૯૯. સબ્બા

નનુ કતરાદયોવ સબ્બાદિસદ્દવચનીયા હોન્તિ સમાસેનાભિહિતત્તા, ન તુ સબ્બસદ્દો [સદ્દસ્સે (પોત્થકે)] ત્યાહ-‘અવયવેને’ત્યાદિ,યદિપિ ‘સબ્બ સદ્દો આદિ યેસ’ન્તિ અવયવેન વિગ્ગહો, તથાપિ સમુદાયોવાસ્સત્થો ભવતિ… યેસન્ત્યનેન સમુદાયસ્સ પરામાસાતિ ભાવો, ઇતીતિ હેતુમ્હિ, કો ભવન્તાનં દ્વિન્નં બહુન્નં વા એકો દેવ દત્તો કઠાદીહિ વા અત્થે દ્વીહિ બહૂહિ વા એકસ્સ નિદ્ધારણે સતિ કિમ્હા નિદ્ધારણે રતર રતમેસુ ણાદિવુત્તિયં ‘‘એકત્થતાય’’ન્તિ (૨-૧૧૯) વિભત્તિલોપે ‘‘રાનુબન્ધેન્તસરાદિસ્સા’’તિ (૪-૧૩૨) અન્તસરાદિલોપે કિંસદ્દસ્સ રૂપસિદ્ધીતિ દસ્સેતુમાહ કતમા’તિઆદિ, ઉભો અંસા અસ્સાતિ અત્થે ‘‘અયુભદ્વિતીહંસે’’તિ (૪-૪૯) અયે‘‘સરો લોપો સરે’’તિ (૧-૨૬) સરલોપે રૂપસિદ્ધીતિ આહ-‘ઉભો અંસા’ઇચ્ચાદિ, કાયં વવત્થા નામે ત્યાહ-‘સાભિધેય્યા’ત્યાદિ, અવધિચ્ચાદિના તસ્સેવાત્થં વિભાવેતિ, અધંસો અભટ્ઠતા અવધિભાવેયેવાવટ્ઠાનં, સાભિધેય્યા પેક્ખાતિ એત્થ સો સકો અભિધેય્યો અત્થો દિસાદિ સાભિધેય્યોતિ ગહિતોતિ આહ-‘પુબ્બાદીન’ન્તિઆદિ, સાભિધેય્યન્તિ કમ્મતો પરા અપપુબ્બા ‘ઇક્ખ=દસ્સને’તીમસ્મા ‘‘ક્વચણ’’ઇતિ (૫-૪૧) અણ્પચ્ચયે સાભિધેય્યાપેક્ખો, સો વાવધિનિયમોતિ દસ્સેતુમાહ-‘તમપેક્ખતિ’ચ્ચાદિ, તત્થાધિપ્પાયં વિવરતિ ‘તથાહિ’ચ્ચાદિના, એત્થ ચ પરાદિસદ્દાભિધેય્યો-ત્થો દિસાદેસાદિ પુબ્બાદિસદ્દાભિધેય્યસ્સાત્થસ્સ દિસાય દેસાદિનો વાવધિભાવેન નિયમવસેન પવત્તતિ, યો ચાવધિભાવો નિયમવસેન પવત્તતિ, સોચાવધિભાવો નિયમવસેન પવત્તો પુબ્બાદિસદ્દવચનીયં દિસાદેસાદિ મપેક્ખતીતિ સાભિધેય્યાપેક્ખોવધિનિયમોયેવ વવત્થાતિ વુચ્ચતીત્યયમધિપ્પાયો, ન તુ અભિધેય્યાયન્તિ અસમ્ભવા, અસમ્ભવમેવ દસ્સેન્તો આહ-‘યો હિ’ચ્ચાદિ, કોસલ્લેન નિમિત્તેનાતિ કુસલ સદ્દસ્સ પવત્તિનિમિત્તેન કોસલ્લેન, ઉત્તરાકુરવો ઉત્તરકુરુદીપ વાસિનો, દેસો વા, ‘નાઞ્ઞઞ્ચ નામપ્પધાના’’તિ (૨-૧૩૬) અનેનેવ સઞ્ઞાયં સબ્બાદિકારિયસ્સ નિસિદ્ધત્તે કિમસઞ્ઞાયંભ્યનેનેત્યાહ ‘નાઞ્ઞઞ્ચે’ત્યાદિ, કિઞ્ચિ પુબ્બત્તાદિકમુદ્દિસ્સ કેસઞ્ચિ પુબ્બોપરોત્યાદિકા અત્થાનુગતા સઞ્ઞા અન્વત્થસઞ્ઞા.

૧૦૪.તિ

‘‘વાનેકઞ્ઞત્થે’’તિ (૩-૧૭) વિકપ્પાનુવત્તનતો અયુત્તત્તાભાવં દસ્સેતિ‘નયિદમયુત્ત’ન્તિ, યુત્તતા ચાસ્સ પાઠે બ્યભિચાર દસ્સનતોતિ વત્તુમાહ-‘નપુંસકે’ચ્ચાદિ, પાઠાનુગતા હિ સુત્તરચના, વિકપ્પાનુવત્તિયા અનપુંસકમિદમેવ વચનં તસ્સ ક્વચિ બ્યભિચારત્તે ઞાપકન્તિ વત્તુમાહ-‘તસ્સ ચા’તિઆદિ, અવસ્સમેવમેત્થ અત્થો ગહેતબ્બો, અઞ્ઞથા યથાવટ્ઠિતપાઠાનુક્કમેનાત્થગ્ગહણે સતિ સુત્તસ્સ [સુત્તસ્સા (પોત્થકે)] મુખ્યત્તપ્પતીતિતો કથન્તમઞ્ઞસ્સ ઞાપકં ભવેય્ય, મુખ્યભાવે હિ ઞાપકત્થં ન યુજ્જેય્ય.