૬. દુતિયઅક્ખન્તિસુત્તં

૨૧૬. ‘‘પઞ્ચિમે, ભિક્ખવે, આદીનવા અક્ખન્તિયા. કતમે પઞ્ચ? બહુનો જનસ્સ અપ્પિયો હોતિ અમનાપો, લુદ્દો ચ હોતિ, વિપ્પટિસારી ચ, સમ્મૂળ્હો કાલં કરોતિ, કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. ઇમે ખો, ભિક્ખવે, પઞ્ચ આદીનવા અક્ખન્તિયા.

‘‘પઞ્ચિમે, ભિક્ખવે, આનિસંસા ખન્તિયા. કતમે પઞ્ચ? બહુનો જનસ્સ પિયો હોતિ મનાપો, અલુદ્દો ચ હોતિ, અવિપ્પટિસારી ચ, અસમ્મૂળ્હો કાલં કરોતિ, કાયસ્સ ભેદા પરં મરણા સુગતિં સગ્ગં લોકં ઉપપજ્જતિ. ઇમે ખો, ભિક્ખવે, પઞ્ચ આનિસંસા ખન્તિયા’’તિ. છટ્ઠં.