૮. પઠમપરિહાનિસુત્તં

૨૮. એવં મે સુતં – એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તત્ર ખો ભગવા ભિક્ખૂ આમન્તેસિ – ‘‘સત્તિમે, ભિક્ખવે, ધમ્મા સેખસ્સ ભિક્ખુનો પરિહાનાય સંવત્તન્તિ. કતમે સત્ત? કમ્મારામતા, ભસ્સારામતા, નિદ્દારામતા, સઙ્ગણિકારામતા, ઇન્દ્રિયેસુ અગુત્તદ્વારતા, ભોજને અમત્તઞ્ઞુતા, સન્તિ ખો પન સઙ્ઘે સઙ્ઘકરણીયાનિ; તત્ર સેખો ભિક્ખુ [તત્ર ભિક્ખુ (સી. સ્યા.)] ઇતિ પટિસઞ્ચિક્ખતિ – ‘સન્તિ ખો પન સઙ્ઘે થેરા [ખો સંઘત્થેરા (ક.)] રત્તઞ્ઞૂ ચિરપબ્બજિતા ભારવાહિનો, તે [ન તે (ક.)] તેન પઞ્ઞાયિસ્સન્તી’તિ અત્તના તેસુ યોગં [અત્તના વોયોગં (સી. સ્યા.)] આપજ્જતિ. ઇમે ખો, ભિક્ખવે, સત્ત ધમ્મા સેખસ્સ ભિક્ખુનો પરિહાનાય સંવત્તન્તિ.

‘‘સત્તિમે, ભિક્ખવે, ધમ્મા સેખસ્સ ભિક્ખુનો અપરિહાનાય સંવત્તન્તિ. કતમે સત્ત? ન કમ્મારામતા, ન ભસ્સારામતા, ન નિદ્દારામતા, ન સઙ્ગણિકારામતા, ઇન્દ્રિયેસુ ગુત્તદ્વારતા, ભોજને મત્તઞ્ઞુતા, સન્તિ ખો પન સઙ્ઘે સઙ્ઘકરણીયાનિ; તત્ર સેખો ભિક્ખુ ઇતિ પટિસઞ્ચિક્ખતિ – ‘સન્તિ ખો પન સઙ્ઘે થેરા રત્તઞ્ઞૂ ચિરપબ્બજિતા ભારવાહિનો, તે તેન પઞ્ઞાયિસ્સન્તી’તિ અત્તના ન તેસુ યોગં આપજ્જતિ. ઇમે ખો, ભિક્ખવે, સત્ત ધમ્મા સેખસ્સ ભિક્ખુનો અપરિહાનાય સંવત્તન્તી’’તિ. અટ્ઠમં.