૩. વસ્સુપનાયિકક્ખન્ધક

પુચ્છા – વસ્સૂપનાયિકં આવુસો ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે સમ્બહુલા ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ હેમન્તમ્પિ ગિમ્હમ્પિ વસ્સમ્પિ ચારિકં ચરિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – કતિપનાવુસો વસ્સૂપનાયિકા ભગવતા અનુઞ્ઞાતા.

વિસ્સજ્જના – દ્વેમા ભન્તે વસ્સૂપનાયિકા ભગવતા અનુઞ્ઞાતા પુરિમિકા પચ્છિમિકા, અપરજ્જુગતાય ભન્તે આસળ્હિયા પુરિમિકા ઉપગન્તબ્બા, માસગતાય ભન્તે આસળ્હિયા પચ્છિમિકા ઉપગન્તબ્બા, ઇમા ખો ભન્તે દ્વે વસ્સૂપનાયિકા ભગવતા અનુઞ્ઞાતા.

પુચ્છા – વસ્સં આવુસો ઉપગન્ત્વા પુરિમં વા તેમાસં પચ્છિમં વા તેમાસં અવસિત્વા ચારિકં પક્કમન્તસ્સ દુક્કટં કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ વસ્સં ઉપગન્ત્વા અન્તરા વસ્સં ચારિકં પક્કમિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – સત્તાહ કરણીયેન આવુસો પહિતે ગન્તું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલા ભન્તે ભિક્ખૂ ઉદેનેન ઉપાસકેન પહિતે ન ગચ્છિંસુ, તસ્મિં ભન્તે વત્થુસ્મિં અનુઞ્ઞાતં.

પુચ્છા – સત્તાહકરણીયેન આવુસો સત્તન્નં અપહિતેપિ ગન્તું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે અઞ્ઞતરસ્સ ભિક્ખુનો માતુગિલાન વત્થુસ્મિં અનુઞ્ઞાતં.

અનુજાનામિ ભિક્ખવે સત્તન્નં સત્તાહકરણીયેન અપહિતેપિ ગન્તું, પગેવ પહિતે.

પુચ્છા – કિસ્મિંચિ આવુસો અન્તરાયે સતિ અન્તોવસ્સં પક્કમિતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલા ભન્તે ભિક્ખૂ કોસલેસુ જનપદેસુ વસ્સં ઉપગચ્છિંસુ, તે વસ્સૂપગતા વાળેહિ ઉબ્બાળ્હા અહેસું, તસ્મિં ભન્તે વત્થુસ્મિં અનુઞ્ઞાતં.

પુચ્છા – રુક્ખ સુસિરે વા આવુસો રુક્ખવિટભિયા વા અજ્ઝોકાસે વા વસ્સં ઉપગચ્છન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ રુક્ખસુસિરેપિ રુક્ખવિટભિયાપિ અજ્ઝોકાસેપિ વસ્સં ઉપગચ્છિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – અસેનાસનિકેન આવુસો વસ્સં ઉપગચ્છન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – તસ્મિંયેવ ભન્તે સાવત્થિયં સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ અસેનાસનિકા વસ્સં ઉપગચ્છિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – છવકુટિકાય વા આવુસો છત્તે વા ચાટિયા વા વસ્સં ઉપગચ્છન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયંયેવ ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ છવકુટિકાયપિ છત્તેપિ ચાટિયાપિ વસ્સં ઉપગચ્છિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – પટિસ્સવં આવુસો વિસં વાદેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે આયસ્મન્તં ઉપનન્દં સક્યપુત્તં આરબ્ભ પઞ્ઞત્તં, આયસ્મા ભન્તે ઉપનન્દો સક્યપુત્તો રઞ્ઞો પસેનદિસ્સ કોસલસ્સ વસ્સં વાસં પટિસ્સુણિત્વા વિસંવાદેસિ, તસ્મિં ભન્તે વત્થુસ્મિં પઞ્ઞત્તં.

પુચ્છા – વસ્સૂપનાયિકં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – વસ્સૂપનાયિકં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે એકા આપત્તિ.