૪. યસ્સંદિસંસુત્તં

૧૩૪. ‘‘પઞ્ચહિ, ભિક્ખવે, અઙ્ગેહિ સમન્નાગતો રાજા ખત્તિયો મુદ્ધાવસિત્તો યસ્સં યસ્સં દિસાયં વિહરતિ, સકસ્મિંયેવ વિજિતે વિહરતિ.

‘‘કતમેહિ પઞ્ચહિ? ઇધ, ભિક્ખવે, રાજા ખત્તિયો મુદ્ધાવસિત્તો ઉભતો સુજાતો હોતિ માતિતો ચ પિતિતો ચ, સંસુદ્ધગહણિકો, યાવ સત્તમા પિતામહયુગા અક્ખિત્તો અનુપક્કુટ્ઠો જાતિવાદેન; અડ્ઢો હોતિ મહદ્ધનો મહાભોગો પરિપુણ્ણકોસકોટ્ઠાગારો; બલવા ખો પન હોતિ ચતુરઙ્ગિનિયા સેનાય સમન્નાગતો અસ્સવાય ઓવાદપટિકરાય; પરિણાયકો ખો પનસ્સ હોતિ પણ્ડિતો વિયત્તો મેધાવી પટિબલો અતીતાનાગતપચ્ચુપ્પન્ને અત્થે ચિન્તેતું; તસ્સિમે ચત્તારો ધમ્મા યસં પરિપાચેન્તિ. સો ઇમિના યસપઞ્ચમેન [યસેન પઞ્ચમેન (ક.), પઞ્ચમેન (સી.)] ધમ્મેન સમન્નાગતો યસ્સં યસ્સં દિસાયં વિહરતિ, સકસ્મિંયેવ વિજિતે વિહરતિ. તં કિસ્સ હેતુ? એવઞ્હેતં, ભિક્ખવે, હોતિ વિજિતાવીનં.

‘‘એવમેવં ખો, ભિક્ખવે, પઞ્ચહિ ધમ્મેહિ સમન્નાગતો ભિક્ખુ યસ્સં યસ્સં દિસાયં વિહરતિ, વિમુત્તચિત્તોવ [વિમુત્તચિત્તો (સી. પી.), વિમુત્તચિત્તો ચ (ક.)] વિહરતિ. કતમેહિ પઞ્ચહિ? ઇધ, ભિક્ખવે, ભિક્ખુ સીલવા હોતિ, પાતિમોક્ખસંવરસંવુતો વિહરતિ આચારગોચરસમ્પન્નો અણુમત્તેસુ વજ્જેસુ ભયદસ્સાવી, સમાદાય સિક્ખતિ સિક્ખાપદેસુ – રાજાવ ખત્તિયો મુદ્ધાવસિત્તો જાતિસમ્પન્નો; બહુસ્સુતો હોતિ સુતધરો સુતસન્નિચયો, યે તે ધમ્મા આદિકલ્યાણા મજ્ઝેકલ્યાણા પરિયોસાનકલ્યાણા સાત્થં સબ્યઞ્જનં કેવલપરિપુણ્ણં પરિસુદ્ધં બ્રહ્મચરિયં અભિવદન્તિ, તથારૂપાસ્સ ધમ્મા બહુસ્સુતા હોન્તિ ધાતા વચસા પરિચિતા મનસાનુપેક્ખિતા દિટ્ઠિયા સુપ્પટિવિદ્ધા – રાજાવ ખત્તિયો મુદ્ધાવસિત્તો અડ્ઢો મહદ્ધનો મહાભોગો પરિપુણ્ણકોસકોટ્ઠાગારો; આરદ્ધવીરિયો વિહરતિ અકુસલાનં ધમ્માનં પહાનાય કુસલાનં ધમ્માનં ઉપસમ્પદાય થામવા દળ્હપરક્કમો અનિક્ખિત્તધુરો કુસલેસુ ધમ્મેસુ – રાજાવ ખત્તિયો મુદ્ધાવસિત્તો બલસમ્પન્નો; પઞ્ઞવા હોતિ ઉદયત્થગામિનિયા પઞ્ઞાય સમન્નાગતો અરિયાય નિબ્બેધિકાય સમ્મા દુક્ખક્ખયગામિનિયા – રાજાવ ખત્તિયો મુદ્ધાવસિત્તો પરિણાયકસમ્પન્નો; તસ્સિમે ચત્તારો ધમ્મા વિમુત્તિં પરિપાચેન્તિ. સો ઇમિના વિમુત્તિપઞ્ચમેન ધમ્મેન સમન્નાગતો યસ્સં યસ્સં દિસાયં વિહરતિ વિમુત્તચિત્તોવ વિહરતિ. તં કિસ્સ હેતુ? એવઞ્હેતં, ભિક્ખવે, હોતિ વિમુત્તચિત્તાન’’ન્તિ. ચતુત્થં.