૧૦. પુગ્ગલપ્પસાદસુત્તં

૨૫૦. ‘‘પઞ્ચિમે, ભિક્ખવે, આદીનવા પુગ્ગલપ્પસાદે. કતમે પઞ્ચ? યસ્મિં, ભિક્ખવે, પુગ્ગલે પુગ્ગલો અભિપ્પસન્નો હોતિ, સો તથારૂપં આપત્તિં આપન્નો હોતિ યથારૂપાય આપત્તિયા સઙ્ઘો ઉક્ખિપતિ. તસ્સ એવં હોતિ – ‘યો ખો મ્યાયં પુગ્ગલો પિયો મનાપો સો સઙ્ઘેન ઉક્ખિત્તો’તિ. ભિક્ખૂસુ અપ્પસાદબહુલો હોતિ. ભિક્ખૂસુ અપ્પસાદબહુલો સમાનો અઞ્ઞે ભિક્ખૂ ન ભજતિ. અઞ્ઞે ભિક્ખૂ અભજન્તો સદ્ધમ્મં ન સુણાતિ. સદ્ધમ્મં અસુણન્તો સદ્ધમ્મા પરિહાયતિ. અયં, ભિક્ખવે, પઠમો આદીનવો પુગ્ગલપ્પસાદે.

‘‘પુન ચપરં, ભિક્ખવે, યસ્મિં પુગ્ગલે પુગ્ગલો અભિપ્પસન્નો હોતિ, સો તથારૂપં આપત્તિં આપન્નો હોતિ યથારૂપાય આપત્તિયા સઙ્ઘો અન્તે નિસીદાપેતિ. તસ્સ એવં હોતિ – ‘યો ખો મ્યાયં પુગ્ગલો પિયો મનાપો સો સઙ્ઘેન અન્તે નિસીદાપિતો’તિ. ભિક્ખૂસુ અપ્પસાદબહુલો હોતિ. ભિક્ખૂસુ અપ્પસાદબહુલો સમાનો અઞ્ઞે ભિક્ખૂ ન ભજતિ. અઞ્ઞે ભિક્ખૂ અભજન્તો સદ્ધમ્મં ન સુણાતિ. સદ્ધમ્મં અસુણન્તો સદ્ધમ્મા પરિહાયતિ. અયં, ભિક્ખવે, દુતિયો આદીનવો પુગ્ગલપ્પસાદે.

‘‘પુન ચપરં, ભિક્ખવે, યસ્મિં પુગ્ગલે પુગ્ગલો અભિપ્પસન્નો હોતિ, સો દિસાપક્કન્તો હોતિ…પે… સો વિબ્ભન્તો હોતિ…પે… સો કાલઙ્કતો હોતિ. તસ્સ એવં હોતિ – ‘યો ખો મ્યાયં પુગ્ગલો પિયો મનાપો સો કાલઙ્કતો’તિ. અઞ્ઞે ભિક્ખૂ ન ભજતિ. અઞ્ઞે ભિક્ખૂ અભજન્તો સદ્ધમ્મં ન સુણાતિ. સદ્ધમ્મં અસુણન્તો સદ્ધમ્મા પરિહાયતિ. અયં, ભિક્ખવે, પઞ્ચમો આદીનવો પુગ્ગલપ્પસાદે. ઇમે ખો, ભિક્ખવે, પઞ્ચ આદીનવા પુગ્ગલપ્પસાદે’’તિ. દસમં.

દુચ્ચરિતવગ્ગો પઞ્ચમો.