૫. ચમ્મક્ખન્ધક

સોણમથેર વત્થુ

પુચ્છા – ઉપાહનં આવુસો ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે આયસ્મન્તં સોણં આરબ્ભ અનુઞ્ઞાતં, આયસ્મતો ભન્તે સોણસ્સ અચ્ચારદ્ધવીરિયસ્સ ચઙ્કમતો પાદા ભિજ્જિંસુ, ચઙ્કમો લોહિતેન ફુટો અહોસિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – સબ્બનીલિકા વા આવુસો સબ્બપીતિકા વા સબ્બલોહિતિકા વા સબ્બમઞ્જિટ્ઠિકા વા સબ્બકણ્હા વા સબ્બમહારઙ્ગરત્તા વા સબ્બમહાનામરત્તા વા ઉપાહનાયો ધારેન્તસ્સ દુક્કટં ભગવતા કત્થ કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ સબ્બનીલિકાયો ઉપાહનાયો ધારેસું, સબ્બપીતિકાયો સબ્બલોહિતિકાયો સબ્બમઞ્જિટ્ઠિકાયો સબ્બકણ્હાયો સબ્બમહારઙ્ગરત્તા સબ્બમહાનામરત્તાયોપિ ઉપાહનાયો ધારેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – ખલ્લકબન્ધા વા આવુસો પુટબન્ધા વા પાલિગુણ્ઠિમા વા તૂલપુણ્ણિકા વા તિત્તિરપત્તિકા વા મેણ્ડવિસાણવદ્ધિકા વા અજવિસાણવદ્ધિકા વા વિચ્છિકાળિકા વા મોરપિઞ્છ પરિસિબ્બિકા વા ચિત્રા વા ઉપાહનાયો ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ ખલ્લકબન્ધા ઉપાહનાયોપિ ધારેસું, પુટબન્ધા ઉપાહનાયોપિ ધારેસું, પાલિગુણ્ઠિમા ઉપાહનાયોપિ ધારેસું, તૂલપુણ્ણિકા ઉપાહનાયોપિ ધારેસું, તિત્તિરપત્તિકા ઉપાહનાયોપિ ધારેસું, મેણ્ડવિસાણવદ્ધિકા ઉપાહનાયોપિ ધારેસું, અજવિસાણવદ્ધિકા ઉપાહનાયોપિ ધારેસું, વિચ્છિકાળિકા ઉપાહનાયોપિ ધારેસું, મોરપિઞ્છ પરિસિબ્બિતા ઉપાહનાયો ધારેસું, ચિત્રા ઉપાહનાયોપિ ધારેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – કટ્ઠપાદુકાયો આવુસો ધારેન્તસ્સ દુક્કટં ભગવતા કત્થ કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે છબ્બગ્ગીયેવ ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ રત્તિયા પચ્ચૂસસમયં પચ્ચુટ્ઠાય કટ્ઠપાદુકાયો અભિરુહિત્વા અજ્ઝોકાસે ચઙ્કમન્તિ ઉચ્ચાસદ્દા મહાસદ્દા ખટખટસદ્દા અનેકવિહિતં તિરચ્છાનકથં કથેન્તા, તસ્મિં ભન્તે વત્થુસ્મિં પઞ્ઞત્તં.

પુચ્છા – યાનેન આવુસો યાયન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ યાનેન યાયિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – ગિલાનસ્સ આવુસો યાનં ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે અઞ્ઞતરં ગિલાનં ભિક્ખું આરબ્ભ અનુઞ્ઞાતં, અઞ્ઞતરો ભન્તે ભિક્ખુ કોસલેસુ જનપદે સાવત્થિં ગચ્છન્તો ભગવન્તં દસ્સનાય અન્તરામગ્ગે ગિલાનો કુક્કુચ્ચાયન્તો યાનં નાભિરુહિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – ઉચ્ચાસયનમહાસયનાનિ આવુસો ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ ઉચ્ચાસયનમહાસયનાનિ ધારેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – ગોચમ્માનિ આવુસો ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે અઞ્ઞતરં પાપભિક્ખું આરબ્ભ પઞ્ઞત્તં, અઞ્ઞતરો ભન્તે ભિક્ખુ પાણાતિપાતે સમાદપેસિ, તસ્મિં ભન્તે વત્થુસ્મિં પઞ્ઞત્તં.

પુચ્છા – પચ્ચન્તિમેસુ આવુસો જનપદેસુ વિનયધરપઞ્ચમેન ગણેન ઉપસમ્પદા ચ ગુણઙ્ગુણૂપહનઞ્ચ ધુવનહાનઞ્ચ ચમ્માનિ અત્થરણાનિ ચ નિસ્સીમગતાનં ચીવરદાનઞ્ચાતિ ઇમાનિ પઞ્ચ ભગવતા કત્થ અનુઞ્ઞાતાનિ, કં આરબ્ભ કિસ્મિં વત્થુસ્મિં અનુઞ્ઞાતાનિ.

વિસ્સજ્જના – સાવત્થિયં ભન્તે આયસ્મન્તં સોણં કુટિકણ્ણં આરબ્ભ અનુઞ્ઞાતા, આયસ્મા ભન્તે સોણો કુટિકણ્ણો એતાનિ પઞ્ચવત્થૂનિ આયસ્મતો મહાકચ્ચાનસ્સ વચનેન ભગવન્તં યાચિ, તસ્મિં ભન્તે વત્થુસ્મિં અનુઞ્ઞાતા.

પુચ્છા – ચમ્મસઞ્ઞુત્તં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – ચમ્મસઞ્ઞુત્તં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે તિસ્સો આપત્તિયો.