૧૨૫. સંયો

અન્તરસદ્દો-નેકત્થોપીહાન્તરાળવાચી મજ્ઝવાચી ગય્હતિ, ન વિજ્જતેન્તરમેસન્તિ અન્તરાળમત્તપટિસેધેપયોજનં નત્થીતિ કત્વાન્તરા ળટ્ઠસ્સાભાવાન્તરાળં નત્થીત્યુપચરીયતિ, એવઞ્હિ લોકે પયુજ્જતે ‘અનન્તરા ઇમે ગામા અનન્તરા ઇમે પાસાદા’તિ અન્તરાળગતસ્સ ઞ્ઞસ્સ ગામસ્સઞ્ઞસ્સ પાસાદસ્સ વાભાવા તથા બ્યપદિસીયતે, તથેવમિહાપ્યન્તરાળગતસ્સઞ્ઞસ્સ બ્યઞ્જનસ્સાભાવા અનન્તરા ઇત્યુચ્ચન્તે, અથવાન્તરસદ્દો બ્યવધાનવાચી બ્યવધાનાભાવતો-નન્તરા ઇતિ વુચ્ચન્તે. અન્તરં કરોતીતિ વા ખાદિઇપ્પચ્ચયં [ણિપ્પચ્ચયં (પોત્થકે)] વિધાય અન્તરાયતિ બ્યવધાનં કરોતીતિ કત્તરિ અપ્પચ્ચયં વિધાય અન્તરો બ્યવધાયકો નત્થેતેસન્તિ અનન્તરા. યથા ‘રુક્ખા વનન્તે’ત્થ રુક્ખા સમુદિતાવેકવનબ્યપદેસં લભન્તે, તથાત્રાપિ બ્યઞ્જના સમુદિતાવેતે સંયોગબ્યપદેસગોચરત્તં પટિપજ્જન્તે.

સંયોગોતિ હિ સમુદાયપ્પધાનો નિદ્દેસો બ્યઞ્જનાત્યવયવપ્પધાનો, તસ્મા બ્યઞ્જનાતિ બહુવચનેન સંયોગોતિ એકવચનનિદ્દેસો ઘટતે, નનુ ચ વણ્ણાનમુચ્ચારિતપ્પધંસિત્તા યોગપજ્જમટ્ઠિતમાનાનં ન સમ્ભવતિ સમુદાયત્તન્તિ સમુદાયત્તમયુત્તન્તિ નાયુત્તં, તથાહિ ઉત્તરુત્તરગ્ગાહિનિ બુદ્ધિ પુબ્બપરીભૂતે બ્યઞ્જનાવયવે સમુદાયરૂપેન સઙ્કપ્પેન્તી સમુદાયવોહારમ્પવત્તયીતિ.

ણાનુબન્ધેતિ દિતિસદ્દસ્સ સંયોગાવિસયત્તા દેચ્ચોતિ ‘સરાનમાદિસ્સા’તિ વિસયો, ઉળુમ્પસદ્દસ્સ સંયોગવિસયત્તા ઓળુમ્પિકોતિ એતસ્સ વિસયોતિ તત્થ રાઘવો વેનતેય્યો મેનિકો દેચ્ચો દોસગ્ગાન્તિ રૂપાનિ. ઇધ તુ ઓળુમ્પિકો કોણ્ડઞ્ઞોતિ યુજ્જન્તિ. તેનેવ ચ તત્થ પઞ્ચિકા એત્થ, એત્થ ચ પઞ્ચિકા તત્થ ઉપનેતબ્બાતિ.