નમો તસ્સ ભગવતો અરહતો સમ્માસમ્બુદ્ધસ્સ

સુત્તન્તપિટક

સંયુત્તનિકાયે

સગાથાવગ્ગપાળિ

સંગાયનસ્સ પુચ્છા વિસ્સજ્જના

પુચ્છા – પઠમમહાસંગીતિકાલે આવુસો ધમ્મસંગાહકા મહાકસ્સપાદયો મહાથેરવરા પોરાણસંગીતિકારા પઠમં વિનયપિટકં સંગાયિત્વા તદનન્તરં સુત્તન્તપિટકં સંગાયન્તા દીઘનિકાયઞ્ચ મજ્ઝિમનિકાયઞ્ચ સંગાયિત્વા તદનન્તરં કિંનામ પાવચનં સંગાયિંસુ.

વિસ્સજ્જના – પઠમમહાસંગીતિકાલે ભન્તે ધમ્મસંગાહકા મહાકસ્સપાદયો પોરાણથેરવરા પઠમં વિનયપિટકં સંગાયિત્વા તદનન્તરં સુત્તન્તપિટકં સંગાયન્તા દીઘનિકાયઞ્ચ મજ્ઝિમનિકાયઞ્ચ સંગાયિત્વા તદનન્તરં સત્તહિ ચ સુત્તસહસ્સેહિ સત્તહિ ચ સુત્તસતેહિ દ્વાસટ્ઠિયા ચ સુત્તેહિ પટિમણ્ડિતં ભાણવારસતપરિમાણં સંયુત્તનિકાયં નામ પાવચનં સંગાયિંસુ.

પુચ્છા – સંયુત્તનિકાયે ચ આવુસો સગાથાવગ્ગો નિદાનવગ્ગો ખન્ધવગ્ગો સળાયતનવગ્ગો મહાવગ્ગોતિ પઞ્ચસંયુત્તપ્પકરણાનિ, તેસુ પઠમં કતરં સંયુત્તપ્પકરણં તે સંગાયિંસુ.

વિસ્સજ્જના – પઞ્ચસુ ભન્તે સંયુત્તપ્પકરણેસુ પઠમં સગાથાવગ્ગસંયુત્તપ્પકરણં સંગાયિંસુ.

પુચ્છા – સગાથાવગ્ગેપિ આવુસો દેવતાસંયુત્તાદિવસેન એકાદસસંયુત્તાનિ, તેસુ પઠમં કતરં સંયુત્તં તે સંગાયિંસુ.

વિસ્સજ્જના – એકાદસસુ ભન્તે સંયુત્તેસુ પઠમં દેવતાસંયુત્તં સંગાયિંસુ.

પુચ્છા – દેવતાસંયુત્તેપિ આવુસો નળવગ્ગાદયો અટ્ઠ વગ્ગા, ઓઘતરણસુત્તાદીનિ ચ એકાસીતિ સુત્તાનિ, તેસુ પઠમં કતરં વગ્ગં કતરઞ્ચ સુત્તં સગાયિંસુ.

વિસ્સજ્જના – અટ્ઠસુ ભન્તે વગ્ગેસુ પઠમં નળવગ્ગં એકાસીતિયા ચ સુત્તેસુ પઠમં ઓઘતરણસુત્તં સંગાયિંસુ.

સાધુ સાધુ આવુસો, મયમ્પિ દાનિ તતોયેવ પટ્ઠાય સંગીતિપુબ્બઙ્ગમાનિ પુચ્છનવિસ્સજ્જનકિચ્ચાનિ આવહિતું સમારભાર.

દેવતાસંયુત્ત

ઓઘતરણસુત્ત

પુચ્છા – તેનાવુસો ભગવતા જાનતા પસ્સતા અરહતા સમ્માસમ્બુદ્ધેન ઓઘતરણસુત્તં કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે અઞ્ઞતરં દેવતં આરબ્ભ ભાસિતં, અઞ્ઞતરા ભન્તે દેવતા અભિક્કન્તાય રત્તિયા અભિક્કન્તવણ્ણા કેવલકપ્પં જેતવનં ઓભાસેત્વા યેન ભગવા તેનુપસઙ્કમિ, ઉપસઙ્કમિત્વા ભગવન્તં અભિવાદેત્વા એકમન્તં અટ્ઠાસિ, એકમન્તં ઠિતા ખો સા દેવતા ભગવન્તં એતદવોચ ‘‘કથં નુ ત્વં મારિસ ઓઘમતરી’’તિ,

તસ્મિં ભન્તે વત્થુસ્મિં ‘‘અપતિટ્ઠં ખ્વાહં આવુસો અનાયૂહં ઓઘમતરિં’’તિ, એવં ખો ભન્તે ભગવતા ભાસિતં.

અચ્ચેન્તિસુત્ત

પુચ્છા – અચ્ચેન્તિસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે અઞ્ઞતરં દેવતં આરબ્ભ ભાસિતં. અઞ્ઞતરા ભન્તે દેવતા ભગવન્તં એતદવોચ–

‘‘અચ્ચેન્તિ કાલા તરયન્તિ રત્તિયો,

વયોગુણા અનુપુબ્બં જહન્તિ,

એતં ભયં મરણે પેક્ખમાનો,

પુઞ્ઞાનિ કયિરાથ સુખાવહાની’’તિ–

તસ્મિં ભન્તે વત્થુસ્મિં –

‘‘અચ્ચેન્તિ કાલા તરયન્તિ રત્તિયો,

વયોગુણા અનુપુબ્બં જહન્તિ,

એતં ભયં મરણે પેક્ખમાનો,

લોકામિસં પજહે સન્તિપેક્ખો’’તિ –

એવં ખો ભન્તે ભગવતા ભાસિતં.

સત્તિસુત્ત

પુચ્છા – સત્તિસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે અઞ્ઞતરં દેવતં આરબ્ભ ભાસિતં, અઞ્ઞતરા ભન્તે દેવતા ભગવન્તં એતદવોચ–

‘‘સત્તિયા વિય ઓમટ્ઠો, ડય્હમાનોવ મત્થકે;

કામરાગપ્પહાનાય, સતો ભિક્ખુ પરિબ્બજે’’તિ–

તસ્મિં ભન્તે વત્થુસ્મિં–

સત્તિયા વિય ઓમટ્ઠો ડય્હમાનોવ મત્થકે;

સક્કાયદિટ્ઠિપ્પહાનાય, સતો ભિક્ખુ પરિબ્બજેતિ;

એવં ખો ભન્તે ભગવતા ભાસિતં.

સત્તિયા વિય ઓમટ્ઠો, ડય્હમાનોવ મત્થકે;

કામરાગપ્પહાનાય, સતો ભિક્ખુ પરિબ્બજે –

સત્તિયા વિય ઓમટ્ઠો, ડય્હમાનોવ મત્થકે,

સક્કાયદિટ્ઠિપ્પમાનાય, સતો ભિક્ખુ પરિબ્બજે –

જટાસુત્ત

પુચ્છા – જટાસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે અઞ્ઞતરં દેવતં આરબ્ભ ભાસિતં, અઞ્ઞતરા ભન્તે દેવતા ભવગન્તં એતદવોચ–

‘‘અન્તો જટા બહિજટા, જટાય જટિતા પજા;

તં તં ગોતમ પુચ્છામિ, કો ઇમં વિજટયે જટ’’ન્તિ–

તસ્મિં ભન્તે વત્થુસ્મિં –

સીલે પતિટ્ઠાય નરો સપઞ્ઞો, ચિત્તં પઞ્ઞઞ્ચ ભાવયં;

આતાપી નિપકો ભિક્ખુ, સો ઇમં વિજટયે જટં.

યેસં રાગો ચ દોસો ચ, અવિજ્જા ચ વિરાજિતા;

ખીણાસવા અરહન્તો, તેસં વિજટિતા જટાતિ;

એવમાદિના ભન્તે ભગવતા ભાસિતં.

સીલે પતિટ્ઠાય નરો સપઞ્ઞો, ચિત્તં પઞ્ઞઞ્ચ ભાવયં;

આતાપી નિપકો ભિક્ખુ, સો ઇમં વિજટયે જટં–

યેસં રાગો ચ દોસો ચ, અવિજ્જા ચ વિરાજિતા;

ખીણાસવા અરહન્તો, તેસં વિજટિતા જટા–

યત્થ નામઞ્ચ રૂપઞ્ચ, અસેસં ઉપરુજ્ઝતિ;

પટિઘં રૂપસઞ્ઞા ચ, એત્થેસા છિજ્જતે જટા.

અચ્છરાસુત્ત

પુચ્છા – અચ્છરાસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે અઞ્ઞતરં દેવપુત્તં આરબ્ભ ભાસિતં. અઞ્ઞતરો ભન્તે દેવપુત્તો ભગવન્તં એતદવોચ–

‘‘અચ્છરાગણસઙ્ઘટ્ઠં, પિસાચ ગણસેવિતં;

વનન્તં મોહનં નામ, કથં યાત્રા ભવિસ્સતી’’તિ.

તસ્મિં ભન્તે વત્થુસ્મિં–

‘‘ઉજુકો નામ સો મગ્ગો, અભયા નામ સા દિસા,

રથો અકૂજનો નામ, ધમ્મચક્કેહિ સંયુતો.

હિરી તસ્સ અપાલમ્બો, સત્યસ્સ પરિવારણં;

ધમ્માહં સારથિં બ્રૂમિ, સમ્માદિટ્ઠિ પુરેજવં.

યસ્સ એતાદિસં યાનં, ઇત્થિયા પુરિસસ્સ વા;

સ વે એતેન યાનેન, નિબ્બાનસ્સેવ સન્તિકે’’તિ.

એવં ખો ભન્તે ભગવતા ભાસિતં.

અચ્છરાગણસઙ્ઘુટ્ઠં, પિસાચગણસેવિતં;

વનન્તં મોહનં નામ, કથં યાત્રા ભવિસ્સતિ–

જરાસુત્ત

પુચ્છા – જરાસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે અઞ્ઞતરં દેવતં આરબ્ભ ભાસિતં. અઞ્ઞતરા ભન્તે દેવતા ભગવન્તં એતદવોચ–

‘‘કિં સુ યાવ જરા સાધુ, કિં સુ સાધુ પતિટ્ઠિતં;

કિં સુ નરાનં રતનં, કિં સુ ચોરેહિ દૂહર’’ન્તિ.

તસ્મિં ભન્તે વત્થુસ્મિં–

‘‘સીલં યાવ જરા સાધુ, સદ્ધા સાધુ પતિટ્ઠિતા;

પઞ્ઞા નરાનં રતનં, પુઞ્ઞં ચોરેહિ દૂહર’’ન્તિ.

એવં ખો ભન્તે ભગવતા ભાસિતં.

કિં સુ યાવ જરા સાધુ.

કિં સુ સાધુ પતિટ્ઠિતં.

કિં સુ નરાનં રતનં.

કિં સુ ચોરેહિ દૂહરં.

દેવપુત્તસંયુત્ત

સુબ્રહ્મસુત્ત

પુચ્છા – તેનાવુસો ભગવતા જાનતા પસ્સતા અરહતા સમ્માસમ્બુદ્ધેન સુબ્રહ્મસુત્તં કત્થ કં આરબ્ભ કિસ્મિં વત્થુસ્મિં કતઞ્ચ ભાસિતં. કીદિસો ચ તત્થ ધમ્મપટિગ્ગાહકસ્સ ધમ્મસ્સવનાનિસંસો અધિગતો.

વિસ્સજ્જના – રાજગહે ભન્તે સુબ્રહ્મદેવપુત્તં આરબ્ભ ભાસિતં. સુબ્રહ્મા ભન્તે દેવપુત્તો મરણભયભીતો ભગવન્તં ઉપસઙ્કમિત્વા એતદવોચ–

‘‘નિચ્ચં ઉત્રસ્તમિદં ચિત્તં, નિચ્ચં ઉબ્બિગ્ગમિદં મનો;

અનુપ્પન્નેસુ કિચ્છેસુ, અથો ઉપ્પતિતેસુ ચ;

સચે અત્થિ અનુત્રસ્તં, તં મે અક્ખાહિ પુચ્છિતો’’તિ–

તસ્મિં ભન્તે વત્થુસ્મિં.

‘‘નાઞ્ઞત્ર બોજ્જા તપસા, નાઞ્ઞત્રિન્દ્રિયસંવરા;

નાઞ્ઞત્ર સબ્બનિસ્સગ્ગા, સોત્થિં પસ્સામિ પાણિન’’ન્તિ.

એવં ખો ભન્તે ભગવતા ભાસિતં. દેસનાપરિયોસાને ચ ભન્તે સુબ્રહ્મસ્સ દેવપુત્તસ્સ તસ્મિંયેવ આસને વિરજં વીતમલં ધમ્મચક્ખું ઉદપાદિ, ‘‘યંકિઞ્ચિ સમુદયધમ્મં, સબ્બં તં નિરોધધમ્મ’’ન્તિ.

નિચ્ચં ઉત્રસ્તમિદં ચિત્તં, નિચ્ચં ઉબ્બિગ્ગમિદં મનો;

અનુપ્પન્નેસુ કિચ્છેસુ, અથો ઉપ્પતિતેસુ ચ;

સચે અત્થિ અનુત્રસ્ત, તં મે અક્ખાહિ પુચ્છિતો-હુ–

નાઞ્ઞત્ર બોજ્જા તપસા, નાઞ્ઞત્રિન્દ્રિયસંવરા;

નાઞ્ઞત્ર સબ્બનિસ્સગ્ગા, સોત્થિં પસ્સામિ પાણિનં–

રોહિતસ્સસુત્ત

પુચ્છા – રોહિતસ્સસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે રોહિતસ્સં દેવપુત્તં આરબ્ભ ભાસિતં. રોહિતસ્સો ભન્તે દેવપુત્તો ભગવન્તં એતદવોચ ‘‘યત્થ નુ ખો ભન્તે ન જાયતિ ન જીયતિ ન મીયતિ ન ચવતિ ન ઉપપજ્જતિ, સક્કા નુ ખો સો ભન્તે ગમનેન લોકસ્સ અન્તો ઞાતું વા દટ્ઠું વા પાપુણિતું વા’’તિ. તસ્મિં ભન્તે વત્થુસ્મિં ‘‘યત્થ ખો આવુસો ન જાયતિ ન જીયતિ ન મીયતિ ન ચવતિ ન ઉપપજ્જતિ, નાહં તં ગમનેન લોકસ્સ અન્તં ઞાતેય્યં અટ્ઠેય્યં પત્તેય્યન્તિ વદામી’’તિ એવમાદિના ભન્તે ભગવતા ભાસિતં.

કોસલસંયુત્ત

દહરસુત્ત

પુચ્છા – દહરસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે રાજાનં પસેનદિં કોસલં આરબ્ભ ભાસિતં. રાજા ભન્તે પસેનદિ કોસલો યેન ભગવા તેનુપસઙ્કમિ, ઉપસઙ્કમિત્વા ભગવતા સદ્ધિં સમ્મોદિ, એકમન્તં નિસિન્નો ખો ભન્તે રાજા પસેનદિ કોસલો ભગવન્તં એતદવોચ ‘‘ભવમ્પિ નો ગોતમો ‘અનુત્તરં સમ્માસમ્બોધિં અભિસમ્બુદ્ધો’તિ પટિજાનાતી’’તિ. તસ્મિં ભન્તે વત્થુસ્મિં ‘‘યઞ્હિ તં મહારાજ સમ્મા વદમાનોવદેય્ય ‘અનુત્તરં સમ્માસમ્બોધિં અભિસમ્બુદ્ધો’તિ, મમેવ તં સમ્મા વદમાનો વદેય્યા’’તિ એવમાદિના ભન્તે ભગવતા ભાસિતં.

તસ્મા હિ પણ્ડિતો પોસો, સમ્પસ્સં અત્થમત્તનો;

ભુજઙ્ગમં પાવકઞ્ચ, ખત્તિયઞ્ચ યસસ્સિનં;

ભિક્ખુઞ્ચ સીલસમ્પન્નં, સમ્મદેવ સમાચરે–

અત્તરક્ખિતસુત્ત

પુચ્છા – અત્તરક્ખિતસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે રાજાનંયેવ પસેનદિં કોસલં આરબ્ભ ભાસિતં. રાજા ભન્તે પસેનદિ કોસલો ભગવન્તં ઉપસઙ્કમિત્વા ‘‘ઇધ મય્હં ભન્તે રહોગતસ્સ પટિસલ્લીનસ્સ એવં ચેતસો પરિવિતક્કો ઉદપાદી’’તિ એવમાદિકં વચનં અવોચ. ભગવા ચ ભન્તે એવમેતં મહારાજ એવમેતં મહારાજાતિ એવમાદિના વિભજિત્વા ભાસિતં.

કાયેન સંવરો સાધુ, સાધુ વાચાય સંવરો;

મનસા સંવરો સાધુ, સાધુ, સબ્બત્થ સંવરો;

સબ્બત્થ સંવુતો લજ્જી, રક્ખિતોતિ પવુચ્ચતિ.

અપ્પકસુત્ત

પુચ્છા – અપ્પકસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે રાજાનંયેવ પસેનદિં કોસલં આરબ્ભ ભાસિતં. રાજા ભન્તે પસેનદિ કોસલો ભગવન્તં ઉપસઙ્કમિત્વા ‘‘ઇધ મય્હં ભન્તે રહોગતસ્સ પટિસલ્લીનસ્સ એવં ચેતસો પરિવિતક્કો ઉદપાદિ અપ્પકા તે સત્તા લોકસ્મિં, યે ઉળારે ઉળારે ભોગે લભિત્વા ન ચેવ મજ્જન્તિ ન ચ પમજ્જન્તિ, ન ચ કામેસુ ગેધં આપજ્જન્તી’’તિ એવમાદિકં વચનં અવોચ. ભગવા ચ ભન્તે ‘‘એવમેતં મહારાજ એવમેતં મહારાજા’’તિ એવમાદિના અપ્પકસુત્તં ભાસિતં.

મલ્લિકાસુત્ત

પુચ્છા – મલ્લિકાસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે રાજાનંયેવ પસેનદિં કોસલં આરબ્ભ ભાસિતં. રાજા ભન્તે પસેનદિ કોસલો મલ્લિકં દેવિં એતદવોચ ‘‘અત્થિ નુ ખો તે મલ્લિકે કોચઞ્ઞો અત્તના પિયતરો’’તિ. તસ્મિં વત્થુસ્મિં સબ્બાદિસા અનુપરિગમ્મ ચેતસાતિ એવમાદિના ભન્તે ભગવતા ભાસિતં.

સબ્બા દિસા અનુપરિગમ્મ ચેતસા, નેવજ્ઝગા પિયતરમત્તના ક્વચિ. એવં પિયો પુથુ અત્તા પરેસં, તસ્મા ન હિંસે પરમત્તકામો–

સત્તજટિલસુત્ત

પુચ્છા – તેનાવુસો ભગવતા…પે… સમ્માસમ્બુદ્ધેન સત્તજટિલસુત્તં કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે રાજાનં પસેનદિં કોસલં આરબ્ભ ભાસિતં. રાજા ભન્તે પસેનદિ કોસલો અચિરપક્કન્તેસુ સત્તસુ ચ જટિલેસુ સત્તસુ ચ નિગણ્ઠેસુ સત્તસુ ચ અચેલકેસુ સત્તસુ ચ એકસાટકેસુ સત્તસુ ચ પરિબ્બાજકેસુ યેન ભગવા તેનુપસઙ્કમિ, ઉપસઙ્કમિત્વા ભગવન્તં અભિવાદેત્વા એકમન્તં નિસીદિ, એકમન્તં નિસિન્નો ખો ભન્તે રાજા પસેનદિ કોસલો ભગવન્તં એતદવોચ ‘‘યે તે ભન્તે લોકે અરહન્તો વા અરહત્તમગ્ગં વા સમાપન્ના, એતે તેસં અઞ્ઞતરા’’તિ. તસ્મિં ભન્તે વત્થુસ્મિં ‘‘દુજ્જાનં ખો એતં મહારાજ તયા ગિહિના કામભોગિના પુત્તસમ્બાધસયનં અજ્ઝાવસન્તેન કાસિણચન્દનં પચ્ચનુભોન્તેન માલાગન્ધવિલેપનં ધારયન્તેન જાતરૂપરજતં સાદિયન્તેન ‘‘ઇમે વા અરહન્તો, ઇમે વા અરહત્તમગ્ગં સમાપન્ના’’તિ એવમાદિના ભન્તે ભગવતા ભાસિતં.

ન વણ્ણરૂપેન નરો સુજાનો, ન વિસ્સસે ઇત્તરદસ્સનેન;

સુસઞ્ઞતાનઞ્હિ વિયઞ્જનેન, અસઞ્ઞતા લોકમિમં ચરન્તિ.

પતિરૂપકો મત્તિકાકુણ્ડલોવ, લોહડ્ઢમાસોવ સુવણ્ણછન્નો;

ચરન્તિ લોકે પરિવારછન્ના, અન્તો અસુદ્ધા બહિસોભમાના-હૂ

પઞ્ચરાજસુત્ત

પુચ્છા – પઞ્ચરાજસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે રાજાનંયેવ પસેનદિં કોસલં આરબ્ભ ભાસિતં. રાજા ભન્તે પસેનદિ કોસલો ભગવન્તં એતદવોચ ‘‘કિં નુ ખો ભન્તે કામાનં અગ્ગ’’ન્તિ. તસ્મિં ભન્તે વત્થુસ્મિં ‘‘મનાપપરિયન્તં ખ્વાહં મહારાજ પઞ્ચસુ કામગુણેસુ અગ્ગન્તિ વદામી’’તિ એવમાદિના ભન્તે ભગવતા ભાસિતં.

ઇધ ભન્તે અમ્હાકં પઞ્ચન્નં રાજૂનં પઞ્ચહિ કામગુણેહિ સમપ્પિતાનં સમઙ્ગીભૂતાનં પરિચારયમાનાનં અયમન્તરાકથા ઉદપાદિં ‘કિં નુ ખો કામાનં અગ્ગ’ન્તિ–

પદુમં યથા કોકનદં સુગન્ધં, પાતો સિયા ફુલ્લમવીતગન્ધં. અઙ્ગીરસં પસ્સ વિરોચમાનં, તપન્તમાદિચ્ચમિવન્તલિક્ખે–

દુતિયઅપુત્તકસુત્ત

પુચ્છા – દુતિયઅપુત્તકસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે રાજાનંયેવ પસેનદિં કોસલં આરબ્ભ ભાસિતં. રાજા ભન્તે પસેનદિ કોસલો ભગવન્તં ઉપસઙ્કમિત્વા ‘‘ઇધ ભન્તે સાવત્થિયં સેટ્ઠિ ગહપતિ કાલઙ્કતો, તમહં અપુત્તકં સાપતેય્યં રાજન્તેપુરં અતિહરિત્વા આગચ્છામી’’તિ એવમાદિકં વચનં અવોચ. ભગવા ચ ભન્તે ‘‘એવમેતં મહારાજ, એવમેતં મહારાજ, ભૂતપુબ્બં સો મહારાજ સેટ્ઠિ ગહપતિ તગ્ગરસિખિં નામ પચ્ચેકસમ્બુદ્ધં પિણ્ડપાતેન પટિપાદેસી’’તિ એવમાદિના તસ્સ સેટ્ઠિસ્સ ગહપતિસ્સ અતીતં વત્થું આહરિત્વા પરિયોસાને ચતૂહિ ગાથાહિ ભાસિતં.

ધઞ્ઞં ધનં રજતં જાતરૂપં, પરિગ્ગહં વાપિ યદત્થિ કિઞ્ચિ,

દાસા કમ્મકરા પેસ્સા, યે ચસ્સ અનુજીવિનો.

સબ્બં નાદાય ગન્તબ્બં, સબ્બં નિક્ખિપ્પગામિનં;

યઞ્ચ કરોતિ કાયેન, વાચાય ઉદચેતસા.

તઞ્હિ તસ્સ સકં હોતિ, તંવ આદાય ગચ્છતિ;

તંવસ્સ અનુગં હોતિ, છાયાવ અનપાયિની.