ચૂળવગ્ગપાળિ

૧. કમ્બક્ખન્ધક

પુચ્છા – ભણ્ડનાદિકારકસ્સ આવુસો ભિક્ખુનો તજ્જનીયકમ્મં કાતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે પણ્ડુકલોહિતકે ભિક્ખૂ આરબ્ભ અનુઞ્ઞાતં, પણ્ડુકલોહિતકા ભન્તે ભિક્ખૂ અત્તના ભણ્ડનકારકા કલહકારકા વિવાદકારકા ભસ્સકારકા સઙ્ઘે અધિકરણકારકા, યેપિ ચઞ્ઞે ભિક્ખૂ ભણ્ડનકારકા કલહકારકા વિવાદકારકા ભસ્સકારકા સઙ્ઘે અધિકરણકારકા તે ઉપસઙ્કમિત્વા એવમાહંસુ ‘‘મા ખો તુમ્હે આયસ્મન્તો એસો અજેસિ, બલવાબલવં પટિમન્તેથ, તુમ્હે તેન પણ્ડિતતરા ચ બ્યત્તતરા ચ બહુસ્સુતતરા ચ અલમત્તતરા ચ, મા ચસ્સ ભાયિત્થ, મયમ્પિ તુમ્હાકં પક્ખા ભવિસ્સામા’’તિ, તેન અનુપ્પન્નાનિ ચેવ ભણ્ડનાનિ ઉપ્પજ્જન્તિ, ઉપ્પન્નાનિ ચ ભણ્ડનાનિ ભિય્યોભાવાય વેપુલ્લાય સંવત્તન્તિ. તસ્મિં ભન્તે વત્થુસ્મિં અનુઞ્ઞાતં.

પુચ્છા – તજ્જનીયકમ્મકતસ્સ આવુસો ભિક્ખુનો કતિસુ વત્તેસુ સમ્મા વત્તન્તસ્સ તં કમ્મં પટિપ્પસ્સમ્ભેતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – અટ્ઠારસસુ ભન્તે વત્તેસુ સમ્મા વત્તન્તસ્સ તજ્જનીયકમ્મકતસ્સ ભિક્ખુનો તં કમ્મં પટિપ્પસ્સમ્ભેતું ભગવતા સાવત્થિયં અનુઞ્ઞાતં, તેયેવ પણ્ડુકલોહિતકા ભિક્ખૂ સઙ્ઘેન તજ્જનીયકમ્મકતા સમ્મા વત્તિત્વા સઙ્ઘં ઉપસઙ્કમિત્વા યાચિંસુ, તસ્મિં ભન્તે વત્થુસ્મિં અનુઞ્ઞાતં.

પુચ્છા – બાલસ્સ આવુસો અબ્યત્તસ્સ આપત્તિબહુલસ્સ અનપદાનસ્સ ગિહિસંસટ્ઠસ્સ અનનુલોમિકેહિ ગિહિસંસગ્ગેહિ નિયસ્સકમ્મં કાતું કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે આયસ્મન્તં સેય્યસકં આરબ્ભ પઞ્ઞત્તં, આયસ્મા ભન્તે સેય્યસકો બાલો અહોસિ અબ્યત્તો આપત્તિબહુલો અનપદાનો ગિહિસંસટ્ઠો વિહાસિ અનનુલોમિકેહિ ગિહિસંસગ્ગેહિ, તસ્મિં ભન્તે વત્થુસ્મિં પઞ્ઞત્તં.

પુચ્છા – નિયસ્સકમ્મકતસ્સ આવુસો ભિક્ખુનો કતિસુ વત્તેસુ સમ્મા વત્તન્તસ્સ તં કમ્મં પટિપ્પસ્સમ્ભેતું ભગવતા અનુઞ્ઞાતં.

વિસ્સજ્જના – અટ્ઠારસસુ ભન્તે વત્તેસુ સમ્મા વત્તન્તસ્સ નિયસ્સ કમ્મકતસ્સ ભિક્ખુનો તં કમ્મં પટિપ્પસ્સમ્ભેતું ભગવતા અનુઞ્ઞાતં, ન ઉપસમ્પાદેતબ્બં, ન નિસ્સયો દાતબ્બો, ન સામણેરો ઉપટ્ઠાપેતબ્બો, ન ભિક્ખુનોવાદકસમ્મુતિ સાદિતબ્બા, સમ્મતેનપિ ભિક્ખુનિયો ન ઓવદિતબ્બા, એવમાદીસુ ભન્તે અટ્ઠારસસુ વત્તેસુ સમ્મા વત્તન્તસ્સ નિયસ્સકમ્મકતસ્સ ભિક્ખુનો તં કમ્મં પટિપ્પસ્સમ્ભેતું ભગવતા અનુઞ્ઞાતં.

પુચ્છા – કુલદૂસકસ્સ આવુસો પાપસમાચારસ્સ ભિક્ખુનો પબ્બાજનીયકમ્મં કાતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે અસ્સજિપુનબ્બસુકે ભિક્ખૂ આરબ્ભ અનુઞ્ઞાતં, અસ્સજિપુનબ્બસુકા ભન્તે ભિક્ખૂ કીટાગિરિસ્મિં કુલદૂસકા અહેસું પાપસમાચારા, તસ્મિં ભન્તે વત્થુસ્મિં અનુઞ્ઞાતં.

પુચ્છા – પટિસારણીયકમ્મં આવુસો પુચ્છામિ, સદ્ધં આવુસો પસન્નં ગહપતિં દાયકં કારકં સઙ્ઘુપટ્ઠાકં હીનેન ખુંસેન્તસ્સ ભિક્ખુનો પટિસારણીયકમ્મં કાતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે આયસ્મન્તં સુધમ્મં આરબ્ભ અનુઞ્ઞાતં, ભગવતિ ભન્તે સાવત્થિયં વિહરતિ આયસ્મા સુધમ્મો મચ્છિકાસણ્ડે ચિત્તં ગહપતિં સદ્ધં પસન્નં દાયકં કારકં સઙ્ઘુપટ્ઠાકં હીનેન ખુંસેસિ હીનેન વમ્ભેસિ, તસ્મિં ભન્તે વત્થુસ્મિં અનુઞ્ઞાતં.

તેનહિ ભિક્ખવે સઙ્ઘો સુધમ્મસ્સ ભિક્ખુનો પટિસારણીયકમ્મં કરોતુ ‘‘ચિત્તો તે ગહપતિ ખમાપેતબ્બો’’તિ –

પુચ્છા – પટિસારણીયકમ્મકતસ્સ આવુસો ભિક્ખુનો અનુદૂતં દાતુઞ્ચ તેન અનુદૂતેન સદ્ધિં ગન્ત્વા યથાખુંસિતં ગહપતિં ખમાપેતું ચ ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે આયસ્મન્તંયેવ સુધમ્મં આરબ્ભ અનુઞ્ઞાતં, આયસ્મા ભન્તે સુધમ્મો મચ્છિકાસણ્ડં ગન્ત્વા મઙ્કુભૂતો નાસક્ખિ ચિત્તં ગહપતિં ખમાપેતું, તસ્મિં ભન્તે વત્થુસ્મિં અનુઞ્ઞાતં.

પુચ્છા – પટિસારણીયકમ્મકતસ્સ આવુસો ભિક્ખુનો કતિસુ વત્તેસુ સમ્મા વત્તન્તસ્સ તં કમ્મં પટિપ્પસ્સમ્ભેતું ભગવતા અનુઞ્ઞાતં.

વિસ્સજ્જના – અટ્ઠારસસુ ભન્તે વત્તેસુ સમ્મા વત્તન્તસ્સ પટિસારણીય કમ્મકતસ્સ ભિક્ખુનો તં કમ્મં પટિપ્પસ્સમ્ભેતું ભગવતા અનુઞ્ઞાતં.

પુચ્છા – આપત્તિં આવુસો આપજ્જિત્વા તં આપત્તિં પસ્સિતું વા પટિકાતું વા ન ઇચ્છન્તસ્સ ભિક્ખુનો આપત્તિયા અદસ્સને વા અપ્પટિકમ્મે વા ઉક્ખેપનીયકમ્મં કાતું ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – કોસમ્બિયં ભન્તે આયસ્મન્તં છન્નત્થેરં આરબ્ભ પઞ્ઞત્તં, આયસ્મા ભન્તે છન્નો આપત્તિં આપજ્જિત્વા ન ઇચ્છિ તં આપત્તિં પસ્સિતું વા પટિકાતું વા, તસ્મિં ભન્તે વત્થુસ્મિં પઞ્ઞત્તં.

પુચ્છા – આપત્તિયા આવુસો અદસ્સનેન વા અપ્પટિકમ્મે વા ઉક્ખેપનીય કમ્મકતેન ભિક્ખુના કતિસુ વત્તેસુ સમ્મા વત્તિતબ્બં.

વિસ્સજ્જના – તેચત્તાલીસાય ભન્તે વત્તેસુ સમ્મા વત્તિતબ્બં.

પુચ્છા – ઉક્ખેપનીયકમ્મકતસ્સ આવુસો ભિક્ખુનો સમ્મા વત્તન્તસ્સ તં કમ્મં પટિપ્પસ્સમ્ભેતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – કોસમ્બિયં ભન્તે આયસ્મન્તંયેવ છન્નં આરબ્ભ અનુઞ્ઞાતં, આયસ્મા ભન્તે છન્નો સઙ્ઘેન આપત્તિયા અદસ્સને વા અપ્પટિકમ્મે વા ઉક્ખેપનીયકમ્મકતો સમ્મા વત્તેસિ લોમંપાતેસિ નેત્થારં વત્તેસિ સઙ્ઘં ઉપસઙ્કમિત્વા તસ્સ કમ્મસ્સ પટિપ્પસ્સદ્ધિયા યાચિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – પાપિકં આવુસો દિટ્ઠિં ગહેત્વા તં દિટ્ઠિં ન પટિનિસ્સજ્જન્તસ્સ પાપિકાય દિટ્ઠિયા અપ્પટિનિસ્સગ્ગે ઉક્ખેપનીયકમ્મં કાતું ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે અરિટ્ઠં ભિક્ખું ગદ્ધબાધિપુબ્બં આરબ્ભ પઞ્ઞત્તં, ભગવતિ ભન્તે સાવત્થિયં વિહરતિ અરિટ્ઠસ્સ નામ ભિક્ખુનો ગદ્ધબાધિપુબ્બસ્સ એવરૂપં પાપકં દિટ્ઠિગતં ઉપ્પન્નં અહોસિ ‘‘તથાહં ભગવતા ધમ્મં દેસિતં આજાનામિ, યથાયેમે અન્તરાયિકા ધમ્મા વુત્તા ભગવતા, તે પટિસેવતો નાલં અન્તરાયાયા’’તિ, તસ્મિં ભન્તે વત્થુસ્મિં પઞ્ઞત્તં.

પુચ્છા – પાપિકાય આવુસો દિટ્ઠિયા અપ્પટિનિસ્સગ્ગે ઉક્ખેપનીયકમ્મકતેન ભિક્ખુના કતિસુ વત્તેસુ સમ્મા વત્તિતબ્બં.

વિસ્સજ્જના – તેચત્તાલીસાય ભન્તે વત્તેસુ સમ્મા વત્તિતબ્બં.

પુચ્છા – કમ્મક્ખન્ધકં પુચ્છિસ્સં, સનિદાનિ સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – કમ્મક્ખન્ધકં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે એકા આપત્તિ.

૨. પારિવાસિકક્ખન્ધક

પુચ્છા – પારિવાસિકસ્સ આવુસો પકતત્તાનં ભિક્ખૂનં અભિવાદનાદીનિ સાદિયન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે પારિવાસિકે ભિક્ખૂ આરબ્ભ પઞ્ઞત્તં, પારિવાસિકા ભન્તે ભિક્ખૂ સાદિયિંસુ પકતત્તાનં ભિક્ખૂનં અભિવાદનાદીનિ, તસ્મિં ભન્તે વત્થુસ્મિં પઞ્ઞત્તં.

પુચ્છા – પારિવાસિકેન આવુસો ભિક્ખુના કતિસુ વત્તેસુ સમ્મા વત્તિતબ્બં.

વિસ્સજ્જના – પારિવાસિકેન ભન્તે ભિક્ખુના ચતુનવુતિયા વત્તેસુ સમ્મા વત્તિતબ્બં.

પુચ્છા – પારિવાસિકં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – પારિવાસિકં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે એકા આપત્તિ.

૩. સમુચ્ચયક્ખન્ધક

પુચ્છા – સમુચ્ચયં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – સમુચ્ચયં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે એકા આપત્તિ.

૪. સમથક્ખન્ધક

પુચ્છા – અસમ્મુખીભૂતાનં આવુસો ભિક્ખૂનં તજ્જનીયં વા નિયસ્સં વા પબ્બાજનીયં વા પટિસારણીયં વા ઉક્ખેપનીયં વા કમ્મં કરોન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ અસમ્મુખીભૂતાનં ભિક્ખૂનં કમ્મં અકંસુ તજ્જનીયમ્પિ નિયસ્સમ્પિ પબ્બાજનીયમ્પિ પટિસારણીયમ્પિ ઉક્ખેપનીયમ્પિ, તસ્મિં ભન્તે વત્થુસ્મિં પઞ્ઞત્તં.

પુચ્છા – સતિવેપુલ્લપત્તસ્સ આવુસો ભિક્ખુનો સતિવિનયં દાનં ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે મેત્તિયભૂમજકે ભિક્ખૂ આરબ્ભ અનુઞ્ઞાતં મેત્તિયભૂમજકા ભન્તે ભિક્ખૂ આયસ્મન્તં દબ્બં મલ્લપુત્તં અમૂલિકાય સીલવિપત્તિયા અનુદ્ધંસેસું, તસ્મિં ભન્તે વત્થુસ્મિં અનુઞ્ઞાતં.

પુચ્છા – કતિપનાવુસો એત્થ ધમ્મિકાનિ સતિવિનયદાનાનિ.

વિસ્સજ્જના – પઞ્ચિમાનિ ભન્તે ધમ્મિકાનિ સતિવિનયસ્સ દાનાનિ, સુદ્ધો હોતિ ભિક્ખુ અનાપત્તિકો, અનુવદન્તિ ચ નં, યાચતિ ચ, તસ્સ સઙ્ઘો સતિવિનયં દેતિ ધમ્મેન સમગ્ગેન, ઇમાનિ ખો ભન્તે પઞ્ચ ધમ્મિકાનિ સતિ વિનયસ્સ દાનાનિ.

પુચ્છા – અમૂળ્હસ્સ આવુસો ભિક્ખુનો અમૂળ્હવિનયં દાતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલા ભન્તે ભિક્ખૂ ગગ્ગં ભિક્ખું ઉમ્મત્તકેન ચિત્તવિપરિયાસકતેન અજ્ઝાચિણ્ણેન આપત્તિયા ચોદેસું ‘‘સરતા યસ્મા એવરૂપિં આપત્તિં આપજ્જિતા’’તિ, સો એવં વદેતિ ‘‘અહં ખો આવુસો ઉમ્મત્તકો અહોસિ ચિત્તવિપરિયાસકતો, તેન મે ઉમ્મત્તકેન ચિત્તવિપરિયાસકતેન બહું અસ્સામણકં અજ્ઝાચિણ્ણં ભાસિતપરિક્કન્તં, નાહં તં સરામિ, મૂળ્હેન મે એતં કત’’ન્તિ. એવમ્પિ નં વુચ્ચમાના ચોદેન્તેવ ‘‘સરતા યસ્મા એવરૂપિં આપત્તિં આપજ્જિતા’’તિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – કતિ આવુસો અધમ્મિકાનિ અમૂળ્હવિનયસ્સ દાનાનિ, વિભજિત્વા કથેહિ.

વિસ્સજ્જના – તીણિ ભન્તે અધમ્મિકાનિ અમૂળ્હવિનયસ્સ દાનાનિ, ઇધ ભન્તે ભિક્ખુ આપત્તિં આપન્નો હોતિ, તમેનં ચોદેતિ સઙ્ઘો વા સમ્બહુલા વા એકપુગ્ગલો વા ‘‘સરતાયસ્મા એવરૂપિં આપત્તિં આપજ્જિતા’’તિ, સો સરમાનોવ એવં વદેતિ ‘‘ન ખો અહં આવુસો સરામિ એવરૂપિં આપત્તિં આપજ્જિતા’’તિ. અઞ્ઞો સરમાનોવ એવં વદેતિ ‘‘સરામિ ખો અહં આવુસો યથા સુપિનન્તેના’’તિ. અઞ્ઞો અનુમ્મત્તકોવ ઉમ્મત્તકાલયં કરોતિ ‘‘અહમ્પિ ખો એવં કરોમિ, તુમ્હેપિ એવં કરોથ, મય્હમ્પિ એતં કપ્પતિ, તુમ્હાકમ્પેતં કપ્પતી’’તિ. એસં સઙ્ઘો અમૂળ્હવિનયં દેતિ, અધમ્મિકં ભન્તે અમૂળ્હવિનયસ્સ દાનં. ઇમાનિ ખો ભન્તે તીણિ અધમ્મિકાનિ અમૂળ્હવિનયસ્સ દાનાનિ.

પુચ્છા – કતિ આવુસો ધમ્મિકાનિ અમૂળ્હવિનયસ્સ દાનાનિ, વિભજિત્વા કથેહિ.

વિસ્સજ્જના – તીણિ ભન્તે ધમ્મિકાનિ અમૂળ્હવિનયસ્સ દાનાનિ, ઇધ ભન્તે ભિક્ખુ ઉમ્મત્તકો હોતિ ચિત્તવિપરિયાસકતો તેન ઉમ્મત્તકેન ચિત્તવિપરિયાસકતેન બહું અસ્સામણકં અજ્ઝાચિણ્ણં હોતિ ભાસિતપરિક્કન્તં, તમેનં ચોદેતિ સઙ્ઘો વા સમ્બહુલા વા એકપુગ્ગલો વા ‘‘સરતાયસ્મા એવરૂપિં આપત્તિં આપજ્જિતા’’તિ, સો અસ્સરમાનોવ એવં વદેતિ ‘‘ન ખો અહં આવુસો સરામિ એવરૂપિં આપત્તિં આપજ્જિતા’’તિ. અઞ્ઞોપિ અસ્સરમાનોવ એવં વદેતિ ‘‘સરામિ ખો અહં આવુસો યથા સુપિનન્તેના’’તિ. અઞ્ઞોપિ ઉમ્મત્તકોવ ઉમ્મત્તકાલયં કરોતિ ‘‘અહમ્પિ એવં કરોમિ, તુમ્હેપિ એવં કરોથ, મય્હમ્પિ એતં કપ્પતિ, તુમ્હાકમ્પેતં કપ્પતી’’તિ. એસં ભન્તે તિણ્ણં ભિક્ખૂનં સઙ્ઘો અમૂળ્હવિનયં દેતિ, ધમ્મિકં ભન્તે અમૂળ્હવિનયસ્સ દાનં. ઇમાનિ ખો ભન્તે તીણિ ધમ્મિકાનિ અમૂળ્હવિનયસ્સ દાનાનિ.

પુચ્છા – અપ્પટિઞ્ઞાય આવુસો ભિક્ખૂનં તજ્જનીયાદીનિ કમ્માનિ કરોન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ અપ્પટિઞ્ઞાય ભિક્ખૂનં કમ્માનિ અકંસુ તજ્જનીયાદીનિ, તસ્મિં ભન્તે વત્થુસ્મિં પઞ્ઞત્તં.

પુચ્છા – કથં આવુસો અધમ્મિકં હોતિ પટિઞ્ઞાતકરણં.

વિસ્સજ્જના – અઞ્ઞથા ભન્તે આપત્તિં આપજ્જન્તસ્સ અઞ્ઞથા પટિજાનન્તસ્સ યથા સો પટિજાનાતિ, તથા સઙ્ઘો કારેતિ, એવં ખો ભન્તે અધમ્મિકં હોતિ પટિઞ્ઞાતકરણં.

પુચ્છા – કથં આવુસો ધમ્મિકં હોતિ પટિઞ્ઞાતકરણં.

વિસ્સજ્જના – યં ભન્તે આપત્તિં આપજ્જન્તસ્સ તમેવ પટિજાનન્તસ્સ તેનેવ સઙ્ઘો કારેતિ, એવં ખો ભન્તે ધમ્મિકં પટિઞ્ઞાતકરણં.

પુચ્છા – યેભુય્યસિકાય આવુસો અધિકરણં વૂપસમેતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલા ભન્તે ભિક્ખૂ ભણ્ડનજાતા કલહજાતા વિવાદાપન્ના અઞ્ઞમઞ્ઞં મુખસત્તીહિ વિતુદન્તા વિહરિંસુ, ન સક્કોન્તિ તં અધિકરણં વૂપસમેતું, તસ્મિં ભન્તે વત્થુસ્મિં અનુઞ્ઞાતં.

પુચ્છા – કથં આવુસો અધિકરણં યેભુય્યસિકાય વૂપસમેતબ્બં.

વિસ્સજ્જના – પઞ્ચહિ ભન્તે અઙ્ગેહિ સમન્નાગતો ભિક્ખુ સલાકગ્ગાહાપકો સમ્મન્નિતબ્બો, તેન ભન્તે સલાકગ્ગાહાપકેન સલાકા ગાહાતબ્બા યથા બહુતરા ભિક્ખૂ ધમ્મવાદિનો વદન્તિ તથા તં અધિકરણં વૂપસમેતબ્બં, એવં ખો ભન્તે યેભુય્યસિકાય અધિકરણં વૂપસમેતબ્બં.

પુચ્છા – કતિ આવુસો અધમ્મિકા સલાકગ્ગાહા.

વિસ્સજ્જના – દસ ભન્તે અધમ્મિકા સલાકગ્ગાહા, ઓરમત્તકઞ્ચ અધિકરણં હોતિ, ન ચ ગતિગતં હોતિ, ન ચ સરિતસારિતં હોતિ, જાનાતિ ‘અધમ્મવાદી બહુતરા’તિ, અપ્પેવ નામ અધમ્મવાદી બહુતરા અસ્સૂતિ, જાનાતિ ‘સઙ્ઘો ભિજ્જિસ્સતી’તિ, અપ્પેવ નામ સઙ્ઘો ભિજ્જેય્યાતિ, અધમ્મેન ગણ્હન્તિ, વગ્ગા ગણ્હન્તિ, ન ચ યથાદિટ્ઠિયા ગણ્હન્તિ, ઇમે ખો ભન્તે દસ અધમ્મિકા કલાકગ્ગાહા.

પુચ્છા – કતિ આવુસો ધમ્મિકા સલાકગ્ગાહા.

વિસ્સજ્જના – દસ ભન્તે ધમ્મિકા સલાકગ્ગાહા વુત્તવિપરિયાયેન.

પુચ્છા – પાપુસ્સન્નસ્સ આવુસો ભિક્ખુસ્સ તસ્સ પાપિયસિકા કમ્મં કાતું ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે ઉપવાળં ભિક્ખું આરબ્ભ પઞ્ઞત્તં, ઉપવાળો ભન્તે ભિક્ખુ સઙ્ઘમજ્ઝે આપત્તિયા અનુયુઞ્જિયમાનો અવજાનિત્વા પટિજાનાતિ, પટિજાનિત્વા અવજાનાતિ, અઞ્ઞેનઞ્ઞં પટિચરતિ, સમ્પજાનમુસા ભાસતિ, તસ્મિં ભન્તે વત્થુસ્મિં પઞ્ઞત્તં.

પુચ્છા – કતિ આવુસો ધમ્મિકાનિ તસ્સપાપિયસિકા કમ્મસ્સ કરણાનિ.

વિસ્સજ્જના – પઞ્ચિમાનિ ભન્તે ધમ્મિકાનિ તસ્સપાપિયસિકા કમ્મસ્સ કરણાનિ. અસુચિ ચ હોતિ, અલજ્જી ચ, સાનુવાદો ચ, તસ્સ સઙ્ઘો તસ્સપાપિયસિકા કમ્મં કરોતિ ધમ્મેન સમગ્ગેન, ઇમાનિ ખો ભન્તે પઞ્ચ ધમ્મિકાનિ તસ્સ પાપિયસિકા કમ્મસ્સ કરણાનિ.

પુચ્છા – તસ્સ પાપિયસિકાકમ્મકતેન આવુસો ભિક્ખુના કતિસુ વત્તેસુ સમ્મા વત્તિતબ્બં.

વિસ્સજ્જના – તસ્સ પાપિયસિકાકમ્મકતેન ભન્તે ભિક્ખુના અટ્ઠારસસુ વત્તેસુ સમ્મા વત્તિતબ્બં. ન ઉપસમ્પાદેતબ્બં, ન નિસ્સયો દાતબ્બો, ન સામણેરો ઉપટ્ઠાપેતબ્બો, એવમાદીસુ ભન્તે અટ્ઠારસસુ વત્તેસુ સમ્મા વત્તિતબ્બં.

પુચ્છા – કતિ આવુસો અધિકરણાનિ સમથેહિ વૂપસમેતબ્બાનિ.

વિસ્સજ્જના – ચત્તારિમાનિ ભન્તે અધિકરણાનિ સમથેહિ વૂપસમેતબ્બાનિ, વિવાદાધિકરણં અનુવાદાધિકરણં આપત્તાધિકરણં કિચ્ચાધિકરણં, ઇમાનિ ભન્તે ચત્તારિ અધિકરણાનિ સમથેહિ વૂપસમેતબ્બાનિ.

પુચ્છા – કિં આવુસો વિવાદાધિકરણસ્સ મૂલં.

વિસ્સજ્જના – છ ભન્તે વિવાદમૂલાનિ વિવાદાધિકરણસ્સ મૂલં, તીણિપિ અકુસલમૂલાનિ વિવાદાધિકરણસ્સ મૂલં, તીણિપિ કુસલમૂલાનિ વિવાદાધિકરણસ્સ મૂલં, ઇદં ભન્તે વિવાદાધિકરણસ્સ મૂલં.

પુચ્છા – કિં પનાવુસો અનુવાદાધિકરણસ્સ મૂલં.

વિસ્સજ્જના – છ ભન્તે અનુવાદમૂલાનિ અનુવાદાધિકરણસ્સ મૂલં, તીણિપિ અકુસલમૂલાનિ અનુવાદાધિકરણસ્સ મૂલં, તીણિપિ કુસલમૂલાનિ અનુવાદાધિકરણસ્સ મૂલં, કાયોપિ અનુવાદાધિકરણસ્સ મૂલં, વાચાપિ અનુવાદાધિકરણસ્સ મૂલં, ઇદં ખો ભન્તે અનુવાદાધિકરણસ્સ મૂલં.

પુચ્છા – કિં પનાવુસો આપત્તાધિકરણસ્સ મૂલં.

વિસ્સજ્જના – છ ભન્તે આપત્તિસમુટ્ઠાના આપત્તાધિકરણસ્સ મૂલં, અત્તિ ભન્તે આપત્તિ કાયતો સમુટ્ઠાતિ ન વાચતો ન ચિત્તતો, અત્થિ ભન્તે આપત્તિ વાચતો સમુટ્ઠાતિ ન કાયતો ન ચિત્તતો, અત્થિ ભન્તે આપત્તિ કાયતો ચ વાચતો ચ સમુટ્ઠાતિ ન ચિત્તતો, અત્થિ ભન્તે આપત્તિ કાયતો ચ ચિત્તતો ચ સમુટ્ઠાતિ ન વાચતો, અત્થિ ભન્તે આપત્તિ વાચતો ચ ચિત્તતો ચ સમુટ્ઠાતિ ન કાયતો, અત્થિ ભન્તે આપત્તિ કાયતો ચ વાચતો ચ ચિત્તતો ચ સમુટ્ઠાતિ, ઇમાનિ ભન્તે છ આપત્તિ સમુટ્ઠાનાનિ આપત્તાધિકરણસ્સ મૂલં.

પુચ્છા – કિં પનાવુસો કિચ્ચાધિકરણસ્સ મૂલં.

વિસ્સજ્જના – કિચ્ચાધિકરણસ્સ ભન્તે એકં મૂલં સઙ્ઘો.

પુચ્છા – સમથં આવુસો પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – સમથં ભન્તે વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે દ્વે આપત્તિયો.

૫. ખુદ્દકવત્થુક્ખન્ધક

પુચ્છા – નહાયન્તેન આવુસો ભિક્ખુના રુક્ખે વા થમ્ભે વા કુટ્ટે વા કાયં ઉગ્ઘંસેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ નહાયમાના રુક્ખેપિ થમ્ભેપિ કુટ્ટેપિ કાયં ઉગ્ઘંસેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – ગન્ધબ્બહત્થકેન વા આવુસો કુરુવિન્દકસુત્તિયા વા મલ્લકેન વા નહાયન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયેવ ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ ગન્ધબ્બહત્થકેનપિ કુરુવિન્દકસુત્તિયાપિ મલ્લકેનપિ નહાયિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – પાણિના આવુસો પરિકમ્મં કાતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલા ભન્તે ભિક્ખૂ પિટ્ઠિપરિકમ્મં કાતું કુક્કુચ્ચાયિંસુ, તસ્મિં ભન્તે વત્થુસ્મિં અનુઞ્ઞાતં.

પુચ્છા – વલ્લિકં વા આવુસો પામઙ્ગં વા કણ્ઠસુત્તકં વા કટિસુત્તકં વા ઓવટ્ટિકં વા કાયુરં વા હત્થાભરણં વા અઙ્ગુલિમુદ્દિકં વા ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ વલ્લિકાદીનિ ધારેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – દીઘે આવુસો કેસે ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ દીઘે કેસે ધારેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – કોચ્છેનવા આવુસો ફણકેનવા હત્થફણકેનવા કેસે ઓસણ્ઠેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયેવ ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ કોચ્છાદીહિ કેસે ઓસણ્ઠેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – આદાસે વા આવુસો ઉદકપત્તે વા મુખનિમિત્તં ઓલોકેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયેવ ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ આદાસેપિ ઉદકપત્તેપિ મુખનિમિત્તં ઓલોકેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – આબાધપચ્ચયા પનાવુસો આદાસે વા ઉદકપત્તે વા મુખનિમિત્તં ઓલોકેતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે અઞ્ઞતરં ભિક્ખું આરબ્ભ અનુઞ્ઞાતં, ભગવતિ ભન્તે રાજગહે વિહરતિ અઞ્ઞતરસ્સ ભિક્ખુનો મુખે વણો અહોસિ, સો ભિક્ખૂ એતદવોચ ‘‘કીદિસો મે આવુસો વણો’’તિ, ભિક્ખૂ એવમાહંસુ ‘‘એદિસો તે આવુસો વણો’’તિ, સો ન સદ્દહતિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – મુખાલેપનાદીનિ આવુસો કરોન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ મુખાલેપનાદીનિ અકંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – નચ્ચં વા આવુસો ગીતં વા વાદિતં વા દસ્સનાય ગચ્છન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે નચ્ચમ્પિ ગીતમ્પિ વાદિતમ્પિ દસ્સનાય ગચ્છિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – કથં આવુસો નચ્ચાદીનિ પસ્સન્તસ્સ આપત્તિ હોતિ, કથં પન અનાપત્તિ.

વિસ્સજ્જના – નચ્ચં વા ભન્તે ગીતં વા વાદિતં વા દસ્સનાય ગચ્છતિ આપત્તિ દુક્કટસ્સ, યત્થ ઠિતો પસ્સતિ વા સુણાતિ વા આપત્તિ દુક્કટસ્સ, દસ્સનૂપચારં વિજહિત્વા પુનપ્પુનં પસ્સતિ આપત્તિ દુક્કટસ્સ, આરામે ઠિતસ્સ પસ્સતો અનાપત્તિ, વિહારતો પન વિહારં પસ્સિસ્સામીતિ ગચ્છતો આપત્તિયેવ, યત્થ ઠિતો પસ્સતિ વા સુણાતિ વા આપત્તિ દુક્કટસ્સ, આસનસાલાય નિસિન્નો પસ્સતિ અનાપત્તિ, પસ્સિસ્સામીતિ વુટ્ઠહિત્વા ગચ્છતિ આપત્તિ દુક્કટસ્સ, યત્થ ઠિતો પસ્સતિ વા સુણાતિ વા આપત્તિ દુક્કટસ્સ, પતિપથં ગચ્છન્તો પસ્સતિ અનાપત્તિ, ગીવં પરિવત્તેત્વા પસ્સતો પન આપત્તિ ભન્તે.

પુચ્છા – આયતકેન આવુસો ગીતસ્સરેન ધમ્મં ગાયન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ આયતકેન ગીતસ્સરેન ધમ્મં ગાયિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – દારુપત્તં આવુસો ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે આયસ્મન્તં પિણ્ડોલભારદ્વાજં આરબ્ભ પઞ્ઞત્તં, આયસ્મા ભન્તે પિણ્ડોલભારદ્વાજો છવસ્સ દારુપત્તસ્સ કારણા ગિહીનં ઉત્તરિમનુસ્સધમ્મં ઇદ્ધિપાટિહારિયં દસ્સેતિ, તસ્મિં ભન્તે વત્થુસ્મિં પઞ્ઞત્તં.

ન ચ ભિક્ખવે દારુપત્તો ધારેતબ્બો, યો ધારેય્ય આપત્તિ દુક્કટસ્સ –

પુચ્છા – ભગવતા આવુસો ઉચ્ચાવચે પત્તે પટિક્ખિપિત્વા અયો પત્તો ભૂમિપત્તોતિ ઇમેયેવ દ્વે પત્તા કત્થ અનુઞ્ઞાતા, કં આરબ્ભ કિસ્મિં વત્થુસ્મિં અનુઞ્ઞાતા.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ અનુઞ્ઞાતા, છબ્બગ્ગિયા ભન્તે ભિક્ખૂ ઉચ્ચાવચે પત્તે ધારેસું સોવણ્ણમયા રૂપિયમયા, તસ્મિં ભન્તે વત્થુસ્મિં અનુઞ્ઞાતા.

પુચ્છા – સોદકં આવુસો પત્તં પટિસામેન્તસ્સ ચ ઓતાપેન્તસ્સચ ઉણ્હે પત્તં નિદહન્તસ્સ ચ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ સોદકં પત્તં પટિસામેસું, ઓતાપેસું, ઉણ્હે પત્તં નિદહિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – છવસીસપત્તં આવુસો ધારેન્તસ્સ ચ સબ્બપંસુકૂલિકસ્સ ચ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે અઞ્ઞતરં ભિક્ખું આરબ્ભ પઞ્ઞત્તં, અઞ્ઞતરો ભન્તે ભિક્ખુ સબ્બપંસુકૂલિકો અહોસિ, સો છવસીસસ્સ પત્તં ધારેસિ, અઞ્ઞતરા ઇત્થી પસ્સિત્વા ભીતા વિસ્સરમકાસિ ‘‘અભું મે પિસાચો વતાય’’ન્તિ, તસ્મિં ભન્તે વત્થુસ્મિં પઞ્ઞત્તં.

પુચ્છા – ચલકાનિ વા આવુસો અટ્ઠિકાનિ વા ઉચ્છિટ્ઠોદકં વા પત્તેન નીહરન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ ચલકાનિપિ અટ્ઠિકાનિપિ ઉચ્છિટ્ઠો દકમ્પિ પત્તેન નીહરિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – ઉપાહનત્થવિકા આવુસો ભગવતા કત્થ અનુઞ્ઞાતા, કં આરબ્ભ કિસ્મિં વત્થુસ્મિં અનુઞ્ઞાતા.

વિસ્સજ્જના – અન્તરા ચ ભન્તે રાજગહં અન્તરા ચ વેસાલિં અઞ્ઞતરં ભિક્ખું આરબ્ભ અનુઞ્ઞાતા, અઞ્ઞતરો ભન્તે ભિક્ખુ ઉપાહનાયો કાયબન્ધનેન બન્ધિત્વા ગામં પિણ્ડાય પાવિસિ, અઞ્ઞતરો ઉપાસકો તં ભિક્ખું અભિવાદેન્તો ઉપાહનાયો સીસેન ઘટ્ટેતિ, સો ભિક્ખુ મઙ્કુ અહોસિ, તસ્મિં ભન્તે વત્થુસ્મિં અનુઞ્ઞાતા.

પુચ્છા – અદ્ધાનમગ્ગપ્પટિપન્નેન આવુસો પરિસ્સાવનં યાચિયમાનેન ન દદન્તસ્સ ચ અપ્પટિસ્સાવનકેન અદ્ધાનં પટિપજ્જન્તસ્સ ચ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – અન્તરા ચ ભન્તે રાજગહં અન્તરા ચ વેસાલિં અઞ્ઞતરં ભિક્ખું આરબ્ભ પઞ્ઞત્તં, અઞ્ઞતરો ભન્તે ભિક્ખુ પરિસ્સાવનં યાચિયમાનો ન અદાસિ, તસ્મિં ભન્તે વત્થુસ્મિં પઞ્ઞત્તં.

પુચ્છા – પુપ્ફાભિકિણ્ણે આવુસો સયને સયન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – વેસાલિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ પુપ્ફાભિકિણ્ણેસુ સયનેસુ સયિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – એકભાજને વા આવુસો ભુઞ્જન્તાનં એકથાલકે વા પિવન્તાનં એકત્થરણપાવુરણાનં વા તુવટ્ટાનં દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – વેસાલિયં ભન્તે છબ્બગ્ગિયેવ ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ એકભાજનેપિ ભુઞ્જિંસુ, એકથાલકેપિ પિવિંસુ, એકમઞ્ચકેપિ તુવટ્ટેસું, એકત્થરણાપિ તુવટ્ટેસું, એકપાવુરણાપિ તુવટ્ટેસું, એકત્થરણપાવુરણાપિ, તસ્મિં ભન્તે વત્થુસ્મિં પઞ્ઞત્તં.

પુચ્છા – ચામરિબીજનિં આવુસો પટિક્ખિપિત્વા તિસ્સો બીજનિયો ભગવતા કત્થ અનુઞ્ઞાતા, કિસ્મિઞ્ચ વત્થુસ્મિં અનુઞ્ઞાતા.

વિસ્સજ્જના – સાવત્થિયં ભન્તે અનુઞ્ઞાતા, સાવત્થિયં ભન્તે ભગવતિ વિહરતિ સઙ્ઘસ્સ ચામરિબીજની ઉપ્પન્ના અહોસિ, ભગવતો એતમત્થં આરોચેસું, તસ્મિં ભન્તે વત્થુસ્મિં અનુઞ્ઞાતા.

ન ભિક્ખવે ચામરિબીજની ધારેતબ્બા, યો ધારેય્ય, આપત્તિ દુક્કટસ્સ. અનુજાનામિ ભિક્ખવે તિસ્સો બીજનિયો વાકમયં ઉસીરમયં મોરપિઞ્છા મયં.

પુચ્છા – દીઘે આવુસો નખે ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે અઞ્ઞતરં ભિક્ખું આરબ્ભ પઞ્ઞત્તં, અઞ્ઞતરો ભન્તે ભિક્ખુ દીઘે નખે ધારેસિ, તસ્મિં ભન્તે વત્થુસ્મિં પઞ્ઞત્તં.

પુચ્છા – કત્તરિકાય આવુસો કેસે છેદાપેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ કત્તરિકાય કેસે છિન્દિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – દીઘે આવુસો નાસિકાલોમે ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ દીઘાનિ નાસિકાલોમાનિ ધારેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – ઉચ્ચાવચા આવુસો કણ્ણમલહરણિયો પટિક્ખિપિત્વા દસ કણ્ણમલહરણિયો ભગવતા કત્થ અનુઞ્ઞાતા, કં આરબ્ભ કિસ્મિં વત્થુસ્મિં અનુઞ્ઞાતા.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ અનુઞ્ઞાતા, છબ્બગ્ગિયા ભન્તે ભિક્ખૂ ઉચ્ચાવચા કણ્ણમલહરણિયો ધારેસું સોવણ્ણમયં રૂપિયમયં, તસ્મિં ભન્તે વત્થુસ્મિં અનુઞ્ઞાતા.

પુચ્છા – સઙ્ઘાટિપલ્લત્થિકાય નિસીદન્તસ્સ આવુસો દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ સઙ્ઘાટિપલ્લત્થિકાય નિસીદિંસુ, સઙ્ઘાટિયા પત્તા લુજ્જિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – અકાયબન્ધનેન આવુસો ગામં પવિસન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે અઞ્ઞતરં ભિક્ખું આરબ્ભ પઞ્ઞત્તં, અઞ્ઞતરો ભન્તે ભિક્ખુ અકાયબન્ધનો ગામં પિણ્ડાય પાવિસિ, તસ્મિં ભન્તે વત્થુસ્મિં પઞ્ઞત્તં.

પુચ્છા – ગિહિનિવત્થં આવુસો નિવાસેન્તસ્સ ચ, ગિહિપારુતં પારુપન્તસ્સ ચ, સંવેલ્લિયં નિવાસેન્તસ્સ ચ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ ગિહિનિવત્થં નિવાસિંસુ, ગિહિપારુતમ્પિ પારુપિંસુ, સંવેલ્લિયમ્પિ નિવાસિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – ઉભતો કાજં આવુસો ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ ઉભતો કાજં ધારેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – લોકાયતં આવુસો પરિયાપુણન્તસ્સ ચ વાચેન્તસ્સ ચ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.