૯. દેવતાસુત્તં

૧૯. ‘‘ઇમઞ્ચ, ભિક્ખવે, રત્તિં સમ્બહુલા દેવતા અભિક્કન્તાય રત્તિયા અભિક્કન્તવણ્ણા કેવલકપ્પં જેતવનં ઓભાસેત્વા યેનાહં તેનુપસઙ્કમિંસુ; ઉપસઙ્કમિત્વા મં અભિવાદેત્વા એકમન્તં અટ્ઠંસુ. એકમન્તં ઠિતા ખો, ભિક્ખવે, તા દેવતા મં એતદવોચું – ‘ઉપસઙ્કમિંસુ નો, ભન્તે, પુબ્બે મનુસ્સભૂતાનં પબ્બજિતા અગારાનિ. તે મયં, ભન્તે, પચ્ચુટ્ઠિમ્હ, નો ચ ખો અભિવાદિમ્હ. તા મયં, ભન્તે, અપરિપુણ્ણકમ્મન્તા વિપ્પટિસારિનિયો પચ્ચાનુતાપિનિયો હીનં કાયં ઉપપન્ના’’’તિ.

‘‘અપરાપિ મં, ભિક્ખવે, સમ્બહુલા દેવતા ઉપસઙ્કમિત્વા એતદવોચું – ‘ઉપસઙ્કમિંસુ નો, ભન્તે, પુબ્બે મનુસ્સભૂતાનં પબ્બજિતા અગારાનિ. તે મયં, ભન્તે, પચ્ચુટ્ઠિમ્હ અભિવાદિમ્હ [પચ્ચુટ્ઠિમ્હ ચ અભિવાદિમ્હ ચ (સ્યા.)], નો ચ તેસં આસનં અદમ્હ. તા મયં, ભન્તે, અપરિપુણ્ણકમ્મન્તા વિપ્પટિસારિનિયો પચ્ચાનુતાપિનિયો હીનં કાયં ઉપપન્ના’’’તિ.

‘‘અપરાપિ મં, ભિક્ખવે, સમ્બહુલા દેવતા ઉપસઙ્કમિત્વા એતદવોચું – ‘ઉપસઙ્કમિંસુ નો, ભન્તે, પુબ્બે મનુસ્સભૂતાનં પબ્બજિતા અગારાનિ. તે મયં, ભન્તે, પચ્ચુટ્ઠિમ્હ અભિવાદિમ્હ [પચ્ચુટ્ઠિમ્હ ચ અભિવાદિમ્હ ચ (સ્યા.)] આસનં [આસનઞ્ચ (સી. સ્યા.)] અદમ્હ, નો ચ ખો યથાસત્તિ યથાબલં સંવિભજિમ્હ…પે… યથાસત્તિ યથાબલં [યથાબલં ચ (?)] સંવિભજિમ્હ, નો ચ ખો ઉપનિસીદિમ્હ ધમ્મસ્સવનાય…પે… ઉપનિસીદિમ્હ [ઉપનિસીદિમ્હ ચ (સ્યા.)] ધમ્મસ્સવનાય, નો ચ ખો ઓહિતસોતા ધમ્મં સુણિમ્હ…પે… ઓહિતસોતા ચ ધમ્મં સુણિમ્હ, નો ચ ખો સુત્વા ધમ્મં ધારયિમ્હ…પે… સુત્વા ચ ધમ્મં ધારયિમ્હ, નો ચ ખો ધાતાનં ધમ્માનં અત્થં ઉપપરિક્ખિમ્હ…પે… ધાતાનઞ્ચ ધમ્માનં અત્થં ઉપપરિક્ખિમ્હ, નો ચ ખો અત્થમઞ્ઞાય ધમ્મમઞ્ઞાય ધમ્માનુધમ્મં પટિપજ્જિમ્હ. તા મયં, ભન્તે, અપરિપુણ્ણકમ્મન્તા વિપ્પટિસારિનિયો પચ્ચાનુતાપિનિયો હીનં કાયં ઉપપન્ના’’’તિ.

‘‘અપરાપિ મં, ભિક્ખવે, સમ્બહુલા દેવતા ઉપસઙ્કમિત્વા એતદવોચું – ‘ઉપસઙ્કમિંસુ નો, ભન્તે, પુબ્બે મનુસ્સભૂતાનં પબ્બજિતા અગારાનિ. તે મયં, ભન્તે, પચ્ચુટ્ઠિમ્હ અભિવાદિમ્હ [પચ્ચુટ્ઠિમ્હ ચ અભિવાદિમ્હ ચ (સ્યા.)], આસનં [આસનઞ્ચ (સી. સ્યા.)] અદમ્હ, યથાસત્તિ યથાબલં [યથાબલં ચ (?)] સંવિભજિમ્હ, ઉપનિસીદિમ્હ [ઉપનિસીદિમ્હ ચ (સ્યા.)] ધમ્મસ્સવનાય, ઓહિતસોતા ચ ધમ્મં સુણિમ્હ, સુત્વા ચ ધમ્મં ધારયિમ્હ, ધાતાનઞ્ચ ધમ્માનં અત્થં ઉપપરિક્ખિમ્હ, અત્થમઞ્ઞાય ધમ્મમઞ્ઞાય ધમ્માનુધમ્મં [ધમ્માનુધમ્મઞ્ચ (?)] પટિપજ્જિમ્હ. તા મયં, ભન્તે, પરિપુણ્ણકમ્મન્તા અવિપ્પટિસારિનિયો અપચ્ચાનુતાપિનિયો પણીતં કાયં ઉપપન્ના’તિ. એતાનિ, ભિક્ખવે, રુક્ખમૂલાનિ એતાનિ સુઞ્ઞાગારાનિ. ઝાયથ, ભિક્ખવે, મા પમાદત્થ, મા પચ્છા વિપ્પટિસારિનો અહુવત્થ સેય્યથાપિ તા પુરિમિકા દેવતા’’તિ. નવમં.