લક્ખણસંયુત્ત

અટ્ઠિસુત્ત

પુચ્છા – લક્ખણસંયુત્તે પનાવુસો પોરાણકેહિ ધમ્મસંગાહકત્થેરેહિ પઠમં સંગીતં અટ્ઠિસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – રાજગહે ભન્તે આયસ્મન્તઞ્ચ લક્ખણં આયસ્મન્તઞ્ચ મહામોગ્ગલ્લાનં આરબ્ભ ભાસિતં. આયસ્મા ભન્તે લક્ખણો ભગવતા સમ્મુખે આયસ્મન્તં મહામોગ્ગલ્લાનં એતદવોચ ‘‘ઇધાયસ્મા મહામોગ્ગલ્લાનો ગિજ્ઝકૂટા પબ્બતા ઓરોહન્તો અઞ્ઞતરસ્મિં પદેસે સિતં પાત્વાકાસિ, કો નુ ખો આવુસો મોગ્ગલ્લાન હેતુ, કો પચ્ચયો સિતસ્સ પાતુકમ્માયા’’તિ. આયસ્મા ચ ભન્તે મહામોગ્ગલ્લાનો ‘‘ઇધાહં આવુસો ગિજ્ઝકૂટા પબ્બતા ઓરોહન્તો અદ્દસં અટ્ઠિકસઙ્ખલિકં વેહાસં ગચ્છન્તિં’’તિ એવમાદિના આરોચેસિ. તસ્મિં ભન્તે વત્થુસ્મિં ‘‘ચક્ખુભૂતા વત ભિક્ખવે સાવકા વિહરન્તિ, ઞાણભૂતા વત ભિક્ખવે સાવકા વિહરન્તિ, યત્રહિ નામ સાવકો એવરૂપં ઞસ્સતિ વા દક્ખતિ વા સક્ખિં વા કરિસ્સતી’’તિ એવમાદિના ભગવતા ભાસિતં.

અચ્છરિયં વત ભો, અબ્ભુતં વત ભો;

એવરૂપોપિ નામ સત્તો ભવિસ્સતિ.

પિણ્ડસુત્ત

પુચ્છા – તેનાવુસો જાનતા…પે… સમ્માસમ્બુદ્ધેન લક્ખણસંયુત્તે તતિયં સંગીતં પિણ્ડસુત્તં કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – રાજગહે ભન્તે આયસ્મન્તઞ્ચ લક્ખણં આયસ્મન્તઞ્ચ મહામોગ્ગલ્લાનં આરબ્ભ ભાસિતં. આયસ્મા ભન્તે લક્ખણો ભગ્ગવતો સમ્મુખે આયસ્મન્તં મહામોગ્ગલ્લાનં એતદવોચ ‘‘ઇધાયસ્મા મહામોગ્ગલ્લાનો ગિજ્ઝકૂટા પબ્બતા ઓરોહન્તો અઞ્ઞતરસ્મિં પદેસે સિતં પાત્વાકાસિ, કો નુખો આવુસો મોગ્ગલ્લાનહેતુ, કો પચ્ચયો સિતસ્સ પાતુકમ્માયા’’તિ. આયસ્મા ચ ભન્તે મહામોગ્ગલ્લાનો ‘‘ઇધાહં આવુસો ગિજ્ઝકૂટા પબ્બતા ઓરોહન્તો અદ્દસં મંસપિણ્ડં વેહાસં ગચ્છન્તં, તમેનં ગિજ્ઝાપિ કાકાપિ કુલલાપિ અનુપતિત્વા અનુપતિત્વા વિતચ્છેન્તિ વિરાજેન્તિ. સા સુદં અટ્ટસ્સરં કરોતી’’તિ એવમાદિના આરોચેસિ. તસ્મિં ભન્તે વત્થુસ્મિં ‘‘ચક્ખુભૂતા વત ભિક્ખવે સાવકા વિહરન્તિ, ઞાણભૂતા વત ભિક્ખવે સાવકા વિહરન્તિ, યત્રહિ નામ સાવકો એવરૂપં ઞસ્સતિ વા દક્ખતિ વા સક્ખિં વા કરિસ્સતી’’તિ એવમાદિના ભગવતા ભાસિતં.

અસિલોમસુત્ત

પુચ્છા – તત્થેવ આવુસો પોરાણકેહિ ધમ્મસંગાહકેહિ મહાથેરેહિ સંગીતં અસિલોમસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – રાજગહે ભન્તે આયસ્મન્તઞ્ચ લક્ખણં આયસ્મન્તઞ્ચ મહામોગ્ગલ્લાનં આરબ્ભ ભાસિતં. આયસ્મા ભન્તે લક્ખણો ભગવતો સમ્મુખે આયસ્મન્તં મહામોગ્ગલ્લાનં એતદવોચ ‘‘કો નુ ખો આવુસો મોગ્ગલ્લાન હેતુ, કો પચ્ચયો સિતસ્સ પાતુકમ્માયા’’તિ. આયસ્મા ચ ભન્તે મહામોગ્ગલ્લાનત્થેરો ‘‘ઇધાહં આવુસો ગિજ્ઝકૂટા પબ્બતા ઓરોહન્તો અદ્દસં અસિલોમં વેહાસં ગચ્છન્તં’’તિ એવમાદિના આરોચેસિ. તસ્મિં ભન્તે વત્થુસ્મિં ચક્ખુભૂતા વત ભિક્ખવે સાવકા વિહરન્તિ, ઞાણભૂતા વત ભિક્ખવે સાવકા વિહરન્તિ. (પેય્યાલ) એસો ભિક્ખવે સત્તો ઇમસ્મિંયેવ રાજગહે સૂકરિકો અહોસી’’તિ એવમાદિના ભગવતા ભાસિતં.

સૂચિલોમસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ સંગીતં સૂચિલોમસુત્તં ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – તત્થેવ ભન્તે રાજગહે આયસ્મન્તઞ્ચ લક્ખણં આયસ્મન્તઞ્ચ મહામોગ્ગલ્લાનં આરબ્ભ ભાસિતં. આયસ્મા ભન્તે લક્ખણો ભગવતો સમ્મુખે તથેવ અવોચ.

આયસ્મા ચ ભન્તે મહામોગ્ગલ્લાનો તથેવ આરોચેસિ. તસ્મિં ભન્તે વત્થુસ્મિં ‘‘ચક્ખુભૂતા વત ભિક્ખવે સાવકા વિહરન્તિ, ઞાણભૂતા વત ભિક્ખવે સાવકા વિહરન્તિ, (પેય્યાલ) એસો ભિક્ખવે સત્તો ઇમસ્મિંયેવ રાજગહે સૂતો અહોસી’’તિ એવમાદિના ભગવતા ભાસિતા.

પાપભિક્ખુસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ સંગીતાનિ પાપભિક્ખુસુત્તાદીનિ પઞ્ચસુત્તાનિ ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતાનિ.

વિસ્સજ્જના – રાજગહે આયસ્મન્તઞ્ચ લક્ખણં આયસ્મન્તઞ્ચ મહામોગ્ગલ્લાનં આરબ્ભ ભાસિતાનિ. આયસ્મા ભન્તે લક્ખણો ભગવતો સમ્મુખે પુબ્બે વુત્તનયેનેવ આરોચેસિ. આયસ્મા ચ ભન્તે મહામોગ્ગલ્લાનો ‘‘ઇધાહં આવુસો ગિજ્ઝકૂટા પબ્બતા ઓરોહન્તો અદ્દસં ભિક્ખું વેહાસં ગચ્છન્તં. અદ્દસં ભિક્ખુનિં વેહાસં ગચ્છન્તિં. અદ્દસં સિક્ખમાનં વેહાસં ગચ્છન્તિં. અદ્દસં સામણેરં વેહાસં ગચ્છન્તં. અદ્દસં સામણેરિં વેહાસં ગચ્છન્તિં. તસ્સા સઙ્ઘાટિપિ આદિત્તા સમ્પજ્જલિતા સજોતિભૂતા, પત્તોપિ આદિત્તો સમ્પજ્જલિતો સજોતિભૂતો, કાયબન્ધનમ્પિ આદિત્તં સમ્પજ્જલિતં સજોતિભૂતં, કાયોપિ આદિત્તો સમ્પજ્જલિતો સજોતિભૂતો, સા સુદં અટ્ટસ્સરં કરોતી’’તિ એવમાદિના આરોચેસિ. તસ્મિં ભન્તે વત્થુસ્મિં ‘‘ચક્ખુભૂતા વત ભિક્ખવે સાવકા વિહરન્તિ ઞાણભૂતા વત ભિક્ખવે સાવકા વિહરન્તિ. (પેય્યાલ). એસો ભિક્ખવે ભિક્ખુ કસ્સપસ્સસમ્માસમ્બુદ્ધસ્સ પાવચને પાપભિક્ખુ અહોસિ. એસા ભિક્ખવે ભિક્ખુની કસ્સપસ્સ સમ્માસમ્બુદ્ધસ્સ પાવચને પાપભિક્ખુની અહોસિ. એસા ભિક્ખવે સિક્ખમાના કસ્સપસ્સ સમ્માસમ્બુદ્ધસ્સ પાવચને પાપસિક્ખમાના અહોસિ. એસો ભિક્ખવે સામણેરો કસ્સપસ્સસમ્માસમ્બુદ્ધસ્સ પાવચને પાપસામણેરો અહોસિ. એસા ભિક્ખવે સામણેરી કસ્સપસ્સ સમ્માસમ્બુદ્ધસ્સ પાવચને પાપસામણેરી અહોસી’’તિ એવમાદિના ભગવતા ભાસિતાનિ.