અબ્યાકતસંયુત્ત

ખેમાસુત્ત

પુચ્છા – અબ્યાકતસંયુત્તે પનાવુસો પોરાણકેહિ ધમ્મસંગાહક મહાથેરેહિ પઠમં સંગીતં ખેમાસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં. કથઞ્ચ તં ભગવતાપિ પુન ભાસિતં.

વિસ્સજ્જના – અન્તરા ચ ભન્તે સાવત્થિં અન્તરા ચ સાકેતં તોરણવત્થુસ્મિં પદેસે રાજાનં પસેનદિં કોસલં આરબ્ભ ખેમાય ભિક્ખુનિયા ભાસિતં. રાજા ભન્તે પસેનદિ કોસલો યેન ખેમા ભિક્ખુની તેનુપસઙ્કમિ, ઉપસઙ્કમિત્વા અભિવાદેત્વા એકમન્તં નિસીદિ, એકમન્તં નિસિન્નો ખો ભન્તે રાજા પસેનદિકોસલો ખેમં ભિક્ખુનિં એતદવોચ ‘‘કિં નુખો અય્યે હોતિ તથાગતો પરંમરણા’’તિ. તસ્મિં ભન્તે વત્થુસ્મિં ‘‘અબ્યાકતં ખો એતં મહારાજ ભગવતા હોતિ તથાગતો પરં મરણા’’તિ એવમાદિના ખેમાય ભિક્ખુનિયા ભાસિતં. ભગવતા ચ ભન્તે અપરેન સમયેન રઞ્ઞા પસેનદિકોસલેન પુટ્ઠેન એવમેવ પુન ભાસિતં.

કિં પનય્યે નહોતિ તથાગતો પરં મરણા.

કુતૂહલસાલાસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ નવમં સંગીતં કુતૂહલસાલાસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – વેસાલિયં ભન્તે વચ્છગોત્તં પરિબ્બાજકં આરબ્ભ ભાસિતં. વચ્છગોત્તો ભન્તે પરિબ્બાજકો ભગવન્તં ઉપસઙ્કમિત્વા ‘‘પુરિમાનિ ભો ગોતમ દિવસાનિ પુરિમતરાનિ સમ્બહુલાનં નાનાતિત્થિયાનં સમણબ્રાહ્મણાનં પરિબ્બાજકાનં કુતૂહલસાલાયં સન્નિસિન્નાનં સન્નિપતિતાનં અયમન્તરકથા ઉદપાદી’’તિ એવમાદિકં વચનં અવોચ. તસ્મિં ભન્તે વત્થુસ્મિં ‘‘અલઞ્હિ તે વચ્છ કઙ્ખિતું, અલં વિચિકિચ્છિતું. કઙ્ખનીયે ચ પન તે ઠાને વિચિકિચ્છા ઉપ્પન્ના’’તિ એવમાદિના ભગવતા ભાસિતં.