(૨૨) ૨. અક્કોસકવગ્ગો

૧. અક્કોસકસુત્તં

૨૧૧. ‘‘યો સો, ભિક્ખવે, ભિક્ખુ અક્કોસકપરિભાસકો અરિયૂપવાદી સબ્રહ્મચારીનં, તસ્સ પઞ્ચ આદીનવા પાટિકઙ્ખા. કતમે પઞ્ચ? પારાજિકો વા હોતિ છિન્નપરિપન્થો [છિન્નપરિબન્ધો (ક.)], અઞ્ઞતરં વા સંકિલિટ્ઠં આપત્તિં આપજ્જતિ, બાળ્હં વા રોગાતઙ્કં ફુસતિ, સમ્મૂળ્હો કાલં કરોતિ, કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. યો સો, ભિક્ખવે, ભિક્ખુ અક્કોસકપરિભાસકો અરિયૂપવાદી સબ્રહ્મચારીનં, તસ્સ ઇમે પઞ્ચ આદીનવા પાટિકઙ્ખા’’તિ. પઠમં.

૨. ભણ્ડનકારકસુત્તં

૨૧૨. ‘‘યો સો, ભિક્ખવે, ભિક્ખુ ભણ્ડનકારકો કલહકારકો વિવાદકારકો ભસ્સકારકો સઙ્ઘે અધિકરણકારકો, તસ્સ પઞ્ચ આદીનવા પાટિકઙ્ખા. કતમે પઞ્ચ? અનધિગતં નાધિગચ્છતિ, અધિગતા [અધિગતં (સબ્બત્થ)] પરિહાયતિ, પાપકો કિત્તિસદ્દો અબ્ભુગ્ગચ્છતિ, સમ્મૂળ્હો કાલં કરોતિ, કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. યો સો, ભિક્ખવે, ભિક્ખુ ભણ્ડનકારકો કલહકારકો વિવાદકારકો ભસ્સકારકો સઙ્ઘે અધિકરણકારકો, તસ્સ ઇમે પઞ્ચ આદીનવા પાટિકઙ્ખા’’તિ. દુતિયં.

૩. સીલસુત્તં

૨૧૩. [મહાવ. ૨૦૯; દી. નિ. ૩.૩૧૬] ‘‘પઞ્ચિમે, ભિક્ખવે, આદીનવા દુસ્સીલસ્સ સીલવિપત્તિયા. કતમે પઞ્ચ? ઇધ, ભિક્ખવે, દુસ્સીલો સીલવિપન્નો પમાદાધિકરણં મહતિં ભોગજાનિં નિગચ્છતિ. અયં, ભિક્ખવે, પઠમો આદીનવો દુસ્સીલસ્સ સીલવિપત્તિયા.

‘‘પુન ચપરં, ભિક્ખવે, દુસ્સીલસ્સ સીલવિપન્નસ્સ પાપકો કિત્તિસદ્દો અબ્ભુગ્ગચ્છતિ. અયં, ભિક્ખવે, દુતિયો આદીનવો દુસ્સીલસ્સ સીલવિપત્તિયા.

‘‘પુન ચપરં, ભિક્ખવે, દુસ્સીલો સીલવિપન્નો યઞ્ઞદેવ પરિસં ઉપસઙ્કમતિ – યદિ ખત્તિયપરિસં, યદિ બ્રાહ્મણપરિસં, યદિ ગહપતિપરિસં, યદિ સમણપરિસં – અવિસારદો ઉપસઙ્કમતિ મઙ્કુભૂતો. અયં, ભિક્ખવે, તતિયો આદીનવો દુસ્સીલસ્સ સીલવિપત્તિયા.

‘‘પુન ચપરં, ભિક્ખવે, દુસ્સીલો સીલવિપન્નો સમ્મૂળ્હો કાલં કરોતિ. અયં, ભિક્ખવે, ચતુત્થો આદીનવો દુસ્સીલસ્સ સીલવિપત્તિયા.

‘‘પુન ચપરં, ભિક્ખવે, દુસ્સીલો સીલવિપન્નો કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. અયં, ભિક્ખવે, પઞ્ચમો આદીનવો દુસ્સીલસ્સ સીલવિપત્તિયા. ઇમે ખો, ભિક્ખવે, પઞ્ચ આદીનવા દુસ્સીલસ્સ સીલવિપત્તિયા.

‘‘પઞ્ચિમે, ભિક્ખવે, આનિસંસા સીલવતો સીલસમ્પદાય. કતમે પઞ્ચ? ઇધ, ભિક્ખવે, સીલવા સીલસમ્પન્નો અપ્પમાદાધિકરણં મહન્તં ભોગક્ખન્ધં અધિગચ્છતિ. અયં, ભિક્ખવે, પઠમો આનિસંસો સીલવતો સીલસમ્પદાય.

‘‘પુન ચપરં, ભિક્ખવે, સીલવતો સીલસમ્પન્નસ્સ કલ્યાણો કિત્તિસદ્દો અબ્ભુગ્ગચ્છતિ. અયં, ભિક્ખવે, દુતિયો આનિસંસો સીલવતો સીલસમ્પદાય.

‘‘પુન ચપરં, ભિક્ખવે, સીલવા સીલસમ્પન્નો યઞ્ઞદેવ પરિસં ઉપસઙ્કમતિ – યદિ ખત્તિયપરિસં, યદિ બ્રાહ્મણપરિસં, યદિ ગહપતિપરિસં, યદિ સમણપરિસં – વિસારદો ઉપસઙ્કમતિ અમઙ્કુભૂતો. અયં ભિક્ખવે, તતિયો આનિસંસો સીલવતો સીલસમ્પદાય.

‘‘પુન ચપરં, ભિક્ખવે, સીલવા સીલસમ્પન્નો અસમ્મૂળ્હો કાલં કરોતિ. અયં, ભિક્ખવે, ચતુત્થો આનિસંસો સીલવતો સીલસમ્પદાય.

‘‘પુન ચપરં, ભિક્ખવે, સીલવા સીલસમ્પન્નો કાયસ્સ ભેદા પરં મરણા સુગતિં સગ્ગં લોકં ઉપપજ્જતિ. અયં, ભિક્ખવે, પઞ્ચમો આનિસંસો સીલવતો સીલસમ્પદાય. ઇમે ખો, ભિક્ખવે, પઞ્ચ આનિસંસા સીલવતો સીલસમ્પદાયા’’તિ. તતિયં.

૪. બહુભાણિસુત્તં

૨૧૪. ‘‘પઞ્ચિમે, ભિક્ખવે, આદીનવા બહુભાણિસ્મિં પુગ્ગલે. કતમે પઞ્ચ? મુસા ભણતિ, પિસુણં ભણતિ, ફરુસં ભણતિ, સમ્ફપ્પલાપં ભણતિ, કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. ઇમે ખો, ભિક્ખવે, પઞ્ચ આદીનવા બહુભાણિસ્મિં પુગ્ગલે.

‘‘પઞ્ચિમે, ભિક્ખવે, આનિસંસા મન્તભાણિસ્મિં પુગ્ગલે. કતમે પઞ્ચ? ન મુસા ભણતિ, ન પિસુણં ભણતિ, ન ફરુસં ભણતિ, ન સમ્ફપ્પલાપં ભણતિ, કાયસ્સ ભેદા પરં મરણા સુગતિં સગ્ગં લોકં ઉપપજ્જતિ. ઇમે ખો, ભિક્ખવે, પઞ્ચ આનિસંસા મન્તભાણિસ્મિં પુગ્ગલે’’તિ. ચતુત્થં.

૫. પઠમઅક્ખન્તિસુત્તં

૨૧૫. ‘‘પઞ્ચિમે, ભિક્ખવે, આદીનવા અક્ખન્તિયા. કતમે પઞ્ચ? બહુનો જનસ્સ અપ્પિયો હોતિ અમનાપો, વેરબહુલો ચ હોતિ, વજ્જબહુલો ચ, સમ્મૂળ્હો કાલં કરોતિ, કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. ઇમે ખો, ભિક્ખવે, પઞ્ચ આદીનવા અક્ખન્તિયા.

‘‘પઞ્ચિમે, ભિક્ખવે, આનિસંસા ખન્તિયા. કતમે પઞ્ચ? બહુનો જનસ્સ પિયો હોતિ મનાપો, ન વેરબહુલો હોતિ, ન વજ્જબહુલો, અસમ્મૂળ્હો કાલં કરોતિ, કાયસ્સ ભેદા પરં મરણા સુગતિં સગ્ગં લોકં ઉપપજ્જતિ. ઇમે ખો, ભિક્ખવે, પઞ્ચ આનિસંસા ખન્તિયા’’તિ. પઞ્ચમં.

૬. દુતિયઅક્ખન્તિસુત્તં

૨૧૬. ‘‘પઞ્ચિમે, ભિક્ખવે, આદીનવા અક્ખન્તિયા. કતમે પઞ્ચ? બહુનો જનસ્સ અપ્પિયો હોતિ અમનાપો, લુદ્દો ચ હોતિ, વિપ્પટિસારી ચ, સમ્મૂળ્હો કાલં કરોતિ, કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. ઇમે ખો, ભિક્ખવે, પઞ્ચ આદીનવા અક્ખન્તિયા.

‘‘પઞ્ચિમે, ભિક્ખવે, આનિસંસા ખન્તિયા. કતમે પઞ્ચ? બહુનો જનસ્સ પિયો હોતિ મનાપો, અલુદ્દો ચ હોતિ, અવિપ્પટિસારી ચ, અસમ્મૂળ્હો કાલં કરોતિ, કાયસ્સ ભેદા પરં મરણા સુગતિં સગ્ગં લોકં ઉપપજ્જતિ. ઇમે ખો, ભિક્ખવે, પઞ્ચ આનિસંસા ખન્તિયા’’તિ. છટ્ઠં.

૭. પઠમઅપાસાદિકસુત્તં

૨૧૭. ‘‘પઞ્ચિમે, ભિક્ખવે, આદીનવા અપાસાદિકે. કતમે પઞ્ચ? અત્તાપિ અત્તાનં ઉપવદતિ, અનુવિચ્ચ વિઞ્ઞૂ ગરહન્તિ, પાપકો કિત્તિસદ્દો અબ્ભુગ્ગચ્છતિ, સમ્મૂળ્હો કાલં કરોતિ, કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. ઇમે ખો, ભિક્ખવે, પઞ્ચ આદીનવા અપાસાદિકે.

‘‘પઞ્ચિમે, ભિક્ખવે, આનિસંસા પાસાદિકે. કતમે પઞ્ચ? અત્તાપિ અત્તાનં ન ઉપવદતિ, અનુવિચ્ચ વિઞ્ઞૂ પસંસન્તિ, કલ્યાણો કિત્તિસદ્દો અબ્ભુગ્ગચ્છતિ, અસમ્મૂળ્હો કાલં કરોતિ, કાયસ્સ ભેદા પરં મરણા સુગતિં સગ્ગં લોકં ઉપપજ્જતિ. ઇમે ખો, ભિક્ખવે, પઞ્ચ આનિસંસા પાસાદિકે’’તિ. સત્તમં.

૮. દુતિયઅપાસાદિકસુત્તં

૨૧૮. ‘‘પઞ્ચિમે, ભિક્ખવે, આદીનવા અપાસાદિકે. કતમે પઞ્ચ? અપ્પસન્ના નપ્પસીદન્તિ, પસન્નાનઞ્ચ એકચ્ચાનં અઞ્ઞથત્તં હોતિ, સત્થુસાસનં અકતં [ન કતં (સ્યા. કં. ક.)] હોતિ, પચ્છિમા જનતા દિટ્ઠાનુગતિં આપજ્જતિ, ચિત્તમસ્સ નપ્પસીદતિ. ઇમે ખો, ભિક્ખવે, પઞ્ચ આદીનવા અપાસાદિકે.

‘‘પઞ્ચિમે, ભિક્ખવે, આનિસંસા પાસાદિકે. કતમે પઞ્ચ? અપ્પસન્ના પસીદન્તિ, પસન્નાનઞ્ચ ભિય્યોભાવો હોતિ, સત્થુસાસનં કતં હોતિ, પચ્છિમા જનતા દિટ્ઠાનુગતિં આપજ્જતિ, ચિત્તમસ્સ પસીદતિ. ઇમે ખો, ભિક્ખવે, પઞ્ચ આનિસંસા પાસાદિકે’’તિ. અટ્ઠમં.

૯. અગ્ગિસુત્તં

૨૧૯. ‘‘પઞ્ચિમે, ભિક્ખવે, આદીનવા અગ્ગિસ્મિં. કતમે પઞ્ચ? અચક્ખુસ્સો, દુબ્બણ્ણકરણો, દુબ્બલકરણો, સઙ્ગણિકાપવડ્ઢનો [સઙ્ગણિકાપવદ્ધનો (સી.), સઙ્ગણિકારામબદ્ધનો (ક.)], તિરચ્છાનકથાપવત્તનિકો હોતિ. ઇમે ખો, ભિક્ખવે, પઞ્ચ આદીનવા અગ્ગિસ્મિ’’ન્તિ. નવમં.

૧૦. મધુરાસુત્તં

૨૨૦. ‘‘પઞ્ચિમે, ભિક્ખવે, આદીનવા મધુરાયં. કતમે પઞ્ચ? વિસમા, બહુરજા, ચણ્ડસુનખા, વાળયક્ખા, દુલ્લભપિણ્ડા – ઇમે ખો, ભિક્ખવે, પઞ્ચ આદીનવા મધુરાય’’ન્તિ. દસમં.

અક્કોસકવગ્ગો દુતિયો.