેસિ.

દેવદત્ત

પુચ્છા – કથં આવુસો દેવદત્તેન દુટ્ઠચિત્તેન વધકચિત્તેન તથા ગતસ્સ રુહિરં ઉપ્પાદેત્વા પઠમં આનન્તરિયં કમ્મં ઉપચિતં.

વિસ્સજ્જના – ભગવા ભન્તે ગિજ્ઝકૂટસ્સ પબ્બતસ્સ છાયાયં ચઙ્કમિ, અથ ભન્તે દેવદત્તો ગિજ્ઝકૂટં પબ્બતં આરુહિત્વા મહતિં સિલં પવિજ્ઝિ ‘‘ઇમાય સમણં ગોતમં જીવિતા વોરોપેસ્સામી’’તિ, અથ ખો ભન્તે દ્વે પબ્બતકૂટાનિ સમાગન્ત્વા તં સિલં સમ્પટિચ્છિંસુ, તતો પપતિકા ઉપ્પતિત્વા ભગવતો પાદે રુહિરં ઉપ્પાદેસિ. એવં ખો ભન્તે દેવદત્તેન દુટ્ઠેન વધકચિત્તેન તથાગતસ્સ રુહિરં ઉપ્પાદેત્વા પઠમં આનન્તરિયકમ્મં ઉપચિતં.

પુચ્છા – કુલેસુ આવુસો તિકભોજનં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે દેવદત્તં આરબ્ભ પઞ્ઞત્તં, દેવદત્તો ભન્તે પરિહીનલાભસક્કારો સપરિસો કુલેસુ વિઞ્ઞાપેત્વા વિઞ્ઞાપેત્વા ભુઞ્જિ, તસ્મિં ભન્તે વત્થુસ્મિં પઞ્ઞત્તં.

પુચ્છા – અલં દેવદત્ત, મા તે રુચ્ચિ સઙ્ઘભેદો, ગરુકો ખો દેવદત્ત સઙ્ઘભેદોતિઆદિકો આવુસો ઓવાદો ભગવતા કત્થ દિન્નો, કિસ્મિં વત્થુસ્મિં દિન્નો.

વિસ્સજ્જના – રાજગહે ભન્તે દેવદત્તં આરબ્ભ દિન્નો, દેવદત્તો ભન્તે સઙ્ઘભેદાય પરક્કમિ ચક્કભેદાય, તસ્મિં ભન્તે વત્થુસ્મિં દિન્નો.

અલં દેવદત્ત, મા તે રુચ્ચિ સઙ્ઘભેદો, ગરુકો ખો દેવદત્ત સઙ્ઘભેદો –

પુચ્છા – ‘‘સુકરં સાધુના સાધું, સાધું પાપેન દુક્કરં. પાપં પાપેન સુકરં, પાપમરિયેહિ દુક્કર’’ન્તિ- આવુસો ઇદં ઉદાનં ભગવતા કત્થ ઉદાનિતં, કં આરબ્ભ કિસ્મિં વત્થુસ્મિં ઉદાનિતં.

વિસ્સજ્જના – રાજગહે ભન્તે દેવદત્તંયેવ આરબ્ભ ઉદાનિતં, આયસ્મા ભન્તે આનન્દો પુબ્બણ્હસમયં નિવાસેત્વા પત્તચીવરમાદાય રાજગહં પિણ્ડાય પાવિસિ, અથ ખો ભન્તે દેવદત્તો યેનાયસ્મા આનન્દો તેનુપસઙ્કમિ, ઉપસઙ્કમિત્વા આયસ્મન્તં આનન્દં એતદવોચ ‘‘અજ્જતગ્ગે દાનાહં આવુસો આનન્દ અઞ્ઞત્રેવ ભગવતા અઞ્ઞત્રેવ ભિક્ખુસઙ્ઘા ઉપોસથં કરિસ્સામિ સઙ્ઘકમ્મં કરિસ્સામી’’તિ, તસ્મિં ભન્તે વત્થુસ્મિં ઉદાનિતં.

સુકરં સાધુના સાધું, સાધું પાપેન દુક્કરં;

પાપં પાપેન સુકરં, પાપમરિયેહિ દુક્કરં.

પુચ્છા – ભેદાનુવત્તકાનં આવુસો ભિક્ખૂનં થુલ્લચ્ચયં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ પઞ્ઞત્તં, આયસ્મા ભન્તે સારિપુત્તો ભગવન્તં ઉપસઙ્કમિત્વા એતદવોચ ‘‘સાધુ ભન્તે ભેદાનુવત્તકા ભિક્ખૂ પુન ઉપસમ્પજ્જેય્યુ’’ન્તિ, તસ્મિં ભન્તે વત્થુસ્મિં પઞ્ઞત્તં.

‘‘સાધુ ભન્તે ભેદાનુવત્તકા ભિક્ખૂ પુન ઉપસમ્પજ્જેય્યુ’’ન્તિ –

પુચ્છા – કિત્તાવતા નુ ખો આવુસો સઙ્ઘરાજિ હોતિ નો ચ સઙ્ઘભેદો, કિત્તાવતા ચ પન સઙ્ઘરાજિ ચેવ હોતિ સઙ્ઘભેદો ચ.

વિસ્સજ્જના – એકતો ભન્તે એકો હોતિ, એકતો દ્વે ચતુત્થો અનુસ્સાવેતિ, સલાકં ગાહેતિ ‘‘અયં ધમ્મો અયં વિનયો ઇદં સત્થુસાસનં ઇમં ગણ્હથ ઇમં રોચેથાતિ’’, એતેનેવ ભન્તે નયેન ચતુન્નં વા પઞ્ચન્નં વા છન્નં વા સત્તન્નં વા અટ્ઠન્નં વા સઙ્ઘરાજિ હોતિ, નો ચ સઙ્ઘભેદો, એકતો ભન્તે ચત્તારો હોન્તિ, એકતો ચત્તારો, નવમો અનુસ્સાવેતિ, સલાકં ગાહેતિ ‘‘અયં ધમ્મો અયં વિનયો ઇદં સત્થુસાસનં ઇમં ગણ્હથ ઇમં રોચેથા’’તિ, એવં ખો ભન્તે સઙ્ઘરાજિ ચેવ હોતિ સઙ્ઘભેદો ચ. એવં ખો ભન્તે સઙ્ઘરાજિ હોતિ, નો ચ સઙ્ઘભેદો, એવઞ્ચ પન ભન્તે સઙ્ઘરાજિ ચેવ હોતિ સઙ્ઘભેદો ચ.

પુચ્છા – કિત્તાવતા નુ ખો આવુસો સઙ્ઘો ભિન્નો હોતિ.

વિસ્સજ્જના – ઇધ ભન્તે ભિક્ખૂ અધમ્માદિં ધમ્માદીનીતિ દીપેન્તિ, તે ઇમેહિ અટ્ઠારસહિ વત્થૂહિ અપકસ્સન્તિ, અવપકસ્સન્તિ, આવેનિં ઉપોસથં કરોન્તિ, આવેનિં પવારણં કરોન્તિ, આવેનિં સઙ્ઘકમ્મં કરોન્તિ, એવં ખો ભન્તે સઙ્ઘો ભિન્નો હોતિ.

પુચ્છા – કિત્તાવતા નુ ખો આવુસો સઙ્ઘો સમગ્ગો હોતિ.

વિસ્સજ્જના – ઇધ ભન્તે ભિક્ખૂ અધમ્મં અધમ્મોતિ દીપેન્તિ, ધમ્મં ધમ્મોતિ દીપેન્તિ, અવિનયં અવિનયોતિ દીપેન્તિ…પે… દુટ્ઠુલ્લં આપત્તિં દુટ્ઠુલ્લા આપત્તીતિ દીપેન્તિ, અદુટ્ઠુલ્લં આપત્તિં અદુટ્ઠુલ્લા આપત્તીતિ દીપેન્તિ, તે ઇમેહિ અટ્ઠારસહિ વત્થૂહિ ન અપકસ્સન્તિ, ન અવપકસ્સન્તિ, ન આવેનિં ઉપોસથં કરોન્તિ, ન આવેનિં પવારણં કરોન્તિ, ન આવેનિં સઙ્ઘકમ્મં કરોન્તિ, એત્તાવતા ખો ભન્તે સઙ્ઘો સમગ્ગો હોતિ.

પુચ્છા – સમગ્ગં આવુસો સઙ્ઘં ભિન્દિત્વા કિં સો પસવતિ.

વિસ્સજ્જના – સમગ્ગં ખો ભન્તે સઙ્ઘં ભિન્દિત્વા કપ્પટ્ઠિતિકં કિબ્બિસં પસવતિ, કપ્પં નિરયમ્હિ પચ્ચતિ.

પુચ્છા – ભિન્નં ખો આવુસો સઙ્ઘં સમગ્ગં કત્વા કિં સો પસવતિ.

વિસ્સજ્જના – ભિન્નં ખો ભન્તે સઙ્ઘં સમગ્ગં કત્વા બ્રહ્મં પુઞ્ઞં પસવતિ, કપ્પં સગ્ગમ્હિ મોદતિ.

પુચ્છા – સઙ્ઘભેદં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – સઙ્ઘભેદં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે દ્વે આપત્તિયો.