ઓપમ્મસંયુત્ત

નખસિખસુત્ત

પુચ્છા – ઓપમ્મસંયુત્તે આવુસો પોરાણકેહિ ધમ્મસંગાહકમહાથેરેહિ સંગીતં નખસિખસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ‘‘તં કિં મઞ્ઞથ ભિક્ખવે, કતમં નુ ખો બહુતરં, યો ચાયં મયા પરિત્તો નખસિખાયં પંસુ આરોપિતો, યા ચાયં મહાપથવી’’તિ એવમાદિના ભગવતા ભાસિતં.

તં કિં મઞ્ઞથ ભિક્ખવે, કતમં નુ ખો બહુતરં.

તસ્માતિહ ભિક્ખવે એવં સિક્ખિતબ્બં.

આણિસુત્ત

પુચ્છા – તત્થેવ આવુસો પોરાણકેહિ ધમ્મસંગાહકમહાથેરેહિ સંગીતં આણિસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયંયેવ ભન્તે સમ્બહુલે ભિક્ખૂ આરબ્ભ ‘‘ભૂતપુબ્બં ભિક્ખવે દસારહાનં આનકો નામ મુદિઙ્ગો અહોસિ, તસ્સ દસારહા આનકે ઘટિતે અઞ્ઞં આણિં ઓદહિંસુ, અહુ ખો સો ભિક્ખવે સમયો યં આનકસ્સ મુદિઙ્ગસ્સ પોરાણં પોક્ખરફલકં અન્તરધાયિ, આણિસઙ્ઘાટોવ અવસિસ્સી’’તિ એવમાદિના ભગવતા ભાસિતં.