૧૦. કોસમ્બકક્ખન્ધક

પુચ્છા – ભેદગરુકેહિ ભિક્ખવે ભિક્ખૂહિ ન સો ભિક્ખુ આપત્તિયા અદસ્સને ઉક્ખિપિતબ્બોતિ ચ, ભેદગરુકેન ભિક્ખવે ભિક્ખુના પરેસમ્પિ સદ્ધાય આપત્તિદેસેતબ્બાતિ ચ આવુસો અયં સામગ્ગિરસઓવાદો ભગવતા કત્થ દિન્નો, કં આરબ્ભ કિસ્મિં વત્થુસ્મિં દિન્નો.

વિસ્સજ્જના – કોસમ્બિયં ભન્તે સમ્બહુલે ભિક્ખૂ આરબ્ભ દિન્નો, ભગવતિ ભન્તે કોસમ્બિયં વિહરતિ અઞ્ઞતરો ભિક્ખુ આપત્તિં આપન્નો અહોસિ, સો તસ્સા આપત્તિયા આપત્તિ દિટ્ઠિ અહોસિ, અઞ્ઞે ભિક્ખૂ તસ્સા આપત્તિયા અનાપત્તિ દિટ્ઠિનો અહેસું. સો અપરેન સમયેન તસ્સા આપત્તિયા અનાપત્તિદિટ્ઠિ અહોસિ, અઞ્ઞે ભિક્ખૂ તસ્સા આપત્તિયા આપત્તિદિટ્ઠિનો અહેસું. અથ ખો તે ભન્તે ભિક્ખૂ સામગ્ગિં લભિત્વા તં ભિક્ખું આપત્તિયા અદસ્સને ઉક્ખિપિંસુ, તસ્મિં ભન્તે વત્થુસ્મિં દિન્નો.

પુચ્છા – સઙ્ઘભેદસ્સ આવુસો મૂલભૂતે ભિક્ખુમ્હિ ઉક્ખિત્તકે ઓસારિતે તસ્સ વત્થુસ્સ વૂપસમાય સઙ્ઘસામગ્ગિઞ્ચ કાતું સામગ્ગી ઉપોસથઞ્ચ કાતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે તેયેવ ઉક્ખિત્તકાનુવત્તકે ભિક્ખૂ આરબ્ભ અનુઞ્ઞાતં, તે ભન્તે ઉક્ખિત્તકાનુવત્તકા ભિક્ખૂ તં ઉક્ખિત્તકં ભિક્ખું ઓસારેત્વા યેન ઉક્ખેપકા ભિક્ખૂ તેનુપસઙ્કમિંસુ ઉપસઙ્કમિત્વા તે ઉક્ખેપકે ભિક્ખૂ એકદવોચું ‘‘યસ્મિં આવુસો વત્થુસ્મિં અહોસિ સઙ્ઘસ્સ ભણ્ડનં કલહો વિગ્ગહો વિવાદો સઙ્ઘભેદો સઙ્ઘરાજિ સઙ્ઘવવત્થાનં સઙ્ઘનાનાકરણં, સો એસો ભિક્ખું આપન્નો ચ ઉક્ખિત્તો ચ પસ્સિ ચ ઓસારિતો ચ, હન્દ મયં આવુસો તસ્સ વત્થુસ્સ વૂપસમાય સઙ્ઘસામગ્ગિં કરોમા’’તિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – કોસમ્બકં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – કોસમ્બકં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે એકા આપત્તિ.