(૨૬) ૬. ઉપસમ્પદાવગ્ગો

૧. ઉપસમ્પાદેતબ્બસુત્તં

૨૫૧. [મહાવ. ૮૪] ‘‘પઞ્ચહિ, ભિક્ખવે, ધમ્મેહિ સમન્નાગતેન ભિક્ખુના ઉપસમ્પાદેતબ્બં. કતમેહિ પઞ્ચહિ? ઇધ, ભિક્ખવે, ભિક્ખુ અસેખેન સીલક્ખન્ધેન સમન્નાગતો હોતિ; અસેખેન સમાધિક્ખન્ધેન સમન્નાગતો હોતિ; અસેખેન પઞ્ઞાક્ખન્ધેન સમન્નાગતો હોતિ; અસેખેન વિમુત્તિક્ખન્ધેન સમન્નાગતો હોતિ; અસેખેન વિમુત્તિઞાણદસ્સનક્ખન્ધેન સમન્નાગતો હોતિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતેન ભિક્ખુના ઉપસમ્પાદેતબ્બ’’ન્તિ. પઠમં.

૨. નિસ્સયસુત્તં

૨૫૨. [મહાવ. ૮૪] ‘‘પઞ્ચહિ, ભિક્ખવે, ધમ્મેહિ સમન્નાગતેન ભિક્ખુના નિસ્સયો દાતબ્બો. કતમેહિ પઞ્ચહિ? ઇધ, ભિક્ખવે, ભિક્ખુ અસેખેન સીલક્ખન્ધેન સમન્નાગતો હોતિ…પે… અસેખેન વિમુત્તિઞાણદસ્સનક્ખન્ધેન સમન્નાગતો હોતિ. ઇમેહિ…પે… નિસ્સયો દાતબ્બો’’તિ. દુતિયં.

૩. સામણેરસુત્તં

૨૫૩. [મહાવ. ૮૪] ‘‘પઞ્ચહિ, ભિક્ખવે, ધમ્મેહિ સમન્નાગતેન ભિક્ખુના સામણેરો ઉપટ્ઠાપેતબ્બો. કતમેહિ પઞ્ચહિ? ઇધ, ભિક્ખવે, ભિક્ખુ અસેખેન સીલક્ખન્ધેન સમન્નાગતો હોતિ; અસેખેન સમાધિક્ખન્ધેન… અસેખેન પઞ્ઞાક્ખન્ધેન… અસેખેન વિમુત્તિક્ખન્ધેન… અસેખેન વિમુત્તિઞાણદસ્સનક્ખન્ધેન સમન્નાગતો હોતિ. ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતેન ભિક્ખુના સામણેરો ઉપટ્ઠાપેતબ્બો’’તિ. તતિયં.

૪. પઞ્ચમચ્છરિયસુત્તં

૨૫૪. ‘‘પઞ્ચિમાનિ, ભિક્ખવે, મચ્છરિયાનિ. કતમાનિ પઞ્ચ? આવાસમચ્છરિયં, કુલમચ્છરિયં, લાભમચ્છરિયં, વણ્ણમચ્છરિયં, ધમ્મમચ્છરિયં – ઇમાનિ ખો, ભિક્ખવે, પઞ્ચ મચ્છરિયાનિ. ઇમેસં ખો, ભિક્ખવે, પઞ્ચન્નં મચ્છરિયાનં એતં પટિકુટ્ઠં [પતિકિટ્ઠં (સી. પી.), પટિક્કિટ્ઠં (સ્યા. કં.), પટિકિટ્ઠં (ક.)], યદિદં ધમ્મમચ્છરિય’’ન્તિ. ચતુત્થં.

૫. મચ્છરિયપ્પહાનસુત્તં

૨૫૫. ‘‘પઞ્ચન્નં, ભિક્ખવે, મચ્છરિયાનં પહાનાય સમુચ્છેદાય બ્રહ્મચરિયં વુસ્સતિ. કતમેસં પઞ્ચન્નં? આવાસમચ્છરિયસ્સ પહાનાય સમુચ્છેદાય બ્રહ્મચરિયં વુસ્સતિ; કુલમચ્છરિયસ્સ…પે… લાભમચ્છરિયસ્સ… વણ્ણમચ્છરિયસ્સ… ધમ્મમચ્છરિયસ્સ પહાનાય સમુચ્છેદાય બ્રહ્મચરિયં વુસ્સતિ. ઇમેસં ખો, ભિક્ખવે, પઞ્ચન્નં મચ્છરિયાનં પહાનાય સમુચ્છેદાય બ્રહ્મચરિયં વુસ્સતી’’તિ. પઞ્ચમં.

૬. પઠમઝાનસુત્તં

૨૫૬. ‘‘પઞ્ચિમે, ભિક્ખવે, ધમ્મે અપ્પહાય અભબ્બો પઠમં ઝાનં ઉપસમ્પજ્જ વિહરિતું. કતમે પઞ્ચ? આવાસમચ્છરિયં, કુલમચ્છરિયં, લાભમચ્છરિયં, વણ્ણમચ્છરિયં, ધમ્મમચ્છરિયં – ઇમે ખો, ભિક્ખવે, પઞ્ચ ધમ્મે અપ્પહાય અભબ્બો પઠમં ઝાનં ઉપસમ્પજ્જ વિહરિતું.

‘‘પઞ્ચિમે, ભિક્ખવે, ધમ્મે પહાય ભબ્બો પઠમં ઝાનં ઉપસમ્પજ્જ વિહરિતું. કતમે પઞ્ચ? આવાસમચ્છરિયં, કુલમચ્છરિયં, લાભમચ્છરિયં, વણ્ણમચ્છરિયં, ધમ્મમચ્છરિયં – ઇમે ખો, ભિક્ખવે, પઞ્ચ ધમ્મે પહાય ભબ્બો પઠમં ઝાનં ઉપસમ્પજ્જ વિહરિતુ’’ન્તિ. છટ્ઠં.

૭-૧૩. દુતિયઝાનસુત્તાદિસત્તકં

૨૫૭-૨૬૩. ‘‘પઞ્ચિમે, ભિક્ખવે, ધમ્મે અપ્પહાય અભબ્બો દુતિયં ઝાનં…પે… અભબ્બો તતિયં ઝાનં… અભબ્બો ચતુત્થં ઝાનં… અભબ્બો સોતાપત્તિફલં… અભબ્બો સકદાગામિફલં… અભબ્બો અનાગામિફલં… અભબ્બો અરહત્તં [અરહત્તફલં (સી.)] સચ્છિકાતું. કતમે પઞ્ચ? આવાસમચ્છરિયં, કુલમચ્છરિયં, લાભમચ્છરિયં, વણ્ણમચ્છરિયં, ધમ્મમચ્છરિયં – ઇમે ખો, ભિક્ખવે, પઞ્ચ ધમ્મે અપ્પહાય અભબ્બો અરહત્તં સચ્છિકાતું.

‘‘પઞ્ચિમે, ભિક્ખવે, ધમ્મે પહાય ભબ્બો દુતિયં ઝાનં…પે… ભબ્બો તતિયં ઝાનં… ભબ્બો ચતુત્થં ઝાનં… ભબ્બો સોતાપત્તિફલં… ભબ્બો સકદાગામિફલં… ભબ્બો અનાગામિફલં… ભબ્બો અરહત્તં સચ્છિકાતું. કતમે પઞ્ચ? આવાસમચ્છરિયં, કુલમચ્છરિયં, લાભમચ્છરિયં, વણ્ણમચ્છરિયં, ધમ્મમચ્છરિયં – ઇમે ખો, ભિક્ખવે, પઞ્ચ ધમ્મે પહાય ભબ્બો અરહત્તં સચ્છિકાતુ’’ન્તિ. તેરસમં.

૧૪. અપરપઠમઝાનસુત્તં

૨૬૪. ‘‘પઞ્ચિમે, ભિક્ખવે, ધમ્મે અપ્પહાય અભબ્બો પઠમં ઝાનં ઉપસમ્પજ્જ વિહરિતું. કતમે પઞ્ચ? આવાસમચ્છરિયં, કુલમચ્છરિયં, લાભમચ્છરિયં, વણ્ણમચ્છરિયં, અકતઞ્ઞુતં અકતવેદિતં – ઇમે ખો, ભિક્ખવે, પઞ્ચ ધમ્મે અપ્પહાય અભબ્બો પઠમં ઝાનં ઉપસમ્પજ્જ વિહરિતું.

‘‘પઞ્ચિમે, ભિક્ખવે, ધમ્મે પહાય ભબ્બો પઠમં ઝાનં ઉપસમ્પજ્જ વિહરિતું. કતમે પઞ્ચ? આવાસમચ્છરિયં, કુલમચ્છરિયં, લાભમચ્છરિયં, વણ્ણમચ્છરિયં, અકતઞ્ઞુતં અકતવેદિતં – ઇમે ખો, ભિક્ખવે, પઞ્ચ ધમ્મે પહાય ભબ્બો પઠમં ઝાનં ઉપસમ્પજ્જ વિહરિતુ’’ન્તિ. ચુદ્દસમં.

૧૫-૨૧. અપરદુતિયઝાનસુત્તાદિસત્તકં

૨૬૫-૨૭૧. ‘‘પઞ્ચિમે, ભિક્ખવે, ધમ્મે અપ્પહાય અભબ્બો દુતિયં ઝાનં…પે… તતિયં ઝાનં… ચતુત્થં ઝાનં… સોતાપત્તિફલં… સકદાગામિફલં… અનાગામિફલં… અરહત્તં સચ્છિકાતું. કતમે પઞ્ચ? આવાસમચ્છરિયં, કુલમચ્છરિયં, લાભમચ્છરિયં, વણ્ણમચ્છરિયં, અકતઞ્ઞુતં અકતવેદિતં – ઇમે ખો, ભિક્ખવે, પઞ્ચ ધમ્મે અપ્પહાય અભબ્બો અરહત્તં સચ્છિકાતું.

‘‘પઞ્ચિમે, ભિક્ખવે, ધમ્મે પહાય ભબ્બો દુતિયં ઝાનં…પે… તતિયં ઝાનં… ચતુત્થં ઝાનં… સોતાપત્તિફલં… સકદાગામિફલં… અનાગામિફલં… અરહત્તં સચ્છિકાતું. કતમે પઞ્ચ? આવાસમચ્છરિયં, કુલમચ્છરિયં, લાભમચ્છરિયં, વણ્ણમચ્છરિયં, અકતઞ્ઞુતં અકતવેદિતં – ઇમે ખો, ભિક્ખવે, પઞ્ચ ધમ્મે પહાય ભબ્બો અરહત્તં સચ્છિકાતુ’’ન્તિ. એકવીસતિમં.

ઉપસમ્પદાવગ્ગો છટ્ઠો.