૪. પવારણાક્ખન્ધક

પુચ્છા – વસ્સં વુટ્ઠાનં આવુસો ભિક્ખૂનં તીહિ ઠાનેહિ પવારિતું ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલા ભન્તે ભિક્ખૂ સન્દિટ્ઠા સમ્ભત્તા અન્તોવસ્સં નેવ આલપિંસુ ન સલ્લપિંસુ, તસ્મિં ભન્તે વત્થુસ્મિં અનુઞ્ઞાતં.

અનુજાનામિ ભિક્ખવે વસ્સં વુટ્ઠાનં ભિક્ખૂનં તીહિ ઠાનેહિ પવારેતું, દિટ્ઠેવ વા સુતેન વા પરિસઙ્કાય વા.

પુચ્છા – કતિ આવુસો પવારણા દિવસવસેન ચ પુગ્ગલવસેન ચ કાતબ્બાકારવસેન ચ.

વિસ્સજ્જના – દિવસવસેન ભન્તે તિસ્સો પવારણા, તથા પુગ્ગલવસેન કાતબ્બાકારવસેનચ.

પુચ્છા – કતીનં આવુસો સઙ્ઘે પવારેતું ભગવતા અનુઞ્ઞાતં, કતીનં પનાવુસો અઞ્ઞમઞ્ઞં પવારેતું ભગવતા અનુઞ્ઞાતં.

વિસ્સજ્જના – પઞ્ચન્નં ભન્તે ભિક્ખૂનં સઙ્ઘે પવારેતું ભગવતા અનુઞ્ઞાતં, ચતુન્નં વા ભન્તે તિણ્ણં વા દ્વિન્નં વા અઞ્ઞમઞ્ઞં પવારેતું અનુઞ્ઞાતં.

પુચ્છા – એકેન પનાવુસો વસ્સંવુટ્ઠેન ભિક્ખુના કથં પટિપજ્જિતબ્બન્તિ ભગવતા અનુઞ્ઞાતં.

વિસ્સજ્જના – એકેન પન ભન્તે ભિક્ખુના ‘‘અજ્જ મે પવારણા’’તિ અધિટ્ઠાતબ્બન્તિ ભગવતા અનુઞ્ઞાતં.

પુચ્છા – પવારણં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – પવારણં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે તિસ્સો આપત્તિયો.