૮૦. દણ્ડા

દ્વે હોન્તીતિ ઇકો ઈચેતિ દ્વે હોન્તિ, એકમેકંવાતિ ઉભિન્નં. વાસદ્દો દ્વે હોન્તીતિ એત્થાપિ દટ્ઠબ્બો. ઉત્તમીણેવ ધના ઇકોતિ ગણસુત્તં વિવરતિ ‘ઉત્તમીણેવા’તિઆદિ. કેનેત્થ સમાસોતિ આહ- ‘સ્યાદિસ્યાદિનેકત્થન્તિ સમાસો’તિ. ઉત્તમીણો ધનસામી. અસન્નિહિતે અત્થાતિ ગણસુત્તં, અસન્નિહિતેતીમસ્સ અત્થં વિવરતિ ‘અપ્પત્તે’તિ. અસમ્પત્તેતિ અત્થો. અસન્નિહિતેતિ ચ અત્થો ઇચ્ચસ્સ વિસેસનં. અત્થનં અસન્નિહિતે અત્થે આસિસનં અત્થો, સો અસ્સ અત્થીતિ અત્થિકો અત્થી. તદન્તાચાતિ ગણસુત્તં, અસન્નિહિતેત્યનુવત્તતે, અસન્નિહિતોપાધિકા અત્થન્તા ચ ઇક ઈપ્પચ્ચયો ભવતીત્યત્થો. વણ્ણન્તાઈયેવાતિ ગણસુત્તં, બ્રહ્માનં દેવાનં વણ્ણોતિ વા સમાસો. હત્થદન્તેહિ જાતિયન્તિ ગણસુત્તં.

જાતિયન્તિ પચ્ચયવિસેસનં. વણ્ણતો બ્રહ્મચારિમ્હીતિ ગણસુત્તં. બ્રહ્મસદ્દેન નિયમવિસેસો વુચ્ચતિચ્ચાહ-‘વિજ્જે’ચ્ચાદિ. તસ્મિઞ્ચનિયમવિસેસચરણે તિણ્ણં બ્રાહ્મણાદીનમેવાધિકારો, નસુદ્દસ્સાતિ દસ્સેન્તો આહ- ‘તઞ્ચે’ચ્ચાદિ. તેવણ્ણિકો વણ્ણીતિ વુચ્ચતીતિ સમ્બન્ધો. તીસુ વણ્ણેસુ ભવો તદન્તોગધત્તા તેવણ્ણિકોતિ ભવત્થે ણિકો. વણ્ણસદ્દો બ્રાહ્મણાદિવણ્ણવચનો. તત્ર બ્રહ્મચારિમ્હિત્યનેન સુદ્દો બ્યવચ્છિજ્જતે.

અથવા બ્રહ્મન્તિ નિબ્બાનં તદત્થો ગન્થોપિ, તં બ્રહ્મં નિબ્બાનં ધમ્મં વા તેપિટકં ચરતીતિ બ્રહ્મચારી, યતિ. યતયોપિ હિ વણ્ણીતિ બ્રહ્મચારિનોતિ વુચ્ચન્તિ. વણ્ણીલિઙ્ગીતિ હિ વુત્તે તિલિઙ્ગવાતિ અત્થો. વણ્ણ સદ્દો પનેત્થ યથાવુત્ત બ્રહ્મપરિયાયો. પોક્ખરાદિતો દેસેતિ ગણસુત્તં. દેસો ચેત્થ યત્થ(ત્થિ પોક્ખરાદીનિ સો). પદુમગચ્છ પોક્ખરણીનં વાચકસ્સાતિ ઇમિના પદુમાનિ અસ્સં સન્તીતિ પદુમિનીતિ પોક્ખરણીપિ વુચ્ચતીતિ દસ્સેતિ. નાવા અત્થીતિ નાવિકો, યાગમે નાવાયિકો. સુખદુક્ખા ઈ, બલા બાહૂરુપુબ્બા ચેતિ ચ ગણસુત્તાનિ.