સળાયતનવગ્ગસંયુત્તપાળિ

અજ્ઝત્તાનિચ્ચસુત્ત, બાહિરસુત્ત

પુચ્છા – તેનાવુસો ભગવતા…પે… સમ્માસમ્બુદ્ધેન સળાયતનવગ્ગસંયુત્તે પઠમં અજ્ઝત્તાનિચ્ચસુત્તઞ્ચ ચતુત્થં બાહિરાનિચ્ચસુત્તઞ્ચ કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ‘‘ચક્ખું ભિક્ખવે અનિચ્ચં, યદનિચ્ચં તં દુક્ખં, યં દુક્ખં તદનત્તા, યદનત્તા તં ‘નેતં મમ, નેસોહમસ્મિ, ન મેસો અત્તા’તિ એવમેતં યથાભૂતં સમ્મપ્પઞ્ઞાય દટ્ઠબ્બ’’ન્તિ એવમાદિનાચ. ‘‘રૂપા ભિક્ખવે અનિચ્ચા. યદનિચ્ચં તં દુક્ખં, યં દુક્ખં તદનત્તા, યદનત્તા તં નેતં મમ, નેસોહમસ્મિ, ન મેસો અત્તા’’તિ ચ એવમાદિના ભગવતા ભાસિતં.

સબ્બવગ્ગ

આદિત્તસુત્ત

પુચ્છા – તત્થાવુસો સબ્બવગ્ગે છટ્ઠં આદિત્તસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – ગયાયં ભન્તે ગયાસીસે પુરાણજટિલં ભિક્ખુસહસ્સં આરબ્ભ ‘‘સબ્બં ભિક્ખવે આદિત્તં, કિઞ્ચ ભિક્ખવે સબ્બં આદિત્તં. ચક્ખુ ભિક્ખવે આદિત્તં, રૂપા આદિત્તા, ચક્ખુવિઞ્ઞાણં આદિત્તં, ચક્ખુસમ્ફસ્સો આદિત્તો, યમ્પિદં ચક્ખુસમ્ફસ્સપચ્ચયા ઉપ્પજ્જતિ, વેદયિતં સુખં વા દુક્ખં વા અદુક્ખમસુખંવા, તમ્પિ આદિત્તં. કેન આદિત્તં. રાગગ્ગિના દોસગ્ગિના મોહગ્ગિના આદિત્તં, જાતિયા જરાય મરણેન સોકેહિ પરિદેવેહિ દુક્ખેહિ દોમનસ્સેહિ ઉપાયાસેહિ આદિત્તન્તિ વદામી’’તિ એવમાદિના ભગવતા ભાસિતં.

મિગજાલવગ્ગ

પઠમ મિગજાલસુત્ત

પુચ્છા – મિગજાલવગ્ગે આવુસો પઠમમિગજાલસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે આયસ્મન્તં મિગજાલત્થેરં આરબ્ભ ભાસિતં. આયસ્મા ભન્તે મિગજાલત્થેરો ભગવન્તં એતદવોચ ‘‘એકવિહારી એકવિહારીતિ ભન્તે વુચ્ચતિ, કિત્તાવતાનુખો ભન્તે એકવિહારી હોતિ, કિત્તાવતાચ પન સદુતિયવિહારી હોતી’’તિ. તસ્મિં ભન્તે વત્થુસ્મિં ‘‘સન્તિ ખો મિગજાલ ચક્ખુવિઞ્ઞેયા રૂપા ઇટ્ઠા કન્તા મનાપા પિયરૂપા કામૂપસંહિતા રજનીયા, તઞ્ચે ભિક્ખુ અભિનન્દતિ અભિવદતિ અજ્ઝોસાય તિટ્ઠતિ, તસ્સ તં અભિનન્દતો અભિવદતો અજ્ઝોસાય તિટ્ઠતો ઉપ્પજ્જતિ નન્દી, નન્દિયા સતિ સારાગો હોતિ, સારાગે સતિ સંયોગો હોતિ, નન્દિસંયોજનસંયુત્તો ખો મિગજાલ ભિક્ખુ સદુતિયવિહારીતિ વુચ્ચતી’’તિ એવમાદિના ભગવતા ભાસિતં.

પઠમ છફસ્સાયતનસુત્ત

પુચ્છા – તત્થેવ નવમં સંગીતં પઠમછફસ્સાયતનસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ ‘‘યો હિ કોચિ વિક્ખવે ભિક્ખુ છન્નં ફસ્સાયતનાનં સમુદયઞ્ચ અત્થઙ્ગમઞ્ચ અસ્સાદઞ્ચ આદીનવઞ્ચ નિસ્સરણઞ્ચ યથાભૂતં નપ્પજાનાતિ, અવુસિતં તેન બ્રહ્મચરિયં, આરકા સો ઇમસ્મા ધમ્મવિનયા’’તિ એવમાદિના ભગવતા ભાસિતં.

અહં હિ ભન્તે છન્નં ફસ્સાયતનાનં સમુદયઞ્ચ અત્થઙ્ગમઞ્ચ અસ્સાદઞ્ચ આદીનવઞ્ચ નિસ્સરણઞ્ચ યથાભૂતં નપ્પજાનામિ.

ચક્ખું એતં મમ, એસોહમસ્મિ, એસો મે અત્તાતિ સમનુપસ્સસિ.

નો હેતં ભન્તે.

એત્થ ચ તે ભિક્ખુ ચક્ખુ નેતં મમ, નેસોહમસ્મિ, ન મેસો અત્તાતિ એવમેતં યથાભૂતં સમ્મપ્પઞ્ઞાય સુદિટ્ઠં ભવિસ્સતિ, એસેવન્તો દુક્ખસ્સ.

ગિલાનવગ્ગ

પઠમ ગિલાનસુત્ત

પુચ્છા – ગિલાનવગ્ગે પનાવુસો પઠમં ગિલાનસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે અઞ્ઞતરં નવં ભિક્ખું ગિલાનં આબાધિતં દુક્ખિતં બાળ્હગિલાનં આરબ્ભ ભાસિતં. અઞ્ઞતરો ભન્તે ભિક્ખુ ગિલાનો આબાધિકો દુક્ખિતો બાળ્હગિલાનો ભગવન્તં એતદવોચ ‘‘નખ્વાહં ભન્તે સીલવિસુદ્ધત્થં ભગવતા ધમ્મં દેસિતં આજાનામી’’તિ. તસ્મિં ભન્તે વત્થુસ્મિં તં ભિક્ખું પટિપુચ્છિત્વા તસ્સ ચ વચનં સાધુકારં દત્વા ‘‘રાગવિરાગત્થો હિ ભિક્ખુ મયા ધમ્મો દેસિતો, તં કિં મઞ્ઞસિ ભિક્ખુ, ચક્ખુ નિચ્ચં વા અનિચ્ચં વાતિ. અનિચ્ચં ભન્તે. યં પનાનિચ્ચં દુક્ખં વા તં સુખં વાતિ, દુક્ખં ભન્તે’’તિ એવમાદિના ભગવતા ભાસિતં.

ન મે ભન્તે ખમનીયં.

સાધુ ખો ત્વં ભિક્ખુ રાગવિરાગત્થં મયા ધમ્મં દેસિતં આજાનાસિ,

છન્નવગ્ગ

પુણ્ણસુત્ત

પુચ્છા – છન્નવગ્ગે પનાવુસો પઞ્ચમં સંગીતં પુણ્ણસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે આયસ્મન્તં પુણ્ણત્થેરં આરબ્ભ ભાસિતં, આયસ્મા ભન્તે પુણ્ણત્થેરો ભગવન્તં એતદવોચ ‘‘સાધુ મે ભન્તે ભગવા સંખિત્તેન ધમ્મં દેસેતુ, યમહં ભગવતો ધમ્મં સુત્વા એકો વૂપકટ્ઠો અપ્પમત્તો આતાપી પહિતત્તો વિહરેય્ય’’ન્તિ. તસ્મિં વત્થુસ્મિં ‘‘સન્તિ ખો પુણ્ણ ચક્ખુવિઞ્ઞેય્યા રૂપા ઇટ્ઠા કન્તા મનાપા પિયરૂપા કામૂપસંહિતા રજનીયા, તઞ્ચે ભિક્ખુ અભિનન્દતિ અભિવદતિ અજ્ઝોસાય તિટ્ઠતિ, તસ્સ તં અભિનન્દતો અભિવદતો અજ્ઝોસાય તિટ્ઠતો ઉપ્પજ્જતિ નન્દી, નન્દી સમુદયો દુક્ખસમુદયો પુણ્ણાતિ વદામી’’તિ એવમાદિના ભન્તે ભગવતા ભાસિતં.

પુચ્છા – એવઞ્ચાવુસો ભગવા આયસ્મતો પુણ્ણત્થેરસ્સ સંખિત્તેન ઓવાદં દત્વા કથઞ્ચ નં પટિપુચ્છિ, કથઞ્ચ સો ભગવતો આરોચેસિ, કથઞ્ચસ્સાયસ્મતો પુણ્ણત્થેરસ્સ અભિસમ્પરાયો અહોસિ.

વિસ્સજ્જના – એવં ખો ભન્તે ભગવા આયસ્મતો પુણ્ણત્થેરસ્સ સંખિત્તેન ઓવાદં દત્વા ‘‘ઇમિના ત્વં પુણ્ણ મયા સંખિત્તેન ઓવાદેન ઓવદિતો કતમસ્મિં જનપદે વિહરિસ્સસી’’તિ તં આયસ્મન્તં પુણ્ણત્થેરં પટિપુચ્છિ. સો ચ ભન્તે આયસ્મા ‘‘અત્થિ ભન્તે સુનાપરન્તો નામ જનપદો, તત્થાહં વિહરિસ્સામી’’તિ એવમાદિના ભગવતો આરોચેસિ. સો હિ ભન્તે આયસ્મા સુનાપરન્તે જનપદે વસિત્વા તેનેવ અન્તરવસ્સેન તિસ્સો વિજ્જા સચ્છાકાસિ. તેનેવ અન્તરવસ્સેન પરિનિબ્બાયિ. એવં ખો ભન્તે તસ્સ આયસ્મતો અભિસમ્પરાયો અહોસિ.

સન્તિ ખો તસ્સ ભગવતો સાવકા કાયેન ચ જીવિતેન ચ અટ્ટીયમાના હરાયમાના જિગુચ્છમાના સત્થહારકં પરિયેસન્તિ.

સક્ખિસ્સસિ ખો ત્વં પુણ્ણ ઇમિના દમૂપસમેન સમન્નાગતો સુનાપરસન્તસ્મિં જનપદે વત્થું.

સળવગ્ગ

માલુક્યપુત્તસુત્ત

પુચ્છા – તેનાવુસો ભગવતા…પે… સમ્માસમ્બુદ્ધેન સળવગ્ગે દુતિયં માલુક્યપુત્તસુત્તં કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સાવત્થિયં ભન્તે આયસ્મન્તં માલુક્યપુત્તત્થેરં આરબ્ભ ભાસિતં. આયસ્મા ભન્તે માલુક્યપુત્તત્થેરો ભગવન્તં એતદવોચ ‘‘સાધુ મે ભન્તે ભગવા સંખિત્તેન ધમ્મં દેસેતુ, યમહં ભગવતો ધમ્મં સુત્વા એકો વૂપકટ્ઠો અપ્પમત્તો આતાપી પહિતત્તો વિહરેય્ય’’ન્તિ. તસ્મિં વત્થુસ્મિં ‘‘એત્થ દાનિ માલુક્યપુત્ત કિં દહરે ભિક્ખૂ વક્ખામાતિ’’આદિના થેરં અપસાદેત્વા ચેવ ઉસ્સાદેત્વા ચ ‘‘તં કિં મઞ્ઞસિ માલુક્યપુત્ત, યે તે ચક્ખુવિઞ્ઞેય્યા રૂપા અદિટ્ઠા અદિટ્ઠપુબ્બા, ન ચ પસ્સસિ, ન ચ તે હોતિ પસ્સેય્યન્તિ, અત્થિ તે તત્થ છન્દો વા રાગો વા એવમાદિના ભન્તે ભગવતા ભાસિતં.

પુચ્છા – ઇમસ્મિં ચ ખો પનાવુસો ભગવતા ઓવાદે સંખિત્તેન ભાસિતે સો આયસ્મા માલુક્યપુત્તત્થેરો ભગવન્તં કિં અવોચ કથઞ્ચસ્સ ભગવા અનુઞ્ઞાસિ. કીદિસો ચસ્સાયસ્મતો માલુક્યપુત્તત્થેરસ્સ ધમ્માભિસમયો અહોસિ.

વિસ્સજ્જના – ઇમસ્મિં ખો ભન્તે ઓવાદે ભગવતા સંખિત્તેન ભાસિતે આયસ્મા માલુક્યપુત્તત્થેરો ભગવન્તં એતદવોચ ‘‘ઇમસ્સ ખ્વાહં ભન્તે ભગવતા સંખિત્તેન ભાસિતસ્સ વિત્થારેન અત્થં આજાનામિ.

રૂપં દિસ્વા મુટ્ઠા, પિયં નિમિત્તં મનસિ કરોતો;

સારત્તચિત્તો વેદેતિ, તઞ્ચ અજ્ઝોસ તિટ્ઠતિ.

તસ્સ વડ્ઢન્તિ વેદના, અનેકા રૂપસમ્ભવા;

અભિજ્ઝા ચ વિહેસા ચ, ચિત્તમસ્સૂપહઞ્ઞતિ;

એવં આચિનતો દુક્ખં, આરા નિબ્બાન વુચ્ચતિ;

પેય્યાલ

ન સો રજ્જતિ ધમ્મેસુ, ધમ્મં ઞત્વા પટિસ્સતો;

વિરત્તચિત્તો વેદેતિ, તઞ્ચ નાજ્ઝોસ તિટ્ઠતિ.

યથાસ્સ જાનતો ધમ્મં, સેવતો ચાપિ વેદનં;

ખીયતિ નોપચીયતિ, એવં સો ચરતી સતો;

એવં અપચિનતો દુક્ખં, સન્તિકે નિબ્બાન વુચ્ચતીતિ.

ઇમસ્સ ખ્વાહં ભન્તે ભગવતા સંખિત્તેન ભાસિતસ્સ એવં વિત્થારેન અત્થં આજાનામીતિ. ભગવા ચ ભન્તે ‘‘સાધુ સાધુ માલુક્યપુત્ત, સાધુ ખો ત્વં માલુક્યપુત્ત મયા સંખિત્તેન ભાસિતસ્સ વિત્થારેન અત્થં આજાનાસી’’તિ સાધુકારં દત્વા–

‘‘રૂપં દિસ્વા સતિ મુટ્ઠો, પિયં નિમિત્તં મનસિ કરોતો;

સારત્તચિત્તો વેદેતિ, તઞ્ચ અજ્ઝોસ તિટ્ઠતી’’તિ–

આદિના

થેરસ્સ વચનં સમનુઞ્ઞાસિ. સો ચ ભન્તે આયસ્મા માલુક્યપુત્તત્થેરો એકો વૂપકટ્ઠો અપ્પમત્તો આતાપી પહિતત્તો વિહરન્તો નચિરસ્સેવ યસ્સત્થાય કુલપુત્તા સમ્મદેવ અગારસ્મા અનગારિયં પબ્બજન્તિ, તદનુત્તરં બ્રહ્મચરિયપરિયોસાનં દિટ્ઠેવ ધમ્મે સયં અભિઞ્ઞા સચ્છિકત્વા ઉપસમ્પજ્જ વિહાસિ, ‘‘ખીણા જાતિ, વુસિતં બ્રહ્મચરિયં, કતં કરણીયં, નાપરં ઇત્થત્તાયા’’તિ અબ્ભઞ્ઞાસિ. અઞ્ઞતરોચ પનાયસ્મા માલુક્યપુત્તો અરહતં અહોસિ. એવં ખો ભન્તે તસ્સ આયસ્મતો અભિસમ્પરાયો અહોસિ.

રૂપં દિસ્વા સતિ મુટ્ઠા, પિયં નિમિત્તં મનસિ કરોતો;

સારત્તચિત્તો વેદેતિ, તઞ્ચ અજ્ઝોસ તિટ્ઠતિ.

પમાદવિહારીસુત્ત

પુચ્છા – તત્થેવ આવુસો ચતુત્થં પમાદવિહારીસુત્તં ભગવતા કત્થ કં આરબ્ભ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ‘‘પમાદવિહારિઞ્ચ વો ભિક્ખવે દેસેસ્સામિ અપ્પમાદવિહારિઞ્ચ, તં સુણાથ. કથઞ્ચ ભિક્ખવે પમાદવિહારી હોતિ. ચક્ખુન્દ્રિયં અસંવુતસ્સ ભિક્ખવે વિહરતો ચિત્તં બ્યાસિઞ્ચતિ ચક્ખુવિઞ્ઞેય્યેસુ રૂપેસુ, તસ્સ બ્યાસિત્તચિત્તસ્સ પામોજ્જં ન હોતિ, પામોજ્જે અસતિ પીતિ ન હોતિ, પીતિયા પસ્સદ્ધિ ન હોતિ, પસ્સદ્ધિયા અસતિ દુક્ખં હોતિ, દુક્ખિનો ચિત્તં ન સમાધિયતિ, અસમાહિ તે ચિત્તે ધમ્મા ન પાતુભવન્તિ, ધમ્માનં અપાતુભાવા પમાદવિહારીત્વેવ સઙ્ખં ગચ્છતી’’તિ એવમાદિના ભન્તે ભગવતા ભાસિતં.

લોકકામગુણવગ્ગ

રાહુલોવાદસુત્ત

પુચ્છા – લોકકામગુણવગ્ગે આવુસો અટ્ઠમં રાહુલોવાદસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયંયેવ ભન્તે આયસ્મન્તં રાહુલં આરબ્ભ ‘‘તં કિં મઞ્ઞસિ રાહુલ, ચક્ખુ નિચ્ચં વા અનિચ્ચં વાતિ. અનિચ્ચં ભન્તે. યં પનાનિચ્ચં, દુક્ખં વા તં સુખંવાતિ. દુક્ખં ભન્તે. યં પનાનિચ્ચં દુક્ખં વિપરિણામધમ્મં કલ્લં નુ તં સમનુપસ્સિતું ‘એતં મમ, એસોહમસ્મિ, એસો મે અત્તા’તિ. નો હેતં ભન્તે’’તિ એવમાદિના ભન્તે ભગવતા ભાસિતં.

યંનૂનાહં રાહુલં ઉત્તરિં આસવાનં ખયે વિનેય્યં.

ગણ્હાહિ રાહુલ નિસીદનં.

ગહપતિવગ્ગ

ભારદ્વાજસુત્ત

પુચ્છા – ગહપતિવગ્ગે આવુસો પોરાણકેહિ ધમ્મસંગાહકમહાથેરેહિ ચતુત્થં સંગીતં ભારદ્વાજસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – કોસમ્બિયં ભન્તે રાજાનં ઉદેનં આરબ્ભ આયસ્મતા પિણ્ડોલભારદ્વાજત્થેરેન ભાસિતં. રાજા ભન્તે ઉદેનો આયસ્મન્તં પિણ્ડોલભારદ્વાજં એતદવોચ ‘‘કો નુ ખો ભો ભારદ્વાજ હેતુ કો પચ્ચયો, યેનિમે દહરા ભિક્ખૂ સુસૂ કાળકેસા ભદ્રેન યોબ્બનેન સમન્નાગતા પઠમેન વયસા અનિકીળિતાવિનો કામેસુ યાવજીવં પરિપુણ્ણં પરિસુદ્ધં બ્રહ્મચરિયં ચરન્તિ, અદ્ધાનઞ્ચ આપાદેન્તી’’તિ. તસ્મિં વત્થુસ્મિં ‘‘વુત્તં ખો

એતં મહારાજ તેન ભગવતા જાનતા પસ્સતા અરહતા સમ્માસમ્બુદ્ધેન એથ તુમ્હે ભિક્ખવે માતુમત્તીસુ માતુચિત્તં ઉપટ્ઠપેથ. ભગનિમત્તીસુ ભગિનિચિત્તં ઉપટ્ઠપેથ, ધીતુમત્તીસુ ધીતુચિત્તં ઉપટ્ઠપેથા’’તિ એવમાદિના ભન્તે આયસ્મતા પિણ્ડોલ ભારદ્વાજત્થેરેન ભાસિતં.

વેરહચ્ચાનિસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ દસમં સંગીતં વેરહચ્ચાનિસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – કામણ્ડાયં ભન્તે વેરહચ્ચાનિગોત્તં બ્રાહ્મણિં આરબ્ભ આયસ્મતા ઉદાયિત્થેરેન ભાસિતં. વેરહચ્ચાનીગોત્તા ભન્તે બ્રાહ્મણી આયસ્મન્તં ઉદાયિત્થેરં એતદવોચ ‘‘કિસ્મિં નુ ખો ભન્તે સતિ અરહન્તો સુખદુક્ખં પઞ્ઞપેન્તિ, કિસ્મિં અસતિ અરહન્તો સુખદુક્ખં ન પઞ્ઞપેન્તી’’તિ. તસ્મિં વત્થુસ્મિં ‘‘ચક્ખુસ્મિં ખો ભગિનિ સતિ અરહન્તો સુખદુક્ખં પઞ્ઞપેન્તિ, ચક્ખુસ્મિં અસતિ અરહન્તો સુખદુક્ખં ન પઞ્ઞપેન્તી’’તિ એવમાદિના ભન્તે આયસ્મતા ઉદાયિત્થેરેન ભાસિતં.

દેવદહવગ્ગ

ખણસુત્ત

પુચ્છા – દેવદહવગ્ગે આવુસો ખણસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સક્કેસુ ભન્તે દેવદહે નામ સક્યાનં નિગમે સમ્બહુલે ભિક્ખૂ આરબ્ભ ‘‘લાભા વો ભિક્ખવે, સુલદ્ધં વો ભિક્ખવે, ખણો વો પટિલદ્ધો બ્રહ્મચરિયવાસાયા’’તિ એવમાદિના ભન્તે ભગવતા ભાસિતં.

સમુદ્દવગ્ગ

બાળિસિકોપમસુત્ત

પુચ્છા – સમુદ્દવગ્ગે પનાવુસો તતિયં બાળિસિકોપમસુત્તં ભગવતા કત્થ કં આરબ્ભ ભાસિતં.

વિસ્સજ્જના – રાજગહે ભન્તે જીવકમ્બવને સમ્બહુલે ભિક્ખૂ આરબ્ભ ‘‘સેય્યથાપિ ભિક્ખવે બાળિસિકો આમિસગતબળિસં ગમ્ભીરે ઉદકરહદે પક્ખિપેય્યા’’તિ એવમાદિના ભગવતા ભાસિતં.

આદિત્તપરિયાયસુત્ત

પુચ્છા – સળાયતનવગ્ગસંયુત્તે સમુદ્દવગ્ગે પનાવુસો પોરાણકેહિ ધમ્મસંગાહકમહાથેરેહિ સંગીતં અટ્ઠમં આદિત્તપરિયાયસુત્તં ભગવતા કં આરબ્ભ કથઞ્ચ ભાસિતં.

વિસ્સજ્જના – સમ્બહુલે ભન્તે ભિક્ખૂ આરબ્ભ ‘‘આદિત્તપરિયાયં વો ભિક્ખવે ધમ્મપરિયાયં દેસેસ્સામિ, તં સુણાથ. કતમો ચ ભિક્ખવે આદિત્તપરિયાયો ધમ્મપરિયાયો. વરં ભિક્ખવે તત્તાય અયોસલાકાય આદિત્તાય સમ્પજ્જલિતાય સજોતિભૂતાય ચક્ખુન્દ્રિયં સમ્પલિમટ્ઠં, નત્વેવ ચક્ખુવિઞ્ઞેય્યેસુ રૂપેસુ અનુબ્યઞ્જનસો નિમિત્તગ્ગાહો’’તિઆદિના ભગવતા ભાસિતં.

આસીવિસવગ્ગ

પઠમદારુક્ખન્ધોપમસુત્ત

પુચ્છા – આસીવિસવગ્ગે આવુસો પોરાણકેહિ ધમ્મસંગાહકમહાથેરેહિ ચતુત્થં સંગીતં પઠમદારુક્ખન્ધોપમસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – કોસમ્બિયં ભન્તે ગઙ્ગાય નદિયા તીરે સમ્બહુલે ભિક્ખૂ આરબ્ભ ‘‘પસ્સથ નો તુમ્હે ભિક્ખવે અમ્હં મહન્તં દારુક્ખન્ધં ગઙ્ગાય નદિયા સોતેન વુય્હમાન’’ન્તિ એવમાદિના ભગવતા ભાસિતા.

ઉપચારવચનં

પુચ્છા – કથઞ્ચાવુસો તત્થ ભગવતા ઓરિમતીરાદીનં ઉપચારવચનાનં અત્થો વિત્થારેન વિભજિત્વા પકાસિતો.

વિસ્સજ્જના – ઓરિમં તીરન્તિ ખો ભિક્ખુ છન્નેતં અજ્ઝત્તિકાનં આયતનાનં અધિવચનં. પારિમં તીરન્તિ ખો ભિક્ખુ છન્નેતં બાહિરાનં આયતનાનં અધિવચનં. મજ્ઝે સંસીદોતિ ખો ભિક્ખુ નન્દિરાગસ્સેતં અધિવચનં. થલે ઉસ્સાદોતિ ખો ભિક્ખુ અસ્મિમાનસ્સેતં અધિવચનન્તિ એવમાદિના ભન્તે ભગવતા તત્થ ઓરિમતીરાદીનં ઉપચારવચનાનં અત્થો વિત્થારેન વિભજિત્વા પકાસિતો.

પુચ્છા – ઇમસ્મિં ખો પન આવુસો સુત્તે ભગવતા ભાસિતે વિસેસતો કસ્સ કીદિસો અત્થો કથઞ્ચ પટિલદ્ધો.

વિસ્સજ્જના – ઇમસ્મિં ભન્તે સુત્તે ભગવતા ભાસિતે વિસેસતો નન્દસ્સ ગોપાલકસ્સ પબ્બજ્જા ચ ઉપસમ્પદા ચ યાવ અરહત્તાચ વિસેસતો અત્થો અધિગતો.

લભેય્યાહં ભન્તે ભગવતો સન્તિકે પબ્બજ્જં, લભેય્યં ઉપસમ્પદં.

તેન હિ ત્વં નન્દ સામિકાનં ગાવો નિય્યાતેહિ.

ગમિસ્સન્તિ ભન્તે ગાવો વચ્છગિદ્ધિનિયો.

કિંસુકોપમસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ અટ્ઠમં સંગીતં કિંસુકોપમસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – સક્કેસુ ભન્તે કપિલવત્થુસ્મિં નિગ્રોધારામે અઞ્ઞતરં કારકં ભિક્ખું આરબ્ભ ભાસિતં. અઞ્ઞતરો ભન્તે કારકો ભિક્ખુ ચત્તારો ખાણાસવે ભિક્ખૂ ઞાણદસ્સનવિસુદ્ધં પુચ્છિત્વા અસન્તુટ્ઠો તેસં ભિક્ખૂનં પઞ્હાવેય્યાકરણેન યેન ભગવા તેનુપસઙ્કમિ. ઉપસઙ્કમિત્વા ભગવન્તં એતદવોચ ‘‘કિત્તાવતા નુ ખો ભન્તે ભિક્ખુનો દસ્સનં સુવિસુદ્ધં હોતી’’તિ. તસ્મિં વત્થુસ્મિં ‘‘સેય્યથાપિ ભિક્ખુ પુરિસસ્સ કિંસુકો અદિટ્ઠપુબ્બો અસ્સ, સો યેનઞ્ઞતરો પુરિસો કિંસુકસ્સ દસ્સાવી તેનુપસઙ્કમેય્યા’’તિ એવમાદિના ભન્તે ભગવતા ભાસિતં.

છપ્પાણકોપમસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ દસમં સંગીતં છપ્પાણકોપમસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સક્કેસુયેવ ભન્તે સમ્બહુલે ભિક્ખૂ આરબ્ભ ‘‘સેય્યથાપિ, ભિક્ખવે પુરિસો અરુગત્તો પક્કગત્તો સરવનં પવિસેય્યા’તિ એવમાદિના ભગવતા ભાસિતં.

પુચ્છા – કથઞ્ચાવુસો તત્થ ભગવતા અસંવરો વિત્થારેન વિભજિત્વા દેસિતો.

વિસ્સજ્જના – કથઞ્ચ ભિક્ખવે અસંવરો હોતિ, ઇધ ભિક્ખવે ભિક્ખુ ચક્ખુના રૂપં દિસ્વા પિયરૂપે રૂપે અધિમુચ્ચતિ, અપ્પિયરૂપે રૂપે બ્યાપજ્જતિ, અનુપટ્ઠિતકાયસ્સતિ ચ વિહરતિ પરિત્તચેતસો. તઞ્ચ ચેતોવિમુત્તિં પઞ્ઞાવિમુત્તિં યથાભૂતં નપ્પજાનાતિ, યત્થસ્સ તે ઉપ્પન્ના પાપકા અકુસલા ધમ્મા અપરિસેસા નિરુજ્ઝન્તીતિ એવમાદિના ભન્તે ભગવતા તત્થ અસંવરો વિત્થારેન વિભજિત્વા દેસિતો.

પુચ્છા – કથઞ્ચાવુસો તત્થ ભગવતા સંવરો વિભજિત્વા વિત્થારેન દેસિતો.

વિસ્સજ્જના – કથઞ્ચ ભિક્ખવે સંવરો હોતિ, ઇધ ભિક્ખવે ભિક્ખુ ચક્ખુના રૂપં દિસ્વા પિયરૂપે રૂપે નાધિમુચ્ચતિ, અપ્પિયરૂપે રૂપે ન બ્યાપજ્જતીતિ, એવમાદિના ભન્તે ભગવતા તત્થ સંવરો વિભજિત્વા વિત્થારેન દેસિતો.

વેદનાસંયુત્ત

દટ્ઠબ્બસુત્ત

પુચ્છા – તેનાવુસો ભગવતા…પે… સમ્માસમ્બુદ્ધેન વેદનાસંયુત્તે પઞ્ચમં દટ્ઠબ્બસુત્તં કત્થ કં આરબ્ભ કથઞ્ચ ભાસિતં.

વિસ્સજ્જના – સક્કેસુ ભન્તે કપિલવત્થુસ્મિં નિગ્રોધારામે સમ્બહુલે ભિક્ખૂ આરબ્ભ ‘‘તિસ્સો ઇમા ભિક્ખવે વેદના. કતમા તિસ્સો, સુખા વેદના દુક્ખાવેદના અદુક્ખમસુખા વેદના. સુખા ભિક્ખવે વેદના દુક્ખતો દટ્ઠબ્બા, દુક્ખા વેદના સલ્લતો દટ્ઠબ્બા, અદુક્ખમસુખા વેદના અનિચ્ચતો દટ્ઠબ્બા’’તિ એવમાદિના ભગવતા ભાસિતં.

સુખા ભિક્ખવે વેદના દુક્ખતો દટ્ઠબ્બા.

યો સુખં દુક્ખતો અદ્દસ, દુક્ખમદ્દક્ખિ સલ્લતો;

અદુક્ખમસુખં સન્તં, અદ્દક્ખિનં અનિચ્ચતો.

સ વે સમ્મદ્દસો ભિક્ખુ, પરિજાનાતિ વેદના;

સો વેદના પરિઞ્ઞાય, દિટ્ઠે ધમ્મે અનાસવો;

કાયસ્સ ભેદા ધમ્મટ્ઠો, સઙ્ખ્યં નોપેતિ વેદગૂ.

સલ્લસુત્ત

પુચ્છા – તત્થેવ આવુસો છટ્ઠં સલ્લસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સક્કેસુ ભન્તે કપિલવત્થુસ્મિં નિગ્રોધારામે સમ્બહુલે ભિક્ખૂ આરબ્ભ ‘‘અસ્સુતવા ભિક્ખવે પુથુજ્જનો સુખમ્પિ વેદનં વેદયતિ, દુક્ખમ્પિ વેદનં વેદયતિ, અદુક્ખમસુખમ્પિ વેદનં વેદયતિ. સુતવા ભિક્ખવે અરિયસાવકો સુખમ્પિ વેદનં વેદયતિ, દુક્ખમ્પિ વેદનં વેદયતિ, અદુક્ખમસુખમ્પિ વેદનં વેદયતિ. તત્ર ભિક્ખવે કો વિસેસો, કો અધિપ્પયાસો, કિં નાનાકરણં સુતવતો અરિયભાવકસ્સ અસ્સુતવતા પુથુજ્જનેના’’તિ એવમાદિના ભગવતા ભાસિતં.

જમ્બુખાદકસંયુત્ત

નિબ્બાનપઞ્હાસુત્ત

પુચ્છા – જમ્બુખાદકસંયુત્તે આવુસો પઠમં નિબ્બાનપઞ્હાસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – મગધેસુ ભન્તે નાલકગામકે જમ્બુખાદકં પરિબ્બાજકં આરબ્ભ આયસ્મતા સારિપુત્તત્થેરેન ધમ્મસેનાપતિના ભાસિતં. જમ્બુખાદકો ભન્તે પરિબ્બાજકો આયસ્મન્તં સારિપુત્તં એતદવોચ ‘‘નિબ્બાનં નિબ્બાનન્તિ આવુસો સારિપુત્ત વુચ્ચતિ, કતમં નુખો આવુસો નિબ્બાન’’ન્તિ. તસ્મિં ભન્તે વત્થુસ્મિં ‘‘યો ખો આવુસો રાગક્ખયો દોસક્ખયો મોહક્ખયો, ઇદં વુચ્ચતિ નિબ્બાન’’ન્તિ એવમાદિના આયસ્મતા સારિપુત્તત્થેરેન ધમ્મસેનાપતિના ભાસિતં.

ધમ્મવાદીપઞ્હાસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ તતિયં સંગીતં ધમ્મવાદીપઞ્હાસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – મગધેસુયેવ ભન્તે નાલકગામે જમ્બુખાદકં પરિબ્બાજકં આરબ્ભ આયસ્મતા સારિપુત્તત્થેરેન ધમ્મસેનાપતિના ભાસિતં. જમ્બુખાદકો ભન્તે પરિબ્બાજકો આયસ્મન્તં સારિપુત્તં એતદવોચ ‘‘કે નુ ખો આવુસો સારિપુત્ત લોકે ધમ્મવાદિનો, કે લોકે સુપ્પટિપન્ના, કે લોકે સુગતા’’તિ. તસ્મિં ભન્તે વત્થુસ્મિં ‘‘યે ખો આવુસો રાગપ્પહાનાય ધમ્મં દેસેન્તિ, દોસપ્પહાનાય ધમ્મં દેસેન્તિ, મોહપ્પહાનાય ધમ્મં દેસેન્તિ. તે લોકે ધમ્મવાદિનો’’તિ એવમાદિના આયસ્મતા સારિપુત્તત્થેરેન ધમ્મસેનાપતિના ભાસિતં.

કે લોકે સુપ્પટિપન્ના.

કે લોકે સુગતા.

દુક્કરપઞ્હાસુત્ત

પુચ્છા – તત્થેવ પોરાણકેહિ ધમ્મસંગાહક મહાથેરેહિ પરિયોસાનસુત્તભાવેન સંગીતં દુક્કરપઞ્હાસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – મગધેસુયેવ નાલકગામે જમ્બુખાદકં પરિબ્બાજકં આરબ્ભ આયસ્મતા સારિપુત્તત્થેરેન ધમ્મસેનાપતિના ભાસિતં. જમ્બુખાદકો ભન્તે પરિબ્બાજકો આયસ્મન્તં સારિપુત્તં એતદવોચ ‘‘કિં નુ ખો આવુસો સારિપુત્ત ઇમસ્મિં ધમ્મવિનયે દુક્કર’’ન્તિ. તસ્મિં ભન્તે વત્થુસ્મિં ‘‘પબ્બજ્જા ખો આવુસો ઇમસ્મિં ધમ્મવિનયે દુક્કરા’’તિ એવમાદિના આયસ્મતા સારિપુત્તત્થેરેન ધમ્મસેનાપતિના ભાસિતં.

મોગ્ગલ્લાનસંયુત્ત

સક્કસુત્ત

પુચ્છા – મોગ્ગલ્લાનસંયુત્તે આવુસો દસમં સંગીતં સક્કસુત્તં કત્થ કં આરબ્ભ કેન કથઞ્ચ ભાસિતં.

વિસ્સજ્જના – દેવેસુ ભન્તે તાવતિંસેસુ સક્કં દેવાનમિન્દં આરબ્ભ ‘‘સાધુ ખો દેવાનમિન્દ બુદ્ધસરણગમનં હોતિ, બુદ્ધસરણગમનહેતુ ખો દેવાનમિન્દ એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપજ્જન્તી’’તિ એવમાદિના ભન્તે આયસ્મતા મહામોગ્ગલ્લાનત્થેરેન ભાસિતં.

ચિત્તસંયુત્ત

નિગણ્ઠનાટપુત્તસુત્ત

પુચ્છા – ચિત્તસંયુત્તે આવુસો પોરાણકેહિ ધમ્મસંગાહકમહાથેરેહિ અટ્ઠમં સંગીતં નિગણ્ઠનાટપુત્તસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – મચ્છિકાસણ્ડે ભન્તે નિગણ્ઠં નાટપુત્તં આરબ્ભ ચિત્તેન ગહપતિના ભાસિતં. નિગણ્ઠો ભન્તે નાટપુત્તો ચિત્તં ગહપતિં એતદવોચ ‘‘સદ્દહસિ ત્વં ગહપતિ સમણસ્સ ગોતમસ્સ અત્થિ અવિતક્કો અવિચારો સમાધિ, અત્થિ વિતક્કવિચારાનં નિરોધો’’તિ. તસ્મિં ભન્તે વત્થુસ્મિં ‘‘ન ખ્વાહં એત્થ ભન્તે ભગવતો સદ્ધાય ગચ્છામિ, અત્થિ અવિતક્કો અવિચારો સમાધિ, અત્થિ વિતક્કવિચારાનં નિરોધો’’તિ એવમાદિના ચિત્તેન ગહપતિના ભાસિતં.

ઇદં ભવન્તો પસ્સન્તુ.

યાવ ઉજુકો ચાયં ચિત્તો ગહપતિ.

‘‘અહં ખો ભન્તે યાવદેવ આકઙ્ખામિ, વિવિચ્ચેવ કામેહિ વિવિચ્ચ અકુસલેહિ ધમ્મેહિ સવિતક્કં સવિચારં વિવેકજં પીતિસુખં પઠમં ઝાનં ઉપસમ્પજ્જ વિહરામિ’’ –

ઇદં ભવન્તો પસ્સન્તુ.

અચેલકસ્સપસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ નવમં સંગીતં અચેલકસ્સપસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – તત્થેવ ભન્તે મચ્છિકાસણ્ડે અચેલં કસ્સપં આરબ્ભ ચિત્તેન ગહપતિના ભાસિતં. અચેલો ભન્તે કસ્સપો ચિત્તં ગહપતિં એતદવોચ ‘‘ઇમેહિ પન તે ગહપતિ તિંસમત્તેહિ વસ્સેહિ અત્થિ કોચિ ઉત્તરિમનુસ્સધમ્મો અલમરિયઞાણદસ્સનવિસેસો અધિગતો ફાસુવિહારો’’તિ. તસ્મિં ભન્તે વત્થુસ્મિં ‘‘ગિહિનોપિ સિયા ભન્તે અહઞ્હિ ભન્તે યાવદેવ આકઙ્ખામિ, વિવિચ્ચેવ કામેહિ વિવિચ્ચ અકુસલેહિ ધમ્મેહિ સવિતક્કં સવિચારં વિવેકજં પીતિસુખં પઠમં ઝાનં ઉપસમ્પજ્જ વિહરામી’’તિ એવમાદિના ચિત્તેન ગહપતિના ભાસિતં.

ગામણિસંયુત્ત

ચણ્ડસુત્ત

પુચ્છા – તેનાવુસો ભગવતા…પે… સમ્માસમ્બુદ્ધેન ગામણિસંયુત્તે પઠમં ચણ્ડસુત્તં કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.