મહાવગ્ગપાળિ

સંગાયનસ્સ પુચ્છા વિસ્સજ્જના

પુચ્છા – ઉભતો વિભઙ્ગાનન્તરં આવુસો પોરાણકેહિ સંગીતિકારમહાથેરેહિ કં નામ પાવચનં સંગીતં.

વિસ્સજ્જના – ઉભતો વિભઙ્ગાનન્તરં ભન્તે પોરાણકેહિ સંગીતિકારમહાથેરેહિ ખન્ધકા સંગીતા.

પુચ્છા – તે પન આવુસો ખન્ધકા વગ્ગભેદેન કતિવિધા.

વિસ્સજ્જના – તે પન ભન્તે ખન્ધકા દુવિધા વગ્ગભેદેન મહાવગ્ગો ચૂળવગ્ગોતિ.

પુચ્છા – મહાવગ્ગે આવુસો કતિ ખન્ધકા પરિયાપન્ના.

વિસ્સજ્જના – મહાવગ્ગે ભન્તે દસખન્ધકા પરિયાપન્ના, સેય્યથિદં, મહાખન્ધકો ઉપોસથક્ખન્ધકો વસ્સૂપનાયિકક્ખન્ધકો પવારણાક્ખન્ધકો ચમ્મક્ખન્ધકો ભેસજ્જક્ખન્ધકો કથિનક્ખન્ધકો ચીવરક્ખન્ધકો ચમ્પેય્યક્ખન્ધકો કોસમ્બકક્ખન્ધકોતિ.

પુચ્છા – મહાખન્ધકે આવુસો બહૂ કથાયો, કતમા તાસં આદિકથા.

વિસ્સજ્જના – મહાખન્ધકે ભન્તે બોધિકથા આદિ.

મહાખન્ધક

મહાબોધિપુચ્છા

પુચ્છા – તસ્માતિહ આવુસો તતો પટ્ઠાય તં પુચ્છિસ્સામિ, ભગવા આવુસો પઠમાભિસમ્બુદ્ધકાલે કત્થ કીવચીરં કેનાકારેન વિહાસિ.

વિસ્સજ્જના – ભગવા ભન્તે પઠમાભિસમ્બુદ્ધો બોધિરુક્ખમૂલે સત્તાહં એકપલ્લઙ્કેન વિહાસિ વિમુત્તિસુખં પટિસંવેદી.

પુચ્છા – તદા આવુસો ભગવા કીદિસં ધમ્મં મનસિકત્વા કીદિસં ઉદાનં ઉદાનેસિ.

વિસ્સજ્જના – તદા ભન્તે ભગવા રત્તિયા પઠમં યામં રત્તિયા મજ્ઝિમં યામં રત્તિયા પચ્છિમં યામં પટિચ્ચસમુપ્પાદં અનુલોમં પટિલોમં મનસિકત્વા તીણિ ઉદાનાનિ ઉદાનેસિ.

અજપાલ

પુચ્છા – તસ્સ આવુસો સત્તાહસ્સ અચ્ચયેન ભગવા કત્થ વિહાસિ.

વિસ્સજ્જના – તસ્સ ભન્તે સત્તાહસ્સ અચ્ચયેન ભગવા અજપાલ નિગ્રોધમૂલે વિહાસિ, સત્તાહં એકપલ્લઙ્કેન વિહાસિ વિમુત્તિસુખં પટિસંવેદી.

મુચલિન્દા

પુચ્છા – તસ્સપિ આવુસો સત્તાહસ્સ અચ્ચયેન ભગવા કત્થ વિહાસિ.

વિસ્સજ્જના – તસ્સ ભન્તે સત્તાહસ્સ અચ્ચયેન ભગવા મુચલિન્દમૂલે સત્તાહં એકપલ્લઙ્કેન નિસીદિ.

પુચ્છા – તસ્સપિ આવુસો સત્તાહસ્સ અચ્ચયેન ભગવા કત્થ વિહાસિ.

વિસ્સજ્જના – તસ્સપિ ભન્તે સત્તાહસ્સ અચ્ચયેન ભગવા રાજાયતનમૂલે સત્તાહં એકપલ્લઙ્કેન નિસીદિ વિમુત્તિસુખં પટિસંવેદી.

પુચ્છા – તસ્સપિ આવુસો સત્તાહસ્સ અચ્ચયેન ભગવા કત્થ વિહાસિ.

વિસ્સજ્જના – તસ્સ ભન્તે સત્તાહસ્સ અચ્ચયેન ભગવા પુનદેવ અજપાલનિગ્રોધમૂલે વિહાસિ.

પુચ્છા – તસ્મિં પન આવુસો અજપાલનિગ્રોધે વિહરન્તસ્સ ભગવતો કથં ચેતસો પરિવિતક્કો ઉદપાદિ.

વિસ્સજ્જના – તસ્મિં પન ભન્તે અજપાલનિગ્રોધે વિહરન્તસ્સ ભગવતો રહોગતસ્સ પટિસલ્લીનસ્સ ધમ્મગમ્ભીરતાપટિસંયુત્તો ચેતસો પરિવિતક્કો ઉદપાદિ.

અધિગતો ખો મ્યાયં ધમ્મો ગમ્ભીરો દુદ્દસો અરનુબોધો સન્તો પણીતો અતક્કાવચરા નિપુણો પણ્ડિતવેદનીયો.

આલયરામાખો પનાયં પજા આલયરતા આલયસમ્મુદિતા,

સહમ્પતિ બ્રહ્મા

પુચ્છા – કથં આવુસો તદા ધમ્મદેસનાય બ્રહ્મયાચના ચ ભગવતો પટિઞ્ઞાચ અહોસિ.

વિસ્સજ્જના – દેસેતુ ભન્તે ભગવા ધમ્મં, દેસેતુ સુગતો ધમ્મં, સન્તિ સત્તા અપ્પરજક્ખજાતિકા અસ્સવનતા ધમ્મસ્સ પરિહાયન્તિ, ભવિસ્સન્તિ ધમ્મસ્સ અઞ્ઞાતારોતિ ઇતિ ભન્તે બ્રહ્મુનો ધમ્મદેસનાય યાચના અહોસિ,

‘‘અપારુતા તેસં અમતસ્સ દ્વારા,

યે સોતવન્તો પમુઞ્ચન્તુ સદ્ધં;

વિહિંસસઞ્ઞી પગુણં નભાસિં,

ધમ્મં પણીતં મનુજેસુ બ્રહ્મે’’તિ.

એવં ખો ભન્તે ભગવતો ધમ્મદેસનાય પટિઞ્ઞા ચ અહોસિ.

નસ્સતિ વત લોકો…

દેસેતુ ભન્તે ભગવા ધમ્મં…

અપારુતા તેસં અમતસ્સ દ્વારા,

યે સોતવન્તો પમુઞ્ચન્તુ સદ્ધં.

પુચ્છા – એવં ખો આવુસો ભગવા ધમ્મદેસનાય પટિઞ્ઞં કત્વા પઠમં ધમ્મં દેસેન્તો કત્થ કીદિસં ધમ્મં કસ્સ દેસેસિ.

વિસ્સજ્જના – બારાણસિયં ભન્તે ઇસિપતને મિગદાયે પઞ્ચવગ્ગિય ભિક્ખુપમુખાનં બ્રહ્મગણાનં ધમ્મચક્કપવત્તનસુત્તં દેસેસિ.

પુચ્છા – તસ્મિં ખો પન આવુસો ધમ્મચક્કપવત્તનસુત્તે દેસિયમાને મનુસ્સલોકે કસ્સ ધમ્માભિસમયો અહોસિ.

વિસ્સજ્જના – આયસ્મતો ભન્તે કોણ્ડઞ્ઞસ્સ ધમ્માભિસમયો અહોસિ.

પુચ્છા – કથં નુ ખો આવુસો ઇમસ્મિં બુદ્ધસાસને પઠમં પબ્બજ્જા ચ ઉપસમ્પદા ચ અહોસિ.

વિસ્સજ્જના – ઇમસ્મિં ભન્તે બુદ્ધસાસને પઠમં એહિભિક્ખુપસમ્પદા અહોસિ.

લભેય્યાહં ભન્તે ભગવતો સન્તિકે પબ્બજં, લભેય્યં ઉપસમ્પદં.

એહિ ભિક્ખુ સ્વાખાતો ધમ્મો, ચર બ્રહ્મચરિયં સમ્મા દુક્ખસ્સ અન્તકિરિયાય.

પુચ્છા – ઇતરેસં પન આવુસો ચતુન્નં પઞ્ચવગ્ગિયાનં કદા ધમ્માભિસમયો અહોસિ.

વિસ્સજ્જના – પાટિપદે ભન્તે દિવસે આયસ્મતો વપ્પસ્સ, દુતિયે ભન્તે દિવસે આયસ્મતો ભદ્દિયસ્સ, તતિયે ભન્તે દિવસે આયસ્મતો મહાનામસ્સ, ચતુત્થે ભન્તે દિવસે આયસ્મતો અસ્સજિસ્સ ધમ્માભિસમયો અહોસિ.

પુચ્છા – સબ્બેસમ્પિ આવુસો તેસં પઞ્ચવગ્ગિયાનં ભિક્ખૂનં કદા અરહત્તપત્તિ હોતિ.

વિસ્સજ્જના – સબ્બેસમ્પિ ભન્તે તેસં પઞ્ચવગ્ગિયાનં ભિક્ખૂનં પક્ખસ્સ પઞ્ચમિયં અનત્તલક્ખણસુત્તે દેસિયમાને અરહત્તપત્તિ હોતિ.

પુચ્છા – કદા આવુસો ભગવતા ભિક્ખૂ તત્થ તત્થ ચારિકં ચરિત્વા ધમ્મદેસનત્થાય પેસિતા.

વિસ્સજ્જના – યસપ્પમુખાનં ભન્તે ચતુપઞ્ઞાસ સહાયકાનં પબ્બજિતકાલે ભગવતા ભિક્ખૂ તત્થ તત્થ ચારિકં ચરિત્વા ધમ્મદેસનત્થાય પેસિતા.

સરણગમન

પુચ્છા – કદા આવુસો ભગવતા તીહિ સરણગમનેહિ પબ્બજ્જૂપ સમ્પદા અનુઞ્ઞાતો અહોસિ.

વિસ્સજ્જના – યસપ્પમુખાનં ભન્તે ચતુપઞ્ઞાસાય ગિહિ સહાયકાનં પબ્બજિત્વા તત્થ તત્થ ચારિકં ચરિત્વા ધમ્મદેસનત્થાય પેસિતકાલે ભગવતા તીહિ સરણગમનેહિ પબ્બજ્જા ચ ઉપસમ્પદા ચ અનુઞ્ઞાતા.

અનુજાનામિ ભિક્ખવે તુમ્હેવ દાનિ તાસુ તાસુ દિસાસુ તેસુ તેસુ જનપદેસુ પબ્બાજેથ ઉપસમ્પાદેથ.

પુચ્છા – ભગવતા આવુસો ભિક્ખૂનં આરામો પટિગ્ગણ્હિતું કત્થ કિસ્મિં વત્થુસ્મિં અનુઞ્ઞાતો.

વિસ્સજ્જના – ભગવતા ભન્તે ભિક્ખૂનં આરામં પટિગ્ગણ્હિતું રાજગહે અનુઞ્ઞાતો, રાજા ભન્તે માગધો સેનિયો બિમ્બિસારો બુદ્ધપ્પમુખસ્સ ભિક્ખુસઙ્ઘસ્સ વેળુવનં ઉય્યાનં અદાસિ, તસ્મિં ભન્તે વત્થુસ્મિં અનુઞ્ઞાતો.

એતાહં ભન્તે વેળુવનં ઉય્યાનં બુદ્ધપ્પમુખસ્સ ભિક્ખુસઙ્ઘસ્સ દમ્મિ –

અનુજાનામિ ભિક્ખવે આરામં.

પુચ્છા – કથઞ્ચ આવુસો દ્વિન્નં અગ્ગસાવકાનં પબ્બજ્જૂપસમ્પદા અહોસિ.

વિસ્સજ્જના – દ્વિન્નં ભન્તે અગ્ગસાવકાનં એહિ ભિક્ખુપસમ્પદા અહોસિ.

વિપ્પસન્નાનિ ખો તે આવુસો ઇન્દ્રિયાનિ.

કંસિ ત્વં આવુસો ઉદ્દિસ્સ પબ્બજિતો.

કો વા તે સત્થા.

કસ્સ વા ત્વં ધમ્મં રોચેસિ.

અત્થાવુસો મહાસમણો સક્યપુત્તો સક્યકુલા પબ્બજિતો.

કિં વાદી પનાયસ્મતો સત્થા કિમક્ખાયી.

યે ધમ્મા હેતુપ્પભવા, તેસં હેતું તથાગતો;

આહ તેસઞ્ચ યો નિરોધો, એવં વાદી મહાસમણો.

અલં આવુસો મા અગમિત્થ.

એતે ભિક્ખવે દ્વે સહાયકા આગચ્છન્તિ કોલિતો ઉપતિસ્સો ચ એતં મે સાવકયુગં ભવિસ્સતિ અગ્ગં ભદ્દયુગં.

લભેય્યામ મયં ભન્તે ભગવતો સન્તિકે પબ્બજ્જં લભેય્યામ ઉપસમ્પદં.

એથ ભિક્ખવો સ્વાખાતો ધમ્મો, ચરથ બ્રહ્મચરિયં સમ્મા દુક્ખસ્સ અન્તકિરિયાય.

પુચ્છા – ઉપજ્ઝાયો આવુસો ગણ્હિતું ભગવતા કત્થ અનુઞ્ઞાતો, કં આરબ્ભ કિસ્મિં વત્થુસ્મિં અનુઞ્ઞાતો.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ અનુઞ્ઞાતો, સમ્બહુલા ભન્તે ભિક્ખૂ અનુપજ્ઝાયકા અનાચરિયકા અનોવદિયમાના અનનુસાસિયમાના દુન્નિવત્થા દુપ્પારુતા અનોકપ્પસમ્પન્ના પિણ્ડાય ચરિંસુ, તસ્મિં ભન્તે વત્થુસ્મિં અનુઞ્ઞાતો.

પુચ્છા – ઉપજ્ઝાયમ્હિ આવુસો ન સમ્માવત્તન્તસ્સ દુક્કટં કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે સમ્બહુલે સદ્ધિવિહારિકે આરબ્ભ પઞ્ઞત્તં, સમ્બહુલા ભન્તે સદ્ધિવિહારિકા ઉપજ્ઝાયમ્હિ ન સમ્માવત્તિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – કદા આવુસો ભગવતા તીહિ સરણગમનેહિ ઉપસમ્પદં પટિક્ખિપિત્વા ઞાતિચતુત્થેન કમ્મેન ઉપસમ્પદા અનુઞ્ઞાતા.

વિસ્સજ્જના – રાધબ્રાહ્મણસ્સ ભન્તે પબ્બજિતકાલે ભગવતા તીહિ સરણગમનેહિ ઉપસમ્પદં પટિક્ખિપિત્વા ઞાત્તિચતુત્થેન કમ્મેન ઉપસમ્પદા અનુઞ્ઞાતા.

કોનુ ખો ભિક્ખવે તસ્સ બ્રાહ્મણસ્સ અધિકારં સરતિ.

અહં ખો ભન્તે તસ્સ બ્રાહ્મણસ્સ અધિકારં સરામિ.

સાધુ સાધુ સારિપુત્ત, કતઞ્ઞુનો હિ સારિપુત્ત સપ્પુરિસા કતવેદિનો.

કથાહં ભન્તે તં બ્રાહ્મણં ઉપસમ્પાદેમિ.

યાસા ભિક્ખવે મયા તીહિ સરણગમનેહિ ઉપસમ્પદાઅનુઞ્ઞાતા, તં અજ્જતગ્ગે પટિક્ખિપામિ.

અનુજાનામિ ભિક્ખવે ઞાત્તિચતુત્થેન કમ્મેન ઉપસમ્પાદેતું.

પુચ્છા – અયાચિતકં આવુસો ઉપસમ્પદાપેક્ખં ઉપસમ્પાદેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે અઞ્ઞતરં ભિક્ખું આરબ્ભ પઞ્ઞત્તં, અઞ્ઞતરો ભન્તે ભિક્ખુ ઉપસમ્પન્નસમનન્તરં અનાચારં અચરિ, તસ્મિં ભન્તે વત્થુસ્મિં પઞ્ઞત્તં.

પુચ્છા – ચતુન્નં આવુસો નિસ્સયાનં આચિક્ખણા ભગવતા કત્થ અનુઞ્ઞાતા, કં આરબ્ભ કિસ્મિં વત્થુસ્મિં અનુઞ્ઞાતા.

વિસ્સજ્જના – રાજગહે ભન્તે અઞ્ઞતરં ભિક્ખું આરબ્ભ અનુઞ્ઞાતા, અઞ્ઞતરો ભન્તે ભિક્ખુ ઉદરસ્સ કારણા પબ્બજિ, તસ્મિં ભન્તે વત્થુસ્મિં અનુઞ્ઞાતા.

એહિ દાનિ આવુસો પિણ્ડાય ચરિસ્સામ.

કથઞ્હિ નામ ભિક્ખુ એવં સ્વાક્ખાતે ધમ્મવિનયે ઉદરસ્સ કારણા પબ્બજિસ્સતિ.

પુચ્છા – ઊનદસવસ્સેન આવુસો ઉપસમ્પાદેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે આયસ્મન્તં ઉપસેનં વઙ્ગન્તપુત્તં આરબ્ભ પઞ્ઞત્તં, આયસ્મા ભન્તે ઉપસેનો વઙ્ગન્તપુત્તો એકવસ્સો સદ્ધિવિહારિકં ઉપસમ્પાદેસિ, તસ્મિં ભન્તે વત્થુસ્મિં પઞ્ઞત્તં.

પુચ્છા – બાલેન આવુસો અબ્યત્તેન ઉપસમ્પાદેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ ‘‘દસવસ્સમ્હા દસવસ્સમ્હા’’તિ બાલા અબ્યત્તા ઉપસમ્પાદેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – આચરિયો આવુસો ગણ્હિતું ભગવતા કત્થ અનુઞ્ઞાતો, કં આરબ્ભ કિસ્મિં વત્થુસ્મિં અનુઞ્ઞાતો.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ અનુઞ્ઞાતો, સમ્બહુલા ભન્તે ભિક્ખૂ ઉપજ્ઝાયેસુ પક્કન્તેસુપિ વિબ્ભન્તેસુપિ કાલઙ્કતેસુપિ પક્ખસઙ્કન્તેસુપિ અનાચરિયકા અનોવદિયમાના અનનુસાસિયમાના દુન્નિવત્થા દુપ્પારુતા અનાકપ્પસમ્પન્ના પિણ્ડાય ચરિંસુ, તસ્મિં ભન્તે વત્થુસ્મિં અનુઞ્ઞાતો.

પુચ્છા – પઞ્ચહિ આવુસો આબાધેહિ ફુટ્ઠં પબ્બાજેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ પઞ્ચહિ આબાધેહિ ફુટ્ઠં પબ્બાજેસું, તસ્મિં ભન્તે વત્થુસ્મિં પઞ્ઞત્તં.

સાધુ ભન્તે અય્યા પઞ્ચહિ આબાધેહિ ફુટ્ઠં ન પબ્બાજેય્યું…

પુચ્છા – રાજભટં આવુસો પબ્બાજેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ રાજભટે પબ્બાજેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – ધજબન્ધં આવુસો ચોરં પબ્બાજેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહેયેવ ભન્તે અઙ્ગુલિમાલં ચોરં આરબ્ભ પઞ્ઞત્તં, અઙ્ગુલિમાલો ભન્તે ચોરો ભિક્ખૂસુ પબ્બજિતો હોતિ, તસ્મિં ભન્તે વત્થુસ્મિં પઞ્ઞત્તં.

પુચ્છા – કારભેદકં આવુસો ચોરં પબ્બાજેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહેયેવ ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ કારભેદકચોરં પબ્બાજેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – ઇણાયિકં આવુસો પબ્બાજેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહેયેવ ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ ઇણાયિકં પબ્બાજેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – દાસં આવુસો પબ્બજેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહેયેવ ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ દાસં પબ્બાજેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – ભણ્ડુકમ્માય આવુસો અપલોકનં ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહેયેવ ભન્તે અઞ્ઞતરં કમ્મારભણ્ડુપુત્તં આરબ્ભ અનુઞ્ઞાતં અઞ્ઞતરો ભન્તે કમ્મારભણ્ડુપુત્તો માતાપિતૂહિ સદ્ધિં ભણ્ડિત્વા ભિક્ખૂસુ પબ્બજિતો હોતિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – ઊનવીસતિવસ્સસ્સ આવુસો પુગ્ગલસ્સ ઉપસમ્પદા ભગવતા કત્થ પટિક્ખિત્તા, કં આરબ્ભ કિસ્મિં વત્થુસ્મિં પટિક્ખિત્તા.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ પટિક્ખિત્તા, સમ્બહુલા ભન્તે ભિક્ખૂ ઊનવીસતિવસ્સં પુગ્ગલં ઉપસમ્પાદેસું, તસ્મિં ભન્તે વત્થુસ્મિં પટિક્ખિત્તા.

ન ભિક્ખવે જાનં ઊનવીસતિવસ્સો પુગ્ગલો ઉપસમ્પાદેતબ્બો, યોઉપસમ્પાદેય્ય, યથાધમ્મો કારેતબ્બો.

પુચ્છા – માતાપિતૂહિ આવુસો અનનુઞ્ઞાતં પુત્તં પબ્બાજેન્તસ્સ દુક્કટં ભગવતા કત્થ પઞ્ઞત્તં, કિસ્મિં વત્થુસ્મિં પઞ્ઞત્તં.

વિસ્સજ્જના – સક્કેસુ ભન્તે પઞ્ઞત્તં, રાજા ભન્તે સુદ્ધોદનો ભગવન્તં ઉપસઙ્કમિત્વા વરં યાચિ, સાધુ ભન્તે અય્યાઅનનુઞ્ઞાતં માતાપિતૂહિ પુત્તં પબ્બાજેય્યુન્તિ, તસ્મિં ભન્તે વત્થુસ્મિં પઞ્ઞત્તં.

ન ભિક્ખવે અનનુઞ્ઞાતો માતાપિતૂહિ પુત્તો પબ્બાજેતબ્બો, યો પબ્બાજેય્ય, આપત્તિદુક્કટસ્સ.

પુચ્છા – થેય્યસંવાસકસ્સ આવુસો ઉપસમ્પદા ભગવતા કત્થ પટિક્ખિત્તા, કં આરબ્ભ કિસ્મિં વત્થુસ્મિં પટિક્ખિત્તા.

વિસ્સજ્જના – સાવત્થિયં ભન્તે અઞ્ઞતરં પુરાણકુલપુત્તં આરબ્ભ પટિક્ખિત્તા, અઞ્ઞતરો ભન્તે પુરાણકુલપુત્તો ખીણ કોલઞ્ઞો સામં પત્તચીવરં પટિયાદેત્વા કેસમસ્સું ઓહારેત્વા કાસાયાનિ વત્થાનિ અચ્છાદેત્વા આરામં ગન્ત્વા ભિક્ખૂહિ સદ્ધિં સંવસિ, ભન્તે વત્થુસ્મિં પટિક્ખિત્તા.

પુચ્છા – તિરચ્છાનગતસ્સ આવુસો ઉપસમ્પદા ભગવતા કત્થ પટિક્ખિત્તા, કં આરબ્ભ કિસ્મિં વત્થુસ્મિં પટિક્ખિત્તા.

વિસ્સજ્જના – સાવત્થિયં ભન્તે અઞ્ઞતરં નાગં આરબ્ભ પટિક્ખિત્તા, અઞ્ઞતરો ભન્તે નાગો માણવકવણ્ણેન ભિક્ખૂ ઉપસઙ્કમિત્વા પબ્બજ્જં યાચિ, તં ભિક્ખૂ પબ્બાજેસું ઉપસમ્પાદેસું, તસ્મિં ભન્તે વત્થુસ્મિં પટિક્ખિત્તા.

પુચ્છા – માતુઘાતકસ્સ ચ આવુસો પિતુઘાતકસ્સ ચ ઉપસમ્પદા ભગવતા કત્થ પટિક્ખિત્તા, કં આરબ્ભ કિસ્મિં વત્થુસ્મિં પટિક્ખિત્તા.

વિસ્સજ્જના – સાવત્થિયંયેવ ભન્તે અઞ્ઞતરં માણવકં આરબ્ભ પટિક્ખિત્તા, અઞ્ઞતરો ચ ભન્તે માણવકો અઞ્ઞતરો ચ માણવકો માતરં જીવિતા વોરોપેસિ પિતરં જીવિતા વોરોપેસિ, તસ્મિં ભન્તે વત્થુસ્મિં પટિક્ખિત્તા.

માતુઘાતકો ભિક્ખવે અનુપસમ્પન્નો નઉપસમ્પાદેતબ્બો, ઉપસમ્પન્નો નાસેતબ્બો, પિતુઘાતકો ભિક્ખવે અનુપસમ્પન્નો નઉપસમ્પાદેતબ્બો, ઉપસમ્પન્નો નાસેતબ્બો.

પુચ્છા – અપત્તચીવરકં વા આવુસો યાચિતપત્તચીવરકં વા ઉપસમ્પાદેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ અપત્તચીવરકં ઉપસમ્પાદેસું, યાચિતકેન પત્તચીવરેન ઉપસમ્પાદેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – ઉપસમ્પદં પુચ્છિસ્સં, સનિદાનં સઉદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – ઉપસમ્પદં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે દ્વે આપત્તિયો.

૨. ઉપોસથક્ખન્ધક

પુચ્છા – ચાતુદ્દસે ચ આવુસો પન્નરસે ચ પક્ખસ્સ ચ અટ્ઠમિયા સન્નિપતિત્વા ધમ્મં ભાસિતું ભગવતા કત્થ અનુઞ્ઞાતં, કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ અનુઞ્ઞાતા, સમ્બહુલા ભન્તે ભિક્ખૂ ચાતુદ્દેસ પન્નરસે અટ્ઠમિયા ચ પક્ખસ્સ સન્નિપતિત્વા તુણ્હી નિસીદિંસુ, તસ્મિં ભન્તે વત્થુસ્મિં અનુઞ્ઞાતા.

અનુજાનામિ ભિક્ખવે ચાતુદ્દસે પન્નરસે અટ્ઠમિયા ચ પક્ખસ્સ સન્નિપતિતું.

નનુ નામ સન્નિપતિતેહિ ધમ્મો ભાસિતબ્બો.

પુચ્છા – કદા આવુસો ભિક્ખૂનં પાતિમોક્ખુદ્દેસો ભગવતા અનુઞ્ઞાતો.

વિસ્સજ્જના – યદા ભન્તે ભગવતો રહોગતસ્સ પટિસલ્લીનસ્સ એવં ચેતસો પરિવિતક્કો ઉદપાદિ ‘‘યંનૂનાહં યાનિ મયા ભિક્ખૂનં પઞ્ઞત્તાનિ સિક્ખાપદાનિ, તાનિ નેસં પાતિમોક્ખુદ્દેસં અનુજાનેય્યં, સો નેસં ભવિસ્સતિ ઉપોસથકમ્મ’’ન્તિ તદા ભન્તે ભગવતા ભિક્ખૂનં પાતિમોક્ખુદ્દેસો અનુઞ્ઞાતો.

પુચ્છા – સીમં આવુસો સમ્મનિતું ભગવતા કત્થ અનુઞ્ઞાતં, કિસ્મિઞ્ચ વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે અનુઞ્ઞાતં, રાજગહે ભન્તે ભગવતિ વિહરતિ ભિક્ખૂનં એતદહોસિ ‘‘ભગવતા પઞ્ઞત્તં એત્તાવતા સામગ્ગી, યાવતા એકાવાસોતિ કિત્તાવતાનુખો એકાવાસો હોતી’’તિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – કતિ આવુસો ઉપોસથા દિવસવસેન ચ કારકપુગ્ગલવસેન ચ કાતબ્બાકારવસેન ચ.

વિસ્સજ્જના – દિવસવસેન ભન્તે તયો ઉપોસથા, પુગ્ગલવસેન ચ ભન્તે તયો ઉપોસથા, કાતબ્બાકારવસેન ચ ભન્તે તયો ઉપોસથા.

પુચ્છા – કતિ આવુસો ઉપોસથકમ્માનિ તેસુ ચ કીદિસં ઉપોસથકમ્મં ભગવતા અનુઞ્ઞાતં, કીદિસં અનનુઞ્ઞાતં.

વિસ્સજ્જના – ચત્તારિમાનિ ભન્તે ઉપોસથકમ્માનિ, અધમ્મેન વગ્ગં ઉપોસથકમ્મં, અધમ્મેન સમગ્ગં ઉપોસથકમ્મં, ધમ્મેન વગ્ગં ઉપોસથકમ્મં, ધમ્મેન સમગ્ગં ઉપોસથકમ્મં. તત્ર ભન્તે યદિદં અધમ્મેન વગ્ગં ઉપોસથકમ્મં, અધમ્મેન સમગ્ગં ઉપોસથકમ્મં ધમ્મેન વગ્ગં ઉપોસથકમ્મં, એવરૂપં ભન્તે ઉપોસથકમ્મં અનનુઞ્ઞાતં, તત્ર ભન્તે યદિદં ધમ્મેન સમગ્ગં ઉપોસથકમ્મં, એવરૂપં ભન્તે ઉપોસથકમ્મં અનુઞ્ઞાતં.

પુચ્છા – ઉપોસથં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – ઉપોસથં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે તિસ્સો આપત્તિયો.

૩. વસ્સુપનાયિકક્ખન્ધક