૯. દુતિયપરિહાનિસુત્તં

૨૯. ‘‘સત્તિમે, ભિક્ખવે, ધમ્મા ઉપાસકસ્સ પરિહાનાય સંવત્તન્તિ. કતમે સત્ત? ભિક્ખુદસ્સનં હાપેતિ, સદ્ધમ્મસ્સવનં પમજ્જતિ, અધિસીલે ન સિક્ખતિ, અપ્પસાદબહુલો હોતિ, ભિક્ખૂસુ થેરેસુ ચેવ નવેસુ ચ મજ્ઝિમેસુ ચ ઉપારમ્ભચિત્તો ધમ્મં સુણાતિ રન્ધગવેસી, ઇતો બહિદ્ધા દક્ખિણેય્યં ગવેસતિ, તત્થ ચ પુબ્બકારં કરોતિ. ઇમે ખો, ભિક્ખવે, સત્ત ધમ્મા ઉપાસકસ્સ પરિહાનાય સંવત્તન્તિ.

‘‘સત્તિમે, ભિક્ખવે, ધમ્મા ઉપાસકસ્સ અપરિહાનાય સંવત્તન્તિ. કતમે સત્ત? ભિક્ખુદસ્સનં ન હાપેતિ, સદ્ધમ્મસ્સવનં નપ્પમજ્જતિ, અધિસીલે સિક્ખતિ, પસાદબહુલો હોતિ, ભિક્ખૂસુ થેરેસુ ચેવ નવેસુ ચ મજ્ઝિમેસુ ચ અનુપારમ્ભચિત્તો ધમ્મં સુણાતિ ન રન્ધગવેસી, ન ઇતો બહિદ્ધા દક્ખિણેય્યં ગવેસતિ, ઇધ ચ પુબ્બકારં કરોતિ. ઇમે ખો, ભિક્ખવે, સત્ત ધમ્મા ઉપાસકસ્સ અપરિહાનાય સંવત્તન્તી’’તિ. ઇદમવોચ ભગવા. ઇદં વત્વાન સુગતો અથાપરં એતદવોચ સત્થા –

‘‘દસ્સનં ભાવિતત્તાનં, યો હાપેતિ ઉપાસકો;

સવનઞ્ચ અરિયધમ્માનં, અધિસીલે ન સિક્ખતિ.

‘‘અપ્પસાદો ચ ભિક્ખૂસુ, ભિય્યો ભિય્યો પવડ્ઢતિ;

ઉપારમ્ભકચિત્તો ચ, સદ્ધમ્મં સોતુમિચ્છતિ.

‘‘ઇતો ચ બહિદ્ધા અઞ્ઞં, દક્ખિણેય્યં ગવેસતિ;

તત્થેવ ચ પુબ્બકારં, યો કરોતિ ઉપાસકો.

‘‘એતે ખો પરિહાનિયે, સત્ત ધમ્મે સુદેસિતે;

ઉપાસકો સેવમાનો, સદ્ધમ્મા પરિહાયતિ.

‘‘દસ્સનં ભાવિતત્તાનં, યો ન હાપેતિ ઉપાસકો;

સવનઞ્ચ અરિયધમ્માનં, અધિસીલે ચ સિક્ખતિ.

‘‘પસાદો ચસ્સ ભિક્ખૂસુ, ભિય્યો ભિય્યો પવડ્ઢતિ;

અનુપારમ્ભચિત્તો ચ, સદ્ધમ્મં સોતુમિચ્છતિ.

‘‘ન ઇતો બહિદ્ધા અઞ્ઞં, દક્ખિણેય્યં ગવેસતિ;

ઇધેવ ચ પુબ્બકારં, યો કરોતિ ઉપાસકો.

‘‘એતે ખો અપરિહાનિયે, સત્ત ધમ્મે સુદેસિતે;

ઉપાસકો સેવમાનો, સદ્ધમ્મા ન પરિહાયતી’’તિ. નવમં;