નમો તસ્સ ભગવતો અરહતો સમ્માસમ્બુદ્ધસ્સ
વિનયપિટક
સંગાયનસ્સ પુચ્છા વિસ્સજ્જના
ઓકાસ દાનકથા
સુણાતુ મે ભન્તે સઙ્ઘો, મહતી અયં પરિસા, એવરૂપાય પરિસાય ન સુકરા સબ્બસો કથં સાવેતું, તસ્મા આયસ્મતો ચ જવનત્થેરસ્સ પખુક્કૂનગરવાસિનો આયસ્મતો ચ વિચિત્તસારાભિવંસસ્સ તિપિટકધર ધમ્મભણ્ડાગારિકસ્સ વિનયપુચ્છનભારઞ્ચ વિનયવિસ્સજ્જન ભારઞ્ચ આવહિતું ઓકાસં દમ્મિ, કરોથ તુમ્હે આવુસો છટ્ઠસંગીતિપુબ્બઙ્ગમાનિ વિનયપુચ્છન વિનયવિસ્સજ્જન કિચ્ચાનિ યથાધમ્મં યથાવિનયં.
અગ્ગમહાપણ્ડિત ભદન્તજવન મહાથેરેન
ઠપિતા
પુચ્છક સમ્મુતિ ઞાત્તિ
સુણાતુ મે ભન્તે સઙ્ઘો, યદિ સઙ્ઘસ્સ પત્તકલ્લં, અહં આયસ્મન્તં વિચિત્તસારાભિવંસં તિપિટકધર ધમ્મભણ્ડાગારિકં વિનયં પુચ્છેય્યં.
તિપિટકધર ધમ્મભણ્ડાગારિક
ભદન્તવિચિત્તસારાભિવંસેન
ઠપિતા વિસ્સજ્જક સમ્મુતિ ઞાત્તિ
સુણાતુ મે ભન્તે સઙ્ઘો, યદિ સઙ્ઘસ્સ પત્તકલ્લં, અહં આયસ્મતા જવનત્થેરેન સઙ્ઘનાયક મહાથેરસ્સ પટિનિધિભૂતેન વિનયં પુટ્ઠો વિસ્સજ્જેય્યં.
પઠમ પારાજિક સિક્ખાપુચ્છા
પુચ્છા – યં તેન આવુસો ભગવતા જાનતા પસ્સતા અરહતા સમ્માસમ્બુદ્ધેન પઠમં પારાજિકં કત્થ પઞ્ઞત્તં.
વિસ્સજ્જના – વેસાલિયં ભન્તે પઞ્ઞત્તં.
પુચ્છા – કં આવુસો આરબ્ભ પઞ્ઞત્તં.
વિસ્સજ્જના – સુદિન્નં ભન્તે કલન્દપુત્તં આરબ્ભ પઞ્ઞત્તં.
પુચ્છા – કિસ્મિં આવુસો વત્થુસ્મિં પઞ્ઞત્તં.
વિસ્સજ્જના – સુદિન્દો ભન્તે કલન્દપુત્તો પુરાણદુતિયિકાય મેથુનં ધમ્મં પટિસેવિ, તસ્મિં ભન્તે વત્થુસ્મિં પઞ્ઞત્તં.
પુચ્છા – અત્થિ આવુસો તત્થ પઞ્ઞત્તિ અનુપઞ્ઞત્તિ અનુપ્પન્નપઞ્ઞત્તિ.
વિસ્સજ્જના – એકા ભન્તે પઞ્ઞત્તિ દ્વે અનુપઞ્ઞત્તિયો, અનુપ્પન્નપઞ્ઞત્તિ તસ્મિં નત્થિ.
પુચ્છા – સબ્બત્થપઞ્ઞત્તિનુખો આવુસો પદેસપઞ્ઞત્તિનુખો.
વિસ્સજ્જના – સબ્બત્થપઞ્ઞત્તિ ભન્તે.
પુચ્છા – સાધારણપઞ્ઞત્તિનુખો આવુસો અસાધારણપઞ્ઞત્તિનુખો.
વિસ્સજ્જના – સાધારણપઞ્ઞત્તિ ભન્તે.
પુચ્છા – એકતોપઞ્ઞત્તિનુખો આવુસો ઉભતોપઞ્ઞત્તિનુખો.
વિસ્સજ્જના – ઉભતોપઞ્ઞત્તિ ભન્તે.
પુચ્છા – પઞ્ચન્નં આવુસો પાતિમોક્ખુદ્દેસાનં કત્થોગધં કત્થ પરિયાપન્નં.
વિસ્સજ્જના – નિદાનોગધં ભન્તે નિદાનપરિયાપન્નં.
પુચ્છા – કતમેન આવુસો ઉદ્દેસેન ઉદ્દેસં આગચ્છતિ.
વિસ્સજ્જના – દુતિયેન ભન્તે ઉદ્દેસેન ઉદ્દેસં આગચ્છતિ.
પુચ્છા – ચતુન્નં આવુસો વિપત્તીનં કતમા વિપત્તિ.
વિસ્સજ્જના – સીલવિપત્તિ ભન્તે.
પુચ્છા – કા આવુસો વિપત્તિ.
વિસ્સજ્જના – અસંવરો ભન્તે વિપત્તિ.
પુચ્છા – કા આવુસો સમ્પત્તિ.
વિસ્સજ્જના – સંવરો ભન્તે સમ્મત્તિ.
પુચ્છા – કા આવુસો પટિપત્તિ.
વિસ્સજ્જના – ન એવરૂપં કરિસ્સામીતિ યાવજીવં આપાણકોટિકં સમાદાય સિક્ખતિ સિક્ખાપદેસુ, અયં ભન્તે પટિપત્તિ.
પુચ્છા – કતિ આવુસો અત્થવસે પટિચ્ચ ભગવતા પઠમં પારાજિકં પઞ્ઞત્તં.
વિસ્સજ્જના – દસ ભન્તે અત્થવસે પટિચ્ચ ભગવતા પઠમં પારાજિકં પઞ્ઞત્તં, ૧ - સઙ્ઘસુટ્ઠુતાય, ૨ - સઙ્ઘફાસુતાય, ૩ - દુમ્મઙ્કૂનં પુગ્ગલાનં નિગ્ગહાય, ૪ - પેસલાનં ભિક્ખૂનં ફાસુવિહારાય, ૫ - દિટ્ઠધમ્મિકાનં આસવાનં સંવરાય, ૬ - સમ્પરાયિકાનં આસવાનં પટિઘાતાય, ૭ - અપ્પસન્નાનં પસાદાય, ૮ - પસન્નાનં ભિય્યોભાવાય, ૯ - સદ્ધમ્મટ્ઠિતિયા, ૧૦ - વિનયાનુગ્ગહાય.
પુચ્છા – કે આવુસો સિક્ખન્તિ.
વિસ્સજ્જના – સેક્ખાચ ભન્તે પુથુજ્જનકલ્યાણકાચ સિક્ખન્તિ.
પુચ્છા – કે આવુસો સિક્ખિતસિક્ખા.
વિસ્સજ્જના – અરહન્તો ભન્તે સિક્ખિતસિક્ખા.
પુચ્છા – કત્થ આવુસો ઠિતં.
વિસ્સજ્જના – સિક્ખાકામેસુ ભન્તે ઠિતં.
પુચ્છા – કે આવુસો ધારેન્તિ.
વિસ્સજ્જના – યેસં ભન્તે વત્તતિ તે ધારેન્તિ.
પુચ્છા – કસ્સ આવુસો વચનં.
વિસ્સજ્જના – ભગવતો ભન્તે વચનં અરહતો સમ્માસમ્બુદ્ધસ્સ.
પુચ્છા – કેનાવુસો આભતં.
વિસ્સજ્જના – પરમ્પરાય ભન્તે આભતં.
સંગાયનત્થાય સઙ્ઘસ્સ ઞાપનં
સુણાતુ મે ભન્તે સઙ્ઘો અહં ભન્તે આયસ્મન્તં વિચિત્થસારાભિવંસં તિપિટકધર ધમ્મભણ્ડાગારિકં પઠમસ્સ પારાજિકસ્સ નિદાનમ્પિ પુચ્છિં, પુગ્ગલમ્પિ પુચ્છિં, વત્થુમ્પિ પુચ્છિં, પઞ્ઞત્તિ અનુપઞ્ઞત્તિઆદીનિપિ પુચ્છિં, પુટ્ઠો પુટ્ઠોચ સો આયસ્માવિચિત્તસારાભિવંસો વિસ્સજ્જેસિ, ઇતિહિદં ભન્તે પઠમં પારાજિક સિક્ખાપદં નિમ્મલં સુપરિસુદ્ધં તસ્સેવ ભગવતો વચનં અરહતો સમ્માસમ્બુદ્ધસ્સ, તસ્મા યથાપુરે મહાકસ્સપાદયો મહાથેરવરા પોરાણસંગીતિકારા બ્રહ્મચરિય સઙ્ખાતસ્સ બુદ્ધસાસનસ્સ ચિરટ્ઠિતિયા બહુજનહિતાય બહુજનસુખાય લોકાનુકમ્પાય અત્થાય હિતાય સુખાય દેવમનુસ્સાનં ધમ્મવિનયં સઙ્ગાયિંસુચેવ અનુસઙ્ગાયિંસુચ, એવમેવ મયમ્પિ દાનિ સબ્બેવ છટ્ઠસંગીતિમહાધમ્મસભાપરિયાપન્ના ઇદં પઠમ પારાજિક સિક્ખાપદં એકતોસજ્ઝાયનવસેન સંગાયેય્યામ.
રેવતાભિ પણ્ડિતધજ સાસનવંસ મહાધમ્મરાજગુરુનો
અભિધજમહારટ્ઠગુરુનોચ સઙ્ઘનાયક મહાથેરસ્સ
ઓકાસ દાનકથા
સુણાતુ મે ભન્તે સઙ્ઘો, મહતી અયં પરિસા, એવરૂપાય પરિસાય ન સુકરા સબ્બસો કથં સાવેતું, તસ્મા આયસ્મતોચ સોભનસ્સ સાસનરિ સારામાધિવાસિનો આયસ્મતોચ વિચિત્તસારાભિવંસસ્સ તિપિટકધર ધમ્મભણ્ડાગારિકસ્સ વિનયપુચ્છનભારઞ્ચ વિનયવિસ્સજ્જનભારઞ્ચ આવહિતું ઓકાસં દમ્મિ, કરોથ તુમ્હે આવુસો છટ્ઠસંગીતિપુબ્બઙ્ગમાનિ વિનયપુચ્છન વિનયવિસ્સજ્જન કિચ્ચાનિ યથાધમ્મં યથાવિનયં.
અગ્ગમહાપણ્ડિત ભદન્ત સોભનત્થેરેન
ઠપિતા પુચ્છક સમ્મુતિ ઞાત્તિ
સુણાતુ મે ભન્તે સઙ્ઘો, યદિ સઙ્ઘસ્સ પત્તકલ્લં, અહં આયસ્મન્તં વિચિત્તસારાભિવંસં તિપિટકધર ધમ્મભણ્ડાગારિકં વિનયં પુચ્છેય્યં.
તિપિટકધર ધમ્મભણ્ડાગારિક
ભદન્તવિચિત્તસારાભિવંસેન
ઠપિતા વિસ્સજ્જક સમ્મુતિ ઞાત્તિ
સુણાતુ મે ભન્તે સઙ્ઘો, યદિસઙ્ઘસ્સ પત્તકલ્લં, અહં આયસ્મતા સોભનત્થેરેન સઙ્ઘનાયક મહાથેરસ્સ પટિનિધિભૂતેન વિનયં પુટ્ઠો વિસ્સજ્જેય્યં.
દુતિય પારાજિક સિક્ખાપુચ્છા
પુચ્છા – યં તેન આવુસો ભગવતા જાનતા પસ્સતા અરહતા સમ્માસમ્બુદ્ધેન દુતિયં પારાજિકં કત્થ પઞ્ઞત્તં.
વિસ્સજ્જના – રાજગહે ભન્તે પઞ્ઞત્તં.
પુચ્છા – કં આવુસો આરબ્ભ પઞ્ઞત્તં.
વિસ્સજ્જના – ધનિયં ભન્તે કુમ્ભકારપુત્તં આરબ્ભ પઞ્ઞત્તં.
પુચ્છા – કિસ્મિં આવુસો વત્થુસ્મિં પઞ્ઞત્તં.
વિસ્સજ્જના – ધનિયો ભન્તે કુમ્ભકારપુત્તો રઞ્ઞો દારૂનિ અદિન્નં આદિયિ, તસ્મિં વત્થુસ્મિં પઞ્ઞત્તં.
પુચ્છા – અત્થિ આવુસો તત્થ પઞ્ઞત્તિ અનુપઞ્ઞત્તિ અનુપ્પન્નપઞ્ઞત્તિ.
વિસ્સજ્જના – એકા ભન્તે પઞ્ઞત્તિ એકા અનુપઞ્ઞત્તિ અનુપ્પન્નપઞ્ઞત્તિ તસ્મિં નત્થિ.
પુચ્છા – કા આવુસો તત્થ મૂલપઞ્ઞત્તિ.
વિસ્સજ્જના – યો પન ભિક્ખુ અદિન્નં થેય્યસઙ્ખાતં આદિયેય્ય, યથારૂપે અદિન્નાદાને રાજાનો ચોરં ગહેત્વા હનેય્યુંવા બન્ધેય્યુંવા પબ્બાજેય્યુંવા ચોરોસિ બાલોસિ મુળ્હોસિ થેનોસીતિ તથારૂપં ભિક્ખુ અદિન્નં આદિયમાનો અયમ્પિ પારાજિકો હોતિ અસંવાસોતિ અયં ભન્તે તત્થ મૂલપઞ્ઞત્તિ.
પુચ્છા – કા આવુસો તત્થ અનુપઞ્ઞત્તિ.
વિસ્સજ્જના – ગામાવા અરઞ્ઞાવાતિ અયં ભન્તે તત્થ અનુપઞ્ઞત્તિ.
પુચ્છા – કા આવુસો તત્થ પરિપુણ્ણપઞ્ઞત્તિ.
વિસ્સજ્જના – યો પન ભિક્ખુ ગામાવા અરઞ્ઞાવા અદિન્નં થેય્યસઙ્ખાતં આદિયેય્ય, કથારૂપે અદિન્નાદાને રાજાનો ચોરં ગહેત્વા હનેય્યુંવા બન્ધેય્યુંવા પબ્બાજેય્યુંવા ચોરોસિ બાલોસિ મૂળ્હોસિ થેનોસીતિ તથારૂપં ભિક્ખુ અદિન્નં આદિયમાનો અયમ્પિ પારાજિકો હોતિ અસંવાસોતિ અયં ભન્તે તત્થ પરિપુણ્ણપઞ્ઞત્તિ.
પુચ્છા – સબ્બત્થપઞ્ઞત્તિ નુખો આવુસો પદેસપઞ્ઞત્તિનુખો.
વિસ્સજ્જના – સબ્બત્થપઞ્ઞત્તિ ભન્તે.
પુચ્છા – સાધારણપઞ્ઞત્તિનુખો આવુસો અસાધારણપઞ્ઞત્તિ નુખો.
વિસ્સજ્જના – સાધારણપઞ્ઞત્તિ ભન્તે.
પુચ્છા – એકતોપઞ્ઞત્તિનુખો આવુસો ઉભતોપઞ્ઞત્તિનુખો.
વિસ્સજ્જના – ઉભતોપઞ્ઞત્તિ ભન્તે.
પુચ્છા – તસ્મિં આવુસો દુતિય પારાજિકે અદિન્નં આદિયન્તો કતિ આપત્તિયો આપજ્જતિ વિભજિત્વા વિસ્સજ્જેહિ.
વિસ્સજ્જના – અદિન્નં ભન્તે આદિયન્તો તિસ્સો આપત્તિયો આપજ્જતિ, પઞ્ચ માસકંવા અતિરેક પઞ્ચ માસકંવા અગ્ઘનકં અદિન્નં થેય્યસઙ્ખાતં આદિયતિ આપત્તિ પારાજિકસ્સ, ઊનપઞ્ચમાસકંવા અતિરેકમાસકંવા અદિન્નં થેય્યસઙ્ખાતં આદિયતિ આપત્તિ થુલ્લચ્ચયસ્સ, માસકંવા ઊનમાસકવા અગ્ઘનકં અદિન્નં થેય્યસઙ્ખાતં આદિયતિ આપત્તિ દુક્કટસ્સ, અદિન્નં ભન્તે આદિયન્તો ઇમા તિસ્સો આપત્તિયો આપજ્જતિ.
પુચ્છા – કેસં આવુસો અનાપત્તિ.
વિસ્સજ્જના – દસન્નં ભન્તે પુગ્ગલાનં અનાપત્તિ, સકસઞ્ઞિસ્સ, વિસ્સાસગ્ગાહેન ગણ્હન્તસ્સ, તાવકાલિકં ગણ્હન્તસ્સ, પેતપરિગ્ગહં ગણ્હન્તસ્સ, તિરચ્છાનગતપરિગ્ગહં ગણ્હન્તસ્સ, પંસુકૂલસઞ્ઞિસ્સ, ઉમ્મત્તકસ્સ, ખિત્તચિત્તસ્સ, વેદનાટ્ટસ્સ, આદિકમ્મિકસ્સાતિ.
પુચ્છા – પઞ્ચન્નં આવુસો પાતિમોક્ખુદ્દેસાનં કત્થોગધં કત્થપરિયાપન્નં.
વિસ્સજ્જના – નિદાનોગધં ભન્તે નિદાનપરિયાપન્નં.
પુચ્છા – કતમેન આવુસો ઉદ્દેસેન ઉદ્દેસં આગચ્છતિ.
વિસ્સજ્જના – દુતિયેન ભન્તે ઉદ્દેસેન ઉદ્દેસં આગચ્છતિ.
પુચ્છા – ચતુન્નં આવુસો વિપત્તીનં કતમા વિપત્તિ.
વિસ્સજ્જના – સીલવિપત્તિ ભન્તે.
પુચ્છા – સત્તન્નં આવુસો આપત્તિક્ખન્ધાનં કતમો આપત્તિક્ખન્ધો.
વિસ્સજ્જના – પારાજિકાપત્તિક્ખન્ધો ભન્તે.
પુચ્છા – છન્નં આવુસો આપત્તિસમુટ્ઠાનાનં કતિહિ સમુટ્ઠાનેહિ સમુટ્ઠાતિ.
વિસ્સજ્જના – તીહિ ભન્તે સમુટ્ઠાનેહિ સમુટ્ઠાતિ, સિયા કાયતોચ ચિત્તતોચ સમુટ્ઠાતિ, ન વાચાતો, સિયા વાચાતોચ
ચિત્તતોચ સમુટ્ઠાતિ, ન કાયતો, સિયા કાયતોચ વાચાતોચ ચિત્તતોચ સમુટ્ઠાતિ.
પુચ્છા – ચતુન્નં આવુસો અધિકરણાનં કતમં અધિકરણં.
વિસ્સજ્જના – આપત્તાધિકરણં ભન્તે.
પુચ્છા – સત્તન્નં આવુસો સમથાનં કતિહિ સમથેહિ સમ્મતિ.
વિસ્સજ્જના – દ્વિહિ ભન્તે સમથેહિ સમ્મતિ સમ્મુખાવિનયેનચ પટિઞ્ઞાત કરણેનચ.
પુચ્છા – કો આવુસો તત્થ વિનયો, કો તત્થ અભિવિનયો.
વિસ્સજ્જના – પઞ્ઞત્તિ ભન્તે વિનયો વિભત્તિ અભિવિનયો.
પુચ્છા – કિંઆવુસો તત્થ પાતિમોક્ખં કિં તત્થ અધિપાતિમોક્ખં.
વિસ્સજ્જના – પઞ્ઞત્તિ ભન્તે પાતિમોક્ખં, વિભત્તિ અધિપાતિમોક્ખં.
પુચ્છા – કા આવુસો વિપત્તિ.
વિસ્સજ્જના – અસંવરો ભન્તે વિપત્તિ.
પુચ્છા – કા આવુસો સમ્પત્તિ.
વિસ્સજ્જના – સંવરો ભન્તે સમ્પત્તિ.
પુચ્છા – કા આવુસો પટિપત્તિ.
વિસ્સજ્જના – ન એવરૂપં કરિસ્સામીતિ યાવજીવં આપાણકોટિકં સમાદાય સિક્ખતિ સિક્ખાપદેસુ અયં ભન્તે તત્થ પટિપત્તિ.
પુચ્છા – કતિ આવુસો અત્થવસે પટિચ્ચ ભગવતા દુતિયં પારાજિકં પઞ્ઞત્તં.
વિસ્સજ્જના – દસ ભન્તે અત્થવસે પટિચ્ચ ભગવતા દુતિયં પારાજિકં પઞ્ઞત્તં. સઙ્ઘસુટ્ઠુતાય સઙ્ઘફાસુતાય દુમ્મઙ્કૂનં પુગ્ગલાનં નિગ્ગહાય પેસલાનં ભિક્ખૂનં ફાસુવિહારાય દિટ્ઠધમ્મિકાનં આસવાનં સંવરાય સમ્પરાયિકાનં આસવાનં પટિઘાતાય અપ્પસન્નાનં પસાદાય પસન્નાનં ભિય્યોભાવાય સદ્ધમ્મટ્ઠિતિયા વિનયાનુગ્ગહાય.
પુચ્છા – કો આવુસો સિક્ખન્તિ.
વિસ્સજ્જના – સેક્ખાચ ભન્તે પુથુજ્જનકલ્યાણકાચ સિક્ખન્તિ.
પુચ્છા – કે આવુસો સિક્ખિતસિક્ખા.
વિસ્સજ્જના – અરહન્તો ભન્તે સિક્ખિતસિક્ખા.
પુચ્છા – કત્થ આવુસો ઠિતં.
વિસ્સજ્જના – સિક્ખાકામેસુ ભન્તે ઠિતં.
પુચ્છા – કે આવુસો ધારેન્તિ.
વિસ્સજ્જના – યેસં ભન્તે વત્તતિ તે ધારેન્તિ.
પુચ્છા – કસ્સ આવુસો વચનં.
વિસ્સજ્જના – ભગવતા ભન્તે વચનં અરહતો સમ્માસમ્મુદ્ધસ્સ.
પુચ્છા – કેનાવુસો આભતં.
વિસ્સજ્જના – પરમ્પરાય ભન્તે આભતં.
પુચ્છા – અત્થિ નુ ખો આવુસો તત્થ ઉપનેતબ્બં વા અપનેતબ્બં વા અક્ખરપદપચ્ચાભટ્ઠં વા વિરદ્ધપદબ્યઞ્જનં વા.
વિસ્સજ્જના – નત્થિ ભન્તે.
‘‘સંગાયનત્થાય સઙ્ઘસ્સ ઞાપનં’’
સુણાતુ મે ભન્તે સઙ્ઘો અહં ભન્તે આયસ્મન્તં વિચિત્તસારાભિવંસ તિપિટકધરધમ્મભણ્ડાગારિકં દુતિયસ્સ પારાજિકસ્સ નિદાનમ્પિ પુચ્છિં, પુગ્ગલમ્પિ પુચ્છિં, વત્થુમ્પિ પુચ્છિં, પઞ્ઞત્તિમ્પિ પુચ્છિં, અનુપઞ્ઞત્તિમ્પિ પુચ્છિં, આપત્તિમ્પિ પુચ્છિં, અનાપત્તિમ્પિ પુચ્છિં, અઞ્ઞાનિપિ ઈદિસાનિ પુચ્છિતબ્બટ્ઠાનાનિ અનેકાનિ પુચ્છિં, પુટ્ઠો પુટ્ઠોચ સો આયસ્મા વિચિત્તસારાભિવંસો વિસ્સજ્જેસિ. ઇતિ હિદં ભન્તે ઇદં દુતિયં પારાજિક સિક્ખાપદં નિમ્મલં, સુપરિસુદ્ધં, તસ્સેવ ભગવતો વચનં અરહતો સમ્માસમ્બુદ્ધસ્સ, તસ્મા યથા પુરે મહાકસ્સ પાદયો મહાથેરવરા પોરાણસંગીતિકારા બ્રહ્મચરિયસઙ્ખાતસ્સ બુદ્ધસાસનસ્સ ચિરટ્ઠિતિયા, બહુજનહિતાય, બહુજનસુખાય લોકાનુકમ્પાય અત્થાય, હિતાય, સુખાય, દેવમનુસ્સાનં ધમ્મવિનયં સઙ્ગાયિંસુચેવ અનુસઙ્ગાયિંસુચ, એવમેવ મયમ્પિ દાનિ સબ્બેવ છટ્ઠસંગીતિમહાધમ્મસભાપરિયાપન્ના ઇદં દુતિય પારાજિક સિક્ખાપદં એકતો ગણસજ્ઝાયં કત્વા સમગ્ગા સમ્મોદમાના હુત્વા સઙ્ગાયેય્યામ.
તતિય પારાજિક સિક્ખાપુચ્છા
પુચ્છા – યં તેન આવુસો ભગવતા (પ) સમ્માસમ્બુદ્ધેન તતિયં પારાજિકં કત્થ પઞ્ઞત્તં.
વિસ્સજ્જના – વેસાલિયં ભન્તે પઞ્ઞત્તં.
પુચ્છા – કં આવુસો આરબ્ભ પઞ્ઞત્તં.
વિસ્સજ્જના – સમ્બહુલે ભન્તે ભિક્ખૂ આરબ્ભ પઞ્ઞત્તં.
પુચ્છા – કિસ્મિં આવુસો વત્થુસ્મિં પઞ્ઞત્તં.
વિસ્સજ્જના – સમ્બહુલા ભન્તે ભિક્ખુ અઞ્ઞમઞ્ઞં જીવિતા વોરોપેસું, તસ્મિં ભન્તે વત્થુસ્મિં પઞ્ઞત્તં.
પુચ્છા – અત્થિ નુખો આવુસો તત્થ પઞ્ઞત્તિ અનુપઞ્ઞત્તિ અનુપ્પન્નપઞ્ઞત્તિ.
વિસ્સજ્જના – એકા ભન્તે પઞ્ઞત્તિ, એકા અનુપઞ્ઞત્તિ, અનુપ્પન્નપઞ્ઞત્તિ તસ્મિં નત્થિ.
પુચ્છા – કા આવુસો તત્થ મૂલપઞ્ઞત્તિ.
વિસ્સજ્જના – યોપન ભિક્ખુ સઞ્ચિચ્ચ મનુસ્સવિગ્ગહં જીવિતા વોરોપેય્ય, સત્થહારકંવાસ્સ પરિયેસેય્ય અયમ્પિ પારાજિકો હોતિ અસંવાસોતિ અયં ભન્તે તત્થ મૂલપઞ્ઞત્તિ.
પુચ્છા – કા આવુસો તત્થ અનુપઞ્ઞત્તિ.
વિસ્સજ્જના – મરણવણ્ણં વા સંવણ્ણેય્ય મરણાય વા સમાદપેય્ય અમ્ભોપુરિસ કિં તુય્હિમિના પાપકેન દુજ્જીવિતેન મતન્તે જીવિતા
સેય્યાતિ ઇતિ ચિત્તમનો ચિત્તસઙ્કપ્પો અનેકપરિયાયેન મરણવણ્ણં વા સંવણ્ણેય્ય મરણાય વા સમાદપેય્યાતિ અયં ભન્તે તત્થ અનુપઞ્ઞત્તિ.
પુચ્છા – કા આવુસો તત્થ પરિપુણ્ણપઞ્ઞત્તિ.