૬. ભેસજ્જક્ખન્ધક

પુચ્છા – પઞ્ચ આવુસો ભેસજ્જાનિ પટિગ્ગહેત્વા કાલેપિ વિકાલેપિ પરિભુઞ્જિતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલાનં ભન્તે ભિક્ખૂનં સારદિકેન આબાધેન પુટ્ઠાનં યાગુપિ ન સમ્મા પરિણામં ગચ્છિ, ભત્તમ્પિ ભુત્તં ન સમ્મા પરિણામં ગચ્છિ, તે તેન કિસા અહેસું લૂખા દુબ્બણ્ણા ઉપ્પણ્ડુપ્પણ્ડુકજાતા ધમનિસન્થતગત્તા, તસ્મિં ભન્તે વત્થુસ્મિં અનુઞ્ઞાતં.

પુચ્છા – મૂલાદિભેસજ્જાનિ આવુસો ભગવતા કત્થ અનુઞ્ઞાતાનિ, કં આરબ્ભ કિસ્મિં વત્થુસ્મિં અનુઞ્ઞાતાનિ.

વિસ્સજ્જના – સાવત્થિયં ભન્તે સમ્બહુલે ગિલાને ભિક્ખૂ આરબ્ભ અનુઞ્ઞાતાનિ, સમ્બહુલાનં ગિલાનાનં ભિક્ખૂનં મૂલેહિ ભેસજ્જેહિ અત્થો અહોસિ, તસ્મિં ભન્તે વત્થુસ્મિં અનુઞ્ઞાતાનિ.

પુચ્છા – અન્તોવુટ્ઠંવા આવુસો અન્તોપક્કં વા સામંપક્કં વા પરિભુઞ્જન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે આયસ્મન્તં આનન્દં આરબ્ભ પઞ્ઞત્તં, આયસ્મા ભન્તે આનન્દો સામં તિલમ્પિ તણ્ડુલમ્પિ મુગ્ગમ્પિ વિઞ્ઞાપેત્વા અન્તો વાસેત્વા અન્તો સામં પચિ, તસ્મિં ભન્તે વત્થુસ્મિં પઞ્ઞત્તં.

સુપ્પિયા વત્થુ

પુચ્છા – મનુસ્સમંસં આવુસો પરિભુઞ્જન્તસ્સ થુલ્લચ્ચયઞ્ચ અપ્પટિવેક્ખિત્વા મંસં પરિભુઞ્જન્તસ્સ દુક્કટઞ્ચ ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – બારાણસિયં ભન્તે અઞ્ઞતરં ભિક્ખું આરબ્ભ પઞ્ઞત્તં, અઞ્ઞતરો ભન્તે ભિક્ખુ અપ્પટિવેક્ખિત્વા મનુસ્સમંસં ભુઞ્જિ, તસ્મિં ભન્તે વત્થુસ્મિં પઞ્ઞત્તં.

ન ભિક્ખવે મનુસ્સમંસં પરિભુઞ્જિતબ્બં, યો પરિભુઞ્જેય્ય, આપત્તિ થુલ્લચ્ચયસ્સ, ન ચ ભિક્ખવે અપ્પટિવેક્ખિત્વા મંસં પરિભુઞ્જિતબ્બં, યો પરિભુઞ્જેય્ય આપત્તિ દુક્કટસ્સ.

પુચ્છા – હત્થિમંસં વા આવુસો અસ્સમંસં વા પરિભુઞ્જન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – બારાણસિયં ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ હત્થિમંસમ્પિ અસ્સમંસમ્પિ પરિભુઞ્જિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – સુનક્ખમંસં વા આવુસો અહિમંસં વા ભુઞ્જન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – બારાણસિયં ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ સુનક્ખમંસમ્પિ અહિમંસમ્પિ પરિભુઞ્જિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – સીહમંસં વા આવુસો બ્યગ્ઘમંસં વા દીપિમંસં વા અચ્છમંસં વા તરચ્છમંસં વા ભુઞ્જન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – બારાણસિયંયેવ ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ સીહમંસમ્પિ બ્યગ્ઘમંસમ્પિ દીપિમંસમ્પિ અચ્છમંસમ્પિ તરચ્છમંસમ્પિ પરિભુઞ્જિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – ગિલાનસ્સ આવુસો ગુળં વા અગિલાનસ્સ ગુળોદકં વા ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલા ભન્તે ભિક્ખૂ ગિલાનસ્સેવ ભગવતા ગુળો અનુઞ્ઞાતો નો અગિલાનસ્સાતિ કુક્કુચ્ચાયન્તા ગુળં ન ભુઞ્જિંસુ, તસ્મિં ભન્તે વત્થુસ્મિં અનુઞ્ઞાતં.

પુચ્છા – જાનં આવુસો ઉદ્દિસ્સ કતં મંસં પરિભુઞ્જન્તસ્સ દુક્કટં પઞ્ઞપેત્વા તિકોટિપરિસુદ્ધં મંસં ભગવતા કત્થ અનુઞ્ઞાતં.

વિસ્સજ્જના – વેસાલિયં ભન્તે સીહસ્સ સેટાપતિનો વત્થુસ્મિં અનુઞ્ઞાતં.

મેણ્ડક વત્થુ

પુચ્છા – પાથેય્યં આવુસો પરિયેસિતુઞ્ચ કપ્પિયકારકાનં હત્થે ઉપનિક્ખિત્તહિરઞ્ઞતો નિબ્બત્તં કપ્પિયપચ્ચયં સાદિતુઞ્ચ ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – અન્તરા ચ ભન્તે ભદ્દિયં અન્તરા ચ અઙ્ગુત્તરાપં મેણ્ડકં ગહપતિં આરબ્ભ અનુઞ્ઞાતં, મેણ્ડકો ભન્તે ગહપતિ ભગવન્તં યાચિ ‘‘સન્તિ ભન્તે મગ્ગા કન્તારા અપ્પોદકા અપ્પભક્ખા ન સુકરા અપાથેય્યેન ગન્તું, સાધુ ભન્તે ભગવા ભિક્ખૂનં પાથેય્યં અનુજાનાતૂ’’તિ, તસ્મિં ભન્તે વત્થુસ્મિં અનુઞ્ઞાતં.

કેણિય વત્થુ

પુચ્છા – અટ્ઠ આવુસો પાનાનિ ભગવતા કત્થ અનુઞ્ઞાતાનિ, કં આરબ્ભ કિસ્મિં વત્થુસ્મિં અનુઞ્ઞાતાનિ.

વિસ્સજ્જના – આપણે ભન્તે સમ્બહુલે ભિક્ખૂ આરબ્ભ અનુઞ્ઞાતાનિ, સમ્બહુલા ભન્તે ભિક્ખૂ કુક્કુચ્ચાયન્તા પાનાનિ ન પટિગ્ગણ્હિંસુ, તસ્મિં ભન્તે વત્થુસ્મિં અનુઞ્ઞાતાનિ.

રોજમલ્લા વત્થુ

પુચ્છા – સબ્બઞ્ચ આવુસો ડાકં સબ્બઞ્ચ પિટ્ઠખાદનીયં ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – કુસિનારાયં ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલા ભન્તે ભિક્ખૂ કુક્કુચ્ચાયન્તા ડાકઞ્ચ પિટ્ઠખાદનીયઞ્ચ ન પટિગ્ગહેસું, તસ્મિં ભન્તે વત્થુસ્મિં અનુઞ્ઞાતં.

પુચ્છા – અકપ્પિયં આવુસો સમાદપેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – આતુમાયં ભન્તે અઞ્ઞતરં વુડ્ઢપબ્બજિતં આરબ્ભ પઞ્ઞત્તં, અઞ્ઞતરો ભન્તે વુડ્ઢપબ્બજિતો અકપ્પિયે સમાદપેતિ, તસ્મિં ભન્તે વત્થુસ્મિં પઞ્ઞત્તં.

પુચ્છા – સઙ્ઘિકાનિ વા આવુસો પુગ્ગલિકાનિ વા બીજાનિ પુગ્ગલિકાય વા સઙ્ઘિકાય વા ભૂમિયા રોપિતાનિ ભાગં દત્વા પરિભુઞ્જિતું ભગવતા કત્થ અનુઞ્ઞાતં, કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે અનુઞ્ઞાતં, સાવત્થિયં ભન્તે ભગવતિ વિહરતિ સઙ્ઘિકાનિપિ બીજાનિ પુગ્ગલિકાય ભૂમિયા રોપિયિંસુ, પુગ્ગલિકાનિપિ બીજાનિ સઙ્ઘિકાય ભૂમિયા રોપિયિંસુ, તસ્મિં ભન્તે વત્થુસ્મિં અનુઞ્ઞાતં.

પુચ્છા – વિનયમહાપદેસસઙ્ખાતાનિ આવુસો ચત્તારિ કપ્પિયાકપ્પિયઅનુલોમાનિ ભગવતા કત્થ પઞ્ઞત્તાનિ, કં આરબ્ભ કિસ્મિં વત્થુસ્મિં પઞ્ઞત્તાનિ.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ પઞ્ઞત્તાનિ, સમ્બહુલાનં ભન્તે ભિક્ખૂનં કિસ્મિઞ્ચિ કિસ્મિઞ્ચિઠાને કુક્કુચ્ચં ઉપ્પજ્જિ, તસ્મિં ભન્તે વત્થુસ્મિં પઞ્ઞત્તાનિ.

પુચ્છા – યાવકાલિકાદીહિ સંસટ્ઠાનં આવુસો યામકાલિકાદીનં પરિભોગકાલમરિયાદં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલાનં ભન્તે ભિક્ખૂનં એતદહોસિ ‘‘કપ્પતિ નુખો યાવકાલિકેન યામકાલિકં સત્તાહકાલિકં યાવજીવિકં, ન નુખો કપ્પતિ. કપ્પતિનુખો યામકાલિકેન સત્તાહકાલિકં યાવજીવિકં, ન નુખો કપ્પતિ. કપ્પતિ નુખો સત્તાહકાલિકેન યાવજીવિકં, ન નુખો કપ્પતી’’તિ. તસ્મિં ભન્તે વત્થુસ્મિં પઞ્ઞત્તં.

પુચ્છા – ભેસજ્જકં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – ભેસજ્જકં વિસ્સજ્જિસ્સં સનિદાનં સનિદ્દેસં. સમુક્કટ્ઠપદાનં ભન્તે તિસ્સો આપત્તિયો.