૯. પઠમસિક્ખત્તયસુત્તં

૯૦. ‘‘તિસ્સો ઇમા, ભિક્ખવે, સિક્ખા. કતમા તિસ્સો? અધિસીલસિક્ખા, અધિચિત્તસિક્ખા, અધિપઞ્ઞાસિક્ખા.

‘‘કતમા ચ, ભિક્ખવે, અધિસીલસિક્ખા? ઇધ, ભિક્ખવે, ભિક્ખુ સીલવા હોતિ…પે… સમાદાય સિક્ખતિ સિક્ખાપદેસુ. અયં વુચ્ચતિ, ભિક્ખવે, અધિસીલસિક્ખા.

‘‘કતમા ચ, ભિક્ખવે, અધિચિત્તસિક્ખા? ઇધ, ભિક્ખવે, ભિક્ખુ વિવિચ્ચેવ કામેહિ…પે… ચતુત્થં ઝાનં ઉપસમ્પજ્જ વિહરતિ. અયં વુચ્ચતિ, ભિક્ખવે, અધિચિત્તસિક્ખા.

‘‘કતમા ચ, ભિક્ખવે, અધિપઞ્ઞાસિક્ખા? ઇધ, ભિક્ખવે, ભિક્ખુ ‘ઇદં દુક્ખ’ન્તિ યથાભૂતં પજાનાતિ…પે… ‘અયં દુક્ખનિરોધગામિની પટિપદા’તિ યથાભૂતં પજાનાતિ. અયં વુચ્ચતિ, ભિક્ખવે, અધિપઞ્ઞાસિક્ખા. ઇમા ખો, ભિક્ખવે, તિસ્સો સિક્ખા’’તિ. નવમં.