૮. વત્તક્ખન્ધક

પુચ્છા – આગન્તુકાનં આવુસો ભિક્ખૂનં વત્તં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે સમ્બહુલે આગન્તુકે ભિક્ખૂ આરબ્ભ પઞ્ઞત્તં, આગન્તુકા ભન્તે ભિક્ખૂ સઉપાહનાપિ આરામં પવિસિંસુ, છત્તપગ્ગહિતાપિ આરામં પવિસિંસુ, ઓગુણ્ઠિતાપિ આરામં પવિસિંસુ, સીસેપિ ચીવરં કરિત્વા આરામં પવિસિંસુ, પાનીયેનપિ પાદે દોવિંસુ, વુડ્ઢતરેપિ આવાસિકે ભિક્ખૂ નાભિવાદેસું, નપિ સેનાસનં પુચ્છિંસુ, તસ્મિં ભન્તે વત્થુસ્મિં ‘‘તેન હિ ભિક્ખવે આગન્તુકાનં ભિક્ખૂનં વત્તં પઞ્ઞપેસ્સામિ, યથા આગન્તુકેહિ ભિક્ખૂહિ સમ્મા વત્તિતબ્બં, આગન્તુકેન ભિક્ખવે ભિક્ખુના ઇદાનિ આરામં પવિસિસ્સામીતિ ઉપાહના ઓમુઞ્ચિત્વા નીચં કત્વા પપ્ફોટેત્વા ગહેત્વા છત્તં અપનામેત્વા સીસં વિવરિત્વા સીસે ચીવરં ખન્ધે કત્વા સાધુકં અતરમાનેન આરામો પવિસિતબ્બો’’ એવમાદિના ભન્તે આગન્તુકાનં ભિક્ખૂનં વત્તં પઞ્ઞત્તં.

પુચ્છા – આવાસિકાનં આવુસો ભિક્ખૂનં વત્તં ભગવતા કત્થ કં આરબ્ભ કિસ્મિં વત્થુસ્મિં પઞ્ઞત્તં, કથઞ્ચ પન પઞ્ઞત્તં.

વિસ્સજ્જના – સાવત્થિયં ભન્તે સમ્બહુલે આવાસિકે ભિક્ખૂ આરબ્ભ પઞ્ઞત્તં, સમ્બહુલા ભન્તે આવાસિકા ભિક્ખૂ આગન્તુકે ભિક્ખૂ દિસ્વા નેવ આસનં પઞ્ઞપેસું, ન પાદોદકં પાદપીઠં પાદકથલિકં ઉપનિક્ખિપિંસુ, ન પચ્ચુગ્ગન્ત્વા પત્તચીવરં પટિગ્ગહેસું, ન સેનાસનં પઞ્ઞપેસું, તસ્મિં ભન્તે વત્થુસ્મિં પઞ્ઞત્તં, તસ્મિં ભન્તે વત્થુસ્મિં –

‘‘આવાસિકેન ભિક્ખવે ભિક્ખુના આગન્તુકં ભિક્ખું વુડ્ઢતરં દિસ્વા આસનં પઞ્ઞપેતબ્બં, પાદોદકં પાદપીઠં પાદકથલિકં ઉપનિક્ખિપિતબ્બં, પચ્ચુગ્ગન્ત્વા પત્તચીવરં પટિગ્ગહેતબ્બં પાનીયેન પુચ્છિતબ્બો’’ એવમાદિના ભન્તે આવાસિકાનં ભિક્ખૂનં વત્તં ભગવતા પઞ્ઞત્તં.

પુચ્છા – ગમિકાનં આવુસો ભિક્ખૂનં વત્તં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં, કથઞ્ચપન પઞ્ઞત્તં.

વિસ્સજ્જના – સાવત્થિયં ભન્તે સમ્બહુલે ગમિકે ભિક્ખૂ આરબ્ભ પઞ્ઞત્તં, સમ્બહુલા ભન્તે ગમિકા ભિક્ખૂ દારુભણ્ડં મત્તિકાભણ્ડં અપ્પટિસામેત્વા દ્વારવાતપાનં વિવરિત્વા સેનાસનં અનાપુચ્છા પક્કમિંસુ, તસ્મિં ભન્તે વત્થુસ્મિં ‘‘ગમિકેન ભિક્ખવે ભિક્ખુના દારુભણ્ડં પટિસામેત્વા દ્વારવાતપાનં થકેત્વા સેનાસનં આપુચ્છા પક્કમિતબ્બં’’ એવમાદિના ભન્તે આકારેન ભગવતા ગમિકાનં ભિક્ખૂનં વત્તં પઞ્ઞત્તં.

પુચ્છા – ભત્તગ્ગે આવુસો અનુમોદિતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલા ભન્તે ભિક્ખૂ ભત્તગ્ગે નાનુમોદિંસુ, તસ્મિં ભન્તે વત્થુસ્મિં અનુઞ્ઞાતં.

પુચ્છા – ભિક્ખૂનં આવુસો ભત્તગ્ગવત્તં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ દુન્નિવત્થા દુપ્પારુતા અનાકપ્પસમ્પન્ના ભત્તગ્ગં ગચ્છિંસુ, તસ્મિં ભન્તે વત્થુસ્મિં ‘‘સચે આરામે કાલો આરોચિતો હોતિ, તિમણ્ડલં પટિચ્છાદેન્તેન પરિમણ્ડલં નિવાસેત્વા કાયબન્ધનં બન્ધિત્વા સગુણં કત્વા સઙ્ઘાટિયો પારુપિત્વા ગણ્ઠિકં પટિમુઞ્ચિત્વા ધોવિત્વા પત્તં ગહેત્વા સાધુકં અતરમાનેન ગામો પવિસિતબ્બો’’તિ એવમાદિના ભન્તે ભત્તગ્ગવત્તં પઞ્ઞત્તં.

પુચ્છા – ભિક્ખૂનં આવુસો સેનાસનવત્તં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં, કથઞ્ચ તં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ ભિક્ખૂસુ અજ્ઝોકાસે ચીવરં કરોન્તેસુ પટિવાતે અઙ્ગણે સેનાસનં પપ્ફોટેસું, તસ્મિં ભન્તે વત્થુસ્મિં ‘‘યસ્મિં વિહારે વિહરતિ, સચે સો વિહારો ઉક્લાપો હોતિ, સચે ઉસ્સહતિ સોધેતબ્બો’’તિ એવમાદિના ભન્તે ભિક્ખૂનં સેનાસનવત્તં ભગવતા પઞ્ઞત્તં.

પુચ્છા – સમાચારં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – સમાચારં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે એકા આપત્તિ.