૫. નિવેસકસુત્તં

૭૬. અથ ખો આયસ્મા આનન્દો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નં ખો આયસ્મન્તં આનન્દં ભગવા એતદવોચ –

‘‘યે, આનન્દ, અનુકમ્પેય્યાથ યે ચ સોતબ્બં મઞ્ઞેય્યું મિત્તા વા અમચ્ચા વા ઞાતી વા સાલોહિતા વા તે વો, આનન્દ, તીસુ ઠાનેસુ સમાદપેતબ્બા [સમાદાપેતબ્બા (?)] નિવેસેતબ્બા પતિટ્ઠાપેતબ્બા. કતમેસુ તીસુ? બુદ્ધે અવેચ્ચપ્પસાદે સમાદપેતબ્બા નિવેસેતબ્બા પતિટ્ઠાપેતબ્બા – ‘ઇતિપિ સો ભગવા અરહં સમ્માસમ્બુદ્ધો વિજ્જાચરણસમ્પન્નો સુગતો લોકવિદૂ અનુત્તરો પુરિસદમ્મસારથિ; સત્થા દેવમનુસ્સાનં, બુદ્ધો ભગવા’તિ, ધમ્મે અવેચ્ચપ્પસાદે સમાદપેતબ્બા નિવેસેતબ્બા પતિટ્ઠાપેતબ્બા – ‘સ્વાક્ખાતો ભગવતા ધમ્મો સન્દિટ્ઠિકો અકાલિકો એહિપસ્સિકો ઓપનેય્યિકો પચ્ચત્તં વેદિતબ્બો વિઞ્ઞૂહી’તિ, સઙ્ઘે અવેચ્ચપ્પસાદે સમાદપેતબ્બા નિવેસેતબ્બા પતિટ્ઠાપેતબ્બા – ‘સુપ્પટિપન્નો ભગવતો સાવકસઙ્ઘો ઉજુપ્પટિપન્નો ભગવતો સાવકસઙ્ઘો ઞાયપ્પટિપન્નો ભગવતો સાવકસઙ્ઘો સામીચિપ્પટિપન્નો ભગવતો સાવકસઙ્ઘો, યદિદં ચત્તારિ પુરિસયુગાનિ અટ્ઠ પુરિસપુગ્ગલા એસ ભગવતો સાવકસઙ્ઘો આહુનેય્યો પાહુનેય્યો દક્ખિણેય્યો અઞ્જલિકરણીયો અનુત્તરં પુઞ્ઞક્ખેત્તં લોકસ્સા’’’તિ.

‘‘સિયા, આનન્દ, ચતુન્નં મહાભૂતાનં અઞ્ઞથત્તં – પથવીધાતુયા આપોધાતુયા તેજોધાતુયા વાયોધાતુયા, ન ત્વેવ બુદ્ધે અવેચ્ચપ્પસાદેન સમન્નાગતસ્સ અરિયસાવકસ્સ સિયા અઞ્ઞથત્તં તત્રિદં અઞ્ઞથત્તં. સો વતાનન્દ, બુદ્ધે અવેચ્ચપ્પસાદેન સમન્નાગતો અરિયસાવકો નિરયં વા તિરચ્છાનયોનિં વા પેત્તિવિસયં વા ઉપપજ્જિસ્સતીતિ નેતં ઠાનં વિજ્જતિ.

‘‘સિયા, આનન્દ, ચતુન્નં મહાભૂતાનં અઞ્ઞથત્તં – પથવીધાતુયા આપોધાતુયા તેજોધાતુયા વાયોધાતુયા, ન ત્વેવ ધમ્મે…પે… ન ત્વેવ સઙ્ઘે અવેચ્ચપ્પસાદેન સમન્નાગતસ્સ અરિયસાવકસ્સ સિયા અઞ્ઞથત્તં તત્રિદં અઞ્ઞથત્તં. સો વતાનન્દ, સઙ્ઘે અવેચ્ચપ્પસાદેન સમન્નાગતો અરિયસાવકો નિરયં વા તિરચ્છાનયોનિં વા પેત્તિવિસયં વા ઉપપજ્જિસ્સતીતિ નેતં ઠાનં વિજ્જતિ.

‘‘યે, આનન્દ, અનુકમ્પેય્યાથ યે ચ સોતબ્બં મઞ્ઞેય્યું મિત્તા વા અમચ્ચા વા ઞાતી વા સાલોહિતા વા તે વો, આનન્દ, ઇમેસુ તીસુ ઠાનેસુ સમાદપેતબ્બા નિવેસેતબ્બા પતિટ્ઠાપેતબ્બા’’તિ. પઞ્ચમં.