મહાવગ્ગસંયુત્તપાળિ

અવિજ્જાવગ્ગ

ઉપડ્ઢસુત્ત

પુચ્છા – મહાવગ્ગસંયુત્તે પનાવુસો પોરાણકેહિ ધમ્મસંગાહકમહાથેરેહિ દુતિયં સંગીતં ઉપડ્ઢસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સક્કેસુ ભન્તે સક્કરે નામ સક્યાનં નિગમે આયસ્મન્તં આનન્દત્થેરં આરબ્ભ ભાસિતં. આયસ્મા ભન્તે આનન્દત્થેરો ભગવન્તં એતદવોચ ‘‘ઉપડ્ઢમિદં ભન્તે બ્રહ્મચરિયં યદિદં કલ્યાણમિત્તતા કલ્યાણસહાયતા કલ્યાણસમ્પવઙ્કતા’’તિ. તસ્મિં ભન્તે વત્થુસ્મિં ‘‘મા હેવં આનન્દ, મા હેવં આનન્દ, સકલમેવિદં આનન્દ બ્રહ્મચરિયં યદિદં કલ્યાણમિત્તતા કલ્યાણસહાયતા કલ્યાણસમ્પવઙ્કતા’’તિ એવમાદિના ભગવતા ભાસિતં.

મમં હિ આનન્દ કલ્યાણમિત્તં આગમ્મ જાતિધમ્મા સત્તા જાતિયા પરિમુચ્ચન્તિ.

બોજ્ઝઙ્ગસંયુત્ત

કુણ્ડલિયસુત્ત

પુચ્છા – બોજ્ઝઙ્ગસંયુત્તે પનાવુસો પોરાણકેહિ ધમ્મસંગાહકમહાથેરેહિ છટ્ઠં સંગીતં કુણ્ડલિયસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાકેતે ભન્તે અઞ્જનવને મિગદાયે કુણ્ડલિયં પરિબ્બાજકં આરબ્ભ ભાસિતં. કુણ્ડલિયો ભન્તે પરિબ્બાજકો ભગવન્તં ઉપસઙ્કમિત્વા ‘‘અહમસ્મિ ભો ગોતમ આરામનિસ્સયી પરિસાવચરો, તસ્સ મય્હં ભો ગોતમ પચ્છાભત્તં ભુત્તપાતરાસસ્સ અયમાચારો હોતિ આરામેન આરામં ઉય્યાનેન ઉય્યાનં અનુચઙ્કમામિ અનુવિચરામિ, સો તત્થ પસ્સામિ એકે સમણબ્રાહ્મણે ઇતિવાદપ્પમોક્ખાનિસંસઞ્ચેવ કથં કથન્તે ઉપારમ્ભાનિસંસઞ્ચ, ભવં પન ગોતમો કિમાનિસંસો વિહરતી’’તિ એતં વચનં અવોચ. તસ્મિં ભન્તે વત્થુસ્મિં ‘‘વિજ્જાવિમુત્તિફલાનિસંસો ખો કુણ્ડલિય તથાગતો વિહરતી’’તિ એવમાદિના ભગવતા ભાસિતં.

પઠમ ગિલાનસુત્ત

પુચ્છા – તેનાવુસો ભગવ્વતા જાનતા…પે… સમ્માસમ્બુદ્ધેન બોજ્ઝઙ્ગસંયુત્તે દુતિયે ગિલાનવગ્ગે પઠમગિલાનસુત્તં કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – રાજગહે ભન્તે પિપ્પલિગુહાયં આયસ્મન્તં મહાકસ્સપત્થેરં આરબ્ભ ભાસિતં. આયસ્મા ભન્તે મહાકસ્સપત્થેરો પિપ્પલિગુહાયં વિહરતિ આબાધિકો દુક્ખિતો બાળ્હગિલાનો. અથ ખો ભન્તે ભગવા સાયન્હસમયં પટિસલ્લાના વુટ્ઠિતો યેનાયસ્મા મહાકસ્સપો તેનુપસઙ્કમિ, ઉપસઙ્કમિત્વા પઞ્ઞત્તે આસને નિસીદિ, નિસજ્જ ખો ભગવા આયસ્મન્તં મહાકસ્સપં એતદવોચ– ‘‘કચ્ચિ તે કસ્સપ ખમનીયં, કચ્ચિ યાપનીયં, કચ્ચિ દુક્ખા વેદના પટિક્કમન્તિ નો અભિક્કમન્તિ, પટિક્કમોસાનં પઞ્ઞાયતિ નો અભિક્કમોતિ. ન મે ભન્તે ખમનીયં ન યાપનીયં, બાળ્હા મે દુક્ખા વેદના અભિક્કમન્તિ નો પટિક્કમન્તિ, અભિક્કમોસાનં પઞ્ઞાયતિ નો પટિક્કમો’’તિ. તસ્મિં ભન્તે વત્થુસ્મિં ‘‘સત્તિમે કસ્સપ બોજ્ઝઙ્ગા મયા સમ્મદક્ખાતા ભાવિતા બહુલીકતા અભિઞ્ઞાય સમ્બોધાય નિબ્બાનાય સંવત્તન્તી’’તિ એવમાદિના ભગવતા ભાસિતં.

ઉદાયિસુત્ત

પુચ્છા – તત્થેવ આવુસો તતિયે ઉદાયિવગ્ગે પોરાણકેહિ ધમ્મસંગાહકમહાથેરેહિ દસમં સંગીતં ઉદાયિસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સુમ્ભેસુ ભન્તે સેતકેનામ સુમ્ભાનં નિગમે આયસ્મન્તં ઉદાયિત્થેરં આરબ્ભ ભાસિતં. આયસ્મા ભન્તે ઉદાયિત્થેરો ભગવન્તં ઉપસઙ્કમિત્વા ‘‘અચ્છરિયં ભન્તે, અબ્ભુતં ભન્તે, યાવ બહુકતઞ્ચ મે ભન્તે ભગવતિ પેમઞ્ચ ગારવો ચ હિરી ચ ઓત્તપ્પઞ્ચાતિ એવમાદિકં વચનં અવોચ. તસ્મિં ભન્તે વત્થુસ્મિં ‘‘સાધુ સાધુ ઉદાયિ એસો હિ તે ઉદાયિ મગ્ગો પટિલદ્ધો. યો તે ભાવિતો બહુલીકતો, તથા તથા વિહરન્તં તથત્તાય ઉપનેસ્સતિ, યથા ત્વં ‘ખીણા જાતિ, વુસિતં બ્રહ્મચરિયં, કતં કરણીયં, નાપરં ઇત્થત્તાયા’તિ પજાનિસ્સતી’’તિ. એવં ખો ભગવતા ભાસિતં.

સતિપટ્ઠાનસંયુત્ત

સતિસુત્ત

પુચ્છા – સતિપટ્ઠાનસંયુત્તે આવુસો પોરાણકેહિ ધમ્મસંગાહક મહાથેરેહિ દુતિયં સંગીતં સતિસુત્તં ભગવતા કત્થ કં કારબ્ભ કથઞ્ચ ભાસિતં.

વિસ્સજ્જના – વેસાલિયં ભન્તે અમ્બપાલિવને સમ્બહુલે ભિક્ખૂ આરબ્ભ ‘‘સતો ભિક્ખવે ભિક્ખુ વિહરેય્ય સમ્પજાનો અયં વો અમ્હાકં અનુસાસની’’તિ એવમાદિના ભગવતા ભાસિતં.

સાલસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ ચતુત્થં સંગીતં સાલસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – કોસલેસુ ભન્તે સાલાયનામ કેસલાનં બ્રાહ્મણગામે સમ્બહુલે ભિક્ખૂ આરબ્ભ ‘‘યે તે ભિક્ખવે ભિક્ખૂ નવા અચિરપબ્બજિતા અધુનાગતા ઇમં ધમ્મવિનયં, તે વો ભિક્ખવે ભિક્ખૂ ચતુન્નં સતિપટ્ઠાનાનં ભાવનાય સમાદપેતબ્બા નિવેસેતબ્બા પતિટ્ઠાપેતબ્બા’’તિ એવમાદિના ભન્તે ભગવતા ભાસિતં.

સકુણગ્ઘિસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ છટ્ઠં સંગીતં સકુણગ્ઘિસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ‘‘ભૂતપુબ્બં ભિક્ખવે સકુણગ્ઘિ લાપં સકુણં સહસા અજ્ઝપ્પત્તા અગ્ગહેસિ. અથ ખો ભિક્ખવે લાપો સકુણો સકુણગ્ઘિયા હરિયમાનો એવં પરિદેવસિ મયમેવમ્હ અલક્ખિકા, મયં અપ્પપુઞ્ઞા, યે મયં અગોચરે ચરિમ્હ પરવિસયે, સચેજ્જ મયં ગોચરે ચરેય્યામ સકે પેત્તિકે વિસયે, ન મ્યાહં સકુણગ્ઘિ અલં અભવિસ્સ યદિદં યુદ્ધાયા’’તિ એવમાદિના ભગવતા ભાસિતં.

મયમેવમ્હ અલક્ખિકા, મયં અપ્પપુઞ્ઞા.

કો પન તે લાપ ગોચરો સકો પેત્તિકો વિસયો.

યદિદં નઙ્ગલકટ્ઠકરણં લેડ્ડુટ્ઠાનં.

એહિ ખો દાનિ મે સકુણગ્ઘિ, એહિ ખો દાનિ મે સકુણગ્ઘિ,

(દારુગુળોવિય વિનિવત્તિત્વા તસ્સેવ લેડ્ડુસ્સ અન્તરે પચ્ચુપાદિ. અટ્ઠકથા)

એવઞ્હિ તં ભિક્ખવે હોતિ યો અગોચરે ચરતિ પરવિસયે.

તસ્માતિહ ભિક્ખવે મા અગોચરે ચરિત્થ પરવિસયે.

ગોચરે ભિક્ખવે ચરથ સકે પેત્તિકે વિસયે.

ગોચરે ભિક્ખવે ચરતં સકે પેત્તિકે વિસયે ન લચ્છતિ મારો ઓતારં, ન લચ્છતિ મારો આરમ્મણં.

ભિક્ખુનુપસ્સયસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ દસમં સંગીતં ભિક્ખુનુપસ્સયસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે આયસ્મન્તં આનન્દત્થેરં આરબ્ભ ભાસિતં. આયસ્મા ભન્તે આનન્દો યાવત્તકો અહોસિ ભિક્ખુનીહિ સદ્ધિં કથાસલ્લાપો તં સબ્બં ભગવતો આરોચેસિ. તસ્મિં ભન્તે વત્થુસ્મિં ‘‘એવમેતં આનન્દ, એવમેતં આનન્દ, યોહિ કોચિ આનન્દ ભિક્ખુ વા ભિક્ખુની વા ચતૂસુ સતિપટ્ઠાનેસુ સુપ્પતિટ્ઠિતચિત્તો વિહરતિ, તસ્સેતં પાટિકઙ્ખં ઉળારં પુબ્બેનાપરં વિસેસં સઞ્જાનિસ્સતી’’તિ એવમાદિના ભગવતા ભાસિતં.

ચુન્દસુત્ત

પુચ્છા – તત્થેવ આવુસો દુતિયે નાલન્દવગ્ગે પોરાણકેહિ ધમ્મસંગાહકમહાથેરેહિ તતિયં સંગીતં ચુન્દસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે આયસ્મન્તંયેવ આનન્દત્થેરં આરબ્ભ ભાસિતં. આયસ્મા ભન્તે આનન્દત્થેરો ચુન્દેન સમણુદ્દેસેન સદ્ધિં યેન ભગવા તેનુપસઙ્કમિ. ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો ભન્તે આયસ્મા આનન્દો ભગવન્તં એતદવોચ ‘‘અયં ભન્તે ચુન્દો સમણુદ્દેસો એવમાહ ‘આયસ્મા ભન્તે સારિપુત્તો પરિનિબ્બુતો, ઇદમસ્સ પત્તચીવર’ન્તિ. અપિ ચ મે ભન્તે મધુરકજાતો વિય કાયો, દિસાપિ મે ન પક્ખાયન્તિ, ધમ્માપિ મં નપ્પટિભન્તિ ‘આયસ્મા સારિપુત્તો પરિનિબ્બુતો’તિ સુત્વા’’તિ. તસ્મિં ભન્તે વત્થુસ્મિં ‘‘કિં નુ ખો તે આનન્દ સારિપુત્તો સીલક્ખન્ધં વા આદાય પરિનિબ્બુતો, સમાધિક્ખન્ધં વા, પઞ્ઞાક્ખન્ધંવા, વિમુત્તિક્ખન્ધંવા, વિમુત્તિઞાણદસ્સનક્ખન્ધં વા આદાય પરિનિબ્બુતો’’તિ એવમાદિના ભગવતા ભાસિતં.

અયં ભન્તે ચુન્દોસમણુદ્દેસો એવમાહ.

તસ્માતિહાનન્દ અત્તદીપા વિહરથ અત્તસરણા અનઞ્ઞસરણા ધમ્મદીપા ધમ્મસરણા અનઞ્ઞસરણા.

બાહિયસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ પઞ્ચમં સંગીતં બાહિયસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે આયસ્મન્તં બાહિયં આરબ્ભ ભાસિતં. આયસ્મા ભન્તે બાહિયો ભગવન્તં એતદવોચ ‘‘સાધુ મે ભન્તે ભગવા સંખિત્તેન ધમ્મં દેસેતુ, યમહં ભગવતો ધમ્મં સુત્વા એકો વૂપકટ્ઠો અપ્પમત્તો આતાપી પહિતત્તો વિહરેય્ય’’ન્તિ. તસ્મિં ભન્તે વત્થુસ્મિં ‘‘તસ્માતિહ ત્વં બાહિય આદિમેવ વિસોધેહિ કુસલેસુ ધમ્મેસુ. કો ચાદિકુસલાનં ધમ્માનં, સીલઞ્ચ સુવિસુદ્ધં દિટ્ઠિચ ઉજુકા’’તિ એવમાદિના ભગવતા ભાસિતં.

સીલટ્ઠિતિવગ્ગ

ચિરટ્ઠિતિસુત્ત

પુચ્છા – તત્થેવ આવુસો તતિયે સીલટ્ઠિતિવગ્ગે પોરાણકેહિ ધમ્મસંગાહકમહાથેરેહિ દુતિયં સંગીતં ચિરટ્ઠિતિસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – પાટલિપુત્તે ભન્તે આયસ્મન્તં ભદ્દં આરબ્ભ આયસ્મતા આનન્દત્થેરેન ધમ્મભણ્ડાગારિકેન ભાસિતં. આયસ્મા ભન્તે ભદ્દો સાયન્હસમયં પટિસલ્લાના વુટ્ઠિતો યેનાયસ્મા આનન્દો તેનુપસઙ્કમિ, ઉપસઙ્કમિત્વા આયસ્મન્તં આનન્દં એતદવોચ ‘‘કો નુ ખો આવુસો આનન્દ હેતુ કો પચ્ચયો, યેન તથાગતે પરિનિબ્બુતે સદ્ધમ્મો ન ચિરટ્ઠિતિકો હોતિ, કો પનાવુસો આનન્દ હેતુ કો પચ્ચયો, યેન તથાગતે પરિનિબ્બુતે સદ્ધમ્મો ચિરટ્ઠિતિકો હોતી’’તિ. તસ્મિં ભન્તે વત્થુસ્મિં ‘‘સાધુ સાધુ આવુસો ભદ્દ, ભદ્દકો ખો તે આવુસો ભદ્દ ઉમ્મઙ્ગો’’તિ એવમાદિના આયસ્મતા આનન્દત્થેરેન ધમ્મભણ્ડાગારિકેન ભાસિતં.

ભદ્દકો તે આવુસો ભદ્દ ઉમ્મઙ્ગો.

‘‘ચતુન્નં ખો આવુસો સતિપટ્ઠાનાનં અભાવિતત્તા અબહુલીકતત્તા તથાગતે પરિનિબ્બુતે સદ્ધમ્મો ન ચિરટ્ઠિતિકો હોતી’’ –

સિરિવડ્ઢસુત્ત

પુચ્છા – તસ્સાવુસો ભગવતા અરહતો સમ્માસમ્બુદ્ધસ્સ પાવચનસમુદયભૂતાય મહાવગ્ગપાળિયા સતિપટ્ઠાનસંયુત્તે સીલટ્ઠિતિવગ્ગે નવમં સિરિવડ્ઢસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – રાજગહે ભન્તે સિરિવડ્ઢં ગહપતિં આરબ્ભ આયસ્મતા આનન્દત્થેરેન ધમ્મભણ્ડાગારિકેન ભાસિતં. સિરિવડ્ઢો ભન્તે ગહપતિ આબાધિકો હોતિ દુક્ખિતો બાળ્હગિલાનો. અથખો ભન્તે આયસ્મા આનન્દો યેનસિરિવડ્ઢસ્સ ગહપતિસ્સ નિવેસનં તેનુપસઙ્કમિ, ઉપસઙ્કમિત્વા પઞ્ઞત્તે આસને નિસીદિ. નિસજ્જ ખો આયસ્મા આનન્દો સિરિવડ્ઢં ગહપતિં એતદવોચ ‘‘કચ્ચિ તે ગહપતિ ખમનીયં, કચ્ચિ યાપનીયં, કચ્ચિ દુક્ખા વેદના પટિક્કમન્તિ નો અભિક્કમન્તિ, પટિક્કમોસાનં પઞ્ઞાયતિ નો અભિક્કમો’’તિ. ન મે ભન્તે ખમનીયં, ન યાપનીયં, બાળ્હા મે દુક્ખા વેદના અભિક્કમન્તિ નો પટિક્કમન્તિ, અભિક્કમોસાનં પઞ્ઞાયતિ નો પટિક્કમો’’તિ. તસ્મિં ભન્તે વત્થુસ્મિં ‘‘તસ્માતિહ તે ગહપતિ એવં સિક્ખિતબ્બં ‘કાયે કાયાનુપસ્સી વિહરિસ્સામિ આતાપી સમ્પજાનો સતિમા વિનેય્ય લોકે અભિજ્ઝા દોમનસ્સં. વેદનાસુ. ચિત્તે. ધમ્મેસુ ધમ્માનુપસ્સી વિહરિસ્સામિ આતાપી સમ્પજાનો સતિમા વિનેય્ય લોકે અભિજ્ઝા દોમનસ્સ’ન્તિ. એવઞ્હિ તે ગહપતિ સિક્ખિતબ્બ’’ન્તિ. એવં ખો આયસ્મતા આનન્દત્થેરેન ધમ્મભણ્ડાગારિકેન ભાસિતં.

ઇદ્ધિપાદસંયુત્ત

મોગ્ગલ્લાનસુત્ત

પુચ્છા – ઇદ્ધિપાદસંયુત્તે આવુસો ચતુત્થં મોગ્ગલ્લાનસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ભાસિતં. સમ્બહુલા ભન્તે ભિક્ખૂ હેટ્ઠામિગારમાતુપાસાદે વિહરન્તિ ઉદ્ધતા ઉન્નળા ચપલા મુખરા વિકિણ્ણવાચા મુટ્ઠસ્સતિનો અસમ્પજાના અસમાહિતા ભન્તચિત્તા પાકતિન્દ્રિયા. તસ્મિં ભન્તે વત્થુસ્મિં આયસ્મન્તં મહામોગ્ગલ્લાનં તે ભિક્ખૂ સંવેજેત્વા ‘‘કિં નુ તુમ્હે ભિક્ખવે સંવિગ્ગા લોમહટ્ઠજાતા એકમન્તં ઠિતા’’તિ એવમાદિના ભગવતા ભાસિતં.

અચ્છરિયં વત ભો, અબ્ભુતં વત ભો.

નિવાતઞ્ચ વત.

અયઞ્ચ મિગારમાતુપાસાદો ગમ્ભીરનેમો.

તુમ્હેવ ખો ભિક્ખવે સંવેજેતુકામેન મોગ્ગલ્લાનેન ભિક્ખુના પાદઙ્ગુટ્ઠકેન મિગારમાતુપાસાદો સઙ્કમ્પિતો સમ્પકમ્પિતો સમ્પધાલિતો.

તં કિં મઞ્ઞથ ભિક્ખવે, કતમેસં ધમ્માનં ભાવિતત્તા બહુલીકતત્તા મોગ્ગલ્લાનો ભિક્ખુ એવં મહિદ્ધિકો એવં મહાનુભાવો.

અનુરુદ્ધસંયુત્ત

બાળ્હગિલાનસુત્ત

પુચ્છા – અનુરુદ્ધસંયુત્તે આવુસો પોરાણકેહિ ધમ્મસંગાહકમહાથેરેહિ દસમં સંગીતં બાળ્હગિનાનસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ આયસ્મતા અનુરુદ્ધત્થેરેન ભાસિતં. સમ્બહુલા ભન્તે ભિક્ખૂ આયસ્મન્તં અનુરુદ્ધં આબાધિકં દુક્ખિતં બાળ્હગિલાનં એતદવોચું ‘‘કતમેનાયસ્મતો અનુરુદ્ધસ્સ વિહારેન વિહરતો ઉપ્પન્ના સારીરિકા દુક્ખા વેદના ચિત્તં ન પરિયાદાય તિટ્ઠન્તી’’તિ. તસ્મિં ભન્તે વત્થુસ્મિં ‘‘ચતૂસુ ખો મે આવુસો સતિપટ્ઠાનેસુ સુપ્પતિટ્ઠિતચિત્તસ્સ વિહરતો ઉપ્પન્ના સારીરિકા દુક્ખા વેદના ચિત્તં ન પરિયાદાય તિટ્ઠન્તી’’તિ એવમાદિના આયસ્મતા અનુરુદ્ધત્થેરેન ભાસિતં.

આનાપાનસંયુત્ત

મહાકપ્પિનસુત્ત

પુચ્છા – આનાપાનસંયુત્તે આવુસો પોરાણકેહિ ધમ્મસંગાહકમહાથેરેહિ સત્તમં સંગીતં મહાકપ્પિનસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ‘‘પસ્સથ નો તુમ્હે ભિક્ખવે એતસ્સ ભિક્ખુનો કાયસ્સ ઇઞ્જિતત્તં વા ફન્દિતબ્બં વા’’તિ એવમાદિના ભગવતા ભાસિતં.

ઇચ્છાનઙ્ગલસુત્ત

પુચ્છા – તત્થેવ આવુસો દુતિયવગ્ગે પઠમં ઇચ્છાનઙ્ગલસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – ઇચ્છાનઙ્ગલે ભન્તે સમ્બહુલે ભિક્ખૂ આરબ્ભ ‘‘સચે ખો ભિક્ખવે અઞ્ઞતિત્થિયા પરિબ્બાજકા એવં પુચ્છેય્યું ‘કતમે નાવુસો વિહારેન સમણો ગોતમો વસ્સાવાસં બહુલં વિહાસી’તિ. એવં પુટ્ઠા તુમ્હે ભિક્ખવે તેસં અઞ્ઞતિત્થિયાનં પરિબ્બાજકાનં એવં બ્યાકરેય્યાથ આનાપાનસ્સતિસમાધિના ખો આવુસો ભગવા વસ્સાવાસં બહુલં વિહાસી’’તિ એવમાદિના ભન્તે ભગવતા ભાસિતં.

સોતાપત્તિસંયુત્ત

ચક્કવત્તિરાજસુત્ત

પુચ્છા – સોતાપત્તિસંયુત્તે આવુસો પોરાણકેહિ ધમ્મસંગાહકમહાથેરેહિ પઠમં સંગીતં ચક્કવત્તિરાજસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ‘‘કિઞ્ચાપિ ભિક્ખવે રાજા ચક્કવત્તી ચતુન્નં દીપાનં ઇસ્સરિયાધિપચ્ચં રજ્જં કારેત્વા કાયસ્સ ભેદા પરં મરણા સુગતિં સગ્ગં લોકં ઉપપજ્જતિ દેવાનં તાવતિંસાનં સહબ્યતં, સો તત્થ નન્દને વને અચ્છરાસઙ્ઘપરિવુતો દિબ્બેહિ ચ પઞ્ચહિ કામગુણેહિ સમપ્પિતો સમઙ્ગીભૂતો પરિચારેતિ સો ચતૂહિ ધમ્મેહિ અસમન્નાગતો, અથ ખો સો અપરિમુત્તોવ નિરયા, અપરિમુત્તો તિરચ્છાનયોનિયા, અપરિમુત્તો પેત્તિવિસયા, અપરિમુત્તો અપાયદુગ્ગતિવિનિપાતા’’તિ એવમાદિના ભન્તે ભગવતા ભાસિતં.

દીઘાવુ ઉપાસકસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ તતિયં સંગીતં દીઘાવુઉપાસકસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – રાજગહે ભન્તે દીઘાવું ઉપાસકં આરબ્ભ ભાસિતં. ભગવા ભન્તે દીઘાવું ઉપાસકં આબાધિકં દુક્ખિતં બાળ્હગિલાનં એતદવોચ ‘‘કચ્ચિ તે દીઘાવુ ખમનીયં, કચ્ચિ યાપનીયં, કચ્ચિ દુક્ખા વેદના પટિક્કમન્તિ નો અભિક્કમન્તિ, પટિક્કમોસાનં પઞ્ઞાયતિ નો અભિક્કમો’’તિ. ન મે ભન્તે ખમનીયં, ન યાપનીયં બાળ્હા મે દુક્ખા વેદના અભિક્કમન્તિ નો પટિક્કમન્તિ, અભિક્કમોસાનં પઞ્ઞાયતિ નો પટિક્કમોતિ. તસ્મિં ભન્તે વત્થુસ્મિં ‘‘તસ્માતિહ તે દીઘાવુ એવં સિક્ખિતબ્બં બુદ્ધે અવેચ્ચપ્પસાદેન સમન્નાગતો ભવિસ્સામી’’તિ એવમાદિના ભગવતા ભાસિતં.

યાનિમાનિ ભન્તે ભગવતા ચત્તારિ સોતાપત્તિયઙ્ગાનિ દેસિતાનિ, સંવિજ્જન્તે તે ધમ્મા મયિ–

તસ્માતિહ ત્વં દીઘાવુ ઇમેસુ ચતૂસુ સોતાપત્તિયઙ્ગેસુ પતિટ્ઠાય છ વિજ્જાભાગિયે ધમ્મે ઉત્તરિ ભાવેય્યાસિ–

મા ત્વં તાત દીઘાવુ એવં મનસાકાસિ.

ઇઙ્ઘ ત્વં તાત દીઘાવુ યદેવ તે ભગવા આહ, તદેવ ત્વં સાધુકં મનસિકરોહિ.

પણ્ડિતો ભિક્ખવે દીઘાવુ ઉપાસકો.

પચ્ચપાદિ ધમ્મસ્સાનુધમ્મં.

ન ચ મં ધમ્માધિકરણં વિહેઠેસિ.

દીઘાવુ ભિક્ખવે ઉપાસકો પઞ્ચન્નં ઓરમ્ભાગિયાનં સંયોજનાનં પરિક્ખયા ઓપપાતિકો તત્થ પરિનિબ્બાયી અનાવત્તિધમ્મો તસ્મા લોકા.

વેળુદ્વારેય્યસુત્ત

પુચ્છા – તેનાવુસો ભગવતા…પે… સમ્માસમ્બુદ્ધેન સોતાપત્તિસંયુત્તે સત્તમં સંગીતં વેળુદ્વારેય્યસુત્તં કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – કોસલેસુ ભન્તે વેળુદ્વારે નામ કોસલાનં બ્રાહ્મણ ગામે વેળુદ્વારેય્યકે બ્રાહ્મણગહપતિકે આરબ્ભ ભાસિતં.

વેળુદ્વારેય્યકા ભન્તે બ્રાહ્મણગહપતિકા ભગવન્તં એતદવોચું ‘‘મયં ભો ગોતમ એવંકામા એવંછન્દા એવંઅધિપ્પાયા પુત્તસમ્બાધસયનં અજ્ઝાવસેય્યામ…પે… જાતરૂપરજતં સાદિયેય્યામ, કાયસ્સ ભેદા પરં મરણા સુગતિં સગ્ગં લોકં ઉપપજ્જેય્યામ, તેસં નો ભવં ગોતમો અમ્હાકં એવંકામાનં એવંછન્દાનં એવંઅધિપ્પાયાનં તથા દમ્મં દેસેતુ, યથા મયં પુત્તસમ્બાધસયનં અજ્ઝાવસેય્યામ…પે… કાયસ્સ ભેદા પરં મરણા સુગતિં સગ્ગં લોકં ઉપપજ્જેય્યામા’’તિ. તસ્મિં ભન્તે વત્થુસ્મિં ‘‘અત્તૂપનાયિકં વો ગહપતયો ધમ્મપરિયાયં દેસેસ્સામિ, તં સુણાથ સાધુકં મનસિ કરોથ, ભાસિસ્સામી’’તિ એવમાદિના ભગવતા ભાસિતં.

સરણાનિવગ્ગ

પઠમ મહાનામસુત્ત

પુચ્છા – તત્થેવ આવુસો તતિયે સરણાનિવગ્ગે પોરાણકેહિ ધમ્મસંગાહકમહાથેરેહિ પઠમં સંગીતં પઠમમહાનામસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સક્કેસુ ભન્તે કપિલવત્થુસ્મિં નિગ્રોધારામે મહાનામં સક્કં આરબ્ભ ભાસિતં. મહાનામો ભન્તે સક્કો ભગવન્તં એતદવોચ ‘‘ઇદં ભન્તે કપિલવત્થુ ઇદ્ધઞ્ચેવ ફીતઞ્ચ બાહુજઞ્ઞં આકિણ્ણમનુસ્સં સમ્બાધબ્યૂહં, સો ખ્વાહં ભન્તે ભગવન્તં વા પયિરુપાસિત્વા મનોભાવનીયે વા ભિક્ખૂ સાયન્હસમયં કપિલવત્થું પવિસન્તો ભન્તેનપિ હત્થિના સમાગચ્છામિ, ભન્તેનપિ અસ્સેન સમાગચ્છામિ, ભન્તેનપિ રથેન સમાગચ્છામિ, ભન્તેનપિ સકટેન સમાગચ્છામિ, ભન્તેનપિ પુરિસેન સમાગચ્છામિ, તસ્સ મય્હં ભન્તે તસ્મિં સમયે મુસ્સતેવ ભગવન્તં આરબ્ભ સતિ, મુસ્સતિ ધમ્મં આરબ્ભ સતિ, મુસ્સતિ સઙ્ઘં આરબ્ભ સતિ, તસ્સ મય્હં ભન્તે એવં હોતિ ઇમમ્હિ ચાહં સમયે કાલં કરેય્યં, કા મય્હં ગતિ, કો અભિસમ્પરાયો’’તિ. તસ્મિં ભન્તે વત્થુસ્મિં ‘‘મા ભાયિ મહાનામ, મા ભાયિ મહાનામ, અપાપકં તે મરણં ભવિસ્સતિ અપાપિકા કાલં કિરિયા’’તિ એવમાદિના ભગવતા ભાસિતં.

દુતિય સરણાનિસક્કસુત્ત

પુચ્છા – તત્થેવ આવુસો ધમ્મસંગાહકમહાથેરેહિ પઞ્ચમં સંગીતં દુતિયસરણાનિસક્કસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સક્કેસુ ભન્તે કપિલવત્થુસ્મિં નિગ્રોધારામે મહાનામંયેવ સક્કં આરબ્ભ ભાસિતં.

મહાનામો ભન્તે સક્કો ભગવન્તં એતદવોચ ‘‘ઇધ ભન્તે સરણાનિ સક્કો કાલઙ્કતો, સો ભગવતા બ્યાકતો ‘સોતાપન્નો અવિનિપાતધમ્મો નિયતો સમ્બોધિપરાયણો’તિ. તત્ર સુદં ભન્તે સમ્બહુલા સક્કા સઙ્ગમ્મ સમાગમ્મ ઉજ્ઝાયન્તિ ખીયન્તિ વિપાચેન્તિ ‘અચ્છરિયં વત ભો, અબ્ભુતં વત

ભો, એત્થ દાનિ કો ન સોતાપન્નો ભવિસ્સતિ, યત્ર હિ નામ સરણાનિ સક્કો કાલઙ્કતો, સો ભગવતા બ્યાકતો ‘સોતાપન્નો અવિનિપાતધમ્મો નિયતો સમ્બોધિપરાયણો’તિ, સરણાનિ સક્કો સિક્ખાય અપરિપૂરકારી અહોસી’’તિ તસ્મિં ભન્તે વત્થુસ્મિં ‘‘યો સો મહાનામ દીઘરત્તં ઉપાસકો બુદ્ધં સરણં ગતો, ધમ્મં સરણં ગતો, સઙ્ઘં સરણં ગતો, સો કથં વિનિપાતં ગચ્છેય્યા’’તિ એવમાદિના ભગવતા ભાસિતં.

પઠમ અનાથપિણ્ડિકસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ છટ્ઠં સંગીતં પઠમઅનાથપિણ્ડિકસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – સાવત્થિયં ભન્તે અનાથપિણ્ડિકં ગહપતિં આરબ્ભ આયસ્મતા સારિપુત્તત્થેરેન ધમ્મસેનાપતિના ભાસિતં.

આયસ્મા ભન્તે સારિપુત્તત્થેરો આયસ્મતા આનન્દત્થેરેન પચ્છાસમણેન સદ્ધિં યેન અનાથપિણ્ડિકસ્સ ગહપતિસ્સ નિવેસનં તેનુપસઙ્કમિ, ઉપસઙ્કમિત્વા પઞ્ઞત્તે આસને નિસીદિ, નિસજ્જ ખો આયસ્મા સારિપુત્તો અનાથપિણ્ડિકં ગહપતિં આબાધિકં દુક્ખિતં બાળ્હગિલાનં એતદવોચ ‘‘કચ્ચિ તે ગહપતિ ખમનીયં કચ્ચિ યાપનીયં, કચ્ચિ દુક્ખા વેદના પટિક્કમન્તિ, નો અભિક્કમન્તિ, પટિક્કમોસાનં પઞ્ઞાયતિ, નો અભિક્કમો’’તિ, ન મે ભન્તે ખમનીયં, ન યાપનીયં, બાળ્હા મે દુક્ખા વેદના અભિક્કમન્તિ, નો પટિક્કમન્તિ, અભિક્કમોસાનં પઞ્ઞાયતિ, નો પટિક્કમોતિ. તસ્મિં ભન્તે વત્થુસ્મિં ‘‘યથા રૂપેન ખો ગહપતિ બુદ્ધે અપ્પસાદેન સમન્નાગતો અસ્સુતવા પુથુજ્જનો કાયસ્સ ભેદા પરં મરણા અપાયં દુગ્ગતિં વિનિપાતં નિયરં ઉપપજ્જતિ તથારૂપો તે બુદ્ધે અપ્પસાદો નત્થિ, અત્થિ ચ ખો તે ગહપતિ બુદ્ધે અવેચ્ચપ્પસાદો ‘ઇતિપિ સો ભગવા અરહં સમ્માસમ્બુદ્ધો…પે… ભગવા’તિ તઞ્ચ પન તે બુદ્ધે અવેચ્ચપ્પસાદં અત્તનિ સમનુપસ્સતો ઠાનસો વેદના પટિપ્પસ્સમ્ભેય્યા’’તિ એવમાદિના આયસ્મતા સારિપુત્તત્થેરેન ધમ્મસેનાપતિના ભાસિતં.

યસ્સ સદ્ધા તથાગતે, અચલા સુપ્પતિટ્ઠિતા;

સીલઞ્ચ યસ્સ કલ્યાણં, અરિયકન્તં પસંસિતં.

સઙ્ઘે પસાદો યસ્સત્થિ, ઉજુભૂતઞ્ચ દસ્સનં;

અદલિદ્દોતિ તં આહુ, અમોઘં તસ્સ જીવિતં.

તસ્મા સદ્ધઞ્ચ સીલઞ્ચ, પસાદં ધમ્મદસ્સનં;

અનુયુઞ્જેથ મેધાવી, સરં બુદ્ધાનસાસનં.

પુઞ્ઞાભિસન્દવગ્ગ

મહાનામસુત્ત

પુચ્છા – તત્થેવ આવુસો પુઞ્ઞાભિસન્દવગ્ગો પોરાણકેહિ ધમ્મસંગાહકમહાથેરેહિ સત્તમં સંગીતં મહાનામસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સક્કેસુ ભન્તે કપિલવત્થુસ્મિં મહાનામં સક્કં આરબ્ભ ભાસિતં.

મહાનામો ભન્તે સક્કો ભગવન્તં એતદવોચ ‘‘કિત્તાવતા નુ ખો ભન્તે ઉપાસકો હોતી’’તિ. તસ્મિં ભન્તે વત્થુસ્મિં ‘‘યતો ખો મહાનામ બુદ્ધં સરણં ગતો હોતિ, ધમ્મં સરણં ગતો હોતિ, સઙ્ઘં સરણં ગતો હોતી’’તિ એવમાદિના ભગવતા ભાસિતં.

કિત્તાવતા નુ ખો ભન્તે ઉપાસકો હોતિ.

કાળિગોધસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ નવમં સંગીતં કાળિગોધસુત્તં ભગવતા કત્થ કં કારબ્ભ કથઞ્ચ ભાસિતં.

વિસ્સજ્જના – સક્કેસુ ભન્તે કાળિગોધં નામ સાકિયાનિં આરબ્ભ ‘‘ચતૂહિ ખો ગોધે ધમ્મેહિ સમન્નાગતા અરિયસાવિકા સોતાપન્ના હોતિ અવિનિપાતધમ્મા નિયતા સમ્બોધિપરાયણા’’તિ એવમાદિના ભગવતા ભાસિતં.

લાભા તે ગોધે, સુલદ્ધં તે ગોધે, સોતાપત્તિફલં તયા ગોધે –

નન્દિયસક્કસુત્ત

પુચ્છા – તેનાવુસો જાનતા…પે… સમ્માસમ્બુદ્ધેન સોતાપત્તિસંયુત્તે પુઞ્ઞાભિસન્દવગ્ગે દસમં નન્દિયસક્કસુત્તં કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સક્કેસુ ભન્તે કપિલવત્થુસ્મિં નિગ્રોધારામે નન્દિયં સક્કં આરબ્ભ ભાસિતં. નન્દિયો ભન્તે સક્કો ભગવન્તં એતદવોચ ‘‘યસ્સેવ નુ ખો ભન્તે અરિયસાવકસ્સ ચત્તારિ સોતાપત્તિયઙ્ગાનિ સબ્બેન સબ્બં સબ્બથાસબ્બં નત્થિ, સ્વેવ નુ ખો ભન્તે અરિયસાવકો પમાદવિહારી’’તિ. તસ્મિં ભન્તે વત્થુસ્મિં ‘‘યસ્સ ખો નન્દિય ચત્તારિ સોતાપત્તિયઙ્ગાનિ સબ્બેનસબ્બં સબ્બથાસબ્બં નત્થિ, તમહં બાહિરો પુથુજ્જનપક્ખે ઠિતોતિ વદામી’’તિ એવમાદિના ભગવતા ભાસિતં.

સચ્ચસંયુત્ત

તિરચ્છાનકથાસુત્ત

પુચ્છા – સચ્ચસંયુત્તે આવુસો પોરાણકેહિ ધમ્મસંગાયકમહાથેરેહિ દસમં સંગીતં તિરચ્છાનકથાસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ મા ભિક્ખવે અનેકવિહિતં તિરચ્છાનકથં કથેય્યાથ. સેય્યથિદં, રાજકથં ચોરકથં મહામત્તકથં સેનાકથં ભયકથં યુદ્ધકથં અન્નકથં પાનકથં વત્થકથં સયનકથં એવમાદિના ભન્તે ભગવતા ભાસિતં.

ઇદં દુક્ખન્તિ કથેય્યાથ.

તસ્માતિહ ભિક્ખવે ઇદં દુક્ખન્તિ યોગો કરણીયો…પે… અયં દુક્ખનિરોધગામિની પટિપદાતિ યોગો કરણીયો.

ધમ્મચક્કપવત્તનસુત્ત

પુચ્છા – તત્થેવ આવુસો ધમ્મચક્કપ્પવત્તનવગ્ગે પોરાણકેહિ ધમ્મસંગાહકમહાથેરેહિ પઠમં સંગીતં ધમ્મચક્કપવત્તનસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – બારાણસિયં ભન્તે ઇસિપતને મિગદાયે પઞ્ચવગ્ગિયે ભિક્ખૂ આરબ્ભ ‘‘દ્વે મે ભિક્ખવે અન્તા પબ્બજિતેન નસેવિતબ્બા. કતમે દ્વે, યો ચાયં કામેસુ કામસુખલ્લિકાનુયોગો હીનો ગમ્મો પોથુજ્જનિકો અનરિયો અનત્થસંહિતો, યો ચાયં અત્તકિલમથાનુયોગો દુક્ખો અનરિયો અનત્થસંહિતો, એતે ખો ભિક્ખવે ઉભો અન્તે અનુપગમ્મ મજ્ઝિમાપટિપદા તથાગતેન અભિસમ્બુદ્ધા’’તિ એવમાદિના ભગવતા ભાસિતં.

આસવક્ખયસુત્ત

પુચ્છા – તત્થેવ આવુસો કોટિગામવગ્ગે પોરાણકેહિ ધમ્મસંગાહકમહાથેરેહિ પઞ્ચમં સંગીતં આસવક્ખયસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ‘‘જાનતોહં ભિક્ખવે પસ્સતો આસવાનં ખયં વદામિ, નો અજાનતો અપસ્સતો. કિઞ્ચ ભિક્ખવે જાનતો પસ્સતો આસવાનં ખયો હોતિ, ઇદં દુક્ખન્તિ ભિક્ખવે જાનતો પસ્સતો આસવાનં ખયો હોતિ, અયં દુક્ખસમુદયોતિ, અયં દુક્ખનિરોધોતિ, અયં દુક્ખનિરોધગામિનીપટિપદાતિ જાનતો પસ્સતો આસવાનં ખયો હોતિ. એવં ખો ભિક્ખવે જાનતો એવં પસ્સતો આસવાનં ખયો હોતિ. તસ્માતિહ ભિક્ખવે ‘‘ઇદં દુક્ખ’’ન્તિ યોગો કરણીયો, અયં દુક્ખસમુદયોતિ, અયં દુક્ખનિરોધોતિ, અયં દુક્ખનિરોધગામિનીપટિપદાતિ યોગો કરણીયો’’તિ એવં ખો ભગવતા ભાસિતં.

સીસપાવનસુત્ત

પુચ્છા – તત્થેવ આવુસો સીસપાવનવગ્ગે પોરાણકેહિ ધમ્મસંગાહકમહાથેરેહિ પઠમં સંગીતં સીસપાવનસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – કોસમ્બિયં ભન્તે સીસપાવને સમ્બહુલે ભિક્ખૂ આરબ્ભ ‘‘તં કિં મઞ્ઞથ ભિક્ખવે, કતમં નુખો બહુતરં યાનિ વા મયા પરિત્તાનિ સીસપાપણ્ણાનિ પાણિના ગહિતાનિ યદિદં ઉપરિ સીસપાવને’’તિ એવમાદિના ભગવતા ભાસિતં.

પઞ્ચગતિપેય્યાલવગ્ગ

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ પરિયોસાનભાવેન સંગીતો પઞ્ચગતિપેય્યાલવગ્ગે, ભગવતા કત્થ કં આરબ્ભ કથઞ્ચ ભાસિતો.

વિસ્સજ્જના – વેસાલિયં ભન્તે સમ્બહુલે ભિક્ખૂ આરબ્ભ ‘‘તં કિં મઞ્ઞથ ભિક્ખવે, કતમં નુ ખો બહુતરં, યો વાયં મયા પરિત્તો નખસિખાયં પંસુ આરોપિતો, અયં વા મહાપથવી’’તિ એવમાદિના ભગવતા ભાસિતો.

પુચ્છા – કે આવુસો સિક્ખન્તિ.

વિસ્સજ્જના – સેક્ખા ચ ભન્તે પુથુજ્જનકલ્યાણકા ચ સિક્ખન્તિ.

પુચ્છા – કે આવુસો સિક્ખિતસિક્ખા.

વિસ્સજ્જના – અરહન્તો ભન્તે સિક્ખિતસિક્ખા.

પુચ્છા – કત્થ આવુસો ઠિતં.

વિસ્સજ્જના – સિક્ખાકામેસુ ભન્તે ઠિતં.