૨. ઉપોસથક્ખન્ધક

પુચ્છા – ચાતુદ્દસે ચ આવુસો પન્નરસે ચ પક્ખસ્સ ચ અટ્ઠમિયા સન્નિપતિત્વા ધમ્મં ભાસિતું ભગવતા કત્થ અનુઞ્ઞાતં, કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ અનુઞ્ઞાતા, સમ્બહુલા ભન્તે ભિક્ખૂ ચાતુદ્દેસ પન્નરસે અટ્ઠમિયા ચ પક્ખસ્સ સન્નિપતિત્વા તુણ્હી નિસીદિંસુ, તસ્મિં ભન્તે વત્થુસ્મિં અનુઞ્ઞાતા.

અનુજાનામિ ભિક્ખવે ચાતુદ્દસે પન્નરસે અટ્ઠમિયા ચ પક્ખસ્સ સન્નિપતિતું.

નનુ નામ સન્નિપતિતેહિ ધમ્મો ભાસિતબ્બો.

પુચ્છા – કદા આવુસો ભિક્ખૂનં પાતિમોક્ખુદ્દેસો ભગવતા અનુઞ્ઞાતો.

વિસ્સજ્જના – યદા ભન્તે ભગવતો રહોગતસ્સ પટિસલ્લીનસ્સ એવં ચેતસો પરિવિતક્કો ઉદપાદિ ‘‘યંનૂનાહં યાનિ મયા ભિક્ખૂનં પઞ્ઞત્તાનિ સિક્ખાપદાનિ, તાનિ નેસં પાતિમોક્ખુદ્દેસં અનુજાનેય્યં, સો નેસં ભવિસ્સતિ ઉપોસથકમ્મ’’ન્તિ તદા ભન્તે ભગવતા ભિક્ખૂનં પાતિમોક્ખુદ્દેસો અનુઞ્ઞાતો.

પુચ્છા – સીમં આવુસો સમ્મનિતું ભગવતા કત્થ અનુઞ્ઞાતં, કિસ્મિઞ્ચ વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે અનુઞ્ઞાતં, રાજગહે ભન્તે ભગવતિ વિહરતિ ભિક્ખૂનં એતદહોસિ ‘‘ભગવતા પઞ્ઞત્તં એત્તાવતા સામગ્ગી, યાવતા એકાવાસોતિ કિત્તાવતાનુખો એકાવાસો હોતી’’તિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – કતિ આવુસો ઉપોસથા દિવસવસેન ચ કારકપુગ્ગલવસેન ચ કાતબ્બાકારવસેન ચ.

વિસ્સજ્જના – દિવસવસેન ભન્તે તયો ઉપોસથા, પુગ્ગલવસેન ચ ભન્તે તયો ઉપોસથા, કાતબ્બાકારવસેન ચ ભન્તે તયો ઉપોસથા.

પુચ્છા – કતિ આવુસો ઉપોસથકમ્માનિ તેસુ ચ કીદિસં ઉપોસથકમ્મં ભગવતા અનુઞ્ઞાતં, કીદિસં અનનુઞ્ઞાતં.

વિસ્સજ્જના – ચત્તારિમાનિ ભન્તે ઉપોસથકમ્માનિ, અધમ્મેન વગ્ગં ઉપોસથકમ્મં, અધમ્મેન સમગ્ગં ઉપોસથકમ્મં, ધમ્મેન વગ્ગં ઉપોસથકમ્મં, ધમ્મેન સમગ્ગં ઉપોસથકમ્મં. તત્ર ભન્તે યદિદં અધમ્મેન વગ્ગં ઉપોસથકમ્મં, અધમ્મેન સમગ્ગં ઉપોસથકમ્મં ધમ્મેન વગ્ગં ઉપોસથકમ્મં, એવરૂપં ભન્તે ઉપોસથકમ્મં અનનુઞ્ઞાતં, તત્ર ભન્તે યદિદં ધમ્મેન સમગ્ગં ઉપોસથકમ્મં, એવરૂપં ભન્તે ઉપોસથકમ્મં અનુઞ્ઞાતં.

પુચ્છા – ઉપોસથં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – ઉપોસથં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે તિસ્સો આપત્તિયો.